໖. ອາຂ຺ຍາຕກປ຺ປ

ປຐມກຓ຺ຑ

(ກ)

ອາຂ຺ຍາຕສາຄຣມຖຊ຺ຊຕນີຕຣງ຺ຄໍ,

ຘາຕຸຊ຺ຊລໍ ວິກຣຓາຄມກາລມີນໍ;

ໂລປານຸພນ຺ຘຣິຍມຕ຺ຖວິຠາຄຕີຣໍ,

ຘີຣາ ຕຣນ຺ຕິ ກວິໂນ ປຸຖຸພຸທ຺ຘິນາວາ.

(ຂ)

ວິຈິຕ຺ຕສງ຺ຂາຣປຣິກ຺ຂິຕໍ ອິມໍ,

ອາຂ຺ຍາຕສທ຺ທໍ ວິປຸລໍ ອເສສໂຕ;

ປຓມ຺ຍ ສມ຺ພຸທ຺ຘມນນ຺ຕໂຄຈຣໍ,

ສຸໂຄຈຣໍ ຍໍ ວທໂຕ ສຸຓາຖ ເມ.

(ຄ)

ອຘິກາເຣ ມງ຺ຄເລ ເຈວ, ນິປ຺ຜນ຺ເນ ຈາວຘາຣເຓ;

ອນນ຺ຕເຣ ຈ ປາທາເນ, ອຖສທ຺ໂທ ປວຕ຺ຕຕິ.

໔໑໖. , ໔໒໙. ອຖ ປຸພ຺ພານິ ວິຠຕ຺ຕີນໍ ຉ ປຣສ຺ສປທານິ.

ອຖ ສພ຺ພາສໍ ວິຠຕ຺ຕີນໍ ຍານິ ຍານິ ປຸພ຺ພການິ ຉ ປທານິ, ຕານິ ຕານິ ປຣສ຺ສປທສຎ຺ຎານິ ໂຫນ຺ຕິ.

ຕໍ ຍຖາ? ຕິ ອນ຺ຕິ, ສິ ຖ, ມິ ມ.

ປຣສ຺ສປທມິຈ຺ຈເນນ ກ຺ວຕ຺ໂຖ? ກຕ຺ຕຣິ ປຣສ຺ສປທໍ.

໔໐໗. , ໔໓໙. ປຣາຓ຺ຍຕ຺ຕໂນປທານິ.

ສພ຺ພາສໍ ວິຠຕ຺ຕີນໍ ຍານິ ຍານິ ປຣານິ ຉ ປທານິ. ຕານິ ຕານິ ອຕ຺ຕໂນປທສຎ຺ຎານິ ໂຫນ຺ຕິ.

ຕໍ ຍຖາ? ເຕ ອນ຺ເຕ, ເສ ວ຺ເຫ, ເອ ມ຺ເຫ.

ອຕ຺ຕໂນປທມິຈ຺ຈເນນ ກ຺ວຕ຺ໂຖ? ອຕ຺ຕໂນປທານິ ຠາເວ ຈ ກມ຺ມນິ.

໔໐໘. , ໔໓໑. ທ຺ເວ ທ຺ເວ ປຐມ ມຊ຺ຌິມຸຕ຺ຕມປຸຣິສາ.

ຕາສໍ ສພ຺ພາສໍ ວິຠຕ຺ຕີນໍ ປຣສ຺ສປທານໍ, ອຕ຺ຕໂນປທານຎ຺ຈ ທ຺ເວ ທ຺ເວ ປທານິ ປຐມມຊ຺ຌິມຸຕ຺ຕມປຸຣິສສຎ຺ຎານິ ໂຫນ຺ຕິ.

ຕໍ ຍຖາ? ຕິ ອນ຺ຕິ ອິຕິ ປຐມປຸຣິສາ, ສິ ຖ ອິຕິ ມຊ຺ຌິມປຸຣິສາ, ມິ ມ ອິຕິ ອຸຕ຺ຕມປຸຣິສາ. ອຕ຺ຕໂນປທານມ຺ປິ ເຕ ອນ຺ເຕ ອິຕິ ປຐມປຸຣິສາ, ເສ ວ຺ເຫ ອິຕິ ມຊ຺ຌິມປຸຣິສາ, ເອ ມ຺ເຫ ອິຕິ ອຸຕ຺ຕມປຸຣິສາ. ເອວໍ ສພ຺ພຕ຺ຖ.

ປຐມມຊ຺ຌິມຸຕ຺ຕມປຸຣິສມິຈ຺ຈເນນ ກ຺ວຕ຺ໂຖ? ນາມມ຺ຫິ ປຍຸຊ຺ຊມາເນປິ ຕຸລ຺ຍາຘິກຣເຓ ປຐໂມ, ຕຸມ຺ເຫ ມຊ຺ຌິໂມ, ອມ຺ເຫ ອຸຕ຺ຕໂມ.

