໔. ສມາສກປ຺ປ

ສຕ຺ຕມກຓ຺ຑ

໓໑໖. , ໓໓໑. ນາມານໍ ສມາໂສ ຍຸຕ຺ຕຕ຺ໂຖ.

ເຕສໍ ນາມານໍ ປຍຸຊ຺ຊມານປທຕ຺ຖານໍ ໂຍ ຍຸຕ຺ຕຕ຺ໂຖ, ໂສ ສມາສສຎ຺ໂຎ ໂຫຕິ.

ກຖິນທຸສ຺ສໍ, ອາຄນ຺ຕຸກຠຕ຺ຕໍ, ຊີວິຕິນ຺ທ຺ຣິຍໍ, ສມຓພ຺ຣາຫ຺ມຓາ, ສາຣິປຸຕ຺ຕໂມຄ຺ຄລ຺ລານາ, ພ຺ຣາຫ຺ມຓ ຄຫປຕິກາ.

ນາມານມິຕິ ກິມຕ຺ຖໍ? ເທວທຕ຺ໂຕ ປຈຕິ, ຍຎ຺ຎທຕ຺ໂຕ ປຈຕິ.

ຍຸຕ຺ຕຕ຺ໂຖຕິ ກິມຕ຺ຖໍ? ຠໂຕ ຣຎ຺ໂຎ ປຸຕ຺ໂຕ ເທວທຕ຺ຕສ຺ສ.

ສມາສອິຈ຺ຈເນນ ກ຺ວຕ຺ໂຖ? ກ຺ວຈິ ສມາສນ຺ຕຄຕານມກາຣນ຺ໂຕ.

໓໑໗. , ໓໓໒. ເຕສໍ ວິຠຕ຺ຕິໂຍ ໂລປາ ຈ.

ເຕສໍ ຍຸຕ຺ຕຕ຺ຖານໍ ສມາສານໍ ວິຠຕ຺ຕິໂຍ ໂລປາ ຈ ໂຫນ຺ຕິ.

ກຖິນທຸສ຺ສໍ, ອາຄນ຺ຕຸກຠຕ຺ຕໍ.

ເຕສໍຄຫເຓນ ສມາສຕທ຺ຘິຕາຂ຺ຍາຕກິຕການໍ ວິຠຕ຺ຕິປຈ຺ຈຍປທກ຺ຂຣາຄມາ ຈ ໂລປາ ໂຫນ຺ຕິ. ວາສິຏ຺ໂຐ, ເວນເຕຍ຺ໂຍ.

ຈຄ຺ຄຫຓ ມວຘາຣຓຕ຺ຖໍ, ປຠງ຺ກໂຣ, ອມຕທ຺ທໂທ, ເມຘງ຺ກໂຣ, ທີປງ຺ກໂຣ.

໓໑໘. , ໓໓໓. ປກຕິ ຈສ຺ສ ສຣນ຺ຕສ຺ສ.

ລຸຕ຺ຕາສຸ ວິຠຕ຺ຕີສຸ ອສ຺ສ ສຣນ຺ຕສ຺ສ ລິງ຺ຄສ຺ສ ປກຕິຣູປານິ ໂຫນ຺ຕິ.

ຈກ຺ຂຸໂສຕໍ, ມຸຂນາສິກໍ, ຣາຊປຸຕ຺ໂຕ, ຣາຊປຸຣິໂສ.

໓໑໙. , ໓໓໐. ອຸປສຄ຺ຄນິປາຕປຸພ຺ພໂກ ອພ຺ຍຍີຠາໂວ.

ອຸປສຄ຺ຄນິປາຕປຸພ຺ພໂກ ສມາໂສ ອພ຺ຍຍີຠາວສຎ຺ໂຎ ໂຫຕິ.

ນຄຣສ຺ສ ສມີເປ ປວຕ຺ຕຕິ ກຖາ ອິຕິ ອຸປນຄຣໍ, ທຣຖານໍ ອຠາໂວ ນິທ຺ທຣຖໍ, ມກສານໍ ອຠາໂວ ນິມ຺ມກສໍ, ວຸຑ຺ຒານໍ ປຏິປາຏິ ຍຖາວຸຑ຺ຒໍ, ເຍ ເຍ ວຸຑ຺ຒາ ວາ ຍຖາວຸຑ຺ຒໍ, ຊີວສ຺ສ ຍຕ຺ຕໂກ ປຣິຈ຺ເຉໂທ ຍາວຊີວໍ, ຈິຕ຺ຕມຘິກິຈ຺ຈ ປວຕ຺ຕນ຺ຕິ ເຕ ຘມ຺ມາຕິ ອຘິຈິຕ຺ຕໍ, ປພ຺ພຕສ຺ສ ຕິໂຣ ຕິໂຣປພ຺ພຕໍ, ໂສຕສ຺ສ ປຕິ ປວຕ຺ຕຕິ ນາວາ ອິຕິ ປຕິໂສຕໍ, ປາສາທສ຺ສ ອນ຺ໂຕ ອນ຺ໂຕປາສາທໍ.

ອພ຺ຍຍີຠາວມິຈ຺ຈເນນ ກ຺ວຕ຺ໂຖ? ອໍວິຠຕ຺ຕີນ ມກາຣນ຺ຕາ ອພ຺ຍຍີຠາວາ.

໓໒໐. , ໓໓໕. ໂສ ນປຸໍສກລິງ຺ໂຄ.

ໂສ ອພ຺ຍຍີຠາວສມາໂສ ນປຸໍສກລິງ຺ໂຄວ ທຏ຺ຐພ຺ໂພ.

ກຸມາຣີສຸ ອຘິກິຈ຺ຈ ປວຕ຺ຕຕິ ກຖາ ອິຕິ ອຘິກຸມາຣິ, ວຘຸຍາ ສມີເປ ປວຕ຺ຕຕິ ກຖາ ອິຕິ ອຸປວຘຸ, ຄງ຺ຄາຍ ສມີເປ ປວຕ຺ຕຕິ ກຖາ ອິຕິ ອຸປຄງ຺ຄໍ, ມຓິກາຍ ສມີເປ ປວຕ຺ຕຕິ ກຖາ ອິຕິ ອຸປມຓິກໍ.

໓໒໑. , ໓໔໙. ທິຄຸສ຺ເສກຕ຺ຕໍ.

ທິຄຸສ຺ສ ສມາສສ຺ສ ເອກຕ຺ຕໍ ໂຫຕິ, ນປຸໍສກລິງ຺ຄຕ຺ຕຎ຺ຈ.

ຕໂຍ ໂລກາ ຕິໂລກໍ, ຕໂຍ ທຓ຺ຑາ ຕິທຓ຺ຑໍ, ຕີຓິ ນຍນານິ ຕິນຍນໍ, ຕໂຍ ສິງ຺ຄາ ຕິສິງ຺ຄໍ. ຈຕສ຺ໂສ ທິສາ ຈຕຸທ຺ທິສໍ, ປຎ຺ຈ ອິນ຺ທ຺ຣິຍານິ ປຎ຺ຈິນ຺ທ຺ຣິຍໍ.

໓໒໒. , ໓໕໙. ຕຖາ ທ຺ວນ຺ເທ ປາຓິ ຕູຣິຍ ໂຍຄ຺ຄເສນງ຺ຄຂຸທ຺ທຊນ຺ຕຸກ ວິວິຘວິຣຸທ຺ຘ ວິສຠາຄຕ຺ຖາທີນຎ຺ຈ.

