໓. ກາຣກກປ຺ປ

ຉຏ຺ຐກຓ຺ຑ

໒໗໑. , ໘໘, ໓໐໘. ຍສ຺ມາ ທເປຕິ ຠຍມາທຕ຺ເຕ ວາ ຕທປາທານໍ.

ຍສ຺ມາ ວາ ອເປຕິ, ຍສ຺ມາ ວາ ຠຍໍ ຊາຍເຕ, ຍສ຺ມາ ວາ ອາທຕ຺ເຕ, ຕໍ ກາຣກໍ ອປາທານສຎ຺ຎໍ ໂຫຕິ.

ຕໍ ຍຖາ? ຄາມາ ອເປນ຺ຕິ ມຸນໂຍ, ນຄຣາ ນິຄ຺ຄໂຕ ຣາຊາ, ໂຈຣາ ຠຍໍ ຊາຍເຕ, ອາຈຣິຍຸປຊ຺ຌາເຍຫິ ສິກ຺ຂໍ ຄຓ຺ຫາຕິ ສິສ຺ໂສ.

ອປາທານມິຈ຺ຈເນນ ກ຺ວຕ຺ໂຖ? ອປາທາເນ ປຎ຺ຈມີ.

໒໗໒. , ໓໐໙. ຘາຕຸນາ ມານມຸປສຄ຺ຄໂຍຄາທ຺ວີສ຺ວປິ ຈ.

ຘາຕຸນາມານໍ ປໂຍເຄ ຈ ອຸປສຄ຺ຄໂຍຄາທີສ຺ວປິ ຈ ຕໍ ກາຣກໍ ອປາທານສຎ຺ຎໍ ໂຫຕິ.

ຘາຕູນໍ ປໂຍເຄ ຕາວ ຊິອິຈ຺ເຈຕສ຺ສ ຘາຕຸສ຺ສ ປຣາປຸພ຺ພສ຺ສ ປໂຍເຄ ໂຍ ອສໂຫ, ໂສ ອປາທານສຎ຺ໂຎ ໂຫຕິ.

ຕໍ ຍຖາ? ພຸທ຺ຘສ຺ມາ ປຣາເຊນ຺ຕິ ອຎ຺ຎຕິຕ຺ຖິຍາ.

ຠູອິຈ຺ເຈຕສ຺ສ ຘາຕຸສ຺ສ ປປຸພ຺ພສ຺ສ ປໂຍເຄ ຍໂຕ ອຈ຺ຉິນ຺ນປ຺ປຠໂວ, ໂສ ອປາທານສຎ຺ໂຎ ໂຫຕິ.

ຕໍ ຍຖາ? ຫິມວຕາ ປຠວນ຺ຕິ ປຎ຺ຈ ມຫານທິໂຍ, ອນວຕຕ຺ຕມ຺ຫາ ປຠວນ຺ຕິ ມຫາສຣາ, ອຈິຣວຕິຍາ ປຠວນ຺ຕິ ກຸນ຺ນທິໂຍ.

ນາມປ຺ປໂຍເຄປິ ຕໍ ກາຣກໍ ອປາທານສຎ຺ຎໍ ໂຫຕິ.

ຕໍ ຍຖາ? ອຸຣສ຺ມາ ຊາໂຕ ປຸຕ຺ໂຕ, ຠູມິໂຕ ນິຄ຺ຄໂຕ ຣໂສ, ອຸຠໂຕ ສຸຊາໂຕ ປຸຕ຺ໂຕ ມາຕິໂຕ ຈ ປິຕິໂຕ ຈ.

ອຸປສຄ຺ຄໂຍເຄ ຕໍ ກາຣກໍ ອປາທານສຎ຺ຎໍ ໂຫຕິ.

ຕໍ ຍຖາ? ອປສາລາຍ ອາຍນ຺ຕິ ວາຓິຊາ, ອາພ຺ຣຫ຺ມໂລກາ ສທ຺ໂທ ອພ຺ຠຸຄ຺ຄຈ຺ຉຕິ ອຸປຣິ ປພ຺ພຕາ ເທໂວ ວສ຺ສຕິ, ພຸທ຺ຘສ຺ມາ ປຕິ ສາຣິປຸຕ຺ໂຕ ຘມ຺ມເທສນາຍ ຠິກ຺ຂູ ອາລປຕິ ເຕມາສໍ, ຆຕມສ຺ສ ເຕລສ຺ມາ ປຕິ ທທາຕິ, ອຸປ຺ປລມສ຺ສ ປທຸມສ຺ມາ ປຕິ ທທາຕິ, ກນກມສ຺ສ ຫິຣຎ຺ຎສ຺ມາ ປຕິ ທທາຕິ.

ອາທິຄ຺ຄຫເຓນ ກາຣກມຊ຺ເຌປິ ປຎ຺ຈມີວິຠຕ຺ຕິ ໂຫຕິ. ອິໂຕ ປກ຺ຂສ຺ມາ ວິຊ຺ຌຕິ ມິຄໍ ລຸທ຺ທໂກ, ໂກສາ ວິຊ຺ຌຕິ ກຸຎ຺ຊຣໍ, ມາສສ຺ມາ ຠຸຎ຺ຊຕິ ໂຠຊນໍ.

ອປິຄ຺ຄຫເຓນ ນິປາຕປໂຍເຄປິ ປຎ຺ຈມີວິຠຕ຺ຕິ ໂຫຕິ ທຸຕິຍາ ຈ ຕຕິຍາ ຈ. ຣຫິຕາ ມາຕຸຊາ ປຸຎ຺ຎໍ ກຕ຺ວາ ທານໍ ເທຕິ, ຣຫິຕາ ມາຕຸຊໍ, ຣຫິຕາ ມາຕຸເຊນ ວາ. ຣິເຕ ສທ຺ຘມ຺ມາ ກຸໂຕ ສຸຂໍ ລຠຕິ, ຣິເຕ ສທ຺ຘມ຺ມໍ, ຣິເຕ ສທ຺ຘມ຺ເມນ ວາ. ເຕ ຠິກ຺ຂູ ນານາ ກຸລາ ປພ຺ພຊິຕາ, ວິນາ ສທ຺ຘມ຺ມາ ນຕ຺ຖຎ຺ໂຎ ໂກຈິ ນາໂຖ ໂລເກ ວິຊ຺ຊຕິ, ວິນາ ສທ຺ຘມ຺ມໍ, ວິນາ ສທ຺ຘມ຺ເມນ ວາ. ວິນາ ພຸທ຺ຘສ຺ມາ, ວິນາ ພຸທ຺ຘໍ, ວິນາ ພຸທ຺ເຘນ ວາ.