໔໐໙. , ໔໔໑. ສພ຺ເພສເມກາຠິຘາເນ ປໂຣ ປຸຣິໂສ.

ສພ຺ເພສໍ ຕິຓ຺ຓໍ ປຐມມຊ຺ຌິມຸຕ຺ຕມ ປຸຣິສານໍ ເອກາຠິຘາເນ ປໂຣ ປຸຣິໂສ ຄເຫຕພ຺ໂພ.

ໂສ ຈ ປຐຕິ, ຕ຺ວຎ຺ຈ ປຐສິ, ຕຸມ຺ເຫ ປຐຖ. ໂສ ຈ ປຈຕິ, ຕ຺ວຎ຺ຈ ປຈສິ. ຕຸມ຺ເຫ ປຈຖ. ເອວໍ ເສສາສຸ ວິຠຕ຺ຕີສຸ ປໂຣ ປຸຣິໂສ ໂຍເຊຕພ຺ໂພ.

໔໑໐. , ໔໓໒. ນາມມ຺ຫິ ປຍຸຊ຺ຊມາເນປິ ຕຸລ຺ຍາຘິກຣເຓ ປຐໂມ.

ນາມມ຺ຫິ ປຍຸຊ຺ຊມາເນປິ ອປ຺ປຍຸຊ຺ຊມາເນປິ ຕຸລ຺ຍາຘິກຣເຓ ປຐມປຸຣິໂສ ໂຫຕິ.

ໂສ ຄຈ຺ຉຕິ, ເຕ ຄຈ຺ຉນ຺ຕິ.

ອປ຺ປຍຸຊ຺ຊມາເນປິ – ຄຈ຺ຉຕິ, ຄຈ຺ຉນ຺ຕິ.

ຕຸລ຺ຍາຘິກຣເຓຕິ ກິມຕ຺ຖໍ? ເຕນ ຫຎ຺ຎເສ ຕ຺ວໍ ເທວທຕ຺ເຕນ.

໔໑໑. , ໔໓໖. ຕຸມ຺ເຫ ມຊ຺ຌິໂມ.

ຕຸມ຺ເຫ ປຍຸຊ຺ຊມາເນປິ ອປ຺ປຍຸຊ຺ຊມາເນປິ ຕຸລ຺ຍາຘິກຣເຓ ມຊ຺ຌິມປຸຣິໂສ ໂຫຕິ.

ຕ຺ວໍ ຍາສິ, ຕຸມ຺ເຫ ຍາຖ.

ອປ຺ປຍຸຊ຺ຊມາເນປິ – ຍາສິ, ຍາຖ.

ຕຸລ຺ຍາຘິກຣເຓຕິ ກິມຕ຺ຖໍ? ຕຍາ ປຈ຺ຈເຕ ໂອທໂນ.

໔໑໒. , ໔໓໗. ອມ຺ເຫ ອຸຕ຺ຕໂມ.

ອມ຺ເຫ ປຍຸຊ຺ຊມາເນປິ ອປ຺ປຍຸຊ຺ຊມາເນປິ ຕຸລ຺ຍາຘິກຣເຓ ອຸຕ຺ຕມປຸຣິໂສ ໂຫຕິ.

ອຫໍ ຍຊາມິ, ມຍໍ ຍຊາມ.

ອປ຺ປຍຸຊ຺ຊມາເນປິ – ຍຊາມິ, ຍຊາມ.

ຕຸລ຺ຍາຘິກຣເຓຕິ ກິມຕ຺ຖໍ? ມຍາ ອິຊ຺ຊເຕ ພຸທ຺ໂຘ.

໔໑໓. , ໔໒໗. ກາເລ.

‘‘ກາເລ’’ ອິຈ຺ເຈຕໍ ອຘິກາຣຕ຺ຖໍ ເວທິຕພ຺ພໍ.

໔໑໔. , ໔໒໘. ວຕ຺ຕມານາ ປຈ຺ຈຸປ຺ປນ຺ເນ.

ປຈ຺ຈຸປ຺ປນ຺ເນ ກາເລ ວຕ຺ຕມານາວິຠຕ຺ຕິ ໂຫຕິ.

ປາຏລິປຸຕ຺ຕໍ ຄຈ຺ຉຕິ, ສາວຕ຺ຖິໍ ປວິສຕິ.

໔໑໕. , ໔໕໑. ອາຓຕ຺ຍາ ສິຏ຺ເຐ’ນຸຕ຺ຕກາເລ ປຎ຺ຈມີ.

ອາຓຕ຺ຍຕ຺ເຖ ຈ ອາສີສຕ຺ເຖ ຈ ອນຸຕ຺ຕກາເລ ປຎ຺ຈມີ ວິຠຕ຺ຕິ ໂຫຕິ.

