໒. ນາມກຓ຺ຑ

ປຸລ຺ລິງ຺ຄ

໔໗. ‘‘ຊິນວຈນຍຸຕ຺ຕໍ ຫີ’’ຕິ ສພ຺ພຕ຺ຖາຘິກາໂຣ.

ລິງ຺ຄຎ຺ຈ ນິປຈ຺ຈເຕ.

ຘາຕຸປ຺ປຈ຺ຈຍວິຠຕ຺ຕິວຊ຺ຊິຕມຕ຺ຖຍຸຕ຺ຕໍ ສທ຺ທຣູປໍ ລິງ຺ຄໍ ນາມ, ຊິນວຈນໂຍຄ຺ຄໍ ລິງ຺ຄໍ ອິຘ ຐປີຍຕິ ນິປ຺ຜາທີຍຕິ ຈ.

໔໘. ພຸທ຺ຘອິຕິ ຐິເຕ –

ຕໂຕ ຈ ວິຠຕ຺ຕິໂຍ.

ຕສ຺ມາ ລິງ຺ຄາ ປຣາ ວິຠຕ຺ຕິໂຍ ໂຫນ຺ຕິ. ຈກາເຣນ ຕາສໍ ເອກວຈນາທິປຐມາທິສຎ຺ຎາ ຈ.

‘‘ສິ ໂຍ ອໍ ໂຍ ນາ ຫິ ສ ນໍ ສ຺ມາ ຫິ ສ ນໍ ສ຺ມິໍ ສູ’’ ຕິ ວິຠຕ຺ຕິໂຍ. ສິ ໂຍ ອິຕິ ປຐມາ, ອໍ ໂຍ ອິຕິ ທຸຕິຍາ, ນາ ຫິ ອິຕິ ຕຕິຍາ, ສ ນໍ ອິຕິ ຈຕຸຕ຺ຖີ, ສ຺ມາ ຫິ ອິຕິ ປຎ຺ຈມີ, ສ ນໍ ອິຕິ ຉຏ຺ຐີ, ສ຺ມິໍ ສຸ ອິຕິ ສຕ຺ຕມີ.

ລິງ຺ຄຕ຺ເຖ ປຐມາ.

ໂຍ ກມ຺ມກຕ຺ຕາທິວຕ຺ຕນ຺ຕຣມປ຺ປຕ຺ໂຕ ສສ຺ສຣູປຏ຺ໂຐ ສຸທ຺ໂຘ, ໂສ ລິງ຺ຄຕ຺ໂຖ ນາມ, ຕສ຺ສາຠິຘານມຕ຺ເຕ ປຐມາວິຠຕ຺ຕິ ໂຫຕິ. ຕສ຺ສາປນິຍເມ ເອກມ຺ຫິ ວຕ຺ຕພ຺ເພ ເອກວຈນໍ ສິ, ວຸຈ຺ຈເຕ ເນເນຕິວຈນໍ, ເອກສ຺ສຕ຺ຖສ຺ສ ວຈນໍ ເອກວຈນໍ. ເອວໍ ພຫຸວຈນໍ.

ອໂຕຕ຺ເວວ.

ໂສ.

ອກາຣນ຺ຕາ ປຣສ຺ສ ສິສ຺ສ ໂອ ໂຫຕິ.

ສຣໂລໂປ ມາເທສປ຺ປຈ຺ຈຍາທິມ຺ຫິ ສຣໂລເປ ຕຸ ປກຕິ.

ອໍອາທີສຸ ປເຣສຸ ສຣສ຺ສ ໂລໂປ ໂຫຕິ, ຕສ຺ມິໍ ກເຕ ຕຸ ກ຺ວຈາທິນາ ອສວຓ຺ເຓ ປຕ຺ເຕ ປກຕິ ໂຫຕິ.

ນເຍ ປຣໍ ຍຸຕ຺ເຕ. ເອວມຸປຣິ ສຣໂລປາທິ. ພຸທ຺ໂຘ.

