໓. ສມາສກຓ຺ຑ

ສມາສລກ຺ຂຓາທິ

໒໐໒. ນາມານໍ ສມາໂສ ຍຸຕ຺ຕຕ຺ໂຖຕ຺ຍຘິກາໂຣ. ສມາໂສຕິ ຠິນ຺ນຕ຺ຖານໍ ປທານ ເມກຕ຺ຖຕາ. ຍຸຕ຺ຕຕ຺ໂຖຕິ ອຎ຺ຎມຎ຺ຎສມ຺ພນ຺ຘຕ຺ໂຖ.

ວິຠາສາຕ຺ຍຘິກາຕພ຺ພໍ ວາກ຺ຍຕ຺ຖໍ.

ກມ຺ມຘາຣຍສມາສ

໒໐໓. ‘‘ມຫນ຺ໂຕ ຈ ໂສ ວີໂຣ ຈາ’’ຕິ ວາກ຺ເຍ –

ທ຺ວິປເທ ຕຸລ຺ຍາຘິກຣເຓ ກມ຺ມຘາຣໂຍ.

ຠິນ຺ນປ຺ປວຕ຺ຕິນິມິຕ຺ຕາ ສທ຺ທາ ເອກສ຺ມິໍ ວຕ຺ຖຸນິ ປວຕ຺ຕາ ຕຸລ຺ຍາຘິກຣຓາ, ວິເສສນວິເສສສ຺ສຠູຕາ ສມານາຘິກຣຓາ ທ຺ເວ ປທາ ຍທາ ສມສ຺ຍນ຺ເຕ, ຕທາ ໂສ ສມາໂສ ກມ຺ມຘາຣໂຍ

ນາມ, ອິຘ ວາ ສມາສສຸຕ຺ຕານິ ສຎ຺ຎາທ຺ວາເຣນ ສມາສວິຘາຍການິ.

ອຄ຺ຄຫິຕວິເສສນາ ພຸທ຺ຘິ ວິເສສ຺ສມ຺ຫິ ນ ອຸປ຺ປຊ຺ຊຕີຕິ ວິເສສນໍ ປຸພ຺ພໍ ໂຫຕິ, ສມາເສເນວ ຕຸລ຺ຍາຘິກຣຓຕ຺ຕສ຺ສ ວຸຕ຺ຕຕ຺ຕາ ຕປ຺ປກາສນຕ຺ຖໍ ປຍຸຕ຺ຕາ ສມາສໂຕ ອຕິຣິຕ຺ຕາ ຈ ໂສ ອິຈ຺ເຈເຕ ‘‘ວຸຕ຺ຕຏ຺ຐານມປ຺ປໂຍໂຄ’’ຕິ ຎາຍາ ນປ຺ປຍຸຊ຺ຊນ຺ເຕ. ເອວມຎ຺ຎຕ຺ຣ.

ເຕສໍ ວິຠຕ຺ຕິໂຍ ໂລປາ ຈ.

ເຕສໍ ຍຸຕ຺ຕຕ຺ຖານໍ ສມາສານໍ ປຸພ຺ພຸຕ຺ຕຣປທານໍ ວິຠຕ຺ຕີ ລຸປ຺ຍນ຺ເຕ, ຈກາເຣນ ກ຺ວຈິ ນ.

ຕໂຕ ມຫນ຺ຕ ວີຣ ອິຕິ ຈ ຣູປປ຺ປສງ຺ເຄ –

ປກຕິ ຈສ຺ສ ສຣນ຺ຕສ຺ສ.

ວິຠຕ຺ຕີສຸ ລຸຕ຺ຕາສຸ ສຣນ຺ຕສ຺ສ ປຸພ຺ພຠູຕສ຺ສ, ປຣຠູຕສ຺ສ ຈ ອສ຺ສ ສມາສປທສ຺ສ ປກຕິ ໂຫຕີຕີຫ ລຸຕ຺ຕາກາຣາ ປຸນານີຍນ຺ເຕ.

ຕໂຕ ມຫນ຺ຕ ວີຣອິຕິ ຐິເຕ –

‘‘ມຫຕໍ ມຫາ ຕຸລ຺ຍາຘິກຣເຓ ປເທ’’ຕິ ມຫນ຺ຕສ຺ສ ມຫາ.