ຈຄ຺ຄຫເຓນ ອຎ຺ຎຕ຺ຖາປິ ປຎ຺ຈມີວິຠຕ຺ຕິ ໂຫຕິ. ຍໂຕຫໍ ຠຄິນິ ອຣິຍາຍ ຊາຕິຍາ ຊາໂຕ. ຍໂຕ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ວິຎ຺ຎຸຕໍ, ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສເວຍ຺ຍຸໍ.

໒໗໓. , ໓໑໐. ຣກ຺ຂຓຕ຺ຖານມິຈ຺ຉິຕໍ.

ຣກ຺ຂຓຕ຺ຖານໍ ຘາຕູນໍ ປໂຍເຄ ຍໍ ອິຈ຺ຉິຕໍ, ຕໍ ກາຣກໍ ອປາທານສຎ຺ຎໍ ໂຫຕິ.

ກາເກ ຣກ຺ຂນ຺ຕິ ຕຓ຺ຑຸລາ, ຍວາ ປຏິເສເຘນ຺ຕິ ຄາໂວ.

໒໗໔. , ໓໑໑. ເຍນ ວາ’ ທສ຺ສນໍ.

ເຍນ ວາ ອທສ຺ສນມິຈ຺ຉິຕໍ, ຕໍ ກາຣກໍ ອປາທານສຎ຺ຎໍ ໂຫຕິ.

ອຸປຊ຺ຌາຍາ ອນ຺ຕຣຘາຍຕິ ສິສ຺ໂສ, ມາຕຣາ ຈ ປິຕຣາ ຈ ອນ຺ຕຣຘາຍຕິ ປຸຕ຺ໂຕ.

ວາຕິ ກິມຕ຺ຖໍ? ສຕ຺ຕມີວິຠຕ຺ຍຕ຺ຕໍ. ເຊຕວເນ ອນ຺ຕຣຘາຍຕິ ຠຄວາ.

໒໗໕. , ໓໑໒. ທູຣນ຺ຕິ ກທ຺ຘ ກາລ ນິມ຺ມານ ຕ຺ວາໂລປ ທິສາໂຍຄວິຠຕ຺ຕາຣປ຺ປໂຍຄ ສຸທ຺ຘປ຺ປໂມຈນ ເຫຕຸ ວິວິຕ຺ຕປ຺ປມາຓ ປຸພ຺ພໂຍຄພນ຺ຘນ ຄຸຓວຈນ ປຎ຺ຫ ກຖນ ໂຖກາກຕ຺ຕູສຸ ຈ.

ທູຣຕ຺ເຖ, ອນ຺ຕິກຕ຺ເຖ, ອທ຺ຘນິມ຺ມາເນ, ກາລນິມ຺ມາເນ, ຕ຺ວາໂລເປ, ທິສາໂຍເຄ, ວິຠຕ຺ເຕ, ອາຣປ຺ປໂຍເຄ, ສຸທ຺ເຘ, ປໂມຈເນ, ເຫຕ຺ວຕ຺ເຖ, ວິວິຕ຺ຕຕ຺ເຖ, ປມາເຓ, ປຸພ຺ພໂຍເຄ, ພນ຺ຘນຕ຺ເຖ, ຄຸຓວຈເນ, ປຎ຺ເຫ, ກຖເນ, ໂຖເກ, ອກຕ຺ຕຣິ ຈ ອິຈ຺ເຈເຕສ຺ວຕ຺ເຖສຸ, ປໂຍເຄສຸ ຈ, ຕໍ ກາຣກໍ ອປາທານສຎ຺ຎໍ ໂຫຕິ.

ທູຣຕ຺ເຖຕາວ – ກີວ ທູໂຣ ອິໂຕ ນຬກາຣຄາໂມ, ທູຣໂຕ ວາ ຄມ຺ມ, ອາຣກາ ເຕ ໂມຆປຸຣິສາ ອິມສ຺ມາ ຘມ຺ມວິນຍາ. ທຸຕິຍາ ຈ ຕຕິຍາ ຈ, ທູຣໍ ຄາມໍ ອາວໂຕ, ທູເຣນ ຄາເມນ ວາ ອາຄໂຕ. ອາຣກາ ອິມໍ ຘມ຺ມວິນຍໍ, ອເນນ ຘມ຺ມວິນເຍນ ວາ ອິຈ຺ເຈວມາທິ.

ອນ຺ຕິກຕ຺ເຖ – ອນ຺ຕິກໍ ຄາມາ, ອາສນ຺ນໍ ຄາມາ, ສມີປໍ ຄາມາ, ສມີປໍ ສທ຺ຘມ຺ມາ. ທຸຕິຍາ ຈ ຕຕິຍາ ຈ, ອນ຺ຕິກໍ ຄາມໍ, ອນ຺ຕິກໍ ຄາເມນ ວາ. ອາສນ຺ນໍ ຄາມໍ, ອາສນ຺ນໍ ຄາເມນ ວາ. ສມີປໍ ຄາມໍ. ສມີປໍ ຄາເມນ ວາ. ສມີປໍ ສທ຺ຘມ຺ມໍ, ສມີປໍ ສທ຺ຘມ຺ເມນ ວາ ອິຈ຺ເຈວມາທິ.

ອທ຺ຘນິມ຺ມາເນ – ອິໂຕ ມຖຸຣາຍ ຈຕູສຸ ໂຍຊເນສຸ ສງ຺ກສ຺ສໍ ນາມ ນຄຣໍ ອຕ຺ຖິ, ຕຕ຺ຖ ພຫູ ຊນາ ວສນ຺ຕິ ອິຈ຺ເຈວມາທິ.

ກາລນິມ຺ມາເນ – ອິໂຕ ຠິກ຺ຂເວ ເອກນວຸຕິກປ຺ເປ ວິປສ຺ສີ ນາມ ຠຄວາ ໂລເກ ອຸທປາທິ, ອິໂຕ ຕິຓ຺ຓໍ ມາສານໍ ອຈ຺ຈເຍນ ປຣິນິພ຺ພາຍິສ຺ສຕິ ອິຈ຺ເຈວມາທິ.

ຕ຺ວາໂລເປ ກມ຺ມາຘິກຣເຓສຸ – ປາສາທາ ສງ຺ກເມຍ຺ຍ, ປາສາທໍ ອຠິຣຸຫິຕ຺ວາ ວາ. ປພ຺ພຕາ ສງ຺ກເມຍ຺ຍ, ປພ຺ພຕໍ ອຠິຣຸຫິຕ຺ວາ ວາ. ຫຕ຺ຖິກ຺ຂນ຺ຘາ ສງ຺ກເມຍ຺ຍ, ຫຕ຺ຖິກ຺ຂນ຺ຘໍ ອຠິຣຸຫິຕ຺ວາ ວາ. ອາສນາ ວຸຏ຺ຐເຫຍ຺ຍ. ອາສເນ ນິສີທິຕ຺ວາ ວາ ອິຈ຺ເຈວມາທິ.