ຕຖາ ທ຺ວນ຺ເທ ສມາເສ ປາຓິ ຕູຣິຍ ໂຍຄ຺ຄ ເສນງ຺ຄຂຸທ຺ທຊນ຺ຕຸກ ວິວິຘວິຣຸທ຺ຘ ວິສຠາຄຕ຺ຖອິຈ຺ເຈວມາທີນໍ ເອກຕ຺ຕໍ ໂຫຕິ, ນປຸໍສກລິງ຺ຄຕ຺ຕຎ຺ຈ.

ຕໍ ຍຖາ? ຈກ຺ຂຸ ຈ ໂສຕຎ຺ຈ ຈກ຺ຂຸໂສຕໍ, ມຸຂຎ຺ຈ ນາສິກາ ຈ ມຸຂນາສິກໍ, ຉວິ ຈ ມໍສຎ຺ຈ ໂລຫິຕຎ຺ຈ ຉວິມໍສໂລຫິຕໍ. ເອວໍ ປາຓ຺ຍງ຺ຄຕ຺ເຖ.

ສງ຺ໂຂ ຈ ປຓໂວ ຈ ສງ຺ຂປຓວໍ, ຄີຕຎ຺ຈ ວາທິຕຎ຺ຈ ຄີຕວາທິຕໍ, ທທ຺ທຣິ ຈ ຑິຓ຺ຑິໂມ ຈ ທທ຺ທຣິຑິຓ຺ຑິມໍ. ເອວໍ ຕູຣິຍງ຺ຄຕ຺ເຖ.

ຜາໂລ ຈ ປາຈນຎ຺ຈ ຜາລປາຈນໍ, ຍຸຄຎ຺ຈ ນງ຺ຄລຎ຺ຈ ຍຸຄນງ຺ຄລໍ. ເອວໍ ໂຍຄ຺ຄງ຺ຄຕ຺ເຖ.

ອສິ ຈ ຈມ຺ມຎ຺ຈ ອສິຈມ຺ມໍ, ຘນຸ ຈ ກລາໂປ ຈ ຘນຸກລາປໍ, ຫຕ຺ຖີ ຈ ອສ຺ໂສ ຈ ຫຕ຺ຖິອສ຺ສໍ, ຣໂຖ ຈ ປຕ຺ຕິໂກ ຈ ຣຖປຕ຺ຕິກໍ. ເອວໍ ເສນງ຺ຄຕ຺ເຖ.

ຑໍສາ ຈ ມກສາ ຈ ຑໍສມກສໍ, ກຸນ຺ໂຖ ຈ ກິປິລ຺ລິໂກ ຈ ກຸນ຺ຖກິປິລ຺ລິກໍ, ກີໂຏ ຈ ສຣີສໂປ ຈ ກີຏສຣີສປໍ. ເອວໍ ຂຸທ຺ທຊນ຺ຕຸກຕ຺ເຖ.

ອຫິ ຈ ນກຸໂລ ຈ ອຫິນກຸລໍ, ພິຬາໂຣ ຈ ມູສິໂກ ຈ ພິຬາຣມູສິກໍ, ກາໂກ ຈ ອຸລູໂກ ຈ ກາໂກລູກໍ. ເອວໍ ວິວິຘວິຣຸທ຺ຘຕ຺ເຖ.

ສີລຎ຺ຈ ປຎ຺ຎາຓຎ຺ຈ ສີລປຎ຺ຎາຓໍ, ສມໂຖ ຈ ວິປສ຺ສນາ ຈ ສມຖວິປສ຺ສນໍ, ວິຊ຺ຊາ ຈ ຈຣຓຎ຺ຈ ວິຊ຺ຊາຈຣຓໍ. ເອວໍ ວິສຠາຄຕ຺ເຖ.

ອາທິຄ຺ຄຫຓໍ ກິມຕ຺ຖໍ? ທາສີ ຈ ທາໂສ ຈ ທາສິທາສໍ, ອິຕ຺ຖີ ຈ ປຸມາ ຈ ອິຕ຺ຖິປຸມໍ, ປຕ຺ໂຕ ຈ ຈີວຣຎ຺ຈ ປຕ຺ຕຈີວຣໍ, ຉຕ຺ຕຎ຺ຈ ອຸປາຫນາ ຈ ຉຕ຺ຕຸປາຫນໍ, ຕິກຎ຺ຈ ຈຕຸກ຺ກຎ຺ຈ ຕິກຈຕຸກ຺ກໍ, ເວໂນ ຈ ຣຖກາໂຣ ຈ ເວນຣຖກາຣໍ, ສາກຸຓິໂກ ຈ ມາຄວິໂກ ຈ ສວກຸຓິກມາຄວິກໍ, ທີໂຆ ຈ ມຊ຺ຌິໂມ ຈ ທີຆມຊ຺ຌິມໍ ອິຈ຺ເຈວມາທິ.

໓໒໓. , ໓໖໐. ວິຠາສາ ຣຸກ຺ຂ ຕິຓ ປສຸຂ ນ ຘຎ຺ຎ ຊນປທາທີນຎ຺ຈ.

ຣຸກ຺ຂຕິຓ ປສຸ ຘນ ຘຎ຺ຎ ຊນປທອິຈ຺ເຈວມາທີນໍ ວິຠາສາ ເອກຕ຺ຕໍ ໂຫຕິ, ນປຸໍສກລິງ຺ຄຕ຺ຕຎ຺ຈ ທ຺ວນ຺ເທ ສມາເສ. ອສ຺ສຕ຺ໂຖ ຈ ກປີຕໂນ ຈ ອສ຺ສຕ຺ຖກປີຕນໍ, ອສ຺ສຕ຺ຖກປີຕນາ ວາ. ອຸສີຣຎ຺ຈ ພີຣຓຎ຺ຈ ອຸສີຣພີຣຓໍ, ອຸສີຣພີຣຓາ ວາ. ອໂຊ ຈ ເອຬໂກ ຈ ອເຊຬກໍ, ອເຊຬກາ ວາ. ຫິຣຎ຺ຎຎ຺ຈ ສຸວຓ຺ຓຎ຺ຈ ຫິຣຎ຺ຎສຸວຓ຺ຓໍ, ຫິຣຎ຺ຎສຸວຓ຺ຓາ ວາ. ສາລິ ຈ ຍໂວ ຈ ສາລິຍວໍ, ສາລິຍວາ ວາ. ກາສີ ຈ ໂກສລາ ຈ ກາສິໂກສລໍ, ກາສິໂກສລາ ວາ.

ອາທິຄ຺ຄຫຓໍ ກິມຕ຺ຖໍ? ສາວຊ຺ຊຎ຺ຈ ອນວຊ຺ຊຎ຺ຈ ສາວຊ຺ຊານວຊ຺ຊໍ, ສາວຊ຺ຊາ ນວຊ຺ຊາ ວາ. ຫີນຎ຺ຈ ປຓີຕຎ຺ຈ ຫີນປຓີຕໍ. ຫີນປຓີຕາ ວາ. ກຓ຺ໂຫ ຈ ສຸກ຺ໂກ ຈ ກຓ຺ຫສຸກ຺ກໍ, ກຓ຺ຫສຸກ຺ກາ ວາ.

໓໒໔. , ໓໓໙. ທ຺ວິປເທ ຕຸລ຺ຍາຘິກຣເຓ ກມ຺ມຘາຣໂຍ.

ທ຺ເວ ປທານິ ຕຸລ຺ຍາຘິກຣຓານິ ຍທາ ສມສ຺ຍນ຺ເຕ, ຕທາ ໂສ ສມາໂສ ກມ຺ມຘາຣຍສຎ຺ໂຎ ໂຫຕິ.