ພຫຸມ຺ຫິ ວຕ຺ຕພ຺ເພ ພຫຸວຈນໍ ໂຍ.

ອໂຕ ວາຕ຺ເວວ.

ສພ຺ພໂຍນີນມາເອ.

ອກາຣນ຺ຕາ ປເຣສໍ ປຐມທຸຕິຍາໂຍນີນໍ ຍຖາສງ຺ຂ຺ຍໍ ອາເອ ວາ ໂຫນ຺ຕິ. ພຸທ຺ຘາ.

ວາຕິ ກິໍ. ອຄ຺ຄໂຍ.

໔໙. ລິງ຺ຄຕ຺ເຖ ປຐມາຕ຺ເວວ.

ອາລປເນ ຈ.

ອຠິມຸຂີກຣຓມາລປນໍ, ຕທຘິເກ ລິງ຺ຄຕ຺ເຖ ປຐມາ ໂຫຕິ.

‘‘ອາລປເນ ສິ ຄສຎ຺ໂຎ’’ຕິ ສິສ຺ສ ຄສຎ຺ຎາ. ເຄອິຕ຺ເວວ.

ອກາຣາ ປິຕາທ຺ຍນ຺ຕານມາ.

ເຄ ປເຣ ອກາໂຣ ປິຕຸສຕ຺ຖຸອຕ຺ຕຣາຊາທີນມນ຺ໂຕ ຈ ອາຕ຺ຕໍ ຍາຕິ.

‘‘ອາກາໂຣ ວາ’’ຕິ ເຄ ປເຣ ອາກາຣສ຺ສ ຣສ຺ໂສ ວາ.

ເສສໂຕ ໂລປໍ ຄສີປິ.

ໂສ ສິໍ ສ຺ຍາ ຈ ສຂາໂຕ ຄສ຺ເສວາຕ຺ຍາທິນິທ຺ທິຏ຺ເຐຫຎ຺ເຎ ອວຓ຺ຓິວຓ຺ຓຸວຓ຺ໂຓກາຣນ຺ຕາ ເສສາ, ເຕຫິ ປເຣ ຄສີ ລຸປ຺ຍນ຺ເຕ. ເຫ - ພຸທ຺ຘ, ພຸທ຺ຘາ. ໂຍ - ພຸທ຺ຘາ.

໕໐. ກມ຺ມຕ຺ເຖ ທຸຕິຍາ.

ຍໍ ກໂຣຕິ, ຕໍ ກມ຺ມໍ ນາມ. ຕຕ຺ຖ ທຸຕິຍາ ໂຫຕິ. ອໍພຸທ຺ຘໍ. ໂຍສ຺ສ ເອ-ພຸທ຺ເຘ.

໕໑. ຕຕິຍາຕ຺ເວວ.

ກຕ຺ຕຣິ ຈ.

ໂຍ ກໂຣຕິ, ສ ກຕ຺ຕາ ນາມ. ຕຕ຺ຖ ຕຕິຍາ ໂຫຕິ. ນາ.

ອໂຕ ເນນ.

ອກາຣາ ປໂຣ ນາ ເອນໍ ຍາຕິ. ພຸທ຺ເຘນ.

ຫິ.

ສຸຫິສ຺ວກາໂຣ ເອ.

ສຸຫິສຸ ປເຣສ຺ວກາຣສ຺ສ ເອ ໂຫຕິ.

ສ຺ມາຫິສ຺ມິນ຺ນໍ ມ຺ຫາຠິມ຺ຫິ ວາ.

ສພ຺ພສທ຺ເທຫິ ປເຣສໍ ສ຺ມາຫິສ຺ມິນ຺ນໍ ຍຖາສງ຺ຂ຺ຍໍ ມ຺ຫາຠິມ຺ຫິອິຈ຺ເຈເຕ ວາ ໂຫນ຺ຕິ. ພຸທ຺ເຘຠິ, ພຸທ຺ເຘຫິ.

໕໒. ກຣເຓ ຕຕິຍາ.

