໕. ຕທ຺ຘິຕກປ຺ປ

ອຏ຺ຐມກຓ຺ຑ

໓໔໔. , ໓໖໑. ວາຓ’ປຈ຺ເຈ.

ຓປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ ມິຈ຺ເຈຕສ຺ມິໍ ອຕ຺ເຖ.

ວສິຏ຺ຐສ຺ສ ອປຈ຺ຈໍ ວາສິຏ຺ໂຐ, ວສິຏ຺ຐສ຺ສ ອປຈ຺ຈໍ ວາ, ວສິຏ຺ຐສ຺ສ ອປຈ຺ຈໍ ວາສິຏ຺ຐີ, ວສິຏ຺ຐສ຺ສ ອປຈ຺ຈໍ ວາສິຏ຺ຐໍ. ເອວໍ ຠາຣທ຺ວາໂຊ, ຠາຣທ຺ວາຊີ, ຠາຣທ຺ວາຊໍ. ໂຄຕໂມ, ໂຄຕມີ, ໂຄຕມໍ. ວາສຸເທໂວ, ວາສຸເທວີ, ວາສຸເທວໍ. ພາລເທໂວ, ພາລເທວີ, ພາລເທວໍ. ເວສາມິຕ຺ໂຕ, ເວສາມິຕ຺ຕີ ເວສາມິຕ຺ຕໍ.

໓໔໕. , ໓໖໖. ຓາຍນ ຓານ ວຈ຺ຉາທິໂຕ.

ຕສ຺ມາ ວຈ຺ຉາທິໂຕ ໂຄຕ຺ຕຄຓໂຕ ຓາຍນຓານປຈ຺ຈຍາ ໂຫນ຺ຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ວຈ຺ຉສ຺ສ ອປຈ຺ຈໍວຈ຺ຉາຍໂນ, ວຈ຺ຉາໂນ, ວຈ຺ຉສ຺ສ ອປຈ຺ຈໍ ວາ, ວຈ຺ຉສ຺ສ ອປຈ຺ຈໍ ວຈ຺ຉາຍນີ, ວຈ຺ຉານີ, ວຈ຺ຉສ຺ສ ອປຈ຺ຈໍ ວຈ຺ຉາຍນໍ, ວຈ຺ຉານໍ. ສກຏສ຺ສ ອປຈ຺ຈໍ ສາກຏາຍໂນ, ສາກຏາໂນ, ສກຏສ຺ສ ອປຈ຺ຈໍ ວາ, ສາກຏາຍນີ, ສາ ກຏານີ, ສາກຏາຍນໍ, ສາກຏານໍ. ເອວໍ ກຓ຺ຫາຍໂນ, ກຓ຺ຫາໂນ, ກຓ຺ຫສ຺ສ ອປຈ຺ຈໍ ວາ. ກຓ຺ຫາຍນີ, ກຓ຺ຫານີ, ກຓ຺ຫາຍນໍ, ກຓ຺ຫານໍ. ອຄ຺ຄິເວສ຺ສາຍໂນ, ອຄ຺ຄິເວສ຺ສາໂນ, ອຄ຺ຄິເວສ຺ສາຍນີ, ອຄ຺ຄິເວສ຺ສານີ, ອຄ຺ຄິເວສ຺ສາຍນໍ, ອຄ຺ຄິເວສ຺ສານໍ. ຄຈ຺ຉາຍໂນ, ຄຈ຺ຉາໂນ, ຄຈ຺ຉາຍນີ, ຄຈ຺ຉານີ, ຄຈ຺ຉາຍນໍ, ຄຈ຺ຉານໍ. ກປ຺ປາຍໂນ, ກປ຺ປາໂນ, ກປ຺ປາຍນີ, ກປ຺ປານີ, ກປ຺ປາຍນໍ, ກປ຺ປານໍ. ໂມຄ຺ຄລ຺ລາຍໂນ, ໂມຄ຺ຄລ຺ລາໂນ, ໂມຄ຺ຄລ຺ລາຍນີ, ໂມຄ຺ຄລ຺ລານີ, ໂມຄ຺ຄລ຺ລາຍນໍ, ໂມຄ຺ຄລ຺ລານໍ. ມຸຎ຺ຈາຍໂນ, ມຸຎ຺ຈາໂນ, ມຸຎ຺ຈາຍນີ, ມຸຎ຺ຈານີ, ມຸຎ຺ຈາຍນໍ, ມຸຎ຺ຈານໍ. ສງ຺ຆາຍໂນ, ສງ຺ຆາໂນ, ສງ຺ຆາຍນີ, ສງ຺ຆານີ, ສງ຺ຆາຍນໍ, ສງ຺ຆານໍ. ໂລມາຍໂນ, ໂລມາໂນ, ໂລມາຍນີ, ໂລມານີ, ໂລມາຍນໍ, ໂລມານໍ, ສາກມາຍໂນ, ສາກມາໂນ, ສາກມາຍນີ, ສາກມານີ, ສາກມາຍນໍ, ສາກມານໍ. ນາຣາຍໂນ, ນາຣາໂນ, ນາຣາຍນີ, ນາຣານີ, ນາຣາຍນໍ, ນາຣານໍ. ໂຈຣາຍໂນໂຈຣາໂນ, ໂຈຣາຍນີ, ໂຈຣານີ, ໂຈຣາຍນໍ, ໂຈຣານໍ, ອາວສາລາຍໂນ, ອາວສາລາໂນ, ອາວສາລາຍນີ, ອາວສາລານີ, ອາວສາລາຍນໍ, ອາວສາລານໍ. ທ຺ເວປາຍໂນ, ທ຺ເວປາໂນ, ທ຺ເວປາຍນີ, ທ຺ເວປານີ, ທ຺ເວປາຍນໍ, ທ຺ເວປານໍ. ກຸຎ຺ຈາຍໂນ, ກຸຎ຺ຈາໂນ, ກຸຎ຺ຈາຍນີ, ກຸຎ຺ຈານີ, ກຸຎ຺ຈາຍນໍ, ກຸຎ຺ຈານໍ. ກຈ຺ຈາຍໂນ, ກຈ຺ຈາໂນ, ກຈ຺ຈາຍນີ, ກຈ຺ຈານີ, ກຈ຺ຈາຍນໍ, ກຈ຺ຈານໍ.

