໔. ຕທ຺ຘິຕກຓ຺ຑ

ອປຈ຺ຈຕທ຺ຘິຕ

໒໓໒. ວາຓປຈ຺ເຈ.

ຉຏ຺ຐນ຺ຕາ ສທ຺ທາ ‘‘ຕສ຺ສາປຈ຺ຈ’’ມິຈ຺ຈສ຺ມິໍ ອຕ຺ເຖ ໂຓ ວາ ໂຫຕິ. ວາຕິ ວາກ຺ຍຕ຺ຖໍ. ເຓເນວາປຈ຺ຈຕ຺ຖສ຺ສ ວຸຕ຺ຕຕ຺ຕາ ອປຈ຺ຈສທ຺ທາປ຺ປໂຍໂຄ.

‘‘ເຕສໍ ວິຠຕ຺ຍາ’’ ໂທ ເຕສໍຄຫເຓນ ວິຠຕ຺ຕິໂລໂປ. ຕໂຖຕ຺ຕຣຕ຺ຣ.

‘‘ເຕສໍ ໂຓ ໂລປໍ’’ຕິ ປຈ຺ຈຍານໍ ຓສ຺ສ ໂລໂປ.

‘‘ວຸທ຺ຘາທິສຣສ຺ສ ວາ ສໍໂຍຄນ຺ຕສ຺ສ ສເຓ ເຈ’’ຕິ ສຓກາເຣ ປເຣ ອສໍໂຍຄນ຺ຕສ຺ສາທິສຣສ຺ສ ວຸທ຺ຘິ.

ຕສ຺ສາປນິຍເມ –

ອຍຸວຓ຺ຓານຎ຺ຈາໂຍ ວຸທ຺ຘິ.

ອກາຣິວຓ຺ຓຸວຓ຺ຓານໍ ອາເອໂອວຸທ຺ຘິໂຍ ໂຫນ຺ຕິ, ຈສທ຺ເທນ ກ຺ວຈິ ນ.

ສຣໂລປາທິ, ຕທ຺ຘິຕຕ຺ຕາ ນາມມິວ ກເຕ ສ຺ຍາທິ.

ຕທ຺ຘິຕາຠິເຘຍ຺ຍລິງ຺ຄ–ວິຠຕ຺ຕິວຈນາ ສິຍຸໍ.

ສມູຫຠາວຊາ ຠີໂຍ, ສກຕ຺ເຖ ຓ຺ໂຍ ນປຸໍສເກ.

ຕາ ຕຸຕ຺ຖິຍໍ ນິປາຕາ ເຕ, ຘາມິຖໍປຈ຺ຈຍນ຺ຕກາ.

ວສິຏ຺ຐສ຺ສາປຈ຺ຈໍ ໂປໂສ ວາສິຏ຺ໂຐ, ອິຕ຺ຖີ ວາສິຏ຺ຐີ, ນປຸໍສກໍ ວາສິຏ຺ຐໍ. ວິກປ຺ປວິຘານໂຕ ຕທ຺ຘິເຕນ ສມາສສ຺ສາຈ຺ຈນ຺ຕໍ ພາຘາຍາ ຠາວາ ວສິຏ຺ຐາ ປຈ຺ຈນ຺ຕິປິ ໂຫຕິ.

ນປຸໍສເກນ ວາປີຕິ, ສທ຺ທສຕ຺ຖວິທູ ວິທຸໍ.

໒໓໓. ວາ ອປຈ຺ເຈຕິ ຈາຘິກາໂຣ.

ຓາຍນ ຓານ ວຈ຺ຉາທິໂຕ.

ວຈ຺ຉາທິໂຕ ໂຄຕ຺ຕຄຓໂຕ ຓາຍໂນ ຓາໂນ ຈ ວາ ໂຫຕິ.

ອປຈ຺ຈໍ ປປຸຕ຺ຕປ຺ປຠຸຕິ ໂຄຕ຺ຕໍ. ກຈ຺ຈສ຺ສາປຈ຺ຈໍ ກຈ຺ຈາຍໂນ, ກຈ຺ຈາໂນ ວາ. ສໍໂຍຄນ຺ຕຕ຺ຕາ ນ ວຸທ຺ຘິ.