ກໂຣຕຸ ກຸສລໍ, ສຸຂໍ ເຕ ໂຫຕຸ.

໔໑໖. , ໔໕໔. ອນຸມຕິປຣິກປ຺ປຕ຺ເຖສຸ ສຕ຺ຕມີ.

ອນຸມຕ຺ຍຕ຺ເຖ ຈ ປຣິກປ຺ປຕ຺ເຖ ຈ ອນຸຕ຺ຕກາເລ ສຕ຺ຕມີ ວິຠຕ຺ຕິ ໂຫຕິ.

ຕ຺ວໍ ຄຈ຺ເຉຍ຺ຍາສິ, ກິມຫໍ ກເຣຍ຺ຍາມິ.

໔໑໗. , ໔໖໐. ອປຈ຺ຈກ຺ເຂ ປໂຣກ຺ຂາຕີເຕ.

ອປຈ຺ຈກ຺ເຂ ອຕີເຕ ກາເລ ປໂຣກ຺ຂາວິຠຕ຺ຕິ ໂຫຕິ.

ສຸປິເນ ກິລມາຫ, ເອວໍ ກິລ ໂປຣາຓາຫຸ.

໔໑໘. , ໔໕໖. ຫິຍ຺ໂຍປຠຸຕິ ປຈ຺ຈກ຺ເຂ ຫິຍ຺ຍຕ຺ຕນີ.

ຫິຍ຺ໂຍປຠຸຕິ ອຕີເຕ ກາເລ ປຈ຺ຈກ຺ເຂ ວາ ອປຈ຺ຈກ຺ເຂ ວາ ຫິຍ຺ຍຕ຺ຕນີ ວິຠຕ຺ຕິ ໂຫຕິ.

ໂສ ອຄມາ ມຄ຺ຄໍ, ເຕ ອຄມູ ມຄ຺ຄໍ.

໔໑໙. , ໔໖໙. ສມີເປ’ຊ຺ຊຕນີ.

ອຊ຺ຊປ຺ປຠຸຕິ ອຕີເຕ ກາເລ ປຈ຺ຈກ຺ເຂ ວາ ອປຈ຺ຈກ຺ເຂ ວາ ສມີເປ ອຊ຺ຊຕນີວິຠຕ຺ຕິ ໂຫຕິ.

ໂສ ມຄ຺ຄໍ ອຄມີ, ເຕ ມຄ຺ຄໍ ອຄມຸໍ.

໔໒໐. , ໔໗໑. ມາໂຍເຄ ສພ຺ພກາເລ ຈ.

ຫິຍ຺ຍຕ຺ຕນີອຊ຺ຊຕນີອິຈ຺ເຈຕາ ວິຠຕ຺ຕິໂຍ ຍທາ ມາໂຍຄາ, ຕທາ ສພ຺ພກາເລ ຈ ໂຫນ຺ຕິ.

ມາ ຄມາ, ມາ ວຈາ, ມາ ຄມີ, ມາ ວຈີ.

ຈຄ຺ຄຫເຓນ ປຎ຺ຈມີວິຠຕ຺ຕິປິ ໂຫຕິ. ມາ ຄຈ຺ຉາຫິ.

໔໒໑. , ໔໗໓. ອນາຄເຕ ຠວິສ຺ສນ຺ຕີ.

ອນາຄເຕ ກາເລ ຠວິສ຺ສນ຺ຕີ ວິຠຕ຺ຕິ ໂຫຕິ.

ໂສ ຄຈ຺ຉິສ຺ສຕິ, ກຣິສ຺ສຕິ. ເຕ ຄຈ຺ຉິສ຺ສນ຺ຕິ, ກຣິສ຺ສນ຺ຕິ.

໔໒໒. , ໔໗໕. ກ຺ຣິຍາຕິປນ຺ເນ’ຕີເຕ ກາລາຕິປຕ຺ຕິ.

ກ຺ຣິຍາຕິປນ຺ນມຕ຺ເຕ ອຕີເຕ ກາເລ ກາລາຕິປຕ຺ຕິ ວິຠຕ຺ຕິ ໂຫຕິ.

ໂສ ເຈ ຕໍ ຍານໍ ອລຠິສ຺ສາ, ອຄຈ຺ຉິສ຺ສາ. ເຕ ເຈ ຕໍ ຍານໍ ອລຠິສ຺ສໍສຸ, ອຄຈ຺ຉິສ຺ສໍສຸ.

໔໒໓. , ໔໒໖. ວຕ຺ຕມານາ ຕິ ອນ຺ຕິ, ສິ ຖ, ມິ ມ, ເຕ ອນ຺ເຕ, ເສ ວ຺ເຫ, ເອ ມ຺ເຫ.