໓໔໖. , ໓໖໗. ເຓຍ຺ໂຍ ກຕ຺ຕິກາທີຫິ.

ເຕຫິ ໂຄຕ຺ຕຄເຓຫິ ກຕ຺ຕິກາທີຫິ ເຓຍ຺ຍປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ກຕ຺ຕິກາຍ ອປຈ຺ຈໍ ກຕ຺ຕິເກຍ຺ໂຍ, ກຕ຺ຕິກາຍ ອປຈ຺ຈໍ ວາ. ເອວໍ ເວນເຕຍ຺ໂຍ, ໂຣຫິເຓຍ຺ໂຍ, ຄງ຺ເຄຍ຺ໂຍ, ກທ຺ທເມຍ຺ໂຍ, ນາເທຍ຺ໂຍ, ອາເລຍ຺ໂຍ, ອາເຫໂຍ, ກາເມຍ຺ໂຍ, ສຸຈິຍາ ອປຈ຺ຈໍ ໂສເຈຍ຺ໂຍ, ສາເລຍ຺ໂຍ, ພາເລຍ຺ໂຍ, ມາເລຍ຺ໂຍ, ກາເລຍ຺ໂຍ.

໓໔໗. , ໓໖໘. ອໂຕ ຓິ ວາ.

ຕສ຺ມາ ອກາຣໂຕ ຓິປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ທກ຺ຂສ຺ສ ອປຈ຺ຈໍ ທກ຺ຂິ, ທກ຺ຂສ຺ສ ອປຈ຺ຈໍ ວາ. ທຸຓສ຺ສ ອປຈ຺ຈໍ ໂທຓິ, ທຸຓສ຺ສ ອປຈ຺ຈໍ ວາ, ເອວໍ ວາສວິ, ສກ຺ຍປຸຕ຺ຕິ, ນາຏປຸຕ຺ຕິ, ທາສປຸຕ຺ຕິ, ທາສວິ, ວາຣຸຓິ, ຄຓ຺ຑິ, ພາລເທວິ, ປາວກິ, ເຊນທຕ຺ຕິ, ພຸທ຺ຘິ, ຘມ຺ມິ, ສງ຺ຆິ, ກປ຺ປິ, ອນຸຣຸທ຺ຘິ.

ວາຕິ ວິກປ຺ປນຕ຺ເຖນ ຓິກປຈ຺ຈໂຍ ໂຫຕິ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ. ສກ຺ຍປຸຕ຺ຕສ຺ສ ອປຈ຺ຈໍ ສກ຺ຍປຸຕ຺ຕິໂກ. ເອວໍ ນາຏປຸຕ຺ຕິໂກ, ເຊນທຕ຺ຕິໂກ.

໑໔໘. , ໓໗໑. ຓໂວ’ ປກ຺ວາທີຫິ.

ອຸປກຸອິຈ຺ເຈວມາທີຫິ ຓວປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ອຸປກຸສ຺ສ ອປຈ຺ຈໍ ໂອປກໂວ, ອຸປກຸສ຺ສ ອປຈ຺ຈໍ ວາ. ມນຸໂນ ອປຈ຺ຈໍ ມານໂວ, ມນຸໂນ ອປຈ຺ຈໍ ວາ. ຠຄ຺ຄຸສ຺ສ ອປຈ຺ຈໍ ຠຄ຺ຄໂວ, ຠຄ຺ຄຸສ຺ສ ອປຈ຺ຈໍ ວາ, ປຓ຺ຑຸສ຺ສ ອປຈ຺ຈໍ ປຓ຺ຑໂວ, ປຓ຺ຑຸສ຺ສ ອປຈ຺ຈໍ ວາ, ພຫຸສ຺ສ ອປຈ຺ຈໍ ພາຫໂວ, ພຫຸສ຺ສ ອປຈ຺ຈໍ ວາ.

໓໔໙. , ໓໗໒. ເຓຣ ວິຘວາທິໂຕ.

ຕສ຺ມາ ວິຘວາທິໂຕ ເຓຣປຈ຺ຈໂຍ ໂຫຕິ ວາ ‘‘ຕສ຺ສາປຈ຺ຈ’’ມິຈ຺ເຈຕສ຺ມິໍ ອຕ຺ເຖ.

ວິຘວາຍ ອປຈ຺ຈໍ ເວຘເວໂຣ, ວິຘວາຍ ອປຈ຺ຈໍ ວາ. ພນ຺ຘຸກິຍາ ອປຈ຺ຈໍ ພນ຺ຘຸເກໂຣ, ພນ຺ຘຸກິຍາ ອປຈ຺ຈໍ ວາ. ສມຓສ຺ສ ອປຈ຺ຈໍ ສາມເຓໂຣ, ສມຓສ຺ສ ອປຈ຺ຈໍ ວາ. ເອວໍ ສາມເຓຣີ, ສາມເຓຣໍ, ນາຬິເກໂຣ, ນາຬິເກຣີ, ນາຬິເກຣໍ.