ເຍນ ວາ ກຍິຣເຕ, ຕໍ ກຣຓໍ ນາມ. ຕຕ຺ຖ ຕຕິຍາ ໂຫຕິ. ສພ຺ພໍ ກຕ຺ຕຸສມໍ.

໕໓. ສມ຺ປທາເນ ຈຕຸຕ຺ຖີ.

ຍສ຺ສ ທາຕຸກາໂມ ໂຣຈເຕ, ຘາຣຍເຕ ວາ, ຕໍ ສມ຺ປທານໍ ນາມ. ຕຕ຺ຖ ຈຕຸຕ຺ຖີ ໂຫຕິ. ສ.

ອໂຕ ວາຕ຺ເວວ.

ອາຍ ຈຕຸຕ຺ເຖກວຈນສ຺ສ ຕຸ.

ອກາຣາ ປຣສ຺ສ ຈຕຸຕ຺ເຖກວຈນສ຺ສ ອາໂຍ ວາ ໂຫຕິ. ພຸທ຺ຘາຍ.

‘‘ສາຄໂມ ເສ’’ຕິ ເສ ສກາຣາຄໂມ. ພຸທ຺ຘສ຺ສ. ນໍ.

ທີຆນ຺ຕ຺ເວວ.

ສຸນໍຫິສຸ ຈ.

ສຸນໍຫິສຸ ປເຣສຸ ສຣາທີນໍ ທີໂຆ ໂຫຕິ. ຈສທ຺ເທນ ກ຺ວຈິ ນ. ພຸທ຺ຘານໍ.

໕໔. ອປາທາເນ ປຎ຺ຈມີ.

ຍສ຺ມາທເປຕິ, ຠຍມາທຕ຺ເຕ ວາ, ຕທປາທານໍ ນາມ, ຕຕ຺ຖ ປຎ຺ຈມີ ໂຫຕິ. ສ຺ມາ.

ອໂຕ ອາເອຕ຺ເວວ.

໕໕. ສ຺ມາສ຺ມິນ຺ນໍ ວາ.

ອກາຣາ ປເຣສໍ ສ຺ມາສ຺ມິນ຺ນໍ ອາເອ ວາ ໂຫນ຺ຕິ. ພຸທ຺ຘາ, ພຸທ຺ຘມ຺ຫາ, ພຸທ຺ຘສ຺ມາ. ພຸທ຺ເຘຠິ, ພຸທ຺ເຘຫິ.

໕໖. ສາມິສ຺ມິໍ ຉຏ຺ຐີ.

ຍສ຺ສ ວາ ປຣິຄ຺ຄໂຫ, ຕໍ ສາມີ ນາມ. ຕຕ຺ຖ ຉຏ຺ຐີ ໂຫຕິ. ພຸທ຺ຘສ຺ສ. ພຸທ຺ຘານໍ.

໕໗. ໂອກາເສ ສຕ຺ຕມີ.

ໂຍຘາໂຣ, ຕໂມກາສໍ ນາມ. ຕຕ຺ຖ ສຕ຺ຕມີ ໂຫຕິ. ສ຺ມິໍ-ພຸທ຺ເຘ, ພຸທ຺ຘມ຺ຫິ, ພຸທ຺ຘສ຺ມິໍ. ສຸ-ພຸທ຺ເຘສຸ.

໕໘. ພຸທ຺ໂຘ ພຸທ຺ຘ ສຸຂໍ ທທາຕິ ສຣໂຕ ພຸທ຺ຘໍ ຕໂຕ ທຸກ຺ກຣໍ,

ກິໍ ພຸທ຺ເຘນ ມຫິທ຺ຘໂຍປິ ມຸນໂຍ ພຸທ຺ເຘນ ຊາຕາສຸຂີ;

ພຸທ຺ຘສ຺ເສວ ມນໍ ທເທ ປທມຫໍ ພຸທ຺ຘາ ລເຠຍ຺ຍາຈ຺ຈຸຕໍ,

ພຸທ຺ຘສ຺ສິທ຺ຘິ ນ ກິໍ ກເຣ ຠວຠເວ ຠຕ຺ຕ຺ຍຕ຺ຖຸ ພຸທ຺ເຘ ມມ.