ມຫນ຺ໂຕ ຈ ໂສ ປຸຣິໂສ ຈາຕິ ມຫາປຸຣິໂສ, ກຓ຺ໂຫ ຈ ໂສ ສປ຺ໂປ ຈາຕິ ກຓ຺ຫສປ຺ໂປ, ນີລຎ຺ຈ ຕໍ ອຸປ຺ປລຎ຺ຈາຕິ ນີລຸປ຺ປລໍ, ໂລຫິຕຎ຺ຈ ຕໍ ຈນ຺ທນຎ຺ຈາຕິ ໂລຫິຕຈນ຺ທນໍ, ພ຺ຣາຫ຺ມຓີ ຈ ສາ ທາຣິກາ ຈາຕິ ພ຺ຣາຫ຺ມຓທາຣິກາ, ຂຕ຺ຕິຍາ ຈ ສາ ກຎ຺ຎາ ຈາຕິ ຂຕ຺ຕິຍກຎ຺ຎາ.

ກມ຺ມຘາຣຍອິຈ຺ຈເນນ ກ຺ວຕ຺ໂຖ? ກມ຺ມຘາຣຍສຎ຺ເຎ ຈ.

໓໒໕. , ໓໔໘. ສງ຺ຂ຺ຍາປຸພ຺ໂພ ທິຄຸ.

ສງ຺ຂ຺ຍາປຸພ຺ໂພ ກມ຺ມຘາຣຍສມາໂສ ທິຄຸສຎ຺ໂຎ ໂຫຕິ.

ຕີຓິ ມລານິ ຕິມລໍ, ຕີຓິ ຜລານິ ຕິຜລໍ, ຕໂຍ ໂລກາ ຕິໂລກໍ, ຕໂຍ ທຓ຺ຑາ ຕິທຓ຺ຑໍ, ຈຕສ຺ໂສ ທິສາ ຈຕຸທ຺ທິສໍ, ປຎ຺ຈ ອິນ຺ທ຺ຣິຍານິ ປຎ຺ຈິນ຺ທ຺ຣິຍໍ, ສຕ຺ຕ ໂຄທາວຣິໂຍ ສຕ຺ຕໂຄທາວຣໍ.

ທິຄຸອິຈ຺ຈເນນ ກ຺ວຕ຺ໂຖ? ທິຄຸສ຺ເສ ກຕ຺ຕໍ.

໓໒໖. , ໓໔໑. ອຸເຠ ຕປ຺ປຸຣິສາ.

ອຸເຠ ທິຄຸກມ຺ມຘາຣຍສມາສາ ຕປ຺ປຸຣິສສຎ຺ຎາ ໂຫນ຺ຕິ.

ນ ພ຺ຣາຫ຺ມໂຓ ອພ຺ຣາຫ຺ມໂຓ, ນ ວສໂລ ອວສໂລ, ນ ຠິກ຺ຂຸ ອຠິກ຺ຂຸ, ນ ປຎ຺ຈວສ຺ສໍ ອປຎ຺ຈວສ຺ສໍ, ນ ປຎ຺ຈປູລີ ອປຎ຺ຈປູລີ, ນ ສຕ຺ຕໂຄທາວຣໍອສຕ຺ຕໂຄທາວຣໍ, ນ ທສຄວໍ ອທສຄວໍ, ນ ປຎ຺ຈຄວໍ ອປຎ຺ຈຄວໍ.

ຕປ຺ປຸຣິສອິຈ຺ຈເນນ ກ຺ວຕ຺ໂຖ? ອຕ຺ຕໍ ນສ຺ສ ຕປ຺ປຸຣິເສ.

໓໒໗. , ໓໕໑. ອມາທໂຍ ປຣປເທຠິ.

ຕາ ອມາທໂຍ ນາເມຫິ ປຣປເທຠິ ຍທາ ສມສ຺ຍນ຺ເຕ, ຕທາ ໂສ ສມາໂສ ຕປ຺ປຸຣິສສຎ຺ໂຎ ໂຫຕິ.

ຠູມິໍ ຄໂຕ ຠູມິຄໂຕ, ສພ຺ພຣຕ຺ຕິໍ ໂສຠໂຓ ສພ຺ພຣຕ຺ຕິໂສຠໂຓ. ອປາຍໍ ຄໂຕ ອປາຍຄໂຕ, ອິສ຺ສເຣນ ກຕໍ ອິສ຺ສຣກຕໍ, ສລ຺ເລນ ວິທ຺ໂຘ ສລ຺ລວິທ຺ໂຘ, ກຖິນສ຺ສ ທຸສ຺ສໍ ກຖິນທຸສ຺ສໍ, ອາຄນ຺ຕຸກສ຺ສ ຠຕ຺ຕໍ ອາຄນ຺ຕຸກຠຕ຺ຕໍ, ເມຖຸນາ ອເປໂຕ ເມຖຸນາເປໂຕ, ໂຈຣາ ຠຍໍ ໂຈຣຠຍໍ, ຣຎ຺ໂຎ ປຸຕ຺ໂຕ ຣາຊປຸຕ຺ໂຕ, ຘຎ຺ຎານໍ ຣາສິ ຘຎ຺ຎຣາສິ, ຣູເປ ສຎ຺ຎາ ຣູປສຎ຺ຎາ, ສໍສາເຣ ທຸກ຺ຂໍ ສໍສາຣທຸກ຺ຂໍ.

໓໒໘. , ໓໕໒. ອຎ຺ຎປທຕ຺ເຖສຸ ພຫຸພ຺ພີຫິ.

ອຎ຺ເຎສໍ ປທານໍ ອຕ຺ເຖສຸ ທ຺ເວ ນາມານິ ພຫູນິ ນາມານິ ຍທາ ສມສ຺ຍນ຺ເຕ, ຕທາ ໂສ ສມາໂສ ພຫຸພ຺ພີຫິ ສຎ຺ໂຎ ໂຫຕິ.

ອາຄຕາ ສມຓາ ອິມໍ ສງ຺ຆາຣາມໍ ໂສຍໍ ອາຄຕສມໂຓ, ສງ຺ຆາຣາໂມ. ຊິຕານິ ອິນ຺ທ຺ຣິຍານິ ອເນນ ສມເຓນ ໂສຍໍ ຊິຕິນ຺ທ຺ຣິໂຍ, ສມໂຓ. ທິນ຺ໂນ ສຸງ຺ໂກ ຍສ຺ສ ຣຎ຺ໂຎ ໂສຍໍ ທິນ຺ນສຸງ຺ໂກ, ຣາຊາ. ນິຄ຺ຄຕາ ຊນາ ອສ຺ມາ ຄາມາ ໂສຍໍ ນິຄ຺ຄຕຊໂນ, ຄາໂມ. ຉິນ຺ໂນ ຫຕ຺ໂຕ ຍສ຺ສ ປຸຣິສສ຺ສ ໂສຍໍ ຉິນ຺ນຫຕ຺ໂຖ, ປຸຣິໂສ. ສມ຺ປນ຺ນານິ ສສ຺ສານິ ຍສ຺ມິໍ ຊນປເທ ໂສຍໍ ສມ຺ປນ຺ນສສ຺ໂສ, ຊນປໂທ.

ນິຄ຺ໂຣຘສ຺ສ ປຣິມຓ຺ຑໂລ ນິຄ຺ໂຣຘປຣິມຓ຺ຑໂລ, ນິຄ຺ໂຣຘປຣິມຓ຺ຑໂລ ອິວ ປຣິມຓ຺ຑໂລ ໂຍ ຣາຊກຸມາໂຣ ໂສຍໍ ນິຄ຺ໂຣຘປຣິມຓ຺ຑໂລ. ອຖ ວາ ນິຄ຺ໂຣຘປຣິມຓ຺ຑໂລ ອິວ ປຣິມຓ຺ຑໂລ ຍສ຺ສ ຣາຊກຸມາຣສ຺ສ ໂສຍໍ ນິຄ຺ໂຣຘປຣິມຓ຺ຑໂລ, ຣາຊກຸມາໂຣ.