ຕທ຺ຘິຕ ສມາສ ກິຕກາ ນາມໍວາຕເວຕຸນາທີສຸ ຈ.

ຕທ຺ຘິຕາທໂຍ ນາມໍ ອິວ ທຏ຺ຐພ຺ພາ ຕເວປ຺ປຠຸຕິປຈ຺ຈເຍ ວຊ຺ເຊຕ຺ວາ.

ຕໂຕ ວຕ຺ຕິຈ຺ຉາຍ ສ຺ຍາທິ. ມຫາວີໂຣ, ມຫາວີຣາອິຈ຺ຈາທິ.

໒໐໔. ກມ຺ມຘາຣໂຍ ທ຺ວນ຺ໂທ ຈ, ຕປ຺ປຸຣິໂສ ຈ ລາຠິໂນ.

ຕໂຍ ປຣປເທ ລິງ຺ຄໍ, ພຫຸພ຺ພີຫິ ປທນ຺ຕເຣ.

໒໐໕. ຣຕ຺ຕາ ຈ ສາ ປຏີ ຈາຕິ ຣຕ຺ຕປຏີ, ມຫນ຺ຕີ ຈ ສາ ສທ຺ຘາ ຈາຕິ ມຫາສທ຺ຘາ. ເອຕ຺ຖ ‘‘ກມ຺ມຘາຣຍສຎ຺ເຎ ເຈ’’ຕິ ປຸພ຺ພປເທ ປຸເມວ ກເຕ ອາອີປຈ຺ຈຍານໍ ນິວຸຕ຺ຕິ.

໒໐໖. ນີລຎ຺ຈ ຕໍ ອຸປ຺ປລຎ຺ຈາຕິ ນີລຸປ຺ປລໍ, ສຕ຺ຖີວ ສຕ຺ຖິ, ສຕ຺ຖິ ຈ ສາ ສາມາ ຈາຕິ ສຕ຺ຖິສາມາ. ມຸຂເມວ ຈນ຺ໂທ ມຸຂຈນ຺ໂທ.

ວິເສສນວິເສສ຺ສານໍ ຍເຖຈ຺ຉຕ຺ຕາ ກ຺ວຈິ ວິເສສນໍ ປຣໍ ໂຫຕິ, ຂຕ຺ຕິຍຠູໂຕອິຈ຺ຈາທິ, ອິຈ຺ຉາ ຈ ຍຖາຕນ຺ຕິ.

ອຸເຠ ຕປ຺ປຸຣິສ ສມາສ

໒໐໗. ນສທ຺ທາ ສິ, ຕສ຺ສ ໂລໂປ. ນ ສຸໂຣ ອສຸໂຣ.

ເອຕ຺ຖ ກມ຺ມຘາຣເຍ ກເຕ – ‘‘ອຸເຠ ຕປ຺ປຸຣິສາ’’ຕິ ຕປ຺ປຸຣິສສຎ຺ຎາ. ‘‘ອຕ຺ຕນ຺ນສ຺ສ ຕປ຺ປຸຣິເສ’’ຕິ ນສ຺ສ ອ. ນ ອສ຺ໂສ ອນສ຺ໂສ. ເອຕ຺ຖ ‘‘ສເຣ ອນ’’ຕິ ນສ຺ສ ອນ.

໒໐໘. ‘‘ນາມານໍ ສມາໂສ’’ຕິ ສຸຕ຺ເຕ ທ຺ວິຘາກເຕ ອຍຸຕ຺ຕຕ຺ຖານມ຺ປິ ກ຺ວຈິ ສມາໂສ. ນ ປຸນ ເຄຍ຺ຍາ ອປຸນເຄຍ຺ຍາ ຄາເຖຕ຺ຍາທິ. ເອຕ຺ຖ ເຄຍ຺ເຍນ ສມ຺ພນ຺ໂຘ ນ-ສທ຺ໂທ ອຍຸຕ຺ຕຕ຺ເຖນາປິ ປຸເນນ ໂຍຄວິຠາຄພລາ ສມສ຺ຍເຕ.

ທິຄຸສມາສ

໒໐໙. ຕໂຍ ໂລກາ ສມາຫຏາ ຕິໂລກໍ.