໒໓໔. ‘‘ເຓຍ຺ໂຍ ກຕ຺ຕິກາທີຫີ’’ຕິ ເຓຍ຺ໂຍ, ວິນຕາຍ ອປຈ຺ຈໍ ເວນເຕຍ຺ໂຍ ວິນເຕຍ຺ໂຍ ວາ. ນ ປກ຺ເຂ ວຸທ຺ຘິ, ເຓຍ຺ໂຍຕິ ໂຍຄວິຠາເຄນ ‘‘ຕສ຺ສ ທີຍເຕ’’ ຕ຺ຍຕ຺ເຖປິ ເຓຍ຺ໂຍ, ທກ຺ຂິຓາ ທີຍເຕ ຍສ຺ສ ໂສ ທກ຺ຂິເຓຍ຺ໂຍ.

໒໓໕. ອໂຕ ຓິ ວາ.

ອກາຣນ຺ຕໂຕ ອປຈ຺ເຈ ຓິ ວາ ໂຫຕິ, ປຸນ ວາສທ຺ເທນ ຓິໂກ, ອກາຣນ຺ຕາ ອນກາຣນ຺ຕາ ຈ ໂພປິ.

ທກ຺ຂິ, ສກ຺ຍປຸຕ຺ຕິໂກ, ມຓ຺ຑພ຺ໂພ, ຠາຕຸພ຺ໂພ. ທ຺ວິຕ຺ຕໍ.

໒໓໖. ‘‘ຓໂວ ປຄ຺ວາທີຫີ’’ ຕິ ຓໂວ. ມນຸໂນ ອປຈ຺ຈໍ ມາຓໂວ.

໒໓໗. ‘‘ເຓຣ ວິຘວາທິໂຕ’’ຕິ ເຓໂຣ, ສາມເຓໂຣ.

ສໍສຏ຺ຐາທິອເນກຕ຺ຖຕທ຺ຘິຕ

໒໓໘. ‘‘ເຍນ ວາ ສໍສຏ຺ຐໍ ຕຣຕິ ຈຣຕິ ວຫຕິ ຓິໂກ’’ຕິ ຓິໂກ. ວາກາເຣນ ເນກຕ຺ເຖເນກປຈ຺ຈຍາ ຈ. ຆເຕນ ສໍສຏ຺ໂຐ ຆາຕິໂກ, ໂອທໂນ. ອຸຬູເປນ ຕຣຕີຕິ ໂອຬູປິໂກ, ອຸຬູປິໂກ ວາ, ນ ປກ຺ເຂ ວຸທ຺ຘິ.

ສກເຏນ ຈຣຕີຕິ ສາກຏິໂກ. ສີເສນ ວຫຕີຕິ ສີສິໂກ, ນ ວຸທ຺ຘິ.

ອິຕ຺ຖິລິງ຺ຄໂຕ ເອຍ຺ຍໂກ, ຓໂກ ຈ. ຈມ຺ປາຍໍ ຊາໂຕ ຈມ຺ເປຍ຺ຍໂກ. ເອວໍ ພາຣາຓເສຍ຺ຍໂກ. ຓໂກ – ກຸສິນາຣາຍໍ ວສຕີຕິ ໂກສິນາຣໂກ. ຊນປທໂຕ ຓໂກ ຈ – ມຄເຘສຸ ວສຕິ, ເຕສໍ ອິສ຺ສໂຣ ວາ ມາຄຘໂກ.

ຕຊ຺ຊາຕິຍາ ວິສິຏ຺ຐຕ຺ເຖ ອາຊານີໂຍ. ອສ຺ສຊາຕິຍາ ວິສິຏ຺ໂຐ ອສ຺ສາຊານີໂຍ. ໂຎ - ອຄ຺ຄນ຺ຕິ ຊານິຕພ຺ພໍ ອຄ຺ຄຎ຺ຎໍ, ທ຺ວິຕ຺ຕໍ.