໕໙. ອິໂຕ ປຣໍ ຕຕິຍາປຎ຺ຈມີນຎ຺ຈ ຈຕຸຕ຺ຖີຉຏ຺ຐີນຎ຺ຈ ສຣູປຕ຺ຕາ ປຎ຺ຈມີຉຏ຺ຐິໂຍ ຠີໂຍ ອຸເປກ຺ຂນ຺ເຕ.

໖໐. ອຕ຺ຕ, ສິ.

ພ຺ຣຫ຺ມຕ຺ຕສຂຣາຊາທິໂຕ ຕ຺ເວວ.

ສ຺ຍາ ຈ.

ພ຺ຣຫ຺ມາທິໂຕ ສິສ຺ສ ອາ ໂຫຕິ. ອຕ຺ຕາ.

‘‘ໂຍນມາໂນ’’ຕິ ພ຺ຣຫ຺ມາທິໂຕ ໂຍນໍ ອາໂນຕ຺ຕໍ. ອຕ຺ຕາໂນ.

໖໑. ເຫ - ອຕ຺ຕ, ອຕ຺ຕາ. ໂຍ, ອຕ຺ຕາໂນ.

໖໒. ‘‘ພ຺ຣຫ຺ມຕ຺ຕສຂຣາຊາທິໂຕ ອມານ’’ນ຺ຕິ ພ຺ຣຫ຺ມາທິໂຕ ອໍວຈນສ຺ສ ອານໍ ວາ ໂຫຕິ. ອຕ຺ຕານໍ, ອຕ຺ຕໍ. ອຕ຺ຕາໂນ.

໖໓. ອຕ຺ເຕນ, ອຕ຺ຕນາ. ປກ຺ເຂ-ຊິນວຈນານຸໂຣເຘນ ເອນາຠາໂວ.

‘‘ອຕ຺ຕານ຺ໂຕ ຫິສ຺ມິມນຕ຺ຕໍ’’ຕິ ຫິມ຺ຫິ ອຕ຺ຕນ຺ຕສ຺ສ ອໂນ. ອຕ຺ຕເນຫິ. ເອວໍ ກຣເຓ.

໖໔. ‘‘ສສ຺ສ ໂນ’’ຕິ ໂນກາໂຣ. ອຕ຺ຕໂນ. ອຕ຺ຕານໍ.

໖໕. ອມ຺ຫຕຸມ຺ຫນ຺ຕຸ ຣາຊພ຺ຣຫ຺ມຕ຺ຕສຂ ສຕ຺ຖຸປິຕາທີຫິ ສ຺ມາ ນາວ.

ອມ຺ຫາທິໂຕ ສ຺ມາ ນາ ອິວ ໂຫຕິ. ອຕ຺ຕນາ.

໖໖. ‘‘ຕໂຕ ສ຺ມິນ຺ນີ’’ຕິ ສ຺ມິໂນ ນິ. ອຕ຺ຕນິ. ‘‘ອນຕ຺ຕ’’ນ຺ຕິ ຠາວນິທ຺ເທເສນ ສຸມ຺ຫິ ຈ ອໂນ. ອຕ຺ຕເນສຸ.

໖໗. ຣາຊາ ອຕ຺ຕາວ. ນາ.

ສວິຠຕ຺ຕິສ຺ສ ຣາຊສ຺ເສຕ຺ເວວ.

ນາມ຺ຫິ ຣຎ຺ຎາ ວາ.

ນາມ຺ຫິ ສວິຠຕ຺ຕິສ຺ສ ຣາຊສທ຺ທສ຺ສ ຣຎ຺ຎາ ວາ ໂຫຕິ. ຣຎ຺ຎາ, ຣາເຊນ.

ຣາຊສ຺ສ ຣາຊຸ ສຸນໍຫິສຸ ຈ.

ສຸນໍ ຫິສຸ ປເຣສຸ ຣາຊສ຺ສ ຣາຊຸ ໂຫຕິ, ຈກາເຣນ ກ຺ວຈິ ນ.