ເອຕ຺ຖ ‘‘ສງ຺ຂ຺ຍາປຸພ຺ໂພ ທິຄູ’’ຕິ ກມ຺ມຘາຣຍສ຺ສ ທິຄຸສຎ຺ຎາ. ‘ທິຄຸສ຺ເສກຕ຺ຕໍ’’ຕິ ເອກຕ຺ຕໍ, ນປຸໍສກຕ຺ຕຎ຺ຈ.

ສຸທ຺ຘຕປ຺ປຸຣິສສມາສ

໒໑໐. ຕປ຺ປຸຣິສາ ຕ຺ເວວ.

ອມາທໂຍ ປຣປເທຫິ.

ທຸຕິຍນ຺ຕາທໂຍ ປຣປເທຫິ ນາເມຫິ ຍທາ ສມສ຺ຍນ຺ເຕ, ຕທາ ໂສ ສມາໂສ ຕປ຺ປຸຣິໂສ ນາມ.

ຄາມໍ ຄໂຕ ຄາມຄໂຕ.

‘‘ປສ຺ສ ວາສິຏ຺ຐ ຄາມໍ, ຄໂຕ ຕິສ຺ໂສ ສາວຕ຺ຖິໍ’’ຕ຺ຍ ຕ຺ຣາຍຸຕ຺ຕຕ຺ຖຕາຍ ນ ສມາໂສ. ຕຖາ ຎ຺ຎຕ຺ຣ ເຎຍ຺ຍໍ.

໒໑໑. ຣຎ຺ຎາ ຫໂຕ ຣາຊຫໂຕ.

ກິຈ຺ຈນ຺ເຕຫິ ຠີໂຍ ອຘິກຕ຺ຖວຈເນ.

ຕພ຺ພ, ອນີຍ, ຓ຺ຍ, ເຕຍ຺ຍ, ຣິຈ຺ຈປ຺ປຈ຺ຈຍາ ກິຈ຺ຈາ. ຖຸຕິນິນ຺ທຕ຺ຖມຊ຺ຌາໂຣປິຕຕ຺ຖໍ ວຈນໍ ອຘິກຕ຺ຖວຈນໍ. ໂສຓເລຍ຺ໂຍ ກູໂປອິຈ຺ຈາທິ. ໂສເຓຫິ ຍຖາ ລິຍ຺ຫເຕ, ຕຖາ ປຸຓ຺ຓຕ຺ຕາ ຖຸຕິ. ເຕຫິ ອຸຈ຺ຉິຏ຺ຐຕ຺ຕາ ນິນ຺ທາ ຈ.

ທຘິນາ ອຸປສິຕ຺ຕໍ ໂຠຊນໍ ທຘິໂຠຊນໍ, ສມາສປເທເນວ ອຸປສິຕ຺ຕກ຺ຣິຍາຍ ກຖນາ ນຕ຺ເຖຕ຺ຖາຍຸຕ຺ຕຕ຺ຖຕາ. ອຸປສິຕ຺ຕສທ຺ທາປ຺ປໂຍໂຄ ປຸພ຺ເພວ.

໒໑໒. ກຣເຓ ຕຸ-ອສິນາ ກລໂຫ ອສິກລໂຫ.

໒໑໓. ພຸທ຺ຘສ຺ສ ເທຍ຺ຍໍ ພຸທ຺ຘທ຺ເທຍ຺ຍໍ, ປຣສ຺ສປທໍ, ເອຕ຺ຖ ວິຠຕ຺ຍໂລໂປ. ເອວໍ ອຕ຺ຕໂນປທມິຈ຺ຈາທິ.

໒໑໔. ໂຈຣສ຺ມາ ຠຍໍ ໂຈຣຠຍໍ. ເອວໍ ພທ຺ຘນມຸຕ຺ໂຕຈ຺ຈາທິ.

໒໑໕. ຣຎ຺ໂຎ ປຸຕ຺ໂຕ ຣາຊປຸຕ຺ໂຕ.

‘‘ພ຺ຣາຫ຺ມຓສ຺ສ ກຓ຺ຫາ ທນ຺ຕາ’’ ອິຈ຺ຈຕ຺ຣ ທນ຺ຕາເປກ຺ຂາ ຉຏ຺ຐີຕິ ກຓ຺ເຫນ ສມ຺ພນ຺ຘາຠາວາ ນ ສມາໂສ. ຍທາ ຕຸ ກຓ຺ຫາ ຈ ເຕ ທນ຺ຕາ ເຈຕິ ກມ຺ມຘາຣໂຍ, ຕທາ ຉຏ຺ຐີ ກຓ຺ຫທນ຺ຕາເປກ຺ຂາຕິ ພ຺ຣາຫ຺ມຓກຓ຺ຫທນ຺ຕາຕິ ສມາໂສ ໂຫເຕວ.