໓໕໐. , ໓໗໓. ເຍນ ວາ ສໍສຏ຺ຐໍ ຕຣຕິ ຈຣຕິ ວຫຕິ ຓິໂກ.

ເຍນ ວາ ສໍສຏ຺ຐໍ, ເຍນ ວາ ຕຣຕິ, ເຍນ ວາ ຈຣຕິ, ເຍນ ວາ ວຫຕິ ອິຈ຺ເຈເຕສ຺ວຕ຺ເຖສຸ ຓິກປຈ຺ຈໂຍ ໂຫຕິ ວາ.

ຕິເລນ ສໍສຏ຺ຐໍ ໂຠຊນໍ ເຕລິກໍ, ຕິເລນ ສໍສຏ຺ຐໍ ວາ. ເອວໍ ໂຄຬິກໍ, ຆາຕິກໍ.

ນາວາຍ ຕຣຕີຕິ ນາວິໂກ, ນາວາຍ ຕຣຕິ ວາ. ເອວໍ ໂອຬຸມ຺ປິໂກ.

ສກເຏນ ຈຣຕີຕິ ສາກຏິໂກ, ສກເຏນ ຈຣຕິ ວາ. ເອວໍ ປຕ຺ຕິໂກ, ທຓ຺ຑິໂກ, ຘມ຺ມິໂກ, ປາທິໂກ.

ສີເສນ ວຫຕີຕິ ສີສິໂກ, ສີເສນ ວຫຕິ ວາ. ອໍເສນ ວຫຕີຕິ ອໍສິໂກ, ອໍເສນ ວຫຕິ ວາ. ເອວໍ ຂນ຺ຘິໂກ, ອງ຺ຄຸລິໂກ.

ວາຕິ ວິກປ຺ປນຕ຺ເຖນ ອຎ຺ເຎສຸປິ ຓິກປຈ຺ຈໂຍ ໂຫຕິ. ຣາຊຄເຫ ວສຕີຕິ ຣາຊຄຫິໂກ, ຣາຊຄເຫ ວສຕິ ວາ. ຣາຊຄເຫ ຊາໂຕ ຣາຊຄຫິໂກ, ຣາຊຄເຫ ຊາໂຕ ວາ. ເອວໍ ມາຄຘິໂກ, ສາວຕ຺ຖິໂກ, ກາປິລ ວຕ຺ຖິໂກ, ປາຏລິປຸຕ຺ຕິໂກ, ເວສາລິໂກ.

໓໕໑. , ໓໗໔. ຕມຘີເຕ ເຕນກຕາທິ ສນ຺ນິຘານ ນິໂຍຄ ສິປ຺ປ ຠຓ຺ຑ ຊີວິກຕ຺ເຖສຸ ຈ.

ຕມຘີເຕ, ເຕນກຕາທິອຕ຺ເຖ, ຕມ຺ຫິ ສນ຺ນິຘານາ, ຕຕ຺ຖ ນິຍຸຕ຺ໂຕ, ຕມສ຺ສ ສິປ຺ປໍ, ຕມສ຺ສ ຠຓ຺ຑໍ, ຕມສ຺ສ ຊີວິກໍ ອິຈ຺ເຈເຕສ຺ວຕ຺ເຖສຸ ຈ ຓິກປຈ຺ຈໂຍ ໂຫຕິ ວາ.

ວິນຍມຘີເຕ ເວນຍິໂກ, ວິນຍມຘີເຕ ວາ. ເອວໍ ສຸຕ຺ຕນ຺ຕິໂກ, ອາຠິຘມ຺ມິໂກ, ເວຍ຺ຍາກຣຓິໂກ.

ກາເຍນ ກຕໍ ກມ຺ມໍ ກາຍິກໍ, ກາເຍນ ກຕໍ ກມ຺ມໍ ວາ. ເອວໍ ວາຈສິກໍ, ມານສິກໍ.

ສຣີເຣ ສນ຺ນິຘານາ ເວທນາ ສາຣີຣິກາ, ສຣີເຣ ສນ຺ນິຘານາ ວາ, ເອວໍ ມານສິກາ.

ທ຺ວາເຣ ນິຍຸຕ຺ໂຕ ໂທວາຣິໂກ, ທ຺ວາເຣ ນິຍຸຕ຺ໂຕ ວາ. ເອວໍ ຠຓ຺ຑາຄາຣິໂກ, ນາຄຣິໂກ, ນາວກມ຺ມິໂກ.

ວີຓາ ອສ຺ສ ສິປ຺ປໍ ເວຓິໂກ, ວີຓາ ອສ຺ສ ສິປ຺ປໍ ວາ. ເອວໍ ປາຓວິໂກ, ໂມທິງ຺ຄິໂກ, ວໍສິໂກ.

ຄນ຺ໂຘ ອສ຺ສ ຠຓ຺ຑໍ ຄນ຺ຘິໂກ, ຄນ຺ໂຘ ອສ຺ສ ຠຓ຺ຑໍ ວາ. ເອວໍ ເຕລິໂກ, ໂຄຬິໂກ.