໒໓໙. ຕມຘີເຕ ເຕນ ກຕາທິສນ຺ນິຘານນິໂຍຄສິປ຺ປຠຓ຺ຑ ຊີວິກຕ຺ເຖສຸ ຈ.

ຕໍ ອຘີເຕ ອິຈ຺ຈາທີສ຺ວຕ຺ເຖສຸ ອາທິສທ຺ເທນ ຫຕາທີສຸ ຈ ຓິໂກ ວາ ໂຫຕິ. ອຠິຘມ຺ມມຘີເຕຕິ ອາຠິຘມ຺ມິໂກ, ອຠິຘມ຺ມິໂກ ວາ, ນ ປກ຺ເຂ ວຸທ຺ຘິ. ວຈສາ ກຕໍ ກມ຺ມໍ ວາຈສິກໍ. ເອວໍ ມານສິກໍ, ເອຕ຺ຖ –

‘‘ສ ສເຣ ວາຄໂມ’’ຕີຫານຸວຕ຺ຕິຕາທິສທ຺ເທນ ສາຄໂມ.

ສຣີເຣ ສນ຺ນິຘານາ ເວທນາ ສາຣີຣິກາ. ທ຺ວາເຣ ນິຍຸຕ຺ໂຕ ໂທວາຣິໂກ, ເອຕ຺ຖ- ‘‘ມາຍູນມາຄໂມ ຐາເນ’’ຕິ ວກາຣໂຕ ປຸພ຺ເພ ໂອກາຣາຄໂມ.

ສິປ຺ປນ຺ຕິ ຄີຕາທິກລາ, ວີຓາ ອສ຺ສ ສິປ຺ປນ຺ຕິ ເວຓິໂກ, ອຕ຺ຣ ວີເຓຕິ ວີຓາວາທນໍ. ຄນ຺ໂຘ ອສ຺ສ ຠຓ຺ຑນ຺ຕິ ຄນ຺ຘິໂກ, ມເຄ ຫນ຺ຕ຺ວາ ຊີວຕີຕິ ມາຄວິໂກ, ວກາຣາຄໂມ. ຊາເລນ ຫໂຕ ຊາລິໂກ, ສຸຕ຺ເຕນ ພທ຺ໂຘ ສຸຕ຺ຕິໂກ, ຈາໂປ ອສ຺ສ ອາຍຸຘນ຺ຕິ ຈາປິໂກ, ວາໂຕ ອສ຺ສ ອາພາໂຘ ອຕ຺ຖີຕິ ວາ ວາຕິໂກ, ພຸທ຺ເຘ ປສນ຺ໂນ ພຸທ຺ຘິໂກ, ວຕ຺ເຖນ ກີຕໍ ຠຓ຺ຑໍ ວຕ຺ຖິກໍ.

ກຸມ຺ໂຠ ອສ຺ສ ປຣິມາຓໍ, ຕ ມຣຫຕິ, ເຕສໍ ຣາສິ ວາ ກຸມ຺ຠິໂກ. ອກ຺ເຂນ ທິພ຺ພຕີຕິ ອກ຺ຂິໂກ, ມຄເຘສຸ ວສຕິ, ຊາໂຕຕິ ວາ ມາຄຘິໂກ ອິຈ຺ຈາທິ.

໒໔໐. ຓ ຣາຄາ ເຕນ ຣຕ຺ຕໍ ຕສ຺ເສທມຎ຺ຎຕ຺ເຖສຸ ຈ.

ເຕນ ຣຕ຺ຕໍ ຕ຺ຍາທ຺ຍຕ຺ເຖສຸ ໂຓ ວາ ໂຫຕິ. ກສາເວນ ຣຕ຺ຕໍ ກາສາວໍ.

ເອວໍ ນີລໍ ປີຕມິຈ຺ຈາທິ. ນ ວຸທ຺ຘິ, ມຫິສສ຺ສ ອິທໍ ມາຫິສໍ, ສິງ຺ຄໍ.