‘‘ສຸນໍຫິສຸ ເຈຕິ’’ ທີເຆ - ຣາຊູຠິ, ຣາຊູຫິ, ຣາເຊຠິ, ຣາເຊຫິ.

໖໘. ສວິຠຕ຺ຕິສ຺ເສຕ຺ຍຘິກາໂຣ.

‘‘ຣາຊສ຺ສ ຣຎ຺ໂຎ ຣາຊິໂນ ເສ’’ຕິ ເສ ຣຎ຺ໂຎ ຣາຊິໂນ ໂຫນ຺ຕິ. ຣຎ຺ໂຎ, ຣາຊິໂນ.

‘‘ຣຎ຺ຎໍ ນມ຺ຫິ ວາ’’ຕິ ນມ຺ຫິ ຣຎ຺ຎໍ ວາ. ຣຎ຺ຎໍ, ຣາຊູນໍ, ຣາຊານໍ.

໖໙. ສ຺ມາສ຺ສນາຕຸລ຺ຍຕ຺ຕາ-ນາມ຺ຫິ ຣຎ຺ຎາ ວາ. ຣຎ຺ຎາ, ຣາຊມ຺ຫາ, ຣາຊສ຺ມາ.

໗໐. ‘‘ສ຺ມິມ຺ຫິ ຣຎ຺ເຎ ຣາຊິນີ’’ຕິ ສ຺ມິມ຺ຫິ ຣຎ຺ເຎ ຣາຊິນິ ໂຫນ຺ຕິ. ຣຎ຺ເຎ, ຣາຊິນິ. ຣາຊູສຸ, ຣາເຊສຸ.

໗໑. ຄຸຓວນ຺ຕຸ, ສິ.

ສວິຠຕ຺ຕິສ຺ສ ນ຺ຕຸສ຺ເສຕ຺ເວວ.

‘‘ອາ ສິມ຺ຫີ’’ຕິ ສິມ຺ຫິ ສວິຠຕ຺ຕິສ຺ສ ນ຺ຕຸສ຺ສ ອາ. ຄຸຓວາ.

ໂຍມ຺ຫິ ປຐເມຕ຺ເວວ.

ນ຺ຕຸສ຺ສ ນ຺ໂຕ.

ປຐເມ ໂຍມ຺ຫິ ສວິຠຕ຺ຕິສ຺ສ ນ຺ຕຸສ຺ສ ນ຺ໂຕກາໂຣ ໂຫຕິ. ຄຸຓວນ຺ໂຕ.

ສຸນໍຫິສຸ ອຕ຺ຕໍຕ຺ເວວ.

ນ຺ຕຸສ຺ສນ຺ໂຕ ໂຍສຸ ຈ.

ສຸນໍຫິສຸ, ໂຍສຸ, ຈກາເຣນ ອຎ຺ເຎສຸປິ ປເຣສຸ ນ຺ຕຸສ຺ສນ຺ໂຕ ອຕ຺ຕໍ ຍາຕິ. ຄຸຓວນ຺ຕາ.

໗໒. ສວິຠຕ຺ຕິສ຺ເສຕ຺ຍຘິກາໂຣ. ອໍອິຕ຺ເວວ.

ອວຓ຺ໂຓ ຈ ເຄ.

ເຄ ປເຣ ສວິຠຕ຺ຕິສ຺ສ ນ຺ຕຸສ຺ສ ອໍອອາ ໂຫນ຺ຕິ. ເຫຄຸຓວໍ,ຄຸຓວ, ຄຸຓວາ. ໂຍ - ຄຸຓວນ຺ໂຕ, ຄຸຓວນ຺ຕາ.

໗໓. ອຕ຺ຕໍ – ຄຸຓວນ຺ຕໍ. ຄຸຓວນ຺ເຕ.