໒໑໖. ‘‘ຣຎ຺ໂຎ ມາຄຘສ຺ສ ຘນ’’ ນ຺ຕ຺ຍຕ຺ຣ ຣຎ຺ໂຎຕິ ຉຏ຺ຐີ ຘນ ມເປກ຺ຂເຕ, ນ ມາຄຘໍ. ຣາຊາ ເອວ ມາຄຘສທ຺ເທນ ວຸຈ຺ຈເຕຕິ ເຠທາຠາວາ ສມ຺ພນ຺ຘາຠາໂວຕິ ຕຸລ຺ຍາຘິກຣເຓນ ມາຄເຘນ ສຫ ຣາຊາ ນ ສມສ຺ຍເຕ. ທ຺ວິຏ຺ໂຐ ຫິ ສມ຺ພນ຺ໂຘ.

ຣຎ຺ໂຎ ອສ຺ໂສ ປຸຣິໂສ ເຈ’’ ຕ຺ຍ ຕ຺ຣ ຣຎ຺ໂຎ ອສ຺ໂສ, ຣຎ຺ໂຎ ປຸຣິໂສ ຕິ ຈ ປຈ຺ເຈກໍ ສມ຺ພນ຺ຘໂຕ ສາເປກ຺ຂຕາ ອຕ຺ຖີຕິ ນ ສມາໂສ. ‘‘ອສ຺ໂສ ຈ ປຸຣິໂສ ຈາ’’ຕິ ທ຺ວນ຺ເທ ກເຕ ຕຸ ຣາຊສ຺ສປຸຣິສາຕິ ໂຫເຕວ, ອຎ຺ຎານເປກ຺ຂຕ຺ຕາ.

‘‘ຣຎ຺ໂຎ ຄຣຸປຸຕ຺ໂຕ’’ ອິຈ຺ຈຕ຺ຣ ຣາຊາເປກ຺ຂິໂນປິ ຄຣຸໂນ

ປຸຕ຺ເຕນ ສຫ ສມາໂສ, ຄມກຕ຺ຕາ. ຄມກຕ຺ຕມ຺ປິ ສມາສສ຺ສ ນິພນ຺ຘນໍ. ຕຕ຺ຖ ຄຣຸໂນ ປຸຕ຺ໂຕຕິ ວິຄ຺ຄໂຫ, ເອວມຎ຺ຎຕ຺ຣ.

໒໑໗. ຣູເປ ສຎ຺ຎາ ຣູປສຎ຺ຎາ.

ກ຺ວຈິ ນິນ຺ທາຍໍ - ກູເປ ມຓ຺ຑູໂກ ວິຍ ກູປມຓ຺ຑູໂກ. ເອວໍ ນຄຣກາໂກ ອິຈ຺ຈາທິ. ອຕ຺ໂຣປມາຍ ນິນ຺ທາ ຄມ຺ຍເຕ.

ອນ຺ເຕວາສິໂກ ຕ຺ຍາໂທ ວິຠຕ຺ຕ຺ຍໂລໂປ.

ພຫຸພ຺ພີຫິສມາສ

໒໑໘. ອຎ຺ຎປທຕ຺ເຖສຸ ພຫຸພ຺ພີຫິ.

ອປ຺ປຐມນ຺ຕານ ມຎ຺ເຎສໍ ປທານໍ ອຕ຺ເຖສຸ ທ຺ເວ ວາ ພຫູນິ ວາ ນາມານິ ຍທາ ສມສ຺ຍນ຺ເຕ, ຕທາ ໂສ ສມາໂສ ພຫຸພ຺ພີຫິ ນາມ.

ອາຄຕາ ສມຓາ ຍໍ ສາ ອາຄຕສມໂຓ, ວິຫາໂຣ.