ທິສາໂຍເຄ – ອວິຈິໂຕ ຍາວ ອຸປຣິຠວຄ຺ຄມນ຺ຕເຣ ພຫູ ສຕ຺ຕນິກາຍາ ວສນ຺ຕິ, ຍໂຕ ເຂມໍ ຕໂຕ ຠຍໍ, ປຸຣຕ຺ຖິມໂຕ, ທກ຺ຂິຓໂຕ, ປຈ຺ຉິມໂຕ, ອຸຕ຺ຕຣໂຕ ອຄ຺ຄີ ປຊ຺ຊລນ຺ຕິ, ຍໂຕ ອສ຺ໂສສຸໍ ຠຄວນ຺ຕໍ, ອຸທ຺ຘໍ ປາທຕລາ ອໂຘ ເກສມຕ຺ຖກາ ອິຈ຺ເຈວມາທິ.

ວິຠຕ຺ເຕ – ຍໂຕ ປຓີຕຕໂຣ ວາ ວິສິຏ຺ຐຕໂຣ ວາ ນຕ຺ຖິ. ຉຏ຺ຐີ ຈ, ຉນ຺ນວຸຕີນໍ ປາສຓ຺ຑານໍ, ຘມ຺ມານໍ ປວຣໍ ຍທິທໍ ສຸຄຕວິນໂຍ ອິຈ຺ເຈວມາທິ.

ອາຣປ຺ປໂຍເຄ – ຄາມຘມ຺ມາ ວສລຘມ຺ມາ ອສທ຺ຘມ຺ມາ ອາຣຕິ ວິຣຕິ ປຏິວິຣຕິ, ປາຓາຕິປາຕາ ເວຣມຓີ ອິຈ຺ເຈວມາທິ.

ສຸທ຺ເຘ – ໂລຠນິເຍຫິ ຘມ຺ເມຫິ ສຸທ຺ໂຘ ອສໍສຏ຺ໂຐ, ມາຕິໂຕ ຈ ປິຕິໂຕ ຈ ສຸທ຺ໂຘ ອສໍສຏ຺ໂຐ ອນຸປກຸທ຺ໂຘ ອຄຣຫິໂຕ ອິຈ຺ເຈວມາທິ.

ປໂມຈເນ – ປຣິມຸຕ຺ໂຕ ທຸກ຺ຂສ຺ມາຕິ ວທາມິ, ມຸຕ຺ໂຕສ຺ມິ ມາຣພນ຺ຘນາ, ນ ເຕ ມຸຈ຺ຈນ຺ຕິ ມຈ຺ຈຸນາ ອິຈ຺ເຈວມາທິ.

ເຫຕ຺ວຕ຺ເຖ – ກສ຺ມາ ເຫຕຸນາ, ເກນ ເຫຕຸນາ, ກິສ຺ສ ເຫຕຸນາ, ກສ຺ມາ ນຸ ຕຸມ຺ຫໍ ທຫຣາ ນ ມີຍເຣ, ກສ຺ມາ ອິເຘວ ມຣຓໍ ຠວິສ຺ສຕິ ອິຈ຺ເຈວມາທິ.

ວິວິຕ຺ຕຕ຺ເຖ – ວິວິຕ຺ໂຕ ປາປກາ ຘມ຺ມາ, ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ອິຈ຺ເຈວມາທິ.

ປມາເຓ – ທີຆໂສ ນວວິທຕ຺ຖິໂຍ ສຸຄຕວິທຕ຺ຖິຍາ ປມາຓິກາ ກາເຣຕພ຺ພາ, ມຊ຺ຌິມສ຺ສ ປຸຣິສສ຺ສ ອຑ຺ຒ ເຕຬສຫຕ຺ຖາ ອິຈ຺ເຈວມາທິ.

ປຸພ຺ພໂຍເຄ – ປຸພ຺ເພວ ສມ຺ໂມຘາ ອິຈ຺ເຈວມາທິ.

ພນ຺ຘນຕ຺ເຖ – ສຕສ຺ມາ ພນ຺ໂຘ ນໂຣ. ຕຕິຍາ ຈ, ສເຕນ ພນ຺ໂຘ ນໂຣ ຣຎ຺ຎາ ອິຓຕ຺ເຖນ ອິຈ຺ເຈວມາທິ.

ຄຸຓວຈເນ – ປຸຎ຺ຎາຍ ສຸຄຕິໍ ຍນ຺ຕິ, ຈາຄາຍ ວິປຸລໍ ຘນໍ, ປຎ຺ຎາຍ ວິມຸຕ຺ຕິມໂນ, ອິສ຺ສຣິຍາຍ ຊນໍ ຣກ຺ຂຕິ ຣາຊາ ອິຈ຺ເຈວມາທິ.

ປຎ຺ເຫ ຕ຺ວາໂລເປ ກມ຺ມາຘິກຣເຓສຸ – ອຠິຘມ຺ມາ ປຸຈ຺ຉນ຺ຕິ, ອຠິຘມ຺ມໍ ສຸຕ຺ວາ, ອຠິຘມ຺ເມ ຐຕ຺ວາ ວາ. ວິນຍາ ປຸຈ຺ຉນ຺ຕິ, ວິນຍໍ ສຸຕ຺ວາ, ວິນເຍ ຐຕ຺ວາ ວາ. ທຸຕິຍາ ຈ ຕຕິຍາ ຈ, ອຠິຘມ຺ມໍ, ອຠິຘມ຺ເມນ ວາ. ວິນຍໍ, ວິນເຍນ ວາ. ເອວ ສຸຕ຺ຕາ, ເຄຍ຺ຍາ, ຄາຖາຍ, ເວຍ຺ຍາກຣຓາ, ອຸທານາ, ອິຕິວຸຕ຺ຕກາ, ຊາຕກາ, ອພ຺ຠຸຕຘມ຺ມາ, ເວທລ຺ລາ ອິຈ຺ເຈວມາທິ.

ກຖເນ ຕ຺ວາໂລເປ ກມ຺ມາຘິກຣເຓສຸ – ອຠິຘມ຺ມາ ກຖຍນ຺ຕິ, ອຠິຘມ຺ມໍ ສຸຕ຺ວາ, ອຠິຘມ຺ເມ ຐຕ຺ວາ ວາ. ວິນຍາ ກຖຍນ຺ຕິ, ວິນຍໍ ສຸຕ຺ວາ, ວິນເຍ ຐຕ຺ວາ ວາ. ທຸຕິຍາ ຈ ຕຕິຍາ ຈ, ອຠິຘມ຺ມໍ, ອຠິຘມ຺ເມນ ວາ. ວິນຍໍ ວິນເຍນ ວາ. ເອວໍ ສຸຕ຺ຕາ, ເຄຍ຺ຍາ, ຄາຖາຍ, ເວຍ຺ຍາກຣຓາ, ອຸທານາ, ອິຕິວຸຕ຺ຕກາ, ຊາຕກາ, ອພ຺ຠຸຕຘມ຺ມາ, ເວທລ຺ລາ ອິຈ຺ເຈວມາທິ.