ວຕ຺ຕມານາ ອິຈ຺ເຈສາ ສຎ຺ຎາ ໂຫຕິ ຕິ ອນ຺ຕິ, ສິ ຖ, ມິ ມ, ເຕ ອນ຺ເຕ, ເສ ວ຺ເຫ, ເອ ມ຺ເຫ ອິຈ຺ເຈເຕສໍ ທ຺ວາທສນ຺ນໍ ປທານໍ.

ວຕ຺ຕມານາ ອິຈ຺ຈເນນ ກ຺ວຕ຺ໂຖ? ວຕ຺ຕມານາ ປຈ຺ຈຸປ຺ປນ຺ເນ.

໔໒໔. , ໔໕໐. ປຎ຺ຈມີ ຕຸ ອນ຺ຕຸ, ຫິຖ, ມິມ, ຕໍ ອນ຺ຕໍ, ສ຺ສຸ ວ຺ໂຫ, ເອ ອາມເສ.

ປຎ຺ຈມີອິຈ຺ເຈສາ ສຎ຺ຎາ ໂຫຕິ ຕຸ ອນ຺ຕຸ, ຫິ ຖ, ມິມ, ຕໍ ອນ຺ຕໍ, ສ຺ສຸ ວ຺ໂຫ, ເອ ອາມເສ ອິຈ຺ເຈເຕສໍ ທ຺ວາທສນ຺ນໍ ປທານໍ.

ປຎ຺ຈມີອິຈ຺ຈເນນ ກ຺ວຕ຺ໂຖ? ອາຓຕ຺ຍາສິຏ຺ເຐ, ນຸຕ຺ຕກາເລ ປຎ຺ຈມີ.

໔໒໕. , ໔໕໓. ສຕ຺ຕມີ ເອຍ຺ຍ ເອຍ຺ຍຸໍ, ເອຍ຺ຍາ ສິ ເອຍ຺ຍາ ຖ, ເອຍ຺ຍາມິ ເອຍ຺ຍາມ, ເອຖ ເອຣໍ, ເອໂຖ ເອຍ຺ຍາວ຺ໂຫ, ເອຍ຺ຍໍ ເອຍ຺ຍາມ຺ເຫ.

ສຕ຺ຕມີ ອິຈ຺ເຈສາ ສຎ຺ຎາ ໂຫຕິ ເອຍ຺ຍ ເອຍ຺ຍຸໍ, ເອຍ຺ຍາສິ ເອຍ຺ຍາຖ, ເອຍ຺ຍາມິ ເອຍ຺ຍາມ, ເອຖ ເອຣໍ, ເອໂຖ, ເອຍ຺ຍາວ຺ໂຫ, ເອຍ຺ຍໍ ເອຍ຺ຍາມ຺ເຫ ອິຈ຺ເຈເຕສໍ ທ຺ວາທສນ຺ນໍ ປທານໍ.

ສຕ຺ຕມີ ອິຈ຺ຈເນນ ກ຺ວຕ຺ໂຖ? ອນຸມຕິປຣິກປ຺ປຕ຺ເຖສຸ ສຕ຺ຕມີ.

໔໒໖. , ໔໕໙. ປໂຣກ຺ຂາ ອອຸ ເອຕ຺ຖ, ອໍມ຺ຫ, ຕ຺ຖເຣ, ຕ຺ໂຖ ວ຺ໂຫ, ອິໍ ມ຺ເຫ.

ປໂຣກ຺ຂາ ອິຈ຺ເຈສາ ສຎ຺ຎາ ໂຫຕິ ອ ອຸ, ເອຕ຺ຖ, ອໍ ມ຺ຫ, ຕ຺ຖ ເຣ ຕ຺ໂຖ ວ຺ໂຫ, ອິໍ ມ຺ເຫ ອິຈ຺ເຈເຕສໍ ທ຺ວາທສນ຺ນໍ ປທານໍ.

ປໂຣກ຺ຂາ ອິຈ຺ຈເນນ ກ຺ວຕ຺ໂຖ? ອປຈ຺ຈກ຺ເຂ ປໂຣກ຺ຂາຕີເຕ.

໔໒໗. , ໔໕໕. ຫິຍ຺ຍຕ຺ຕນີ ອາອູ, ໂອຕ຺ຖ, ອໍມ຺ຫາ, ຕ຺ຖຕ຺ຖຸໍ, ເສ ວ຺ຫໍ, ອິໍ ມ຺ຫເສ.

ຫິຍ຺ຍຕ຺ຕນີ ອິຈ຺ເຈສາ ສຎ຺ຎາ ໂຫຕິ ອາ ອູ, ໂອ ຕ຺ຖ, ອໍ ມ຺ຫາ, ຕ຺ຖ ຕ຺ຖຸໍ, ເສ ວ຺ຫໍ, ອິໍ ມ຺ຫເສ ອິຈ຺ເຈເຕສໍ ທ຺ວາທສນ຺ນໍ ປທານໍ.