ຈກ຺ຂຸໂນ ຠູໂຕ ຈກ຺ຂຸຠູໂຕ, ຈກ຺ຂຸຠູໂຕ ອິວ ຠູໂຕ ໂຍ ຠຄວາ ໂສຍໍ ຈກ຺ຂຸຠູໂຕ, ຠຄວາ.

ສຸວຓ຺ຓສ຺ສ ວຓ຺ໂຓ ສຸວຓ຺ຓວຓ຺ໂຓ, ສຸວຓ຺ຓວຓ຺ໂຓ ວິຍ ວຓ຺ໂຓ ຍສ຺ສ ຠຄວໂຕ ໂສຍໍ ສຸວຓ຺ຓວຓ຺ໂຓ, ຠຄວາ.

ພ຺ຣຫ຺ມຸໂນ ສໂຣ ພ຺ຣຫ຺ມສ຺ສໂຣ, ພ຺ຣຫ຺ມສ຺ສໂຣ ວິຍ ສໂຣ ຍສ຺ສ ຠຄວໂຕ ໂສຍໍ ພ຺ຣຫ຺ມສ຺ສໂຣ, ຠຄວາ.

ສຍໍ ປຕິຕ ປຓ຺ຓ ປຸປ຺ຜຜລວາຍຸໂຕຍາຫາຣາຕິ ປຓ຺ຓຎ຺ຈ ປຸປ຺ຜຎ຺ຈ ຜລຎ຺ຈ ປຓ຺ຓປຸປ຺ຜຜລານິ, ສຍເມວ ປຕິຕານິ ສຍໍປຕິຕານິ, ສຍໍປຕິຕານິ ຈ ຕານິ ປຓ຺ຓປຸປ຺ຜຜລານິ ເຈຕິ ສຍໍປຕິຕປຓ຺ຓປຸປ຺ຜຜລານິ ວາຍຸ ຈ ໂຕຍຎ຺ຈ ວາຍຸໂຕຍານິ, ສຍໍປຕິຕປຓ຺ຓປຸປ຺ຜຜລານິ ຈ ວາຍຸໂຕຍານິ ຈ ສຍໍປຕິຕປຓ຺ຓປຸປ຺ຜຜລວາຍຸໂຕຍານິ. ສຍໍປຕິຕປຓ຺ຓປຸປ຺ຜຜລວາຍຸໂຕຍານິ ອາຫາຣາ ເຍສໍ ເຕ ສຍໍປຕິຕປຓ຺ຓປຸປ຺ຜຜລວາຍຸໂຕຍາຫາຣາ, ອິສໂຍ. ຍເມຕ຺ຖ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕເມວ. ອຍໍ ປນ ທ຺ວນ຺ທກມ຺ມຘາຣຍຄພ຺ໂຠ ຕຸລ຺ຍາຘິກຣຓປຫຸພ຺ພີຫິ.

ອຖ ວາ – ສຍໍປຕິຕປຓ຺ຓປຸປ຺ຜຜລວາຍຸໂຕເຍຫິ ອາຫາຣາ ເຍສໍ ເຕ ສຍໍປຕິຕປຓ຺ຓປຸປ຺ຜຜລວາຍຸໂຕຍາຫາຣາ. ອຍໍ ປນ ຠິນ຺ນາຘິກຣຓພຫຸພ຺ພີຫິ.

ນານາ ທຸມປຕິຕ ປຸປ຺ຜວາສິຕ ສານູຕິ ນານາປກາຣາ ທຸມາ ນານາທຸມາ, ນານາທຸເມຫິ ປຕິຕານິ ນານາທຸມປຕິ ຕານິ, ນານາທຸມປຕິຕານິ ຈ ຕານິ ປຸປ຺ຜານິ ເຈຕິ ນານາທຸມປຕິຕປຸປ຺ຜານິ, ນານາທຸມປຕິຕປຸປ຺ເຜຫິ ວາສິຕາ ນານາທຸມປຕິຕປຸປ຺ຜວາສິຕາ, ນານາທຸມປຕິຕປຸປ຺ຜວາສິຕາ ສານູ ຍສ຺ສ ປພ຺ພຕຣາຊສ຺ສ ໂສຍໍ ນານາທຸມປຕິຕປຸປ຺ຜວາສິຕສານຸ, ປພ຺ພຕຣາຊາ. ອຍໍ ປນ ກມ຺ມຘາຣຍຕປ຺ປຸຣິສຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ອຖ ວາ – ວາສິຕາ ສານູ ວາສິຕສານຸ, ສາເປກ຺ຂຕ຺ເຕ ສຕິປິ ຄມກຕ຺ຕາ ສມາໂສ. ນານາທຸມປຕິຕປຸປ຺ເຜຫິ ວາສິຕສານູ ຍສ຺ສ ປພ຺ພຕຣາຊສ຺ສ ໂສຍໍ ນານາທຸມປຕິຕປຸປ຺ຜວາສິຕສານຸ, ປພ຺ພຕຣາຊາ. ອຍໍ ປນ ຠິນ຺ນາຘິກຣຓພຫຸພ຺ພີຫິ.

ພ຺ຍາລມ຺ພມ຺ພຸຘຣພິນ຺ທຸຈຸມ຺ພິຕກູໂຏຕິ ອມ຺ພຸໍ ຘາເຣຕີຕິ ອມ຺ພຸຘໂຣ, ໂກ ໂສ? ປຊ຺ຊຸນ຺ໂນ. ວິວິຘາ ອາລມ຺ໂພ ພ຺ຍາລມ຺ໂພ, ພ຺ຍາລມ຺ໂພ ຈ ໂສ ອມ຺ພຸຘໂຣ ຈາຕິ ພ຺ຍາລມ຺ພມ຺ພຸຘໂຣ, ພ຺ຍາລມ຺ພມ຺ພຸຘຣສ຺ສ ພິນ຺ທູ ພ຺ຍາລມ຺ພມ຺ພຸຘຣພິນ຺ທູ, ພ຺ຍາລມ຺ພມ຺ພຸຘຣພິນ຺ທູຫິ ຈຸມ຺ພິໂຕ ພ຺ຍາລມ຺ພມ຺ພຸຘຣພິນ຺ທຸຈຸມ຺ພິໂຕ, ພ຺ຍາລມ຺ພມ຺ພຸເຣພິນ຺ທຸຈຸມ຺ພິໂຕ ກູໂຏ ຍສ຺ສ ປພ຺ພຕຣາຊສ຺ສ ໂສຍໍ ພ຺ຍາລມ຺ພມ຺ພຸຘຣພິນ຺ທຸຈຸມ຺ພິຕກູໂຏ. ອຍໍ ປນ ກມ຺ມຘາຣຍຕປ຺ປຸຣິສຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ອຖ ວາ – ຈຸມ຺ພິໂຕ ກູໂຏ ຈຸມ຺ພິຕກູໂຏ, ສາເປກ຺ຂຕ຺ເຕ ສຕິປິ ຄມກຕ຺ຕາ ສມາໂສ. ພ຺ຍາລມ຺ພມ຺ພຸຘຣພິນ຺ທູຫິ ຈຸມ຺ພິຕກູໂຏ ຍສ຺ສ ປພ຺ພຕຣາຊສ຺ສ ໂສຍໍ ພ຺ຍາລມ຺ພມ຺ພຸຘຣພິນ຺ທຸຈຸມ຺ພິຕກູໂຏ. ອຍໍ ປນ ຠິນ຺ນາຘິກຣຓພຫຸພ຺ພີຫິ.