ເອວໍ ຣາຊໂປຣິສໍ, ເອຕ຺ຖ ‘‘ອຍຸວຓ຺ຓານຎ຺ຈາ’’ ໂທ ປຸນ ວຸທ຺ຘິຄ຺ຄຫເຓນ ອຸຕ຺ຕຣປທສ຺ສ ວຸທ຺ຘິ. ມຄເຘຫິ ອາຄໂຕ, ຕຕ຺ຣ ຊາໂຕ, ເຕສໍ ອິສ຺ສໂຣ, ເຕ ອສ຺ສ ນິວາໂສຕິ ວາ ມາຄໂຘ, ກຕ຺ຕິກາທີຫິ ຍຸຕ຺ໂຕ ກຕ຺ຕິໂກ, ມາໂສ.

ພຸທ຺ໂຘ ອສ຺ສ ເທວຕາຕິ ພຸທ຺ໂຘ. ພ຺ຍາກຣຓໍ ອເວຈ຺ຈ ອຘີເຕຕິ ເວຍ຺ຍາກຣໂຓ. ເອຕ຺ຖ ‘‘ມາຍູນມາ’’ທິນາ ຍກາຣໂຕ ປຸພ຺ເພ ເອ ອາຄໂມ, ຍສ຺ສ ທ຺ວິຕ຺ຕໍ. ສຄເຣຫິ ນິພ຺ພຕ຺ໂຕ ສາຄໂຣອິຈ຺ຈາທິ.

໒໔໑. ຊາຕາທີນມິມິຍາ ຈ.

ຊາຕາທີສຸ ອິໂມ ອິໂຍ ຈ ໂຫຕິ, ຈສທ຺ເທນ ກິໂຍ ຈ. ປຈ຺ຉາ ຊາໂຕ ປຈ຺ຉິໂມ, ມນຸສ຺ສຊາຕິຍາ ຊາໂຕ ມນຸສ຺ສຊາຕິໂຍ. ອນ຺ເຕ ນິຍຸຕ຺ໂຕ ອນ຺ຕິໂມ, ອນ຺ຕິໂຍ.

ເອວໍ ອນ຺ຘກິໂຍ. ປຸຕ຺ໂຕ ອສ຺ສ ອຕ຺ຖີຕິ ປຸຕ຺ຕິໂມ, ປຸຕ຺ຕິໂຍ. ເອວໍ ກປ຺ປິໂຍ.

໒໔໒. ‘‘ຕທສ຺ສຏ຺ຐານມີໂຍ ເຈ’’ຕິ ອີໂຍ, ຈກາເຣນ ຫິຕາທ຺ຍຕ຺ເຖປິ, ພນ຺ຘນສ຺ສ ຐານໍ ພນ຺ຘນີຍໍ, ຈງ຺ກມນສ຺ສ ຫິຕໍ ຈງ຺ກມນີຍໍ.

໒໔໓. ‘‘ອາລຸ ຕພ຺ພຫຸເລ’’ຕິ ອາລຸ. ອຠິຊ຺ຌາພຫຸໂລ ອຠິຊ຺ຌາລຸ.

ວິເສສຕທ຺ຘິຕ

໒໔໔. ວິເສເສ ຕຣຕມິສ຺ສິກິຍິຏ຺ຐາ.

ອຕິສຍຕ຺ເຖ ຕຣາທໂຍ ໂຫນ຺ຕິ.

ອຍເມເຕສໍ ອຕິສເຍນ ປາໂປຕິ ປາປຕໂຣ, ປາປຕໂມ, ປາປິສ຺ສິໂກ, ປາປິໂຍ, ປາປິຏ຺ໂຐ ວາ.

‘‘ວຸທ຺ຘສ຺ສ ໂຊ ອິຍິຏ຺ເຐສູ’’ຕິ ວຸທ຺ຘສ຺ສ ຊາເທເສ – ‘‘ສຣໂລປາ’’ໂທ ປກຕິຄ຺ຄຫເຓນ ປກຕ຺ຍຠາວາ ອິສ຺ສ ເອ. ເຊຍ຺ໂຍ, ເຊຏ຺ໂຐ.