ໂຖເກ – ໂຖກາ ມຸຈ຺ຈນ຺ຕິ. ອປ຺ປມຕ຺ຕກາ ມຸຈ຺ຈນ຺ຕິ, ກິຈ຺ຉາ ມຸຈ຺ຈນ຺ຕິ. ຕຕິຍາ ຈ. ໂຖເກນ, ອປ຺ປມຕ຺ຕເກນ, ກິຈ຺ເຉນ ວາ ອິຈ຺ເຈວມາທິ.

ອກຕ຺ຕຣິຈ – ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ອຸສ຺ສນ຺ນຕ຺ຕາ ວິປຸລຕ຺ຕາ ຈກ຺ຂຸວິຎ຺ຎາຓໍ ອຸປ຺ປນ຺ນໍ ໂຫຕິ ອິຈ຺ເຈວມາທິ.

ຈຄ຺ຄຫເຓນ ເສເສສຸປິ ເຍ ມຍາ ໂນປທິຏ຺ຐາ ອປາທານປໂຍຄິກາ, ເຕ ປໂຍຄວິຈກ຺ຂເຓຫິ ຍຖາໂຍຄໍ ໂຍເຊຕພ຺ພາ.

໒໗໖. , ໓໐໒. ຍສ຺ສ ທາຕຸກາໂມ ໂຣຈເຕ ຘາຣຍເຕ ວາ ຕໍ ສມ຺ປທານໍ.

ຍສ຺ສ ວາ ທາຕຸກາໂມ ຍສ຺ສ ວາໂຣຈເຕ, ຍສ຺ສ ວາ ຘາຣຍເຕ, ຕໍ ກາຣກໍ ສມ຺ປທານສຎ຺ຎໍ ໂຫຕິ.

ສມຓສ຺ສ ຈີວຣໍ ທທາຕິ, ສມຓສ຺ສ ໂຣຈເຕ ສຈ຺ຈໍ, ເທວທຕ຺ຕສ຺ສ ສຸວຓ຺ຓຈ຺ຉຕ຺ຕໍ ຘາຣຍເຕ ຍຎ຺ຎທຕ຺ໂຕ.

ສມ຺ປທານມິຈ຺ຈເນນ ກ຺ວຕ຺ໂຖ? ສມ຺ປທາເນ ຈຕຸຕ຺ຖີ.

ວາຕິ ວິກປ຺ປນຕ຺ຖໍ, ຘາຕຸນາມານໍ ປໂຍເຄ ວາ ອຸປສຄ຺ຄປ຺ປໂຍເຄ ວາ ນິປາຕປ຺ປໂຍເຄ ວາ ສຕິ ອຕ຺ຖວິກປ຺ປນຕ຺ຖໍ ວາຕິ ປທໍ ປຍຸຊ຺ຊຕິ.

໒໗໗. , ໓໐໓. ສິລາຆ ຫນຸ ຐາ ສປ ຘາຣ ປິຫ ກຸຘ ທຸຫິສ຺ໂສສູຍ ຣາຘິກ຺ຂ ປຈ຺ຈາສຸຓ ອນຸປຕິຄິຓ ປຸພ຺ພກຕ຺ຕາໂຣຈນຕ຺ຖ ຕທຕ຺ຖ ຕຸມຕ຺ຖາລມຕ຺ຖ ມຎ຺ຎານາທຣປ຺ປາຓິນິ, ຄຕ຺ຍຕ຺ຖກມ຺ມນິ, ອາສີສຕ຺ຖ ສມ຺ມຸຕິ ຠິຍ຺ຍ ສຕ຺ຕມ຺ຍຕ຺ເຖສຸ ຈ.

ສິລາຆ ຫນຸ ຐາ ສປ ຘາຣ ປິຫ ກຸຘ ທຸຫ ອິສ຺ສອິຈ຺ເຈເຕສໍ ຘາຕູນໍ ປໂຍເຄ, ອຸສູຍຕ຺ຖານຎ຺ຈ ປໂຍເຄ, ຣາຘິກ຺ຂປ຺ປໂຍເຄ, ປຈ຺ຈາສຸຓອນຸປຕິຄິຓານໍ ປຸພ຺ພກຕ຺ຕຣິ, ອາໂຣຈນຕ຺ເຖ, ຕທຕ຺ເຖ, ຕຸມຕ຺ເຖ, ອລມຕ຺ເຖ, ມຎ຺ຎຕິປ຺ປໂຍເຄ ອນາທເຣ ອປ຺ປາຓິນິ, ຄຕ຺ຍຕ຺ຖານໍ ຘາຕູນໍ ກມ຺ມນິ, ອາສີສຕ຺ເຖ ຈ ສມ຺ມຸຕິ ຠິຍ຺ຍ ສຕ຺ຕມ຺ຍຕ຺ເຖສຸ ຈ, ຕໍ ກາຣກໍ ສມ຺ປທານສຎ຺ຎໍ ໂຫຕິ.

ສິລາຆປ຺ປໂຍເຄ ຕາວ – ພຸທ຺ຘສ຺ສ ສິລາຆເຕ, ຘມ຺ມສ຺ສ ສິລາຆເຕ, ສງ຺ຆສ຺ສ ສິລາຆເຕ, ສກໍອຸປຊ຺ຌາຍສ຺ສ ສິລາຆເຕ, ຕວ ສິລາຆເຕ ມມ ສິລາຆເຕ ອິຈ຺ເຈວມາທິ.

ຫນຸປ຺ປໂຍເຄ – ຫນຸເຕ ຕຸຍ຺ຫເມວ, ຫນຸເຕ ມຍ຺ຫເມວ ອິຈ຺ເຈວມາທິ.

ຐາປໂຍເຄ – ອຸປຕິຏ຺ເຐຍ຺ຍ ສກ຺ຍປຸຕ຺ຕານໍ ວຑ຺ຒກີ, ຠິກ຺ຂຸສ຺ສ ຠຸຎ຺ຊນ຺ຕສ຺ສ ປານີເຍນ ວາ ວິຘູປເນນ ວາ ອຸປຕິຏ຺ເຐຍ຺ຍ ຠິກ຺ຂຸນີ ອິຈ຺ເຈວມາທິ.

ສປປ຺ປໂຍເຄ – ຕຸຍ຺ຫໍ ສປເຕ, ມຍ຺ຫໍ ສປເຕ ອິຈ຺ເຈວມາທິ.