ອມິຕ ພລ ປຣກ຺ກມຊຸຕີຕິ ນ ມິຕາ ອມິຕາ, ພລຎ຺ຈ ປຣກ຺ກໂມ ຈ ຊຸຕິ ຈ ພລປຣກ຺ກມຊຸຕິໂຍ, ອມິຕາ ພລປຣກ຺ກມຊຸຕິໂຍ ຍສ຺ສ ໂສຍໍ ອມິຕພລປຣກ຺ກມຊຸຕິ, ອຍໍ ປນ ກມ຺ມຘາຣຍທ຺ວນ຺ທຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ປີໂຓຣກ຺ຂໍສ ພາຫູຕິ ອຸໂຣ ຈ ອກ຺ຂຎ຺ຈ ອໍໂສ ຈ ພາຫຸ ຈ ອຸຣກ຺ຂໍສພາຫໂວ, ປີຓາ ອຸຣກ຺ຂໍສພາຫໂວ ຍສ຺ສ ຠຄວໂຕ ໂສຍໍ ປີໂຓຣກ຺ຂໍສພາຫຸ. ອຍໍ ປນ ທ຺ວນ຺ທວພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ປີຓ ຄຓ຺ຑ ວທນ ຖນູຣຸຊຆນາຕິ ຄຓ຺ໂຑ ຈ ວທນຎ຺ຈ ຖໂນ ຈ ອູຣຸ ຈ ຊຆນຎ຺ຈ ຄຓ຺ຑວທນຖນູຣຸຊຆນາ, ປີຓາ ຄຓ຺ຑວທນຖນູຣຸຊຆນາ ຍສ຺ສາ ສາຍໍ ປີຓຄຓ຺ຑວທນຖນູຣຸຊຆນາ. ອຍມ຺ປິ ທ຺ວນ຺ທຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ວວຣ ສຸຣາສຸຣ ຄຣຸຑ ມນຸຊ ຠຸຊຄ ຄນ຺ຘພ຺ພ ມກຸຏ ກູຏ ຈຸມ຺ພິຕ ເສລສງ຺ຆຏ຺ຏິຕ ຈຣໂຓຕິ ສຸຣາ ຈ ອສຸຣາ ຈ ຄຣຸຑາ ຈ ມນຸຊາ ຈ ຠຸຊຄາ ຈ ຄນ຺ຘພ຺ພາ ຈ ສຸຣາສຸຣຄຣຸຑມນຸຊຠຸຊຄຄນ຺ຘພ຺ພາ, ປວຣາ ຈ ເຕ ສຸຣາສຸຣຄຣຸຑມນຸຊຠຸຊຄ ຄນ຺ຘພ຺ພາ ເຈຕິ ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພາ, ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພານໍ ມກຸຏານິ ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏານິ, ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏານໍ ກູຏານິ ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູຏານິ, ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູເຏສຸ ຈຸມ຺ພິຕາ ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕາ, ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕາ ຈ ເຕ ເສລາ ຈາຕິ ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕເສລາ, ປວຣສຸຣາສຸຣ ຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕເສເລຫິ ສງ຺ຆຏ຺ຏິຕາ ປວຣສຸຣາສຸຣ ຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕເສລສງ຺ຆຏ຺ຏິຕາ, ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕເສລສງ຺ຆຏ຺ຏິຕາ ຈຣຓາ ຍສ຺ສ ຕຖາຄຕສ຺ສ ໂສຍໍ ປວຣສຸຣາສຸຣຄຣຸຑມນຸຊຠຸຊຄຄນ຺ຘພ຺ພມກຸຏກູຏຈຸມ຺ພິຕເສລສງ຺ຆຏ຺ຏິຕຈຣໂຓ, ຕຖາຄໂຕ, ອຍໍ ປນ ທ຺ວນ຺ທກມ຺ມຘາຣຍຕປ຺ປຸຣິສຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ອຖ ວາ–ສງ຺ຆຏ຺ຏິຕາ ຈຣຓາ ສງ຺ຆຏ຺ຏິຕຈຣຓາ, ສາເປກ຺ຂຕ຺ເຕ ສຕິປິ ຄມກຕ຺ຕາ ສມາໂສ. ປວຣສຸຣາສຸຣ ຄຣຸຑມນຸຊຠຸຊຄ ຄນ຺ຘພ຺ພມກຸຏກູຏຈຸມ຺ພິຕເສເລຫິ ສງ຺ຆຏ຺ຏິຕຈຣຓາ ຍສ຺ສ ຕຖາຄຕສ຺ສ ໂສຍໍ ປວຣສຸຣາສຸຣຄຣຸຑ ມນຸຊຠຸຊຄ ຄນ຺ຘພ຺ພມກຸຏກູຏຈຸມ຺ພິຕເສລສງ຺ຆຏ຺ຏິຕ ຈຣໂຓ. ອຍໍ ປນ ຠິນ຺ນາຘິກຣຓພຫຸພ຺ພີຫິ.

ຈຕຸທ຺ທິໂສຕິ ຈຕສ຺ໂສ ທິສາ ຍສ຺ສ ໂສຍໍ ຈຕຸທ຺ທິໂສ, ຠຄວາ.

ປຎ຺ຈຈກ຺ຂູຕິ ປຎ຺ຈ ຈກ຺ຂູນິ ຍສ຺ສ ຕຖາຄຕສ຺ສ ໂສຍໍ ປຎ຺ຈຈກ຺ຂຸ, ຕຖາຄໂຕ.

ທສພໂລຕິ ທສ ພລານິ ຍສ຺ສ ໂສຍໍ ທສພໂລ, ຠຄວາ.

ອນນ຺ຕຎາໂຓຕິ ນສ຺ສ ອນ຺ໂຕ ອນນ຺ຕໍ, ອນນ຺ຕໍ ຎາຓໍ ຍສ຺ສ ຕຖາຄຕສ຺ສ ໂສຍໍ ອນນ຺ຕຎາໂຓ, ຕຖາຄໂຕ.

ອມິຕ ຆນ ສຣີໂຣຕິ ນ ມິຕໍ ອມິຕໍ, ຆນໍ ເອວ ສຣີຣໍ ຆນສຣີຣໍ, ອມິຕໍ ຆນສຣີຣໍ ຍສ຺ສ ຕຖາຄຕສ຺ສ ໂສຍໍ ອມິຕຆນສຣີໂຣ, ຕຖາຄໂຕ.