ຫິຍ຺ຍຕ຺ຕນີ ອິຈ຺ຈເນນ ກ຺ວຕ຺ໂຖ? ຫິຍ຺ໂຍປຠຸຕິ ປຈ຺ຈກ຺ເຂ ຫິຍ຺ຍຕ຺ຕນີ.

໔໒໘. , ໔໖໘. ອຊ຺ຊຕນີ ອີ ອຸໍ, ໂອ ຕ຺ຖ, ອິໍ ມ຺ຫາ, ອາ ອູ, ເສ ວ຺ຫໍ, ອໍ ມ຺ເຫ.

ອຊ຺ຊຕນີ ອິຈ຺ເຈສາ ສຎ຺ຎາ ໂຫຕິ ອີ ອຸໍ, ໂອ ຕ຺ຖ, ອິໍມ຺ຫາ, ອາ ອູ, ເສວ຺ຫໍ, ອໍ ມ຺ເຫ ອິຈ຺ເຈເຕສໍ ທ຺ວາທສນ຺ນໍ ປທານໍ.

ອຊ຺ຊຕນີ ອິຈ຺ຈເນນ ກ຺ວຕ຺ໂຖ? ສມີເປຊ຺ຊຕນີ.

໔໒໙. , ໔໗໒. ຠວິສ຺ສນ຺ຕີ ສ຺ສຕິ ສ຺ສນ຺ຕິ, ສ຺ສສິ ສ຺ສຖ, ສ຺ສາມິ ສ຺ສາມ, ສ຺ສເຕ ສ຺ສນ຺ເຕ, ສ຺ສເສ ສ຺ສວ຺ເຫ, ສ຺ສໍ ສ຺ສາມ຺ເຫ.

ຠວິສ຺ສນ຺ຕີ ອິຈ຺ເຈສາ ສຎ຺ຎາ ໂຫຕິ ສ຺ສຕິ ສ຺ສນ຺ຕິ, ສ຺ສສິ ສ຺ສຖ, ສ຺ສາມິ ສ຺ສາມ, ສ຺ສເຕ ສ຺ສນ຺ເຕ, ສ຺ສເສ ສ຺ສວ຺ເຫ, ສ຺ສໍ ສ຺ສາມ຺ເຫ ອິຈ຺ເຈເຕສໍ ທ຺ວາທສນ຺ນໍ ປທານໍ.

ຠວິສ຺ສນ຺ຕີ ອິຈ຺ຈເນນ ກ຺ວຕ຺ໂຖ? ອນາຄເຕ ຠວິສ຺ສນ຺ຕີ.

໔໓໐. , ໓໗໓. ກາລາຕິປຕ຺ຕິ ສ຺ສາ ສ຺ສໍສຸ, ສ຺ເສ ສ຺ສຖ, ສ຺ສໍ ສ຺ສາມ຺ຫາ, ສ຺ສຖ ສິສ຺ສຸ, ສ຺ສເສ ສ຺ສວ຺ເຫ, ສ຺ສິໍ ສ຺ສາມ຺ຫເສ.

ກາລາຕິປຕ຺ຕິ ອິຈ຺ເຈສາ ສຎ຺ຎາ ໂຫຕິ ສ຺ສາ ສ຺ສໍສຸ, ສ຺ເສ ສ຺ສຖ, ສ຺ສໍ ສ຺ສາມ຺ຫາ, ສ຺ສຖ ສ຺ສິສຸ, ສ຺ສເສ ສ຺ສວ຺ເຫ, ສ຺ສິໍ ສ຺ສາມ຺ຫເສ ອິຈ຺ເຈເຕສໍ ທ຺ວາທສນ຺ນໍ ປທານໍ.

ກາລາຕິປຕ຺ຕິ ອິຈ຺ຈເນນ ກ຺ວຕ຺ໂຖ? ກ຺ຣິຍາຕິປນ຺ເນ’ ຕີເຕ ກາລາຕິປຕ຺ຕິ.

໔໓໑. , ໔໕໘. ຫິຍ຺ຍຕ຺ຕນີ ສຕ຺ຕມີ ປຎ຺ຈມີ ວຕ຺ຕມານາ ສພ຺ພຘາຕຸກໍ.

ຫິຍ຺ຍຕ຺ຕນາທໂຍ ຈຕສ຺ໂສ ວິຠຕ຺ຕິໂຍ ສພ຺ພຘາຕຸກ ສຎ຺ຎາ ໂຫນ຺ຕິ.

ອຄມາ, ຄຈ຺ເຉຍ຺ຍ, ຄຈ຺ຉຕຸ, ຄຈ຺ຉຕິ.