໗໔. ‘‘ໂຕຕິຕາ ສສ຺ມິໍ ນາສ຺ວີ’’ຕິ ສວິຠຕ຺ຕິສ຺ສ ນ຺ຕຸສ຺ສ ນາມ຺ຫິ ຕາ, ເສ ໂຕກາໂຣ, ສ຺ມິມ຺ຫິ ຕິ ຈ ວາ. ຄຸຓວຕາ, ຄຸຓວນ຺ເຕນ. ຄຸຓວນ຺ເຕຠິ, ຄຸຓວນ຺ເຕຫິ.

໗໕. ຄຸຓວໂຕ, ຄຸຓວນ຺ຕສ຺ສ.

‘‘ນມ຺ຫິ ຕໍ ວາ’’ຕິ ນມ຺ຫິ ນ຺ຕຸສ຺ສ ຕໍ ວາ. ຄຸຓວຕໍ, ຄຸຓວນ຺ຕານໍ. ສ຺ມາ ນາວ.

໗໖. ຄຸຓວຕິ, ຄຸຓວນ຺ເຕ, ຄຸຓວນ຺ຕມ຺ຫິ, ຄຸຓວນ຺ຕສ຺ມິໍ, ຄຸຓວນ຺ເຕສຸ.

໗໗. ຄຈ຺ຉນ຺ຕ, ສິ.

‘‘ສິມ຺ຫິ ຄຈ຺ຉນ຺ຕາທີນໍ ນ຺ຕສທ຺ໂທ ອ’’ນ຺ຕິ ນ຺ຕສທ຺ທສ຺ສ ອໍວາ, ສິໂລໂປ. ຄຈ຺ຉໍ, ສິສ຺ສ ໂອ – ຄຈ຺ຉນ຺ໂຕ.

ຄຈ຺ຉນ຺ຕາທີນໍ ນ຺ຕສທ຺ໂທຕ຺ເວວ.

ເສເສສຸນ຺ຕຸວ.

ວຸຕ຺ຕໍ ຫິຕ຺ວາ ເສເສສຸ ຄຈ຺ຉນ຺ຕາທີນໍ ນ຺ຕສທ຺ໂທ ນ຺ຕຸ ອິວ ທຏ຺ຐພ຺ໂພ. ຄຈ຺ຉນ຺ໂຕ, ຄຈ຺ຉນ຺ຕາອິຈ຺ຈາທິ.

ເສສໍ ຄຸຓວນ຺ຕຸສມໍ.

໗໘. ຄຈ຺ຉນ຺ຕາທໂຍ ນາມ ອນ຺ຕປ຺ປຈ຺ຈຍນ຺ຕາ.

໗໙. ອຄ຺ຄິ, ສິໂລໂປ.

‘‘ອິວຓ຺ຓຸວຓ຺ຓາ ຌລາ’’ຕິ ອິວຓ຺ຓຸວຓ຺ຓານໍ ຍຖາສງ຺ຂ຺ຍໍ ຌລສຎ຺ຎາ.

ຌລໂຕ ວາຕ຺ເວວ.

ຆປໂຕ ຈ ໂຍນໍ ໂລໂປ.

ຆປຌລໂຕ ໂຍນໍ ໂລໂປ ວາ ໂຫຕິ.

ໂຍສຸ ກຕນິກາຣໂລເປສຸ ທີຆໍ.

ກໂຕ ນິກາໂຣ ໂລໂປ ຈ ເຍສໍ ເຕສຸ ໂຍສຸ ສຣານໍ ທີໂຆ ໂຫຕິ. ອຄ຺ຄີ. ປກ຺ເຂ-ອຕ຺ຕນ຺ຕ຺ເວວ.

ໂຍ ສ຺ວກຕຣສ຺ໂສ ໂຌ.

ໂຍສຸ ອກຕຣສ຺ໂສ ໂຌ ອຕ຺ຕໍ ຍາຕິ. ອຄ຺ຄໂຍ. ຕຖາລປເນ.

໘໐. ອໍ ໂມ ນິຄ຺ຄຫີຕໍ ຌລເປຫິ.