ອມິຕ ພລ ປຣກ຺ກມ ປຕ຺ໂຕຕິ ນ ມິຕາ ອມິຕາ, ພລຎ຺ຈ ປຣກ຺ກໂມ ຈ ພລປຣກ຺ກມາ, ອມິຕາ ເອວ ພລປຣກ຺ກມາ ອມິຕພລປຣກ຺ກມາ, ອມິຕພລປຣກ຺ກມາ ປຕ຺ຕາ ເຍນ ໂສຍໍ ອມິຕພລປຣກ຺ກມປຕ຺ໂຕ, ຠຄວາ. ອຍໍ ປນ ກມ຺ມຘາຣຍທ຺ວນ຺ທຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ມຕ຺ຕ ຠມຣ ຄຓ ຈຸມ຺ພິຕ ວິກສິຕປຸປ຺ຜວລ຺ລິນາຄຣຸກ຺ໂຂ ປໂສຠິຕ ກນ຺ທໂຣຕິ ມຕ຺ຕາ ເອວ ຠມຣາ ມຕ຺ຕຠມຣາ, ມຕ຺ຕຠມຣານໍ ຄຓາ ມຕ຺ຕຠມຣຄຓາ, ມຕ຺ຕຠມຣຄເຓຫິ ຈຸມ຺ພິຕານິ ມຕ຺ຕຠມຣຓຈຸມ຺ພິຕານິ, ວິກສິຕານິ ເອວ ປຸປ຺ຜານິ ວິກສິຕປຸປ຺ຜານິ, ມຕ຺ຕຠມຣຄຓຈຸມ຺ພິຕານິ ວິກສິຕປຸປ຺ຜານິ ເຍສໍ ເຕຫິ ມຕ຺ຕຠມຣຄຓຈຸມ຺ພິຕວິກສິຕປຸປ຺ຜາ, ວລ຺ລິ ຈ ນາຄຣຸກ຺ໂຂ ຈ ມລ຺ລິນາຄຣຸກ຺ຂາ, ມຕ຺ຕຠມຣຄຓຈຸມ຺ພິຕວິກສິຕປຸປ຺ຜາ ຈ ເຕ ວລ຺ລິນາຄຣຸກ຺ຂາ ເຈຕິ ມຕ຺ຕຠມຣຄຓຈຸມ຺ພິຕວິກສິຕປຸປ຺ຜວລ຺ລິນາຄຣຸກ຺ຂາ, ມຕ຺ຕຠມຣຄຓຈຸມ຺ພິຕວິກສິຕປຸປ຺ຜວລ຺ລິນາຄຣຸກ຺ເຂຫິ ອຸປໂສຠິຕານິ ມຕ຺ຕຠມຣຄຓຈຸມ຺ພິຕວິກສິຕປຸປ຺ຜວລ຺ລິນາຄຣຸກ຺ໂຂ ປໂສຠິຕານິ, ມຕ຺ຕຠມຣຄຓຈຸມ຺ພິຕວິກສິຕປຸປ຺ຜວລ຺ລິນາຄຣຸກ຺ໂຂ ປໂສຠິຕານິ ກນ຺ທຣານິ ຍສ຺ສ ປພ຺ພຕຣາຊສ຺ສ ໂສຍໍ ມຕ຺ຕຠມຣຄຓຈຸມ຺ພິຕວິກສິຕປຸປ຺ຜ ວລ຺ລິນາຄຣຸກ຺ໂຂ ປໂສ ຠິຕກນ຺ທໂຣ, ປພ຺ພຕຣາຊາ. ອຍໍ ປນ ທ຺ວນ຺ທກມ຺ມຘາຣຍຕປ຺ປຸຣິສຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ອຖ ວາ–ອຸປໂສຠິຕານິ ກນ຺ທຣານິ ອຸປໂສຠິຕກນ຺ທຣານິ, ສາເປກ຺ຂຕ຺ເຕ ສຕິປິ ຄມກຕ຺ຕາ ສມາໂສ. ມຕ຺ຕຠມຣຄຓຈຸມ຺ພິຕວິກສິຕປຸປ຺ຜວລ຺ລິນາຄຣຸກ຺ເຂຫິ ອຸປໂສຠິຕກນ຺ທຣານິ ຍສ຺ສ ປພ຺ພຕຣາຊສ຺ສ ໂສຍໍ ມຕ຺ຕຠມຣຄຓຈຸມ຺ພິຕວິກສິຕປຸປ຺ຜວລ຺ລິນາຄຣຸກ຺ໂຂ ປໂສຠິຕກນ຺ທໂຣ, ປພ຺ພຕຣາຊາ. ອຍໍ ປນ ຠິນ຺ນາຘິກຣຓພຫຸພ຺ພີຫິ.

ນານາ ຣຸກ຺ຂ ຕິຓ ປຕິຕ ປຸປ຺ໂຜປໂສຠິຕ ກນ຺ທໂຣຕິ ຣຸກ຺ໂຂ ຈ ຕິຓຎ຺ຈ ຣຸກ຺ຂຕິຓານິ, ນານາ ປກາຣານິ ເອວ ຣຸກ຺ຂຕິຓານິ ນານາຣຸກ຺ຂຕິຓານິ, ນານາຣຸກ຺ຂຕິເຓຫິ ປຕິຕານິ ນານາຣຸກ຺ຂຕິຓປຕິຕານິ, ນານາຣຸກ຺ຂຕິຓປຕິຕານິ ຈ ຕານິ ປຸປ຺ຜານິ ເຈຕິ ນານາຣຸກ຺ຂຕິຓປຕິຕປຸປ຺ຜານິ, ນານາຣຸກ຺ຂຕິຓປຕິຕປຸປ຺ເຜຫິ ອຸປໂສຠິຕານິ ນານາຣຸກ຺ຂຕິຓປຕິຕ ປຸປ຺ໂຜປໂສຠິຕານິ, ນານາຣຸກ຺ຂຕິຓປຕິຕປຸປ຺ໂຜປໂສຠິຕານິ ກນ຺ທຣານິ ຍສ຺ສ ປພ຺ພຕຣາຊສ຺ສ ໂສຍໍ ນານາຣຸກ຺ຂຕິຓປຕິຕປຸປ຺ໂຜປໂສຠິຕກນ຺ທໂຣ, ປພ຺ພຕຣາຊາ. ອຍໍ ປນ ທ຺ວນ຺ທກມ຺ມຘາຣຍຕປ຺ປຸຣິສຄພ຺ໂຠ ຕຸລ຺ຍາຘິກຣຓພຫຸພ຺ພີຫິ.

ອຖ ວາ–ອຸປໂສຠິຕານິ ເອວ ກນ຺ທຣານິ ອຸປໂສຠິຕກນ຺ທຣານິ, (ສາເປກ຺ຂຕ຺ເຕ ສຕິປິ ຄມກຕ຺ຕາ ສມາໂສ.) ນານາຣຸກ຺ຂຕິຓປຕິຕປຸປ຺ເຜຫິ ອຸປໂສຠິຕກນ຺ທຣານິ ຍສ຺ສ ປພ຺ພຕຣາຊສ຺ສ ໂສຍໍ ນານາຣຸກ຺ຂຕິຓປຕິຕປຸປ຺ໂຜປໂສຠິຕກນ຺ທໂຣ, ປພ຺ພຕຣາຊາ. ອຍໍ ປນ ຠິນ຺ນາຘິກຣຓພຫຸພ຺ພີຫິ.

ນານາ ມຸສລ ຜາລ ປພ຺ພຕ ຕຣຸ ກລິງ຺ຄຣ ສຣ ຘນຸຄທາສິ ໂຕມຣຫຕ຺ຖາຕິ ມຸສໂລ ຈ ຜາໂລ ຈ ປພ຺ພໂຕ ຈ ຕຣຸ ຈ ກລິງ຺ຄໂຣ ຈ ສໂຣ ຈ ຘນຸ ຈ ຄທາ ຈອສິ ຈ ໂຕມໂຣ, ຈ ມຸສລຜາລປພ຺ພຕຕຣຸກລິງ຺ຄຣສຣຘນຸຄທາສິໂຕມຣາ, ນານາ ປກາຣາ ເອວ ມຸສລຜາລປພ຺ພຕຕຣຸກລິງ຺ຄຣສຣຘນຸຄທາສິໂຕມຣາ ນານາມຸສລຜາລປພ຺ພຕຕຣຸກລິງ຺ຄຣສຣຘນຸຄທາສິໂຕມຣາ, ນານາມຸສລຜາລປພ຺ພຕຕຣຸກລິງ຺ຄຣສຣຘນຸຄທາສິໂຕມຣາ ຫຕ຺ເຖສຸ ເຍສໍ ເຕ ນານາມຸສລຜາລປພ຺ພຕຕຣຸກລິງ຺ຄຣ ສຣຘນຸຄທາສິໂຕມຣຫຕ຺ຖາ. ອຍໍ ປນ ທ຺ວນ຺ທກມ຺ມຘາຣຍຄພ຺ໂຠ ຠິນ຺ນາຘິກຣຓພຫຸພ຺ພີຫິ.