ສພ຺ພຘາຕຸກ ອິຈ຺ຈເນນ ກ຺ວຕ຺ໂຖ? ອິກາຣາຄໂມ ອສພ຺ພຘາຕຸກມ຺ຫິ.

ອິຕິ ອາຂ຺ຍາຕກປ຺ເປ ປຐໂມ ກຓ຺ໂຑ.

ທຸຕິຍກຓ຺ຑ

໔໓໒. , ໓໖໒. ຘາຕຸລິງ຺ເຄຫິ ປຣາ ປຈ຺ຈຍາ.

ຘາຕຸລິງ຺ຄອິຈ຺ເຈເຕຫິ ປຣາ ປຈ຺ຈຍາ ໂຫນ຺ຕິ.

ກໂຣຕິ, ຄຈ຺ຉຕິ. ໂຍ ໂກຈິ ກໂຣຕິ, ຕໍ ອຎ຺ໂຎ ‘‘ກໂຣຫິ ກໂຣຫິ’’ ອິຈ຺ເຈວໍ ພ຺ຣວີຕິ, ອຖ ວາ ກໂຣນ຺ຕໍ ປໂຍຊຍຕິ = ກາເຣຕິ. ສງ຺ໂຆ ປພ຺ພຕມິວ ອຕ຺ຕານມາຈຣຕິ = ປພ຺ພຕາຍຕິ. ຕຬາກໍ ສມຸທ຺ທມິວ ອຕ຺ຕານມາຈຣຕິ = ສມຸທ຺ທາຍຕິ, ສທ຺ໂທ ຈິຈ຺ຈິຏມິວ ອຕ຺ຕານມາຈຣຕິ = ຈິຈ຺ຈິຏາຍຕິ, ວສິຏ຺ຐສ຺ສ ອປຈ຺ຈໍ ວາສິຏ຺ໂຐ. ເອວມຎ຺ເຎປິ ໂຍເຊຕພ຺ພາ.

໔໓໓. , ໕໒໘. ຕິຊ ຄຸປ ກິຕ ມາເນ ຫິ ຂ ຉ ສາ ວາ.

ຕິຊ ຄຸປ ກິຕ ມານຸ ອິຈ຺ເຈເຕຫິ ຘາຕູຫິ ຂ ຉ ສ ອິຈ຺ເຈເຕ ປຈ຺ຈຍາ ໂຫນ຺ຕິ ວາ.

ຕິຕິກ຺ຂຕິ, ຊິຄຸຈ຺ຉຕິ, ຕິກິຈ຺ຉຕິ, ວີມໍສຕິ.

ວາຕິ ກິມຕ຺ຖໍ? ເຕຊຕິ, ໂຄປຕິ, ມາເນຕິ.

໔໓໔. , ໕໓໔. ຠຸຊ ຆສ ຫຣ ສຸ ປາທີຫິ ຕຸມິຈ຺ຉຕ຺ເຖສຸ.

ຠຸຊ ຆສ ຫຣ ສຸ ປາອິຈ຺ເຈວມາທີຫິ ຘາຕູຫິ ຕຸມິຈ຺ຉຕ຺ເຖສຸ ຂ ຉ ສອິຈ຺ເຈເຕ ປຈ຺ຈຍາ ໂຫນ຺ຕິ ວາ.

ໂຠຕ຺ຕຸມິຈ຺ຉຕິ=ພຸຠຸກ຺ຂຕິ, ຆສິຕຸມິຈ຺ຉຕິ=ຊິຆຈ຺ຉຕິ, ຫຣິຕຸມິຈ຺ຉຕິ=ຊິຄີສຕິ, ໂສຕຸມິຈ຺ຉຕິ=ສຸສ຺ສຸສຕິ, ປາຕຸມິຈ຺ຉຕິ=ປິວາສຕິ.

ວາຕິ ກິມຕ຺ຖໍ? ໂຠຕ຺ຕຸມິຈ຺ຉຕິ.

ຕຸມິຈ຺ຉຕ຺ເຖສູຕິ ກິມຕ຺ຖໍ? ຠຸຎ຺ຊຕິ.

໔໓໕. , ໕໓໖. ອາຍ ນາມໂຕ ກຕ຺ຕູປມານາທາຈາເຣ.

ນາມໂຕ ກຕ຺ຕູປມານາ ອາຈາຣຕ຺ເຖ ອາຍປຈ຺ຈໂຍ ໂຫຕິ.

ສງ຺ໂຆ ປພ຺ພຕມິວ ອຕ຺ຕານມາຈຣຕິ = ປພ຺ພຕາຍຕິ, ຕຬາກໍ ສມຸທ຺ທມິວ ອຕ຺ຕານມາຈຣຕິ = ສມຸທ຺ທາຍຕິ, ສທ຺ໂທ ຈິຈ຺ຈິຏມິວ ອຕ຺ຕານມາຈຣຕິ = ຈິຈ຺ຈິຏາຍຕິ. ເອວມຎ຺ເຎປິ ໂຍເຊຕພ຺ພາ.