໒໑໙. ຊິຕານິ ອິນ຺ທ຺ຣິຍານິ ເຍນ ໂສ ຊິຕິນ຺ທ຺ຣິໂຍ, ຠຄວາ. ອາຫິໂຕ ອຄ຺ຄິ ເຍນ ໂສ ອາຫິຕຄ຺ຄິ. ອຄ຺ຍາຫິໂຕ ວາຕ຺ຍາໂທ ຍເຖຈ຺ຉໍ ວິເສສນສ຺ສ ປຣຕາ.

໒໒໐. ກຣເຓ ຕຸ-ຉິນ຺ໂນ ຣຸກ຺ໂຂ ເຍນ ໂສ ຉິນ຺ນຣຸກ຺ໂຂ, ຜຣສຸ.

໒໒໑. ທິນ຺ໂນ ສຸງ຺ໂກ ຍສ຺ສ ໂສ ທິນ຺ນສຸງ຺ໂກ, ຣາຊາ.

໒໒໒. ນິຄ຺ຄຕາ ຊນາ ຍສ຺ມາ ໂສ ນິຄ຺ຄຕຊໂນ, ຄາໂມ.

໒໒໓. ທສ ພລານິ ຍສ຺ສ ໂສ ທສພໂລ, ຠຄວາ. ນຕ຺ຖິ ສໂມ ຍສ຺ສ ໂສ ອສໂມ. ເອຕ຺ຖ ‘‘ອຕ຺ຕນ຺ນສ຺ສາ’’ຕິ ໂຍຄວິຠາເຄນ ນສ຺ສ ອ.

ປຫູຕາ ຊິວ຺ຫາ ຍສ຺ສ ໂສ ປຫູຕຊິວ຺ໂຫ, ມຫນ຺ຕີ ປຎ຺ຎາ ຍສ຺ສ ໂສ ມຫາປຎ຺ໂຎ. ທ຺ວີສຸ ‘‘ອິຕ຺ຖິຍມ຺ຠາສິຕປຸມິຕ຺ຖີປຸມາວ ເຈ’’ຕິ ປຸມ຺ຠາວາຕິເທສາ ປຸພ຺ພຸຕ຺ຕຣປເທສຸ ອາອີປ຺ປຈ຺ຈຍານມຠາໂວ.

໒໒໔. ‘‘ກ຺ວຈິ ສມາສນ຺ຕຄຕານມກາຣນ຺ໂຕ’’ຕິ ອນ຺ຕສ຺ສ ອຕ຺ຕໍ. ກາຣຄ຺ຄຫເຓນ ອາ ອິ ຈ. ອິຕ຺ຖິຍມິວຓ຺ຓນ຺ຕາ, ຕ຺ວນ຺ເຕຫິ ຈ ກປ຺ປຈ຺ຈໂຍປິ. ຍຖາ - ວິສາລໍ ອກ຺ຂິ ຍສ຺ສ ໂສ ວິສາລກ຺ໂຂ, ປຈ຺ຈກ຺ຂຘມ຺ມາ, ສິໂລໂປ. ໂສຠໂນ ຄນ຺ໂຘ ຍສ຺ສ ໂສ ສຸຄນ຺ຘິ. ພຫຸກນ຺ຕິໂກ, ພຫຸນທິໂກ, ສມຸທ຺ໂທ. ເອຕ຺ຖ ຍທາທິນາ ຣສ຺ໂສ. ພຫຸກຕ຺ຕຸໂກ. ມຕ຺ຕາ ພຫໂວ ມາຕງ຺ຄາ ຍສ຺ມິໍ ຕໍ ມຕ຺ຕພຫຸມາຕງ຺ຄໍ, ວນໍ.

ຕຸລ຺ຍາຘິກຣໂຓ.

໒໒໕. ສຸວຓ຺ຓສ຺ສ ວິຍ ວຓ຺ໂຓ ຍສ຺ສ ໂສ ສຸວຓ຺ຓວຓ຺ໂຓ. ວຊິຣໍ ປາຓິມ຺ຫິ ຍສ຺ສ ໂສ ວຊິຣປາຓິ. ອຸຣສິ ໂລມານິ ຍສ຺ສ ໂສ ອຸຣສິໂລໂມ. ເອຕ຺ຖ ວິຠຕ຺ຍໂລໂປ.