ອຸຣພ຺ຠໍ ຫນ຺ຕ຺ວາ ຊີວຕີຕິ ໂອຣພ຺ຠິໂກ, ອຸຣພ຺ຠໍ ຫນ຺ຕ຺ວາ ຊີວຕິ ວາ. ມຄໍ ຫນ຺ຕ຺ວາ ຊີວຕີຕິ ມາຄວິໂກ, ມຄໍ ຫນ຺ຕ຺ວາ ຊີວຕິ ວາ. ເອວໍ ໂສກຣິໂກ, ສາກຸຓິໂກ.

ອາທິຄ຺ຄຫເຓນ ອຎ຺ຎຕ຺ຖາປິ ຓິກ ປຈ຺ຈໂຍ ໂຍເຊຕພ຺ໂພ. ຊາເລນ ຫໂຕ ຊາລິໂກ, ຊາເລນ ຫໂຕ ວາ.

ສຸຕ຺ເຕນ ພນ຺ໂຘ ສຸຕ຺ຕິໂກ, ສຸຕ຺ເຕນ ພນ຺ໂຘ ວາ.

ຈາໂປ ອສ຺ສ ອາວຸໂຘ ຈາປິໂກ, ຈາໂປ ອສ຺ສ ອາວຸໂຘ ວາ. ເອວໍ ໂຕມຣິໂກ, ມຸຄ຺ຄຣິໂກ, ໂມສລິໂກ.

ວາໂຕ ອສ຺ສ ອາພາໂຘ ວາຕິໂກ, ວາໂຕ ອສ຺ສ ອາພາໂຘ ວາ. ເອວໍ ເສມ຺ຫິໂກ, ປິຕ຺ຕິໂກ.

ພຸທ຺ເຘ ປສນ຺ໂນ ພຸທ຺ຘິໂກ, ພຸທ຺ເຘ ປສນ຺ໂນ ວາ. ເອວໍ ຘມ຺ມິໂກ, ສງ຺ຆິໂກ.

ພຸທ຺ຘສ຺ສ ສນ຺ຕກໍ ພຸທ຺ຘິກໍ, ພຸທ຺ຘສ຺ສ ສນ຺ຕກໍ ວາ. ເອວໍ ຘມ຺ມິກໍ, ສງ຺ຆິກໍ.

ວຕ຺ເຖນ ກີຕໍ ຠຓ຺ຑໍ ວຕ຺ຖິກໍ, ວຕ຺ເຖນ ກີຕໍ ຠຓ຺ຑໍ ວາ. ເອວໍ ກຸມ຺ຠິກໍ, ຜາລິກໍ, ກິໍ ກຓິກໍ, ໂສວຓ຺ຓິກໍ.

ກຸມ຺ໂຠ ອສ຺ສ ປຣິມາຓໍ ກຸມ຺ຠິກໍ, ກຸມ຺ໂຠ ອສ຺ສ ປຣິມາຓໍ ວາ.

ກຸມ຺ຠສ຺ສ ຣາສິ ກຸມ຺ຠິກໍ, ກຸມ຺ຠສ຺ສ ຣາສິ ວາ.

ກຸມ຺ຠໍ ອຣຫຕີຕິ ກຸມ຺ຠິໂກ, ກຸມ຺ຠໍ ອຣຫຕິ ວາ.

ອກ຺ເຂນ ທິພ຺ພຕີຕິ ອກ຺ຂິໂກ, ອກ຺ເຂນ ທິພ຺ພຕິ ວາ. ເອວໍ ສາລາກິໂກ, ຕິນ຺ທຸກິໂກ, ອມ຺ພຜລິໂກ. ກປິຏ຺ຐຜລິໂກ, ນາຬິເກຣິໂກ ອິຈ຺ເຈວມາທິ.

໓໕໒. , ໓໗໖. ຓ ຣາຄາ ຕສ຺ເສ ທມຎ຺ຎຕ຺ເຖສຸ ຈ.

ຓປຈ຺ຈໂຍ ໂຫຕິ ວາ ຣາຄມ຺ຫາ ‘‘ເຕນ ຣຕ຺ຕໍ’’ ອິຈ຺ເຈຕສ຺ມິໍ ອຕ຺ເຖ, ‘‘ຕສ຺ເສທໍ’’ ອຎ຺ຎຕ຺ເຖສຸ ຈ.

ກສາເວນ ຣຕ຺ຕໍ ວຕ຺ຖໍ ກາສາວໍ, ກສາເວນ ຣຕ຺ຕໍ ວຕ຺ຖໍ ວາ. ເອວໍ ໂກສຸມ຺ຠໍ, ຫາລິທ຺ທໍ, ປາຏງ຺ຄໍ, ຣຕ຺ຕງ຺ຄ, ມຎ຺ຊິຏ຺ຐໍ, ກຸງ຺ກຸມໍ.

ສູກຣສ຺ສ ອິທໍ ມໍສໍ ໂສກຣໍ, ສູກຣສ຺ສ ອິທໍ ມໍສໍ ວາ. ເອວໍ ມາຫິສໍ.

ອຸທຸມ຺ພຣສ຺ສ ອວິທູເຣ ປວຕ຺ຕໍ ວິມານໍ ໂອທຸມ຺ພຣໍ, ອຸທຸມ຺ພຣສ຺ສ ອວິທູເຣ ປວຕ຺ຕໍ ວິມານໍ ວາ.

ວິທິສາຍ ອວິທູເຣ ນິວາໂສ ເວທິໂສ, ວິທິສາຍ ອວິທູເຣ ນິວາໂສ ວາ.

ມຖຸຣາຍ ຊາໂຕ ມາຖຸໂຣ, ມຖຸຣາຍ ຊາໂຕ ວາ.