ເອວໍ ‘‘ປສຕ຺ຖສ຺ສ ໂສ ເຈ’’ຕິ ສາເທເສ ເສຍ຺ໂຍ, ເສຏ຺ໂຐ.

ອສ຺ສຕ຺ຖິຕທ຺ຘິຕ

໒໔໕. ‘‘ຕທສ຺ສຕ຺ຖີຕິ ວີ ເຈ’’ຕິ ວີ. ເມຘາ ອສ຺ສ ອຕ຺ຖີຕິ ເມຘາວີ.

໒໔໖. ເອວໍ ‘‘ຕປາທິໂຕ ສີ’’ຕິ ສີ, ທ຺ວິຕ຺ຕໍ, ຕປສ຺ສີ.

໒໔໗. ‘‘ທຓ຺ຑາທິໂຕ ອິກ ອີ’’ຕິ ອິໂກ, ອີ ຈ. ທຓ຺ຑິໂກ, ທຓ຺ຑີ.

໒໔໘. ‘‘ຄຸຓາທິໂຕ ວນ຺ຕູ’’ຕິ ວນ຺ຕຸ. ຄຸຓວາ, ປຎ຺ຎວາ. ຍທາທິນາ ຣສ຺ໂສ.

໒໔໙. ‘‘ສຕ຺ຍາທີຫິ ມນ຺ຕູ’’ຕິ ມນ຺ຕຸ. ສຕິມາ, ຠານຸມາ.

໒໕໐. ‘‘ອາຍຸສ຺ສຸກາຣາສ຺ມນ຺ຕຸມ຺ຫີ’’ຕິ ອຸສ຺ສ ອສ. ອາຍສ຺ມາ.

໒໕໑. ‘‘ສທ຺ຘາທິໂຕ ຓ’’ ອິຕິ ໂຓ. ສທ຺ໂຘ.

໒໕໒. ‘‘ຕປ຺ປກຕິວຈເນ ມໂຍ’’ຕິ ມໂຍ. ສຸວຓ຺ເຓນ ປກຕໍ ໂສວຓ຺ຓມຍໍ, ສຸວຓ຺ຓມຍໍ ວາ. ປກ຺ເຂ - ຍທາທິນາ ວຸທ຺ຘິ.

ເອເຕສໂມ ໂລເປ.

ວິຠຕ຺ຕິໂລເປ ມນາທີນມນ຺ຕສ຺ສ ໂອ ໂຫຕິ. ມໂນມຍໍ.

ສງ຺ຂ຺ຍາຕທ຺ຘິຕ

໒໕໓. ສງ຺ຂ຺ຍາປູຣເຓ ຕ຺ຍຘິກາໂຣ.

‘‘ທ຺ວິຕີຫິ ຕິໂຍ’’ຕິ ຕິໂຍ, ‘‘ຕິເຍ ທຸຕາປິ ເຈ’’ຕິ ທ຺ວິຕີນໍ ທຸຕາ. ທ຺ວິນ຺ນໍ ປູຣໂຓ ທຸຕິໂຍ, ເອວໍ ຕຕິໂຍ.

໒໕໔. ‘‘ຈຕຸຈ຺ເຉຫິ ຖຐາ’’ຕິ ຖຐາ. ຈຕຸຕ຺ໂຖ, ຉຏ຺ໂຐ.

໒໕໕. ເຕສມຑ຺ຒູປປເທນ ອຑ຺ຒຸຑ຺ຒ ທິວຑ຺ຒ ທິຍຑ຺ຒາຑ຺ຒຕິຍາ.

ຈຕຸຕ຺ຖ ທຸຕິຍ ຕຕິຍານໍ ອຑ຺ຒູປປເທນ ສຫ ອຑ຺ຒຸຑ຺ຒ ທິວຑ຺ຒ ທິຍຑ຺ຒາຑ຺ຒຕິຍາ ໂຫນ຺ຕິ.

ອຑ຺ເຒນ ຈຕຸຕ຺ໂຖ ອຑ຺ຒຸຑ຺ໂຒ, ອຑ຺ເຒນ ທຸຕິໂຍ ທິວຑ຺ໂຒ, ທິຍຑ຺ໂຒ ວາ, ອຑ຺ເຒນ ຕຕິໂຍ ອຑ຺ຒຕິໂຍ.