‘‘ອຕ຺ເຖສູ’’ຕິ ພຫຸຕ຺ຕຄ຺ຄຫເຓນ ກ຺ວຈິ ປຐມນ຺ຕານມ຺ປິ. ສຫ ເຫຕຸນາ ໂຍ ວຕ຺ຕເຕ ໂສ ສເຫຕຸໂກ, ‘‘ຍທາ’’ ທິນາ ສຫສ຺ສ ໂສ.

໒໒໖. ສຕ຺ຕ ວາ ອຏ຺ຐ ວາ ສຕ຺ຕຏ຺ຐ, ມາສາ, ເອຕ຺ຖຎ຺ຎປທຕ຺ໂຖ ວາ ສທ຺ທສ຺ສຕ຺ໂຖ. ທກ຺ຂິຓສ຺ສາ ຈ ປຸພ຺ພສ຺ສາ ຈ ທິສາຍ ຍໍ ອນ຺ຕຣາລໍ, ສາ ທກ຺ຂິຓປຸພ຺ພາ, ທິສາ.

ຠິນ຺ນາຘິກຣໂຓ.

ອປ຺ປຐມນ຺ຕານນ຺ຕິ ກິໍ, ເທສິໂຕ ພຸທ຺ເຘນ ໂຍ ຘມ຺ໂມ.

ທ຺ວນ຺ທສມາສ

໒໒໗. ນາມານໍ ສມຸຈ຺ຈໂຍ ທ຺ວນ຺ໂທ.

ສມຸຈ຺ຈໂຍ, ຕິ ປິຓ຺ຑີກຣຓໍ ເອກວິຠຕ຺ຕິການໍ ນາມານໍ ໂຍ ສມຸຈ຺ຈໂຍ, ໂສ ທ຺ວນ຺ໂທ ນາມ, ອິທໍ ສຸຕ຺ຕໍ ພຫຸວຈນວິສຍໍ.

ຈນ຺ໂທ ຈ ສູຣິໂຍ ຈ ຈນ຺ທສູຣິຍາ. ຕິຏ຺ຐນ຺ຕິ ຕ຺ຍາທິ-

ກ຺ຣິຍາສມ຺ພນ຺ຘສາມຎ຺ຎໂຕ ອຕ຺ເຖຕ຺ຖາເປກຕ຺ຖຕາ, ເອວໍ ນຣນາຣິໂຍ, ອກ຺ຂຣປທານິ.

໒໒໘. ຕຖາ ທ຺ວນ຺ເທ ປາຓິ ຕຸຣິຍ ໂຍຄ຺ຄ ເສນງ຺ຄ ຂຸທ຺ທຊນ຺ຕຸກ ວິວິຘ ວິຣຸທ຺ຘ ວິສຠາຄຕ຺ຖາທີນຎ຺ຈ.

ວິວິເຘນາກາເຣນ ວິຣຸທ຺ຘາ ວິວິຘວິຣຸທ຺ຘາ, ສຠາຄາ ສທິສາ, ວິວິຘາ ຈ ເຕ ສຠາຄາ ເຈຕິ ວິສຠາຄາ. ຍຖາ ທິຄຸສມາເສ, ຕຖາ ທ຺ວນ຺ເທ ປາຓ຺ຍງ຺ຄຕ຺ຖາທີນໍ ເອກຕ຺ຕໍ, ນປຸໍສກຕ຺ຕຎ຺ຈ ໂຫຕິ.

ຈກ຺ຂຸໂສຕໍ, ຄີຕວາທິຕໍ, ຍຸຄນງ຺ຄລໍ, ຫຕ຺ຖສ຺ສໍ, ອສິຈມ຺ມໍ, ຑໍສມກສໍ, ໂກກາລູກໍ.

ນາມຣູປໍ, ນາມໍ ນມນລກ຺ຂຓໍ, ຣູປໍ ຣຸປ຺ປນລກ຺ຂຓໍ. ເອວເມເຕ ຘມ຺ມາ ລກ຺ຂຓໂຕ ວິວິຘາ, ປຣມຕ຺ຖໂຕ ສຠາຄາ ຈ.

ອາທິສທ຺ເທນາຎ຺ຎຕ຺ຖາປິ. ຍຖາ - ຠິນ຺ນລິງ຺ຄານໍ - ອິຕ຺ຖິປຸມໍ. ຍທາທິນາ ຣສ຺ໂສ, ທາສິທາສໍ, ປຕ຺ຕຈີວຣໍ. ຄງ຺ຄາໂສຓໍ.