໔໓໖. , ໕໓໗. ອີຍູປມານາ ຈ.

ນາມໂຕ ອຸປມານາ ອາຈາຣຕ຺ເຖ ຈ ອີຍປຈ຺ຈໂຍ ໂຫຕິ.

ອຉຕ຺ຕໍ ຉຕ຺ຕມິວ ອາຈຣຕິ =ຉຕ຺ຕີຍຕິ, ອປຸຕ຺ຕໍ ປຸຕ຺ຕມິວ ອາຈຣຕິ=ປຸຕ຺ຕີຍຕິ.

ອຸປມານາຕິ ກິມຕ຺ຖໍ? ຘມ຺ມໍ ອາຈຣຕິ.

ອາຈາເຣຕິ ກິມຕ຺ຖໍ? ອຉຕ຺ຕໍ ຉຕ຺ຕມິວ ຣກ຺ຂຕິ. ເອວມຎ຺ເຎປິ ໂຍເຊຕພ຺ພາ.

໔໓໗. , ໕໓໘. ນາມມ຺ຫາ’ຕ຺ຕິຈ຺ຉຕ຺ເຖ.

ນາມມ຺ຫາ ອຕ຺ຕໂນ ອິຈ຺ຉຕ຺ເຖ ອີຍປຈ຺ຈໂຍ ໂຫຕິ.

ອຕ຺ຕໂນ ປຕ຺ຕມິຈ຺ຉຕິ = ປຕ຺ຕີຍຕິ. ເອວໍ ວຕ຺ຖີຍຕິ, ປຣິກ຺ຂາຣີຍຕິ, ຈີວຣີຍຕິ, ຘນີຍຕິ, ຆຏີຍຕິ.

ອຕ຺ຕິຈ຺ຉຕ຺ເຖຕິ ກິມຕ຺ຖໍ? ອຎ຺ຎສ຺ສ ປຕ຺ຕມິຈ຺ຉຕິ. ເອວມຎ຺ເຎປິ ໂຍເຊຕພ຺ພາ.

໔໓໘. , ໕໔໐. ຘາຕູຫິ ເຓ ຓຍ ຓາເປ ຓາປຍາ ກາຣິຕານິ ເຫຕ຺ວຕ຺ເຖ.

ສພ຺ເພຫິ ຘາຕູຫິ ເຓຓຍ ຓາເປ ຓາປຍອິຈ຺ເຈເຕ ປຈ຺ຈຍາ ໂຫນ຺ຕິ ກາຣິຕສຎ຺ຎາ ຈ ເຫຕ຺ວຕ຺ເຖ.

ໂຍ ໂກຈິ ກໂຣຕິ, ຕໍ ອຎ຺ໂຎ ‘‘ກໂຣຫິ ກໂຣຫິ’’ ອິຈ຺ເຈວໍ ພ຺ຣວີຕິ, ອຖ ວາ ກໂຣນ຺ຕໍ ປໂຍຊຍຕິ = ກາເຣຕິ, ກາຣຍຕິ, ກາຣາເປຕິ, ກາຣາ ປຍຕິ. ເຍ ເກຈິ ກໂຣນ຺ຕິ, ເຕ ອຎ຺ເຎ ‘‘ກໂຣຖ ກໂຣຖ’’ ອິຈ຺ເຈວໍ ພ຺ຣຸວນ຺ຕິ = ກາເຣນ຺ຕິ, ກາຣຍນ຺ຕິ, ກາຣາເປນ຺ຕິ, ກາຣາປຍນ຺ຕິ. ໂຍ ໂກຈິ ປຈຕິ, ຕໍ ອຎ຺ໂຎ ‘‘ປຈາຫິ ປຈາຫິ’’ອິຈ຺ເຈວໍ ພ຺ຣວີຕິ, ອຖ ວາ ປຈນ຺ຕໍ ປໂຍຊຍຕິ = ປາເຈຕິ, ປາຈຍຕິ, ປາຈາເປຕິ, ປາຈາປຍຕິ. ເຍ ເກຈິ ປຈນ຺ຕິ, ເຕ ອຎ຺ເຎ ‘‘ປຈຖ ປຈຖ’’ ອິຈ຺ເຈວໍ ພ຺ຣຸວນ຺ຕິ = ປາເຈນ຺ຕິ, ປາຈຍນ຺ຕິ, ປາຈາເປນ຺ຕິ. ປາຈາປຍນ຺ຕິ. ເອວໍ ຠເຓຕິ, ຠຓຍຕິ, ຠຓາເປຕິ, ຠຓາປຍຕິ. ຠເຓນ຺ຕິ, ຠຓຍນ຺ຕິ, ຠຓາເປນ຺ຕິ, ຠຓາປຍນ຺ຕິ. ຕຖຣິວ ອຎ຺ເຎປິ ໂຍເຊຕພ຺ພາ.