ຘາຣປ຺ປໂຍເຄ – ສຸວຓ຺ຓໍ ເຕ ຘາຣຍເຕ ອິຈ຺ເຈວມາທິ.

ປິຫປ຺ປໂຍເຄ – ພຸທ຺ຘສ຺ສ ອຎ຺ຎຕິຕ຺ຖິຍາ ປິຫຍນ຺ຕິ, ເທວາ ທສ຺ສນກາມາ ເຕ, ຍໂຕ ອິຈ຺ຉາມິ ຠທ຺ທນ຺ຕສ຺ສ, ສມິທ຺ຘານໍ ປິຫຍນ຺ຕິ ທລິທ຺ທາ ອິຈ຺ເຈວມາທິ.

ກຸຘທຸຫອິສ຺ສອຸສູຍປ຺ປໂຍເຄ – ໂກຘຍຕິ ເທວ ທຕ຺ຕສ຺ສ, ຕສ຺ສ ກຸຊ຺ຌ ມຫາວີຣ, ມາ ຣຏ຺ຐໍ ວິນສ຺ສ ອິທໍ. ທຸຫຍຕິ ທິສານໍ ເມໂຆ, ຕິຕ຺ຖິຍາ ສມຓານໍ ອິສ຺ສຍນ຺ຕິ ຄຸຓຄິທ຺ເຘນ, ຕິຕ຺ຖິຍາ ສມຓານໍ ອິສ຺ສຍນ຺ຕິ ລາຠຄິທ຺ເຘນ, ທຸຊ຺ຊນາ ຄຸຓວນ຺ຕານໍ ອຸສູຍນ຺ຕິ ຄຸຓຄິທ຺ເຘນ, ກາ ອຸສູຍາ ວິຊານຕໍ ອິຈ຺ເຈວມາທິ.

ຣາຘ ອິກ຺ຂ ອິຈ຺ເຈເຕສໍ ຘາຕູນໍ ປໂຍເຄ ຍສ຺ສ ອກຖິຕສ຺ສ ປຸຈ຺ຉນໍ ກມ຺ມວິກ຺ຂ຺ຍາປນຕ຺ຖຎ຺ຈ, ຕໍ ກາຣກໍ ສມ຺ປທານສຎ຺ຎໍ ໂຫຕິ, ທຸຕິຍາ ຈ.

ອາຣາໂຘຫໍ ຣຎ຺ໂຎ, ອາຣາໂຘຫໍ ຣາຊານໍ, ກ຺ຍາຫໍ ອຍ຺ຍານໍ ອປຣຊ຺ຌາມິ, ກ຺ຍາຫໍ ອຍ຺ເຍ ອປຣຊ຺ຌາມິ, ຈກ຺ຂຸໍ ຊນສ຺ສ ທສ຺ສນາຍ ຕໍ ວິຍ ມຎ຺ເຎ, ອາຍສ຺ມໂຕ ອຸປາລິຕ຺ເຖຣສ຺ສ ອຸປສມ຺ປທາເປກ຺ໂຂ ອຸປຕິສ຺ໂສ, ອາຍສ຺ມນ຺ຕໍ ວາ ອິຈ຺ເຈວມາທິ.

ປຈ຺ຈາສຸຓ ອນຸປຕິຄິຓານໍ ປຸພ຺ພກຕ຺ຕຣິ ສຸໂຓຕິສ຺ສ ປຈ຺ຈາໂຍເຄ ຍສ຺ສ ກມ຺ມຸໂນ ປຸພ຺ພສ຺ສ ໂຍ ກຕ຺ຕາ, ໂສ ສມ຺ປທານສຎ຺ໂຎ ໂຫຕິ.

ຕໍ ຍຖາ? ຠຄວາ ຠິກ຺ຂູ ເອຕທໂວຈ.

ຠິກ຺ຂູຕິ ອກຖີຕ ກມ຺ມໍ, ເອຕນ຺ຕິ ກຖິຕກມ຺ມໍ. ຍສ຺ສ ກມ຺ມຸໂນ ປຸພ຺ພສ຺ສ ໂຍ ກຕ຺ຕາ, ໂສ‘ຠຄວາ’ຕິ ‘‘ໂຍ ກໂຣຕິ ສ ກຕ຺ຕາ’’ຕິ ສຸຕ຺ຕວຈເນນ ກຕ຺ຕຸສຎ຺ໂຎ. ເອວໍ ຍສ຺ສ ກມ຺ມຸໂນ ປຸພ຺ພສ຺ສ ໂຍ ກຕ຺ຕາ, ໂສ ສມ຺ປທານສຎ຺ໂຎ ໂຫຕິ.

ຕໍ ຍຖາ? ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ, ອາສຸຓນ຺ຕິ ພຸທ຺ຘສ຺ສ ຠິກ຺ຂູ.

ຄິຓສ຺ສ ອນຸປຕິໂຍເຄ ຍສ຺ສ ກມ຺ມຸໂນ ປຸພ຺ພສ຺ສ ໂຍ ກຕ຺ຕາ, ໂສ ສມ຺ປທານສຎ຺ໂຎ ໂຫຕິ.

ຕໍ ຍຖາ? ຠິກ຺ຂຸ ຊນໍ ຘມ຺ມໍ ສາເວຕິ, ຕສ຺ສ ຠິກ຺ຂຸໂນ ຊໂນ ອນຸຄິຓາຕິ, ຕສ຺ສ ຠິກ຺ຂຸໂນ ຊໂນ ປຕິຄິຓາຕິ.

ໂຍ ວເທຕິ ສ‘ກຕ຺ຕາ’ຕິ,

ວຸຕ຺ຕໍ ‘ກມ຺ມ’ນ຺ຕິ ວຸຈ຺ຈຕິ;

ໂຍ ປຏິຄ຺ຄາຫໂກ ຕສ຺ສ,

‘ສມ຺ປທານໍ’ ວິຊານິຍາ.

ອິຈ຺ເຈວມາທິ.

ອາໂຣຈນຕ຺ເຖ – ອາໂຣຈຍາມິ ໂວ ຠິກ຺ຂເວ, ອາມນ຺ຕຍາມິ ໂວ ຠິກ຺ຂເວ, ປຏິເວທຍາມິ ໂວ ຠິກ຺ຂເວ, ອາໂຣຈຍາມິ ເຕ ມຫາຣາຊ, ອາມນ຺ຕຍາມິ ເຕ ມຫາຣາຊ, ປຏິເວທຍາມິ ເຕ ມຫາຣາຊ ອິຈ຺ເຈວມາທິ.