໒໕໖. ‘‘ສງ຺ຂ຺ຍາປູຣເຓ ໂມ’’ຕິ ໂມ, ປຎ຺ຈໂມ. ອິຕ຺ຖິຍໍ ປຎ຺ຈນ຺ນໍ ປູຣຓີ ປຎ຺ຈມີ.

ເອໂກ ຈ ທສ ຈາຕິ ທ຺ວນ຺ເທ ກເຕ –

ທ຺ເວກຏ຺ຐານມາກາໂຣ ວາ.

ສງ຺ຂ຺ຍາເນ ອຸຕ຺ຕຣປເທ ທ຺ວິເອກອຏ຺ຐອິຈ຺ເຈເຕສ ມນ຺ຕສ຺ສ ອາ ວາ ໂຫຕິ. ເອກາທສ ປຎ຺ຈີວ. ເອວໍ ທ຺ວາທສ.

ຍທາທິນາ ຕິສ຺ສ ເຕອາເທເສ ‘‘ເອກາທິໂຕ ທສ຺ສ ຣ ສງ຺ຂ຺ຍາເນ’’ຕິ ທສສທ຺ເທ ທສ຺ສ ໂຣ. ເຕຣສ.

໒໕໗. ‘‘ຈຕູປປທສ຺ສ ໂລໂປ ຕຸຕ຺ຕຣປທາທິຈສ຺ສ ຈຸໂຈປິ ນວາ’’ຕິ ຈຕຸສທ຺ເທ ຕຸສ຺ສ ໂລໂປ ຈສ຺ສ ຈຸ ຈ. ຈຸທ຺ທສ.

‘‘ທເສ ໂສ ນິຈ຺ຈຎ຺ເຈ’’ຕິ ຉສ຺ສ ໂສອາເທເສ – ‘‘ຬ ທຣານໍ’’ຕິ ທສສທ຺ເທ ທສ຺ສ ໂຬ. ໂສຬສ, ອຏ຺ຐາຣສ.

໒໕໘. ‘‘ວີສຕິ ທເສສຸ ພາ ທ຺ວິສ຺ສ ຕູ’’ຕິ ທ຺ວິສ຺ສ ພາ. ພາວີສຕິ, ເອກາທສນ຺ນໍ ປູຣໂຓ ເອກາທສໂມ.

໒໕໙. ‘‘ເອກາທິໂຕ ທສສ຺ສີ’’ຕິ ອິຕ຺ຖິຍໍ ອີ. ເອກາທສີ ອິຈ຺ຈາທິ.

‘‘ທ຺ວາທິໂຕ ໂກເນກຕ຺ເຖ ເຈ’’ຕິ ໂກ, ທ຺ເວ ປຣິມາຓານິ ອສ຺ເສຕິ ທ຺ວິກໍ. ເອວໍ ຕິກາທິ.

໒໖໐. ‘‘ສມູຫຕ຺ເຖ ກຓ຺ຓາ’’ຕິ ກຓ ຈ, ໂຓ ຈ. ມນຸສ຺ສານໍ ສມູໂຫ ມານຸສ຺ສໂກ, ມານຸສ຺ໂສ ວາ.

ເຓ ກເຕ – ‘‘ຌລານມິຍຸວາ ສເຣ ວາ’’ ຕີຫ ວາກາເຣນ ອິສ຺ສ ອຍາເທເສ – ທ຺ວຍໍ, ຕຍໍ. ເອວໍ ‘‘ຄາມຊນພນ຺ຘຸສຫາຍາທີຫິ ຕາ’’ຕິ ຕາ. ຄາມຕາ, ນາຄຣຕາ.

ຠາວຕທ຺ຘິຕ

໒໖໑. ຓ຺ຍຕ຺ຕຕາ ຠາເວ ຕຸ.