ມຖຸຣາຍ ອາຄໂຕ ມາຖຸໂຣ, ມຖຸຣາຍ ອາຄໂຕ ວາ.

ກຕ຺ຕິກາຍ ນິຍຸຕ຺ໂຕ ມາໂສ ກຕ຺ຕິໂກ, ກຕ຺ຕິກາຍ ນິຍຸຕ຺ໂຕ ມາໂສ ວາ. ເອວໍ ມາຄສິໂຣ, ຜຸສ຺ໂສ, ມາໂຆ, ຜຄ຺ຄຸໂນ, ຈິຕ຺ໂຕ, ເວສາໂຂ, ເຊຏ຺ໂຐ, ອາສຬ຺ໂຫ, ສາວໂຓ, ຠທ຺ໂທ, ອສ຺ສຍຸໂຊ.

ນ ວຸທ຺ຘິ ນີລປີຕາໂທ, ປຈ຺ຈເຍ ສຓກາຣເກ.

ຜກາໂຣ ຜຸສ຺ສສທ຺ທສ຺ສ, ‘‘ສິໂຣ’’ຕິ ສິຣສໍ ວເທ.

ສິກ຺ຂານໍ ສມູໂຫ ສິກ຺ໂຂ, ຠິກ຺ຂານໍ ສມູໂຫ ຠິກ຺ໂຂ. ເອວໍ ກາໂປໂຕ, ມາຍູໂຣ, ໂກກິໂລ.

ພຸທ຺ເຘ, ອສ຺ສ ເທວຕາ ພຸທ຺ໂຘ. ເອວໍ ຠທ຺ໂທ, ມາໂຣ, ມາຫິນ຺ໂທ, ເວສ຺ສວໂຓ, ຍາໂມ, ໂສໂມ, ນາຣາຍໂຓ.

ສໍວຈ຺ຉຣມຘີເຕ ສໍວຈ຺ຉໂຣ. ເອວໍ ໂມຫຸຕ຺ໂຕ, ເນມິຕ຺ໂຕ, ອງ຺ຄວິຊ຺ໂຊ, ເວຍ຺ຍາກຣໂຓ, ຉນ຺ໂທ, ຠາສ຺ໂສ, ຈນ຺ໂທ.

ວສາທານໍ ວິສໂຍ ເທໂສ ວາສາໂທ. ເອວໍ ກຸມ຺ໂຠ, ສາກຸນ຺ໂຕ, ອາຕິສາໂຣ.

ອຸທຸມ຺ພຣາ ອສ຺ມິໍ ປເທເສ ສນ຺ຕີຕິ ໂອທຸມ຺ພໂຣ. ສາຄເຣຫິ ນິພ຺ພຕ຺ໂຕ ສາຄໂຣ. ສາຄລມສ຺ສ ນິວາໂສ ສາຄໂລ. ມຖຸຣາ ອສ຺ສ ນິວາໂສ ມາຖຸໂຣ. ມຖຸຣາຍ ອິສ຺ສໂຣ ມາຖຸໂຣ. ອິຈ຺ເຈວມາທໂຍ ໂຍເຊຕພ຺ພາ.

໓໕໓. , ໓໗໘. ຊາຕາທີນມິມິຍາ ຈ.

ຊາຕອິຈ຺ເຈວມາທີນມຕ຺ເຖ ອິມອິຍປຈ຺ຈຍາ ໂຫນ຺ຕິ.

ປຈ຺ຉາ ຊາໂຕ ປຈ຺ຉິໂມ. ເອວໍ ອນ຺ຕິໂມ, ມຊ຺ຌິໂມ, ປຸຣິໂມ, ອຸປຣິໂມ, ເຫຏ຺ຐິໂມ, ໂຄປ຺ຜິໂມ. ໂພຘິສຕ຺ຕຊາຕິຍາ ຊາໂຕ ໂພຘິສຕ຺ຕຊາຕິໂຍ, ເອວໍ ອສ຺ສຊາຕິໂຍ, ຫຕ຺ຖິຊາຕິໂຍ, ມນຸສ຺ສຊາຕິໂຍ.

ອາທິຄ຺ຄຫເຓນ ນິຍຸຕ຺ຕຕ຺ຖາທິໂຕປິ ຕທສ຺ສຕ຺ຖາທິໂຕປິ ອິມ ອິຍ ອິກ ອິຈ຺ເຈເຕ ປຈ຺ຈຍາ ໂຫນ຺ຕິ. ອນ຺ໂຕ ນິຍຸຕ຺ໂຕ ອນ຺ຕິໂມ. ເອວໍ ອນ຺ຕິໂຍ, ອນ຺ຕິໂກ.

ປຸຕ຺ໂຕ ອສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ປຸຕ຺ຕິໂມ. ເອວໍ ປຸຕ຺ຕິເຍວ, ປຸຕ຺ຕິໂກ, ກປ຺ປິໂມ, ກປ຺ປິໂຍ, ກປ຺ປິໂກ.

ຈຄ຺ຄຫເຓນ ກິຍປຈ຺ຈໂຍ ໂຫຕິ ນິຍຸຕ຺ຕຕ຺ເຖ. ຊາຕິຍໍ ນິຍຸຕ຺ໂຕ ຊາຕິກິໂຍ, ອນ຺ເຘ ນິຍຸຕ຺ໂຕ ອນ຺ຘກິໂຍ, ຊາຕິຍາ ອນ຺ໂຘ ຊຈ຺ຈນ຺ໂຘ, ຊຈ຺ຈນ຺ເຘ ນິຍຸຕ຺ໂຕ ຊຈ຺ຈນ຺ຘກິໂຍ.