ຕທຕ຺ເຖ – ອູນສ຺ສ ປາຣິປູຣິຍາ ຕໍ ຈີວຣໍ ນິກ຺ຂິປິຕພ຺ພໍ. ພຸທ຺ຘສ຺ສ ອຕ຺ຖາຍ, ຘມ຺ມສ຺ສ ອຕ຺ຖາຍ, ສງ຺ຆສ຺ສ ອຕ຺ຖາຍ, ຊີວິຕໍ ປຣິຈ຺ຈຊາມິ ອິຈ຺ເຈວມາທິ.

ຕຸມຕ຺ເຖ -ໂລການຸກມ຺ປາຍ ອຕ຺ຖາຍ ຫິຕາຍ ສຸຂາຍ ເທວມນຸສ຺ສານໍ ພຸທ຺ໂຘ ໂລເກ ອຸປ຺ປຊ຺ຊຕິ. ຠິກ຺ຂູນໍ ຜາສຸວິຫາຣາຍ ວິນໂຍ ປຎ຺ຎຕ຺ໂຕ ອິຈ຺ເຈວມາທິ.

ອລມຕ຺ຖປ຺ປໂຍເຄ-ອລມິຕິ ອຣຫຕິ ປຏິກ຺ຂິຕ຺ເຕສຸ. ອລໍ ເມ ພຸທ຺ໂຘ, ອລໍ ເມ ຣຊ຺ຊໍ, ອລໍ ຠິກ຺ຂຸ ປຕ຺ຕສ຺ສ, ອລໍ ມລ຺ໂລ ມລ຺ລສ຺ສ, ອຣຫຕິ ມລ຺ໂລ ມລ຺ລສ຺ສ. ປຏິກ຺ຂິຕ຺ເຕ ອລໍ ເຕ ຣູປໍ ກຣຓີຍໍ, ອລໍ ເມ ຫິຣຎ຺ຎສຸວຓ຺ເຓນ ອິຈ຺ເຈວມາທິ.

ມຎ຺ຎຕິປ຺ປໂຍເຄ ອນາທເຣ ອປ຺ປາຓິນິ-ກຏ຺ຐສ຺ສ ຕຸວໍ ມຎ຺ເຎ, ກລິງ຺ຄຣສ຺ສ ຕຸວໍ ມຎ຺ເຎ.

ອນາທເຣຕິ ກິມຕ຺ຖໍ? ສຸວຓ຺ຓໍ ວິຍ ຕໍ ມຎ຺ເຎ.

ອປ຺ປາຓິນີຕິ ກິມຕ຺ຖໍ? ຄທ຺ຣຠໍ ຕຸວໍ ມຎ຺ເຎ ອິຈ຺ເຈວມາທິ.

ຄຕ຺ຍຕ຺ຖກມ຺ມນິ-ຄາມສ຺ສ ປາເທນ ຄໂຕ, ນຄຣສ຺ສ ປາເທນ ຄໂຕ, ອປ຺ໂປ ສຄ຺ຄາຍ ຄຈ຺ຉຕິ, ສຄ຺ຄສ຺ສ ຄມເນນ ວາ, ມູລາຍ ປຏິກສ຺ເສຍ຺ຍ ສງ຺ໂຆ. ທຸຕິຍາ ຈ, ຄາມໍ ປາເທນ ຄໂຕ, ນຄຣໍ ປາເທນ ຄໂຕ, ອປ຺ໂປ ສຄ຺ຄໍ ຄຈ຺ຉຕິ, ສຄ຺ຄໍ ຄມເນນ ວາ, ມູລໍ ປຏິກສ຺ເສຍ຺ຍ ສງ຺ໂຆ ອິຈ຺ເຈວມາທິ.

ອາສີສຕ຺ເຖ-ອາຍສ຺ມໂຕ ທີຆາຍຸໂກ ໂຫຕຸ, ຠທ຺ທໍ ຠວໂຕ ໂຫຕຸ, ກຸສລໍ ຠວໂຕ ໂຫຕຸ, ອນາມຍໍ ຠວໂຕ ໂຫຕຸ, ສຸຂໍ ຠວໂຕ ໂຫຕຸ, ສ຺ວາຄຕໍ ຠວໂຕ ໂຫຕຸ, ອຕ຺ໂຖ ຠວໂຕ ໂຫຕຸ, ຫິຕໍ ຠວໂຕ ໂຫຕຸ ອິຈ຺ເຈວມາທິ.

ສມ຺ມຸຕິປ຺ປໂຍເຄ– ອຎ຺ຎຕ຺ຣ ສງ຺ຆສມ຺ມຸຕິຍາ ຠິກ຺ຂຸສ຺ສ ວິປ຺ປວຕ຺ຖຸໍ ນ ວຏ຺ຏຕິ, ສາຘຸ ສມ຺ມຸຕິ ເມ ຕສ຺ສ ຠຄວໂຕ ທສ຺ສນາຍ ອິຈ຺ເຈວມາທິ.

ຠິຍ຺ຍປ຺ປໂຍເຄ – ຠິຍ຺ໂຍໂສ ມຕ຺ຕາຍໍ ອິຈ຺ເຈວມາທິ.

ສຕ຺ຕມ຺ຍຕ຺ເຖ – ຕຸຍ຺ຫຎ຺ຈສ຺ສ ອາວິ ກໂຣມິ, ຕສ຺ສ ເມ ສກ຺ໂກ ປາຕຸຣໂຫສິ ອິຈ຺ເຈວມາທິ.

ອຕ຺ຖຄ຺ຄຫເຓນ ພຫູສຸ ອກ຺ຂຣປ຺ປໂຍເຄສຸ ທິສ຺ສຕິ.

ຕໍ ຍຖາ? ອຸປມໍ ມຕ ກຣິສ຺ສາມິ, ຘມ຺ມໍ ໂວ ເທເສສ຺ສາມິ.

ສາຣຕ຺ເຖ ຈ – ເທເສຕຸ ຠນ຺ເຕ ຠຄວາ ຘມ຺ມໍ ຠິກ຺ຂູນໍ. ຕສ຺ສ ຜາສຸ ວິຫາຣາຍ ໂຫຕິ, ເອຕສ຺ສ ປຫິເຓຍ຺ຍ, ຍຖາ ໂນ ຠຄວາ ພ຺ຍາກເຣຍ຺ຍ, ຕຖາປິ ເຕສໍ ພ຺ຍາກຣິສ຺ສາມ, ກປ຺ປຕິ ສມຓານໍ ອາໂຍໂຄ, ອມ຺ຫາກໍ ມຓິນາ ອຕ຺ໂຖ, ກິມຕ຺ໂຖ ເມ ພຸທ຺ເຘນ, ເສຍ຺ໂຍ ເມ ອຕ຺ໂຖ, ພຫູປກາຣາ ຠນ຺ເຕ ມຫາປຊາ ປຕິໂຄຕມີ ຠຄວໂຕ, ພຫູປກາຣາ ຠິກ຺ຂເວ ມາຕາປິຕໂຣ ປຸຕ຺ຕານໍ ອິຈ຺ເຈວມາທິ.