ສງ຺ຂ຺ຍາປຣິມາຓານໍ - ຕິກຈຕຸກ຺ກໍ.

ສິປ຺ປີນໍ - ເວຓຣຖກາຣໍ.

ລຸທ຺ທການໍ - ສາກຸນ຺ຕິກ ມາຄວິກໍ.

ອປ຺ປາຓິຊາຕີນໍ - ອາຣສຕ຺ຖິ.

ເອກຊ຺ຌາຍນພ຺ຣາຫ຺ມຓານໍ - ກຐກາລາປໍ ອິຈ຺ຈາທິ.

໒໒໙. ວິຠາສາ ຣຸກ຺ຂ ຕິຓ ປສຸ ຘນ ຘຎ຺ຎ ຊນປທາທີນຎ຺ຈ.

ທ຺ວນ຺ເທ ຣຸກ຺ຂາທີນໍ ເອກຕ຺ຕໍ ນປຸໍສກຕ຺ຕຎ຺ຈ ວາ ໂຫຕິ.

ຘວຂທິຣໍ, ຘວຂທິຣາ, ມຸຎ຺ຊປພ຺ພຊໍ, ມຸຎ຺ຊປພ຺ພຊາ, ອເຊຬກໍ, ອເຊຬກາ, ຫິຣຎ຺ຎສຸວຓ຺ຓໍ, ຫິຣຎ຺ຎສຸວຓ຺ຓານິ, ສາລິຍວໍ, ສາລິຍວາ.

ກາສິໂກສລໍ ກາສິໂກສລາ.

ອາທິສທ຺ເທນ ອຎ຺ເຎສຸປິ ວາ. ຍຖາ – ນິຈ຺ຈວິໂຣຘີນມທ຺ທພ຺ພານໍ - ກຸສລາກຸສລໍ, ກຸສລາກຸສລານິ.

ສກຸຓີນໍ - ພກພລາກໍ, ພກພລາກາ.

ພ຺ຍຎ຺ຊນານໍ - ທຘິຆຕໍ, ທຘິຆຕານິ.

ທິສານໍ - ປຸພ຺ພາປຣໍ, ປຸພ຺ພາປຣາ ອິຈ຺ຈາທິ.

ອພ຺ຍຍີຠາວສມາສ

໒໓໐. ອຘິສທ຺ທາ ສ຺ມິໍ, ຕສ຺ສ ໂລໂປ. ອຘິສທ຺ເທນ ຕຸລ຺ຍາຘິກຣຓຕ຺ຕາ ອິຕ຺ຖິສທ຺ທາປິສ຺ມິໍ. ນິຈ຺ຈສມາສຕ຺ຕາ ອາຘາຣຠູຕາຍມິຕ຺ຖິຍນ຺ຕິ ປທນ຺ຕເຣນ ວິຄ຺ຄໂຫ. ອຘິ ອິຕ຺ຖິຍນ຺ຕິ ຐິເຕ –

ອຸປສຄ຺ຄນິປາຕປຸພ຺ພໂກ ອພ຺ຍຍີຠາໂວ.

ອຸປສຄ຺ຄາທິປຸພ຺ພໂກ ສທ຺ໂທ ວິຠຕ຺ຍຕ຺ຖາທີສຸ ສມາໂສ ໂຫຕິ, ອພ຺ຍຍີຠາວສຎ຺ໂຎ ຈ.

‘‘ໂສ ນປຸໍສກລິງ຺ໂຄ’’ຕິ ອພ຺ຍຍີຠາໂວ ນປຸໍສກລິງ຺ໂຄ, ຍທາທິນາ ເອກວຈໂນ ຈ.

‘‘ສໂຣ ຣສ຺ໂສ ນປຸໍສເກ’’ຕິ ຣສ຺ໂສ.

ອຎ຺ຎສ຺ມາ ໂລໂປ ຈ.

ອນກາຣນ຺ຕາ ອພ຺ຍຍີຠາວາ ປຣາ ສພ຺ພາ ວິຠຕ຺ຕີ ລຸຊ຺ຊເຣ. ອຘິຕ຺ຖິ, ວິຠຕ຺ຕີນມຕ຺ໂຖ ອາຘາຣາທິ.