໓໕໔. , ໓໗໙. ສມູຫຕ຺ເຖ ກຓ ຓາ.

ສມູຫຕ຺ເຖ ກຓ ຓອິຈ຺ເຈເຕ ປຈ຺ຈຍາ ໂຫນ຺ຕິ.

ຣາຊປຸຕ຺ຕານໍ ສມູໂຫ ຣາຊປຸຕ຺ຕໂກ. ເອວໍ ຣາຊປຸຕ຺ໂຕ, ມານຸສ຺ສໂກ, ມານຸສ຺ໂສ, ມາຍູຣໂກ, ມາຍູໂຣ, ມາຫິໍສໂກ, ມາຫິໍໂສ.

໓໕໕. , ໓໘໐. ຄາມ ຊນ ພນ຺ຘຸ ສຫາຍາທີຫິຕາ.

ຄາມ ຊນ ພນ຺ຘຸ ສຫາຍອິຈ຺ເຈວມາທີຫິ ຕາປຈ຺ຈໂຍ ໂຫຕິ ສມູຫຕ຺ເຖ.

ຄາມານໍ ສມູໂຫ ຄາມຕາ. ເອວໍ ຊນຕາ, ພນ຺ຘຸຕາ, ສຫາຍຕາ, ນຄຣຕາ.

໓໕໖. , ໓໘໑. ຕທສ຺ສ ຐານມິໂຍ ຈ.

‘‘ຕທສ຺ສ ຐານ’’ ມິຈ຺ເຈຕສ຺ມິໍ ອຕ຺ເຖ ອິຍປຈ຺ຈໂຍ ໂຫຕິ.

ມທນສ຺ສ ຐານໍ ມທນິຍໍ, ພນ຺ຘນສ຺ສ ຐານໍ ພນ຺ຘນິຍໍ, ມຸຈ຺ຉນສ຺ສ ຐານໍ ມຸຈ຺ຉນິຍໍ, ເອວໍ ຣຊນິຍໍ, ກມນິຍໍ, ຄມນິຍໍ, ທຸສ຺ສນິຍໍ, ທສ຺ສນິຍໍ.

໓໕໗. , ໓໘໒. ອຸປມຕ຺ຖາຍິຕຕ຺ຕໍ.

ອຸປມຕ຺ເຖ ອາຍິຕຕ຺ຕປຈ຺ຈໂຍ ໂຫຕິ.

ຘູໂມ ວິຍ ທິສ຺ສຕິ ອທຸໍ ວນໍ ຕທິທໍ ຘູມາຍິຕຕ຺ຕໍ, ຕິມິຣໍ ວິຍ ທິສ຺ສຕິ ອທຸໍ ວນໍ ຕທິທໍ ຕິມິຣາຍິຕຕ຺ຕໍ.

໓໕໘. , ໓໘໓. ຕນ຺ນິສ຺ສິຕຕ຺ເຖ ໂລ.

‘‘ຕນ຺ນິສ຺ສິຕຕ຺ເຖ, ຕທສ຺ສ ຐານ’’ມິຈ຺ເຈຕສ຺ມິໍ ອຕ຺ເຖ ຈ ລປຈ຺ຈໂຍ ໂຫຕິ.

ທຸຏ຺ຐຸ ນິສ຺ສິຕໍ ທຸຏ຺ຐຸລ຺ລໍ, ເວທໍ ນິສ຺ສິຕໍ ເວທລ຺ລໍ, ທຸຏ຺ຐຸ ຐານໍ ທຸຏ຺ຐຸລ຺ລໍ, ເວທສ຺ສ ຐານໍ ເວທລ຺ລໍ.

໓໕໙. , ໓໘໔. ອາລຸ ຕພ຺ພຫຸເລ.

ອາລຸປຈ຺ຈໂຍ ໂຫຕິ ຕພ຺ພຫຸລຕ຺ເຖ.

ອຠິຊ຺ຌາ ອສ຺ສ ປກຕິ ອຠິຊ຺ຌາລຸ, ອຠິຊ຺ຌາ ອສ຺ສ ພຫຸລາ ວາ ອຠິຊ຺ຌາລຸ. ເອວໍ ສີຕາລຸ, ຘຊາລຸ, ທຍາລຸ.

໓໖໐. , ໓໘໗. ຓ຺ຍ ຕ຺ຕ ຕາ ຠາເວ ຕຸ.

ຓ຺ຍຕ຺ຕຕາອິຈ຺ເຈເຕ ປຈ຺ຈຍາ ໂຫນ຺ຕິ ຠາວຕ຺ເຖ.

ອລສສ຺ສ ຠາໂວ ອາລສ຺ຍໍ, ອໂຣຄສ຺ສ ຠາໂວ ອາໂຣຄ຺ຍໍ. ປໍສຸກູລິກສ຺ສ ຠາໂວ ປໍສຸກູລິກຕ຺ຕໍ, ອໂນທຣິກສ຺ສ ຠາໂວ ອໂນທຣິກຕ຺ຕໍ. ສງ຺ຄຓິກາຣາມສ຺ສ ຠາໂວ ສງ຺ຄຓິກາຣາມຕາ, ນິທ຺ທາຣາມສ຺ສ ຠາໂວ ນິທ຺ທາຣາມຕາ.

ຕຸຄ຺ຄຫເຓນ ຕ຺ຕນປຈ຺ຈໂຍ ໂຫຕິ. ປຸຖຸຊ຺ຊນຕ຺ຕນໍ, ເວທນຕ຺ຕນໍ.