ຌລປໂຕ ອໍ ໂມ ຈ ພິນ຺ທຸໍ ຍນ຺ຕິ. ອຄ຺ຄິໍ. ອຄ຺ຄີ, ອຄ຺ຄໂຍ.

໘໑. ອຄ຺ຄິນາ. ທີເຆ-ອຄ຺ຄີຠິ, ອຄ຺ຄີຫິ.

໘໒. ‘‘ຌລໂຕ ສສ຺ສ ໂນ ວາ’’ຕິ ສສ຺ສ ໂນຕ຺ຕໍ ວາ. ອຄ຺ຄິໂນ, ອຄ຺ຄິສ຺ສ. ອຄ຺ຄີນໍ.

໘໓. ‘‘ຌລໂຕ ເຈ’’ຕິ ສ຺ມາສ຺ສ ນາ. ອຄ຺ຄິນາ.

໘໔. ອຄ຺ຄິມ຺ຫິ, ອຄ຺ຄິສ຺ມິໍ. ອຄ຺ຄີສຸ.

໘໕. ອາທິ ອຄ຺ຄີວ. ສ຺ມິໍໂນ ປນ ‘‘ອາທິໂຕ ໂອ ເຈ’’ຕິ ອໍ, ໂອ ຈ ວາ. ອາທິ, ອາໂທ, ອາທິມ຺ຫິ, ອາທິສ຺ມິໍ. ອາທີສຸ.

໘໖. ທຓ຺ຑີ, ສິ.

‘‘ອໂຆ ຣສ຺ສ’’ມາທິນາ ຣສ຺ເສ ສມ຺ປຕ຺ເຕ ‘‘ນ ສິສ຺ມິມນປຸໍສການີ’’ຕິ ສິມ຺ຫິ ອນປຸໍສການໍ ນ ຣສ຺ໂສ. ສິໂລໂປ, ທຓ຺ຑີ, ໂຍໂລເປ – ທຓ຺ຑີ. ປກ຺ເຂ –

ອໂຆ ຣສ຺ສເມກວຈນໂຍສ຺ວປິ ຈ.

ເອກວຈນໂຍສຸ ຌລປາ ຣສ຺ສໍ ຍນ຺ຕິ.

ຌໂຕ ກຕຣສ຺ສາຕ຺ເວວ.

ໂຍນໍ ໂນ.

ກຕສ຺ສາ ຌໂຕ ໂຍນໍ ໂນຕ຺ຕໍ ໂຫຕິ. ທຓ຺ຑິໂນ.

໘໗. ‘‘ຌລປາ ຣສ຺ສ’’ນ຺ຕິ ເຄ ປເຣ ຌລປານໍ ຣສ຺ໂສ. ເຫທຓ຺ຑິ. ທຓ຺ຑີ, ທຓ຺ຑິໂນ.

໘໘. ວາ ອໍອິຕ຺ເວວ.

‘‘ນໍ ຌໂຕ ກຕຣສ຺ສາ’’ຕິ ອໍອິຈ຺ຈສ຺ສ ນໍ ວາ. ທຓ຺ຑິນໍ, ທຓ຺ຑິໍ. ທຓ຺ຑີ, ທຓ຺ຑິໂນ.

໘໙. ທຓ຺ຑິນາ. ທຓ຺ຑີຠິ, ທຓ຺ຑີຫິ.

໙໐. ທຓ຺ຑິໂນ, ທຓ຺ຑິສ຺ສ. ທຓ຺ຑີນໍ.

໙໑. ຌໂຕ ກຕຣສ຺ສາຕ຺ເວວ.

‘‘ສ຺ມິນ຺ນີ’’ຕິ ສ຺ມິໂນ ນິ. ທຓ຺ຑິນິ. ທຓ຺ຑີສຸ.

໙໒. ຠິກ຺ຂຸ, ສິໂລໂປ.

ວາ ໂຍນໍຕ຺ເວວ.

‘‘ລໂຕ ໂວ ກາໂຣ ເຈ’’ຕິ ລໂຕ ໂຍນໍ ໂວຕ຺ຕໍ ວາ.