ອິຘາຘິສທ຺ໂທ ອາຘາເຣວຕ຺ຕເຕ, ອຘິຕ຺ຖິອິຈ຺ເຈຕໍ ປທໍ ອິຕ຺ຖິຍ ມິຈ຺ເຈຕມຕ຺ຖໍ ວທຕິ.

ສມີປໍ ນຄຣສ຺ສ ອຸປນຄຣໍ. ‘‘ອໍວິຠຕ຺ຕີນມກາຣນ຺ຕພ຺ຍຍີຠາວາ’’ຕິ ວິຠຕ຺ຕີນໍ ກ຺ວຈິ ອໍ.

ກ຺ວຈີຕິ ກິໍ. ອຸປນຄເຣ.

ອຠາໂວ ມກ຺ຂິການໍ ນິມ຺ມກ຺ຂິກໍ ຣສ຺ໂສ. ອນຸປຸພ຺ໂພ ເຖຣານໍ ອນຸເຖຣໍ, ອນຕິກ຺ກມ຺ມ ສຕ຺ຕິໍ ຍຖາສຕ຺ຕິ.

ເຍ ເຍ ພຸຑ຺ຒາ ຍຖາພຸຑ຺ຒໍ, ວິຈ຺ຉາຍໍ.

ຍຕ຺ຕໂກ ປຣິຈ຺ເຉໂທ ຊີວສ຺ສ ຍາວຊີວໍ, ອວຘາຣເຓ.

ອາ ປພ຺ພຕາ ເຂຕ຺ຕໍ ອາປພ຺ພຕໍ ເຂຕ຺ຕໍ, ມຣິຍາທາຍໍ, ວຊ຺ຊມານາ ສີມາ ມຣິຍາທາ, ປພ຺ພຕໍ ວິນາຕ຺ຍຕ຺ໂຖ.

ອາ ຊລນ຺ຕາ ສີຕໍ ອາຊລນ຺ຕໍ ສີຕໍ, ອຠິວິຘິມ຺ຫິ, ຄຍ຺ຫມານາ ສີມາ ອຠິວິຘິ, ຊລນ຺ເຕນ ສເຫຕ຺ຍຕ຺ໂຖ.

ອາສທ຺ທໂຍເຄ ‘‘ຘາຕຸນາມາ’’ທິນາ ອປາທານວິຘາເນເນວ ວາກ຺ຍມ຺ປິ ສິທ຺ຘໍ. ຕຖາຎ຺ຎຕ຺ຣ.

໒໓໑. ‘‘ອຸຕ຺ຕໂມ ວີໂຣ ປວີໂຣ’’ ອິຈ຺ຈາໂທ ປນ ປຸພ຺ພປທຕ຺ຖປ຺ປຘານຕ຺ຕາຠາວາພ຺ຍຍີຠາວາຠາໂວ ກມ຺ມຘາຣໂຍເອວ. ເອວໍ ວິສິຏ຺ໂຐ ຘມ຺ໂມ ອຠິຘມ຺ໂມ. ກຸຈ຺ຉິຕໍ ອນ຺ນໍ ກທນ຺ນໍ. ເອຕ຺ຕ຺ຖ ‘‘ກທ ກຸສ຺ສາ’’ຕິ ສເຣ ກຸສ຺ສ ກທາເທໂສ.

ອປ຺ປກໍ ລວຓໍ ກາລວຓໍ, ເອຕ຺ຖ ‘‘ກາປ຺ປຕ຺ເຖສຸ ຈາ’’ຕິ ກຸສ຺ສ ກາ, ພຫຸວຈເນນາຎ຺ຎຕ຺ຣາປິ ກ຺ວຈິ. ກຸຈ຺ຉິໂຕ ປຸຣິໂສ ກາປຸຣິໂສ, ກຸປຸຣິໂສ ວາ, ເອວມສຸຣາທິ.

ປຸພ຺ພປຣູຠຍມຎ຺ຎປທຕ຺ຖ - ປ຺ປຘານາພ຺ຍຍີຠາວ ສມາໂສ;

ກມ຺ມຘາຣຍກ ຕປ຺ປຸຣິສາ ທ຺ເວ, ທ຺ເວນ຺ໂທ ຈ ພຫຸພ຺ພີຫິ ຈ ເຎຍ຺ຍາ.

ສມາໂສ.