ເສເສສຸ ອກ຺ຂຣປ຺ປໂຍເຄສຸປິ ອຎ຺ເຎປິ ປໂຍຄາ ປໂຍຄວິຈກ຺ຂເຓຫິ ໂຍເຊຕພ຺ພາ.

ຈຄ຺ຄຫຓໍ ວິກປ຺ປນຕ຺ຖວາຄ຺ຄຫຓານຸກຑ຺ຒນຕ຺ຖໍ. ເຍ ເກຈິ ສທ຺ທາ ສມ຺ປທານປ຺ປໂຍຄິກາ ມຍາ ໂນປທິຏ຺ຐາ, ເຕສໍ ຄຫຓຕ຺ຖໍ ອິຘ ວິກປ຺ປີຍຕິ ວາສທ຺ໂທ.

ຕໍ ຍຖາ? ຠິກ຺ຂຸສງ຺ຆສ຺ສ ປຠູ ອຍໍ ຠຄວາ, ເທສສ຺ສ ປຠູ ອຍໍ ຣາຊາ. ເຂຕ຺ຕສ຺ສ ປຠູ ອຍໍ ຄຫປຕິ, ອຣຎ຺ຎສ຺ສ ປຠູ ອຍໍ ລຸທ຺ທໂກ ອິຈ຺ເຈວມາທິ. ກ຺ວຈິ ທຸຕິຍາ ຕຕິຍາ ປຎ຺ຈມີ ຉຏ຺ຐີ ສຕ຺ຕມ຺ຍຕ຺ເຖສຸ ຈ.

໑໗໘. , ໓໒໐. ໂຍຘາໂຣ ຕໂມກາສໍ.

ໂຍ ອາຘາໂຣ, ຕໍ ໂອກາສສຎ຺ຎໍ ໂຫຕິ. ສ຺ວາຘາໂຣ ຈຕຸພ຺ພິໂຘ ພ຺ຍາປິໂກ, ໂອປສິເລສິໂກ, ເວສຍິໂກ ສາມີປິໂກ ຈາຕິ.

ຕຕ຺ຖ ພ຺ຍາປິໂກ ຕາວ–ຊເລສຸ ຂີຣໍ ຕິຏ຺ຐຕິ, ຕິເລສຸ ເຕລໍ, ອຸຈ຺ຉູສຸ ຣໂສ.

ໂອປສິເລສິໂກ–ປຣິຍງ຺ເກ ຣາຊາ ເສຕິ, ອາສເນ ອຸປວິຏ຺ໂຐ ສງ຺ໂຆ.

ເວສຍິໂກ–ຠູມີສຸ ມນຸສ຺ສາ ຈຣນ຺ຕິ, ອນ຺ຕລິກ຺ເຂ ວາຍູ ວາຍນ຺ຕິ. ອາກາເສ ສກຸຓາ ປກ຺ຂນ຺ທນ຺ຕິ.

ສາມີປິໂກ–ວເນ ຫຕ຺ຖິໂນ ຈຣນ຺ຕິ, ຄງ຺ຄາຍໍ ໂຆໂສ ຕິຏ຺ຐຕິ, ວເຊ ຄາໂວ ທຸຫນ຺ຕິ, ສາວຕ຺ຖິຍໍ ວິຫຣຕິ ເຊຕວເນ.

ໂອກາສມິຈ຺ຈເນນ ກ຺ວຕ຺ໂຖ? ໂອກາເສ ສຕ຺ຕມີ.

໒໗໙. , ໒໙໒. ເຍນ ວາ ກຍິຣເຕ ຕໍ ກຣຓໍ.

ເຍນ ວາ ກຍິຣເຕ, ເຍນ ວາ ປສ຺ສຕິ, ເຍນ ວາ ສຸຓາຕິ, ຕໍ ກາຣກໍ ກຣຓສຎ຺ຎໍ ໂຫຕິ.

ທຕ຺ເຕນ ວິຫິໍ ລຸນາຕິ, ວາສິຍາ ກຏ຺ຐໍ ຕຈ຺ຉຕິ, ຜຣສຸນາ ຣຸກ຺ຂໍ ຉິນ຺ທຕິ, ກຸທາເລນ ປຖວິໍ ຂຓຕິ, ສຕ຺ເຖນ ກມ຺ມໍ ກໂຣຕິ. ຈກ຺ຂຸນາ ຣູປໍ ປສ຺ສຕິ.

ກຣຓມິຈ຺ຈເນນ ກ຺ວຕ຺ໂຖ? ກຣເຓ ຕຕິຍາ.

໒໘໐. , ໒໘໕. ຍໍ ກໂຣຕິ ຕໍ ກມ຺ມໍ.

ຍໍ ວາ ກໂຣຕິ, ຍໍ ວາ ປສ຺ສຕິ, ຍໍ ວາ ສຸຓາຕິ, ຕໍ ກາຣກໍ ກມ຺ມສຎ຺ຎໍ ໂຫຕິ.

ຉຕ຺ຕໍ ກໂຣຕິ, ຣຖໍ ກໂຣຕິ, ຣູປໍ ປສ຺ສຕິ, ສທ຺ທໍ ສຸຓາຕິ, ກຓ຺ຏກໍ ມທ຺ທຕິ, ວິສໍ ຄິລຕິ.

ກມ຺ມມິຈ຺ຈເນນ ກ຺ວຕ຺ໂຖ? ກມ຺ມຕ຺ເຖ ທຸຕິຍາ.

໒໘໑. , ໒໙໔. ໂຍ ກໂຣຕິ ສ ກຕ຺ຕາ.

ໂຍ ກໂຣຕິ, ໂສ ກຕ຺ຕຸສຎ຺ໂຎ ໂຫຕິ.

ອຫິນາ ທຏ຺ໂຐ ນໂຣ, ຄຣຸເຬນ ຫໂຕ ນາໂຄ. ພຸທ຺ເຘນ ຊິໂຕ ມາໂຣ, ອຸປຄຸຕ຺ເຕນ ມາໂຣ ພນ຺ໂຘ.

ກຕ຺ຕຸອິຈ຺ຈເນນ ກ຺ວຕ຺ໂຖ? ກຕ຺ຕຣິ ຈ.

໒໘໒. , ໒໙໕. ໂຍ ກາເຣຕິ ສ ເຫຕຸ.

ໂຍ ກຕ຺ຕາຣໍ ກາເຣຕິ, ໂສ ເຫຕຸສຎ຺ໂຎ ໂຫຕິ, ກຕ຺ຕາ ຈ.