ພຫຸພ຺ພີຫິ ອິຈ຺ຈເນນ ກ຺ວຕ຺ໂຖ? ພຫຸພ຺ພີຫິມ຺ຫິ ຈ.

໓໒໙. , ໓໕໗. ນາມານໍ ສມຸຈ຺ຈໂຍ ທ຺ວນ຺ໂທ.

ນາມານໍ ເອກວິຠຕ຺ຕິການໍ ໂຍ ສມຸຈ຺ຈໂຍ, ໂສ ທ຺ວນ຺ທສຎ຺ໂຎ ໂຫຕິ.

ຈນ຺ທິມາ ຈ ສູຣິໂຍ ຈ ຈນ຺ທິມສູຣິຍາ, ສມໂຓ ຈ ພ຺ຣາຫ຺ມໂຓ ຈ ສມຓພ຺ຣາຫ຺ມຓາ, ສາຣິປຸຕ຺ໂຕ ຈ ໂມຄ຺ຄລ຺ລາໂນ ຈ ສາຣິປຸຕ຺ຕໂມຄ຺ຄລ຺ລານາ, ພ຺ຣາຫ຺ມໂຓ ຈ ຄຫປຕິໂກ ຈ ພ຺ຣາຫ຺ມຓຄຫປຕິກາ, ຍໂມ ຈ ວຣຸໂຓ ຈ ຍມວຣຸຓາ, ກຸເວໂຣ ຈ ວາສໂວ ຈ ກຸເວຣວາສວາ.

ທ຺ວນ຺ທອິຈ຺ຈເນນ ກ຺ວຕ຺ໂຖ? ທ຺ວນ຺ທຏ຺ຐາ ວາ.

໓໓໐. , ໓໔໐. ມຫຕໍ ມຫາ ຕຸລ຺ຍາຘິກຣເຓ ປເທ.

ເຕສໍ ມຫນ຺ຕສທ຺ທານໍ ມຫາອາເທໂສ ໂຫຕິ ຕຸລ຺ຍາຘິກຣເຓ ປເທ.

ມຫນ຺ໂຕ ຈ ໂສ ປຸຣິໂສ ຈາຕິ ມຫາປຸຣິໂສ, ມຫນ຺ຕີ ຈ ສາ ເທວີ ຈາຕິ ມຫາເທວີ, ມຫນ຺ຕຎ຺ຈ ຕໍ ພລຎ຺ຈາຕິ ມຫາພລໍ, ມຫນ຺ໂຕ ຈ ໂສ ນາໂຄ ຈາຕິ ມຫານາໂຄ, ມຫນ຺ໂຕ ຈ ໂສ ຍໂສ ຈາຕິ ມຫາຍໂສ, ມຫນ຺ຕຎ຺ຈ ຕໍ ປທຸມວນຎ຺ຈາຕິ ມຫາປທຸມວນໍ, ມຫນ຺ຕີ ຈ ສາ ນທີ ຈາຕິ ມຫານທີ, ມຫນ຺ໂຕ ຈ ໂສ ມຓິ ຈາຕິ ມຫາມຓິ, ມຫນ຺ໂຕ ຈ ໂສ ຄຫປຕິໂກ ຈາຕິ ມຫາຄຫປຕິໂກ, ມຫນ຺ຕຎ຺ຈ ຕໍ ຘນຎ຺ຈາຕິ ມຫາຘນໍ, ມຫນ຺ໂຕ ຈ ໂສ ປຸຎ຺ໂຎ ຈາຕິ ມຫາປຸຎ຺ໂຎ.

ພຫຸວຈນຄ຺ຄຫເຓນ ກ຺ວຈິ ມຫນ຺ຕ ສທ຺ທສ຺ສ ມຫາເທໂສ ໂຫຕິ. ມຫນ຺ຕຎ຺ຈ ຕໍ ຜລຎ຺ຈາຕິ ມຫປ຺ຜລໍ, ມຫພ຺ພລໍ, ເອວໍ ມຫທ຺ຘນໍ, ມຫພ຺ຠຍໍ.

໓໓໑. , ໓໕໓. ອິຕ຺ຖິຍໍ ຠາສິຕປຸມິຕ຺ຖີ ປຸມາວ ເຈ.

ອິຕ຺ຖິຍໍ ຕຸລ຺ຍາຘິກຣເຓ ປເທ ເຈ ຠາສິຕປຸມິຕ຺ຖີ ປຸມາວ ທຏ຺ຐພ຺ພາ.

ທີຆາ ຊງ຺ຆາ ຍສ຺ສ ໂສຍໍ ທີຆຊງ຺ໂຆ, ກລ຺ຍາຓຠຣິໂຍ, ປຫູຕປຎ຺ໂຎ.

ຠາສິຕປຸເປຕິ ກິມຕ຺ຖໍ? ພ຺ຣາຫ຺ມຓພນ຺ຘຸ ຈ ສາ ຠຣິຍາ ຈາຕິພ຺ຣາຫ຺ມຓພນ຺ຘຸຠຣິຍາ.

໓໓໒. , ໓໔໓. ກມ຺ມຘາຣຍສຎ຺ເຎ ຈ.

ກມ຺ມຘາຣຍສຎ຺ເຎ ຈ ສມາເສ ອິຕ຺ຖິຍໍ ຕຸລ຺ຍາຘິກຣເຓ ປເທ ປຸພ຺ເພ ຠາສິຕປຸມິຕ຺ຖີ ເຈ, ປຸມາວ ທຏ຺ຐພ຺ພາ. ພ຺ຣາຫ຺ມຓທາຣິກາ, ຂຕ຺ຕິຍກຎ຺ຎາ, ຂຕ຺ຕິຍກຸມາຣິກາ.

ຠາສິຕປຸເມຕິ ກິມຕ຺ຖໍ? ຂຕ຺ຕິຍພນ຺ຘຸທາຣິກາ, ພ຺ຣາຫ຺ມຓພນ຺ຘຸທາຣິກາ.

໓໓໓. , ໓໔໔. ອຕ຺ຕໍ ນສ຺ສ ຕປ຺ປຸຣິເສ.

ນສ຺ສ ປທສ຺ສ ຕປ຺ປຸຣິເສ ອຸຕ຺ຕຣປເທ ອຕ຺ຕໍ ໂຫຕິ.

ນພ຺ຣາຫ຺ມໂຓ ອພ຺ຣາຫ຺ມໂຓ, ອວສໂລ, ອຠິກ຺ຂຸ, ອປຎ຺ຈວສ຺ສໍ, ອປຎ຺ຈຄວໍ.

໓໓໔. , ໓໔໕. ສເຣ ອນ.

ນສ຺ສ ປທສ຺ສ ຕປ຺ປຸຣິເສ ອນ ອາເທໂສ ໂຫຕິ ສເຣ ປເຣ.

ນ ອສ຺ໂສ ອນສ຺ໂສ, ອນິສ຺ສໂຣ, ອນຣິໂຍ.

໓໓໕. , ໓໔໖. ກທ ກຸສ຺ສ.

ກຸອິຈ຺ເຈຕສ຺ສ ກທ ໂຫຕິ ສເຣ ປເຣ.