ເຫຕ຺ວຕ຺ເຖຕິ ກິມຕ຺ຖໍ? ກໂຣຕິ, ປຈຕິ.

ອຕ຺ຖຄ຺ຄຫເຓນ ອລປຈ຺ຈໂຍ ໂຫຕິ, ໂຊຕລຕິ.

໔໓໙. , ໕໓໙. ຘາຕຸຣູເປ ນາມສ຺ມາ ຓໂຍ ຈ.

ຕສ຺ມາ ນາມສ຺ມາ ຓຍປຈ຺ຈໂຍ ໂຫຕິ ກາຣິຕສຎ຺ໂຎ ຈ ຘາຕຸຣູເປ ສຕິ.

ຫຕ຺ຖິນາ ອຕິກ຺ກມຕິ ມຄ຺ຄໍ = ອຕິຫຕ຺ຖຍຕິ, ວີຓາຍ ອຸປຄາຍຕິ ຄີຕໍ = ອຸປວີຓຍຕິ, ທຬ຺ຫໍ ກໂຣຕິ ວີຣິຍໍ = ທຬ຺ຫຍຕິ, ວິສຸທ຺ຘາ ໂຫຕິ ຣຕ຺ຕິ = ວິສຸທ຺ຘຍຕິ.

ຈຄ຺ຄຫເຓນ ອາຣ ອາລອິຈ຺ເຈເຕ ປຈ຺ຈຍາ ໂຫນ຺ຕິ. ສນ຺ຕໍ ກໂຣຕິ = ສນ຺ຕາຣຕິ, ອຸປກ຺ກມໍ ກໂຣຕິ = ອຸປກ຺ກມາລຕິ.

໔໔໐. , ໔໔໕. ຠາວກມ຺ເມສຸ ໂຍ.

ສພ຺ເພຫິ ຘາຕູຫິ ຠາວກມ຺ເມສຸ ຍປຈ຺ຈໂຍ ໂຫຕິ.

ຐີຍເຕ, ພຸຊ຺ຌເຕ, ປຈ຺ຈເຕ, ລພ຺ຠເຕ, ກຣີຍເຕ, ຍຸຊ຺ຊເຕ, ອຸຈ຺ຈເຕ.

ຠາວກມ຺ເມສູຕິ ກິມຕ຺ຖໍ? ກໂຣຕິ, ປຈຕິ, ປຐຕິ.

໔໔໑. , ໔໔໗. ຕສ຺ສ ຈວຄ຺ຄຍກາຣວກາຣຕ຺ຕໍ ສຘາຕ຺ວນ຺ຕສ຺ສ.

ຕສ຺ສ ຍປຈ຺ຈຍສ຺ສ ຈວຄ຺ຄຍກາຣວກາຣຕ຺ຕໍ ໂຫຕິ ຘາຕູນໍ ອນ຺ເຕນ ສຫ ຍຖາສມ຺ຠວໍ.

ວຸຈ຺ຈເຕ, ວຸຈ຺ຈນ຺ເຕ, ອຸຈ຺ຈເຕ, ອຸຈ຺ຈນ຺ເຕ, ປຈ຺ຈເຕ, ປຈ຺ຈນ຺ເຕ. ມຊ຺ຊເຕ, ມຊ຺ຊນ຺ເຕ, ຍຸຊ຺ຊເຕ, ຍຸຊ຺ຊນ຺ເຕ. ພຸຊ຺ຌເຕ, ພຸຊ຺ຌນ຺ເຕ, ກຸຊ຺ຌເຕ, ກຸຊ຺ຌນ຺ເຕ, ອຸຊ຺ຌເຕ, ອຸຊ຺ຌນ຺ເຕ. ຫຎ຺ຎເຕ, ຫຎ຺ຎນ຺ເຕ. ກຍ຺ຍເຕ, ກຍ຺ຍນ຺ເຕ. ທິພ຺ພເຕ, ທິພ຺ພນ຺ເຕ.

໔໔໒. , ໔໔໘. ອິວຓ຺ຓາຄໂມ ວາ.

ສພ຺ເພຫິ ຘາຕູຫິ ຍມ຺ຫິ ປຈ຺ຈເຍ, ປເຣ ອິວຓ຺ຓາຄໂມ ໂຫຕິ ວາ.

ກຣີຍເຕ, ກຣີຍຕິ, ຄຈ຺ຉີຍເຕ, ຄຈ຺ຉີຍຕິ.

ວາຕິ ກິມຕ຺ຖໍ? ກຍ຺ຍເຕ.

໔໔໓. , ໔໔໙. ປຸພ຺ພຣູປຎ຺ຈ.