໓໖໑. , ໓໘໘. ຓ ວິສມາທີຫິ.

ຓປຈ຺ຈໂຍ ໂຫຕິ ວິສມາທີຫິ ‘‘ຕສ຺ສ ຠາໂວ’’ອິຈ຺ເຈຕສ຺ມິໍ ອຕ຺ເຖ.

ວິສມສ຺ສ ຠາໂວ ເວສມໍ, ສຸຈິສ຺ສ ຠາໂວ ໂສຈໍ.

໓໖໒. , ໓໘໙. ຣມຓີຍາທິໂຕ ກຓ.

ຣມຓີຍອິຈ຺ເຈວມາທິໂຕ ກຓ ປຈ຺ຈໂຍ ໂຫຕິ ‘‘ຕສ຺ສ ຠາໂວ’’ອິຈ຺ເຈຕສ຺ມິໍ ອຕ຺ເຖ.

ຣມຓີຍສ຺ສ ຠາໂວ ຣາມຓີຍກໍ, ມນຸຎ຺ຎສ຺ສ ຠາໂວ ມານຸຎ຺ຎກໍ.

໓໖໓. , ໓໙໐. ວິເສເສ ຕຣຕມິສິກິຍິຏ຺ຐາ.

ວິເສສຕ຺ເຖ ຕຣ ຕມ ອິສິກ ອິຍ ອິຏ຺ຐອິຈ຺ເຈເຕ ປຈ຺ຈຍາ ໂຫນ຺ຕິ.

ສພ຺ເພ ອິເມ ປາປາ, ອຍມິເມສໍ ວິເສເສນ ປາໂປຕິ ປາປຕໂຣ. ເອວໍ ປາປຕໂມ, ປາປິສິໂກ, ປາປິໂຍ, ປາປິຏ຺ໂຐ.

໓໖໔. , ໓໙໘. ຕທສ຺ສຕ຺ຖີຕິ ວີ ຈ.

‘‘ຕທສ຺ສຕ຺ຖິ’’ອິຈ຺ເຈຕສ຺ມິໍ ອຕ຺ເຖ ວີປຈ຺ຈໂຍ ໂຫຕິ.

ເມຘາ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິເມຘາວີ. ເອວໍ ມາຍາວີ.

ຈຄ຺ຄຫເຓນ ໂສປຈ຺ຈໂຍ ໂຫຕິ. ສຸເມຘາ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ສຸເມຘໂສ.

໓໖໕. , ໓໙໙. ຕປາທິໂຕ ສີ.

ຕປາທິໂຕ ສີປຈ຺ຈໂຍ ໂຫຕິ ‘‘ຕທສ຺ສຕ຺ຖິ’’ອິຈ຺ເຈຕສ຺ມິໍ ອຕ຺ເຖ.

ຕໂປ ຍສ຺ສ ອຕ຺ຖິ ຕສ຺ມິໍ ວາ ວິຊ຺ຊຕີຕິ ຕປສ຺ສີ. ເອວໍ ຍສສ຺ສີ, ເຕຊສ຺ສີ.

໒໖໖. , ໔໐໐. ທຓ຺ຑາທິໂຕ ອິກອີ.

ທຓ຺ຑາທິໂຕ ອິກ ອີອິຈ຺ເຈເຕ ປຈ຺ຈຍາ ໂຫນ຺ຕິ ‘‘ຕທສ຺ສຕ຺ຖິ’’ອິຈ຺ເຈຕສ຺ມິໍ ອຕ຺ເຖ.

ທຓ຺ໂຑ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ທຓ຺ຑິໂກ, ທຓ຺ຑີ. ເອວໍ ມາລິໂກ, ມາລີ.

໓໖໗. , ໔໐໑. ມຘ຺ວາທິໂຕ ໂຣ.

ມຘຸອິຈ຺ເຈວມາທິໂຕ ຣປຈ຺ຈໂຍ ໂຫຕິ ‘‘ຕທສ຺ສຕ຺ຖິ’’ອິຈ຺ເຈຕສ຺ມິໍ ອຕ຺ເຖ.

ມຘຸ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ມຘຸໂຣ. ເອວໍ ກຸຎ຺ຊໂຣ, ມຸຄ຺ຄໂຣ, ມຸຂໂຣ, ສຸສິໂຣ, (ສີສໂຣ, ສຸກໂຣ, ສຸງ຺ກໂຣ), ສຸຠໂຣ, ສຸຈິໂຣ, ຣຸຈິໂຣ.

໓໖໘. , ໔໐໒. ຄຸຓາທິໂຕ ວນ຺ຕຸ.

ຄຸຓອິຈ຺ເຈວມາທິໂຕ ວນ຺ຕຸປຈ຺ຈໂຍ ໂຫຕິ ‘‘ຕທສ຺ສຕ຺ຖິ’’ອິຈ຺ເຈຕສ຺ມິໍ ອຕ຺ເຖ.

ຄຸໂຓ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ຄຸຓວາ. ເອວໍ ຍສວາ, ຘນວາ, ປຎ຺ຎວາ, ພລວາ, ຠຄວາ.

໓໖໙. , ໔໐໓. ສຕ຺ຍາທີຫິ ມນ຺ຕຸ.

ສຕິອິຈ຺ເຈວມາທີຫິ ມນ຺ຕຸປຈ຺ຈໂຍໂຫຕິ ‘‘ຕທສ຺ສຕ຺ຖິ’’ ອິຈ຺ເຈຕສ຺ມິໍ ອຕ຺ເຖ.