ກຸຈ຺ຉິຕໍ ອນ຺ນໍ ກທນ຺ນໍ, ກຸຈ຺ຉິຕໍ ອສນໍ ກທສ຺ສນໍ.

ສເຣຕິ ກິມຕ຺ຖໍ? ກຸຈ຺ຉິຕາ ທາຣາ ເຍສໍ (ອປຸຎ຺ຎກາຣານໍ) ເຕ ໂຫນ຺ຕີຕິ ກຸທາຣາ, ກຸຊນາ. ເອວໍ ກຸປຸຕ຺ຕາ, ກຸເຄຫາ, ກຸວຕ຺ຖາ, ກຸທາສາ.

໓໓໖. , ໓໔໗. ກາ’ປ຺ປຕ຺ເຖສຸ ຈ.

ກຸອິຈ຺ເຈຕສ຺ສ ກາ ໂຫຕິ ອປ຺ປຕ຺ເຖສຸ ຈ.

ກາລວຓໍ, ກາປຸປ຺ຜໍ.

ພຫຸວຈນຄ຺ຄຫຓໍ ກິມຕ຺ຖໍ? ກຸອິຈ຺ເຈຕສ຺ສ ອນປ຺ປຕຕ຺ເຖສຸປິ ກ຺ວຈິ ກາ ໂຫຕິ, ກາປຸຣິສາ.

໓໓໗. , ໓໕໐. ກ຺ວຈິ ສມາສນ຺ຕຄຕານມກາຣນ຺ໂຕ.

ສມາສນ຺ຕຄຕານໍ ນາມານມນ຺ໂຕ ສໂຣ ກ຺ວຈິ ອກາໂຣ ໂຫຕິ.

ເທວານໍ ຣາຊາ ເທວຣາໂຊ, ເທວຣາຊາ, ເທວານໍ ສຂາ ເທວສໂຂ, ເທວສຂາ, ປຎ຺ຈ ອຫານິ ປຎ຺ຈາຫໍ, ສຕ຺ຕາຫໍ, ປຎ຺ຈຄວໍ, ຉຕ຺ຕຸປາຫນໍ, ອຸປສຣທໍ, ວິສາລກ຺ໂຂ, ວິມຸໂຂ.

ກາຣຄ຺ຄຫຓໍ ກິມຕ຺ຖໍ? ອາກາຣນ຺ຕ ອິກາຣນ຺ຕາ ຈ ໂຫນ຺ຕິ, ປຈ຺ຈກ຺ຂາ ຘມ຺ມາ ຍສ຺ສ ໂສຍນ຺ຕິ ປຈ຺ຈກ຺ຂຘມ຺ມາ, ສຸຣຠິໂນ ຄນ຺ໂຘ ສຸຣຠິຄນ຺ຘິ, ສຸນ຺ທໂຣ ຄນ຺ໂຘ ສຸຄນ຺ຘິ, ປູຕິໂນ ຄນ຺ໂຘ ປູຕິຄນ຺ຘິ, ກຸຈ຺ຉິໂຕ ຄນ຺ໂຘ ກຸຄນ຺ຘິ, ທຸຏ຺ຐຸ ຄນ຺ໂຘ ຍສ຺ສ ໂສຍນ຺ຕິ ທຸຄນ຺ຘິ, ປູຕິ ເອວ ຄນ຺ໂຘ ປູຕິຄນ຺ຘິ.

ນທີອນ຺ຕາ ຈ ກຕ຺ຕຸອນ຺ຕາ ຈ ກປຈ຺ຈໂຍ ໂຫຕິ ສມາສນ຺ເຕ.

ພຫູ ນທິໂຍ ຍສ຺ມິໍ ໂສຍໍ ພຫຸນທິໂກ, ຊນປໂທ. ພຫໂວ ກຕ຺ຕາໂຣ ຍສ຺ສ ໂສຍໍ ພຫຸກຕ຺ຕຸໂກ, ປຸຣິໂສ.

໓໓໘. , ໓໕໖. ນທິມ຺ຫາ ຈ.

ນທິມ຺ຫາ ຈ ກປຈ຺ຈໂຍ ໂຫຕິ ສມາສນ຺ເຕ.

ພຫູ ນທິໂຍ ຍສ຺ມິໍ ໂສຍນ຺ຕິ ພຫຸນທິໂກ. ພຫູ ກນ຺ຕິໂຍ ຍສ຺ສ ໂສຍນ຺ຕິ ພຫຸກນ຺ຕິໂກ. ພຫຸນາຣິໂກ.

໓໓໙. , ໓໕໘. ຊາຍາຍ ຕຸທໍ ຊານິ ປຕິມ຺ຫິ.

ຊາຍາອິຈ຺ເຈຕາຍ ຕຸທໍ ຊານິອິຈ຺ເຈເຕ ອາເທສາ ໂຫນ຺ຕິ ປຕິມ຺ຫິ ປເຣ.

ຕຸທໍປຕີ, ຊານິປຕີ.

໓໔໐. , ໓໕໕. ຘນຸມ຺ຫາ ຈ.

ຘນຸມ຺ຫາ ຈ ອາປຈ຺ຈໂຍ ໂຫຕິ ສມາສນ຺ເຕ.

ຄາຓ຺ຑີໂວ ຘນຸ ຍສ຺ສ ໂສຍໍ ຄາຓ຺ຑີວຘນ຺ວາ.

໓໔໑. , ໓໓໖. ອໍ ວິຠຕ຺ຕີນມກາຣນ຺ຕາ ອພ຺ຍຍີຠາວາ.

ຕສ຺ມາ ອກາຣນ຺ຕາ ອພ຺ຍຍີຠາວສມາສາ ປຣາສໍ ວິຠຕ຺ຕີນໍ ກ຺ວຈິ ອໍ ໂຫຕິ.

ອຘິຈິຕ຺ຕໍ, ຍຖາວຸຑ຺ຒໍ, ອຸປກຸມ຺ຠໍ, ຍາວຊີວໍ, ຕິໂຣປພ຺ພຕໍ, ຕິໂຣປາກາຣໍ, ຕິໂຣກຸຏ຺ຏໍ, ອນ຺ໂຕປາສາທໍ.

ກ຺ວຈີຕິ ກິມຕ຺ຖໍ? ອຘິຈິຕ຺ຕສ຺ສ ຠິກ຺ຂຸໂນ.

໓໔໒. , ໓໓໗. ສໂຣ ຣສ຺ໂສ ນປຸໍສເກ.

ນປຸໍສເກ ວຕ຺ຕມານສ຺ສ ອພ຺ຍຍີຠາວສມາສສ຺ສ ລິງ຺ຄສ຺ສ ສໂຣ ຣສ຺ໂສ ໂຫຕິ.

ກຸມາຣີສຸ ອຘິກິຈ຺ຈ ປວຕ຺ຕຕິ ກຖາ ອິຕິ ອຘິກຸມາຣິ. ອຸປວຘຸ, ອຸປຄງ຺ຄໍ, ອຸປມຓິກໍ.

໓໔໓. , ໓໓໘. ອຎ຺ຎສ຺ມາ ໂລໂປ ຈ.

ອຎ຺ຎສ຺ມາ ອພ຺ຍຍີຠາວສມາສາ ອນກາຣນ຺ຕາ ປຣາສໍ ວິຠຕ຺ຕີນໍ ໂລໂປ ຈ ໂຫຕິ.

ອຘິຕ຺ຖິ, ອຘິກຸມາຣິ, ອຸປວຘຸ.

ອິຕິ ນາມກປ຺ເປ ສມາສກປ຺ໂປ ສຕ຺ຕໂມ ກຓ຺ໂຑ.

ສມາສກປ຺ໂປ ນິຏ຺ຐິໂຕ.