ຠາວຕ຺ເຖ ຓ຺ຍຕ຺ຕຕາ ໂຫນ຺ຕິ. ຕຸສທ຺ເທນ ຕ຺ຕໂນ ຈ. ສກຕ຺ຖາທີສຸປິ ຓ຺ໂຍ, ສກຕ຺ເຖ ຕາ ຈ.

໒໖໒. ໂຫນ຺ຕ຺ຍສ຺ມາ ສທ຺ທຎາຓານິ,

ຠາໂວ ສາ ສທ຺ທວຸຕ຺ຕິຍາ;

ນິມິຕ຺ຕຠູຕໍ ນາມຎ຺ຈ,

ຊາຕິ ທພ຺ພໍ ກ຺ຣິຍາ ຄຸໂຓ.

໒໖໓. ຍຖາ – ຈນ຺ທສ຺ສ ຠາໂວ ຈນ຺ທຕ຺ຕໍ. ອິຫ ນາມວສາ ຈນ຺ທສທ຺ໂທ ຈນ຺ທທ຺ທພ຺ເພ ວຕ຺ຕເຕ, ນິມິຕ຺ຕສ຺ສ ຣູປານຸຄຕຎ຺ຈ ຎາຓໍ. ເອວໍ ມນຸສ຺ສຕ຺ຕນ຺ຕິ ມນຸສ຺ສຊາຕິວສາ. ຍທາທິນາ ອີສ຺ສ ຣສ຺ເສ – ທຓ຺ຑິຕ຺ຕນ຺ຕິ ທຓ຺ຑທ຺ທພ຺ພສມ຺ພນ຺ຘາ. ປາຈກຕ຺ຕນ຺ຕິ ປຈນກ຺ຣິຍາສມ຺ພນ຺ຘາ. ນີລຕ຺ຕນ຺ຕິ ນີລຄຸຓວສາ.

ເອວໍ ຓ຺ຍາທີສຸປິ ຍຖາໂຍຄໍ ເຎຍ຺ຍໍ. ຓ຺ໂຍ.

ອວຓ຺ໂຓ ເຍ ໂລປຎ຺ຈ.

ເຍ ປເຣ ອວຓ຺ໂຓ ລຸປ຺ຍເຕ, ຈກາເຣນ ອິກາໂຣປິ.

ຍວຕໍ ຕລຓທກາຣານໍ ພ຺ຍຎ຺ຊນານິ ຈລຎ ຊກາຣຕ຺ຕ’’ນ຺ຕິ ຍກາຣຍຸຕ຺ຕານໍ ຕາທີນໍ ຈາທໂຍ, ກາຣຄ຺ຄຫເຓນ ສກປຠມາທິໂຕ ປຣຍກາຣສ຺ສ ປຸພ຺ເພນ ສຫ ກ຺ວຈິ ປຸພ຺ພຣູປຎ຺ຈ, ທ຺ວິຕ຺ຕໍ. ປຓ຺ຑິຈ຺ຈໍ, ໂກສລ຺ລໍ, ສາມຎ຺ຎໍ, ໂສຫຊ຺ຊໍ, ໂປຣິສ຺ສໍ, ເນປກ຺ກໍ, ສາຣຸປ຺ປໍ, ໂອສພ຺ຠໍ, ໂອປມ຺ມໍ.

ອາຕ຺ຕຎ຺ຈ.

ອິອຸອິຈ຺ເຈເຕສໍ ອາ ໂຫຕິ, ຣິກາຣາຄໂມ ຈ ຐາເນ.

ສຣໂລປາທິນາ ອິໂລໂປ. ອິສິໂນ ຠາໂວ.

ອາຣິສ຺ສໍ. ເອວໍ ມຸທຸຕາ, ອຣຫຕາ, ນ຺ຕສ຺ສ ຍທາທິນາ ໂລໂປ.

ປຸຖຸຊ຺ຊນຕ຺ຕນໍ, ອກິຎ຺ຈນເມວ ອາກິຎ຺ຈຎ຺ຎໍ, ກຸຓ຺ຑນິຍາ ອປຈ຺ຈໍ ໂກຓ຺ຑຎ຺ໂຎ, ເອຕ຺ຖ ວຸທ຺ຘາໂທ ວາກາເຣນ ສໍໂຍຄນ຺ຕສ຺ສາປິ ວຸທ຺ຘິ.