ໂສ ປຸຣິໂສ ຕໍ ປຸຣິສໍ ກມ຺ມໍ ກາເຣຕິ ໂສ ປຸຣິໂສ ເຕນ ປຸຣິເສນ ກມ຺ມໍ ກາເຣຕິ, ໂສ ປຸຣິໂສ ຕສ຺ສ ປຸຣິສສ຺ສ ກມ຺ມໍ ກາເຣຕິ. ເອວໍ ຫາເຣຕິ ປາເຐຕິ ປາເຈຕິ, ຘາເຣຕິ.

ເຫຕຸອິຈ຺ຈເນນ ກ຺ວຕ຺ໂຖ? ຘາຕູຫິ ເຓ ຓຍ ຓາເປ ຓາປຍາ ກາຣິຕານິ ເຫຕ຺ວຕ຺ເຖ.

໒໘໓. , ໓໑໖. ຍສ຺ສ ວາ ປຣິຄ຺ຄໂຫ ຕໍ ສາມີ.

ຍສ຺ສ ວາ ປຣິຄ຺ຄໂຫ, ຕໍ ສາມີສຎ຺ຎໍ ໂຫຕິ.

ຕສ຺ສ ຠິກ຺ຂຸໂນ ປຏິວີໂສ, ຕສ຺ສ ຠິກ຺ຂຸໂນ ປຕ຺ໂຕ, ຕສ຺ສ ຠິກ຺ຂຸໂນ ຈີວຣໍ, ອຕ຺ຕໂນ ມຸຂໍ.

ສາມີອິຈ຺ຈເນນ ກ຺ວຕ຺ໂຖ? ສາມິສ຺ມິໍ ຉຏ຺ຐີ.

໒໘໔. , ໒໘໓. ລິງ຺ຄຕ຺ເຖ ປຐມາ.

ລິງ຺ຄຕ຺ຖາຠິຘານມຕ຺ເຕ ປຐມາວິຠຕ຺ຕິ ໂຫຕິ.

ປຸຣິໂສ, ປຸຣິສາ, ເອໂກ, ທ຺ເວ, ຈ, ວາ, ເຫ, ອເຫ, ເຣ, ອເຣ.

໒໘໕. , ໗໐. ອາລປເນ ຈ.

ອາລປນຕ຺ຖາ ຘິເກ ລິງ຺ຄຕ຺ຖາຠິຘານມຕ຺ເຕ ຈ ປຐມາວິຠຕ຺ຕິ ໂຫຕິ.

ໂຠ ປຸຣິສ, ຠວນ຺ໂຕ ປຸຣິສາ, ໂຠ ຣາຊ, ຠວນ຺ໂຕ ຣາຊາໂນ, ເຫ ສເຂ, ເຫ ສຂິໂນ.

໒໘໖. , ໒໙໑. ກຣເຓ ຕຕິຍາ.

ກຣຓກາຣເກ ຕຕິຍາວິຠຕ຺ຕິ ໂຫຕິ.

ອຄ຺ຄິນາ ກຸຏິໍ ຌາເປຕິ, ມນສາ ເຈ ປທຸຏ຺ເຐນ, ມນສາ ເຈ ປສນ຺ເນນ, ກາເຍນ ກມ຺ມໍ ກໂຣຕິ.

໒໘໗. , ໒໙໙. ສຫາທິໂຍເຄ ຈ.

ສຫາທິໂຍຄຕ຺ເຖ ຈ ຕຕິຍາວິຠຕ຺ຕິ ໂຫຕິ.

ສຫາປິ ຄຄ຺ເຄນ ສງ຺ໂຆ ອຸໂປສຖໍ ກເຣຍ຺ຍ, ວິນາປິ ຄຄ຺ເຄນ, ມຫຕາ ຠິກ຺ຂຸສງ຺ເຆນ ສທ຺ຘິໍ, ສຫສ຺ເສນ ສມໍ ມິຕາ.

໒໘໘. , ໒໙໓. ກຕ຺ຕຣິ ຈ.

ກຕ຺ຕຣິ ຈ ຕຕິຍາວິຠຕ຺ຕິ ໂຫຕິ.

ຣຎ຺ຎາ ຫໂຕ ໂປໂສ, ຍກ຺ເຂນ ທິນ຺ໂນ ວໂຣ, ອຫິນາ ທຏ຺ໂຐ ນໂຣ.

໒໘໙. , ໒໙໗. ເຫຕ຺ວຕ຺ເຖ ຈ.

ເຫຕ຺ວຕ຺ເຖ ຈ ຕຕິຍາວິຠຕ຺ຕິ ໂຫຕິ.

ອນ຺ເນນ ວສຕິ, ຘມ຺ເມນ ວສຕິ, ວິຊ຺ຊາຍ ວສຕິ, ສກ຺ກາເຣນ ວສຕິ.

໒໙໐. , ໒໙໘. ສຕ຺ຕມ຺ຍຕ຺ເຖ ຈ.

ສຕ຺ຕມ຺ຍຕ຺ເຖ ຈ ຕຕິຍາວິຠຕ຺ຕິ ໂຫຕິ.

ເຕນ ກາເລນ, ເຕນ ສມເຍນ. (ເຍນ ກາເລນ, ເຍນ ສມເຍນ,) ເຕນ ໂຂ ປນ ສມເຍນ.

໒໙໑. , ໒໙໙. ເຍນງ຺ຄວິກາໂຣ.

ເຍນ ພ຺ຍາຘິມຕາ ອງ຺ເຄນ ອງ຺ຄິໂນ ວິກາໂຣ ລກ຺ຂີຍເຕ. ຕຕ຺ຖ ຕຕິຍາວິຠຕ຺ຕິ ໂຫຕິ.

ອກ຺ຂິນາ ກາໂຓ, ຫຕ຺ເຖນ ກຸຓີ, ກາຓໍ ປສ຺ສຕິ ເນຕ຺ເຕນ, ປາເທນ ຂຎ຺ໂຊ, ປິຏ຺ຐິຍາ ຂຸຊ຺ໂຊ.

໒໙໒. , ໓໐໐. ວິເສສເນ ຈ.

ວິເສສນຕ຺ເຖ ຈ ຕຕິຍາວິຠຕ຺ຕິ ໂຫຕິ.

ໂຄຕ຺ເຕນ ໂຄຕໂມ ນາໂຖ, ສຸວຓ຺ເຓນ ອຠິຣູໂປ, ຕປສາ ອຸຕ຺ຕໂມ.

໒໙໓. , ໓໐໑. ສມ຺ປທາເນ ຈຕຸຕ຺ຖີ.

ສມ຺ປທານກາຣເກ ຈຕຸຕ຺ຖີວິຠຕ຺ຕິ ໂຫຕິ.