ສຕິ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ສຕິມາ, ເອວໍ ຊຸຕິມາ, ຣຸຈິມາ, ຖຸຕິມາ, ຘິຕິມາ, ມຕິມາ, ຠາຓຸມາ.

໓໗໐. , ໔໐໕. ສທ຺ຘາທິໂຕຓ.

ສທ຺ຘາອິຈ຺ເຈວມາທິໂຕ ຓ ປຈ຺ຈໂຍ ໂຫຕິ ‘‘ຕທສ຺ສຕ຺ຖິ’’ອິຈ຺ເຈຕສ຺ມິໍ ອຕ຺ເຖ.

ສທ຺ຘາ ຍສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຠິ ສທ຺ໂຘ, ເອວໍ ປຎ຺ໂຎ, ອມຈ຺ຉໂຣ.

໓໗໑. , ໔໐໔. ອາຍຸສ຺ສຸກາຣາສ ມນ຺ຕຸມ຺ຫິ.

ອາຍຸສ຺ສ ອນ຺ໂຕ ອຸກາໂຣ ອສາເທໂສ ໂຫຕິມນ຺ຕຸມ຺ຫິ ປຈ຺ຈເຍ ປເຣ.

ອາຍຸ ອສ຺ສ ອຕ຺ຖິ, ຕສ຺ມິໍ ວາ ວິຊ຺ຊຕີຕິ ອາຍສ຺ມາ.

໓໗໒. , ໓໘໕. ຕປ຺ປກຕິວຈເນ ມໂຍ.

ຕປ຺ປກຕິວຈນຕ຺ເຖ ມຍປຈ຺ຈໂຍ ໂຫຕິ.

ສຸວຓ຺ເຓນ ປກຕໍ ກມ຺ມໍ ໂສວຓ຺ຓມຍໍ. ເອວໍ ຣູປິຍມຍໍ ຊຕຸມຍໍ, ຣຊຕມຍໍ, ອິຏ຺ຐກມຍໍ, ອໂຍມຍໍ, ມຕ຺ຕິກາ ມຍໍ, ທາຣຸມຍໍ, ໂຄມຍໍ.

໓໗໓. , ໔໐໖. ສງ຺ຂ຺ຍາປູຣເຓ ໂມ.

ສງ຺ຂ຺ຍາປູຣຓຕ຺ເຖ ມປຈ຺ຈໂຍ ໂຫຕິ.

ປຎ຺ຈນ຺ນໍ ປູຣໂຓ ປຎ຺ຈໂມ, ເອວໍ ສຕ຺ຕໂມ, ອຏ຺ຐໂມ, ນວໂມ, ທສໂມ.

໓໗໔. , ໔໐໘. ສ ຉສ຺ສວາ.

ຉສ຺ສ ສກາຣາເທໂສ ໂຫຕິ ວາ ສງ຺ຂ຺ຍາປູຣຓຕ຺ເຖ.

ຉນ຺ນໍ ປູຣໂຓ ສຏ຺ໂຐ, ຉຏ຺ໂຐ ວາ.

໓໗໕. , ໔໑໒. ເອກາທິໂຕ ທສສ຺ສີ.

ເອກາທິໂຕ ທສສ຺ສ ອນ຺ເຕ ອີປຈ຺ຈໂຍ ໂຫຕິ ວາ ສງ຺ຂ຺ຍາປູຣຓຕ຺ເຖ.

ເອໂກ ຈ ທສ ຈ ເອກາທສ, ເອກາທສນ຺ນໍ ປູຣຓີ ເອກາທສີ. ປຎ຺ຈຈ ທສ ຈ ປຎ຺ຈທສ, ປຎ຺ຈທສນ຺ນໍ ປູຣຓີ ປຎ຺ຈທສີ. ຈຕ຺ຕາໂຣ ຈ ທສ ຈ ຈຕຸທ຺ທສ, ຈຕຸທ຺ທສນ຺ນໍ ປູຣຓີ ຈາຕຸທ຺ທສີ.

ປູຣເຓຕິ ກິມຕ຺ຖໍ? ເອກາທສ, ປຎ຺ຈທສ.

໓໗໖. , ໒໕໗. ທເສ ໂສ ນິຈ຺ຈຎ຺ຈ.

ທສສທ຺ເທ ປເຣ ນິຈ຺ຈໍ ຉສ຺ສ ໂສ ໂຫຕິ.

ໂສຬສ.

໓໗໗. , ໐. ອນ຺ເຕ ນິຄ຺ຄຫິຕຎ຺ຈ.

ຕາສໍ ສງ຺ຂ຺ຍານໍ ອນ຺ເຕ ນິຄ຺ຄຫິຕາຄໂມ ໂຫຕິ.

ປຎ຺ຈທສິ, ຈາຕຸທ຺ທສິ.

໓໗໘. , ໔໑໔. ຕິ ຈ.

ຕາສໍ ສງ຺ຂ຺ຍານໍ ອນ຺ເຕ ຕິກາຣາຄໂມ ໂຫຕິ. ວີສຕິ, ຕິໍສຕິ.

໓໗໙. , ໒໕໘. ລ ທຣານໍ.

ທກາຣ ຣກາຣານໍ ສງ຺ຂ຺ຍານໍ ລກາຣາເທໂສ ໂຫຕິ. ໂສຬສ, ຈຕ຺ຕາລີສໍ.

໓໘໐. , ໒໕໕. ວີສຕິ ທເສສຸ ພາ ທ຺ວິສ຺ສ ຕຸ.