ປທາຍ ຫິຕໍ ປຊ຺ຊໍ, ຘນາຍໍ ສໍວຕ຺ຕນິກໍ ຘຎ຺ຎໍ, ສຕິໂຕ ສມ຺ຠູຕໍ ສຈ຺ຈໍ, ອິໂລໂປ, ຕີສຸ ນ ວຸທ຺ຘິ. ເທໂວ ເອວ ເທວຕາ.

໒໖໔. ‘‘ຓ ວິສມາທີຫີ’’ຕິ ຠາເວ ໂຓ. ເວສມໍ. ອຸຊຸໂນ ຠາໂວ ອຊ຺ຊວໍ. ເອຕ຺ຖ ອຸສ຺ສ ອາຕ຺ເຕ ປຣູກາຣສ຺ສ ຍທາທິນາ ອໂວ.

໒໖໕. ‘‘ຣມຓີຍາທິໂຕ ກຓ຺ຕິ ກຓ. ມານຎ຺ຎກໍ.

ອພ຺ຍຍຕທ຺ຘິຕ

໒໖໖. ‘‘ວິຠາເຄ ຘາ ເຈ’’ຕິ ຘາ, ຈກາເຣນ ໂສປ຺ປຈ຺ຈໂຍ ຈ. ເອເກນ ວິຠາເຄນ ເອກຘາ, ນິປາຕຕ຺ຕາ ສິໂລໂປ. ປທວິຠາເຄນ ປທໂສ.

໒໖໗. ‘‘ສພ຺ພນາເມຫິ ປກາຣວຈເນ ຕຸ ຖາ’’ຕິ ຖາ. ຕຸກາເຣນ ຖຕ຺ຕາ ຈ. ສພ຺ໂພ ປກາໂຣ, ສພ຺ເພນ ປກາເຣນ ວາ ສພ຺ພຖາ. ເອວໍ ອຎ຺ຎຖຕ຺ຕາ.

໒໖໘. ‘‘ກິມິເມຫິ ຖ’’ນ຺ຕິ ຖໍ, ກາເທເສ-ກຖໍ. ອິອາເທເສ-ອິຕ຺ຖໍ, ຖນ຺ຕິ ໂຍຄວິຠາເຄນ ຖໍ-ພຫຸຕ຺ຖໍ.

໒໖໙. ອມລິນໍ ມລິນໍ ກໂຣຕີຕ຺ຍາທ຺ຍຕ຺ເຖ-ອຠູຕຕພ຺ຠາເວ ຄມ຺ຍມາເນ ກຣຠູໂຍເຄ ສຕິ ນາມໂຕ ຍທາທິນາ ອີປ຺ປຈ຺ຈໂຍ, ມລິນີກໂຣຕິ ເສຕໍ. ອຠສ຺ມໂນ ຠສ຺ມໂນ ກຣຓນ຺ຕິ ຠສ຺ມີກຣຓໍ ກຏ຺ຐສ຺ສ. ອມລິໂນ ມລິໂນ ຠວຕີຕິ ມລິນີຠວຕິ ເສໂຕ. ອີປ຺ປຈ຺ຈຍນ຺ໂຕປິ ນິປາໂຕ. ອຠູຕຕພ຺ຠາເວຕິ ກິໍ, ຆຏໍ ກໂຣຕິ, ຆໂຏ ຠວຕິ.

ກຣຠູໂຍເຄຕິ ກິໍ, ອມລິໂນ ມລິໂນ ຊາຍເຕ.

ອວຕ຺ຖາວໂຕວຕ຺ຖຍາ, ຠູຕສ຺ສຎ຺ຎາຍ ວຕ຺ຖຸໂນ.

ຕາຍາວຕ຺ຖາຍ ຠວນໍ, ອຠູຕຕພ຺ຠວໍ ວິທຸໍ.

ຕທ຺ຘິໂຕ.