໙. ສມຓວຄ຺ໂຄ

໑. ຠິກ຺ຂຸສຸຕ຺ຕໍ

໘໕. [ມຫານິ. ໑໘; ຈູຬນິ. ອຊິຕມາຓວປຸຈ຺ຉານິທ຺ເທສ ໘] ‘‘ສຕ຺ຕນ຺ນໍ, ຠິກ຺ຂເວ, ຘມ຺ມານໍ ຠິນ຺ນຕ຺ຕາ ຠິກ຺ຂຸ ໂຫຕິ. ກຕເມສໍ ສຕ຺ຕນ຺ນໍ? ສກ຺ກາຍທິຏ຺ຐິ ຠິນ຺ນາ ໂຫຕິ, ວິຈິກິຈ຺ຉາ ຠິນ຺ນາ ໂຫຕິ, ສີລພ຺ພຕປຣາມາໂສ ຠິນ຺ໂນ ໂຫຕິ, ຣາໂຄ ຠິນ຺ໂນ ໂຫຕິ, ໂທໂສ ຠິນ຺ໂນ ໂຫຕິ, ໂມໂຫ ຠິນ຺ໂນ ໂຫຕິ, ມາໂນ ຠິນ຺ໂນ ໂຫຕິ. ອິເມສໍ ໂຂ, ຠິກ຺ຂເວ, ສຕ຺ຕນ຺ນໍ ຘມ຺ມານໍ ຠິນ຺ນຕ຺ຕາ ຠິກ຺ຂຸ ໂຫຕີ’’ຕິ. ປຐມໍ.

໒. ສມຓສຸຕ຺ຕໍ

໘໖. ສຕ຺ຕນ຺ນໍ, ຠິກ຺ຂເວ, ຘມ຺ມານໍ ສມິຕຕ຺ຕາ ສມໂຓ ໂຫຕິ…ເປ…. ທຸຕິຍໍ.

໓. ພ຺ຣາຫ຺ມຓສຸຕ຺ຕໍ

໘໗. ພາຫິຕຕ຺ຕາ ພ຺ຣາຫ຺ມໂຓ ໂຫຕິ…ເປ…. ຕຕິຍໍ.

໔. ໂສຕ຺ຕິຍສຸຕ຺ຕໍ

໘໘. ນິສ຺ສຸຕຕ຺ຕາ [ນິສ຺ສຸຕ຺ຕຕ຺ຕາ (ສ຺ຍາ.) ມ. ນິ. ໑.໔໓໔ ປສ຺ສິຕພ຺ພໍ] ໂສຕ຺ຕິໂຍ [ໂສຕ຺ຖິໂກ (ສີ.), ໂສຕ຺ຕິໂກ (ສ຺ຍາ.)] ໂຫຕິ…ເປ…. ຈຕຸຕ຺ຖໍ.

໕. ນ຺ຫາຕກສຸຕ຺ຕໍ

໘໙. ນ຺ຫາຕຕ຺ຕາ ນ຺ຫາຕໂກ [ນຫາຕຕ຺ໂຕ ນຫາຕໂກ (ສີ. ສ຺ຍາ.)] ໂຫຕິ…ເປ…. ປຎ຺ຈມໍ.

໖. ເວທຄູສຸຕ຺ຕໍ

໙໐. ວິທິຕຕ຺ຕາ ເວທຄູ ໂຫຕິ…ເປ…. ຉຏ຺ຐໍ.

໗. ອຣິຍສຸຕ຺ຕໍ

໙໑. ອາຣກຕ຺ຕາ [ອຣຫຕ຺ຕາ (ສີ.), ອຣີ ຫຕຕ຺ຕາ (ກ.) ມ. ນິ. ໑.໔໓໔ ປາຬິ ອຏ຺ຐກຖາຏີກາ ປສ຺ສິຕພ຺ພາ. ສ຺ຍາມໂປຕ຺ຖເກ ປນ ສກລມ຺ປິ ອິທໍ ສຕ຺ຕມສຸຕ຺ຕໍ ນຕ຺ຖິ] ອຣິໂຍ ໂຫຕິ…ເປ…. ສຕ຺ຕມໍ.

໘. ອຣຫາສຸຕ຺ຕໍ

໙໒. ‘‘ອາຣກຕ຺ຕາ ອຣຫາ ໂຫຕິ. ກຕເມສໍ ສຕ຺ຕນ຺ນໍ? ສກ຺ກາຍທິຏ຺ຐິ ອາຣກາ ໂຫຕິ, ວິຈິກິຈ຺ຉາ ອາຣກາ ໂຫຕິ, ສີລພ຺ພຕປຣາມາໂສ ອາຣໂກ ໂຫຕິ, ຣາໂຄ ອາຣໂກ ໂຫຕິ, ໂທໂສ ອາຣໂກ ໂຫຕິ, ໂມໂຫ ອາຣໂກ ໂຫຕິ, ມາໂນ ອາຣໂກ ໂຫຕິ. ອິເມສໍ ໂຂ, ຠິກ຺ຂເວ, ສຕ຺ຕນ຺ນໍ ຘມ຺ມານໍ ອາຣກຕ຺ຕາ ອຣຫາ ໂຫຕີ’’ຕິ. ອຏ຺ຐມໍ.

໙. ອສທ຺ຘມ຺ມສຸຕ຺ຕໍ

໙໓. ‘‘ສຕ຺ຕິເມ, ຠິກ຺ຂເວ, ອສທ຺ຘມ຺ມາ. ກຕເມ ສຕ຺ຕ? ອສ຺ສທ຺ໂຘ ໂຫຕິ, ອຫິຣິໂກ ໂຫຕິ, ອໂນຕ຺ຕປ຺ປີ ໂຫຕິ, ອປ຺ປສ຺ສຸໂຕ ໂຫຕິ, ກຸສີໂຕ ໂຫຕິ, ມຸຏ຺ຐສ຺ສຕິ ໂຫຕິ, ທຸປ຺ປຎ຺ໂຎ ໂຫຕິ. ອິເມ ໂຂ, ຠິກ຺ຂເວ, ສຕ຺ຕ ອສທ຺ຘມ຺ມາ’’ຕິ. ນວມໍ.

໑໐. ສທ຺ຘມ຺ມສຸຕ຺ຕໍ

໙໔. ‘‘ສຕ຺ຕິເມ, ຠິກ຺ຂເວ, ສທ຺ຘມ຺ມາ. ກຕເມ ສຕ຺ຕ? ສທ຺ໂຘ ໂຫຕິ, ຫິຣີມາ ໂຫຕິ, ໂອຕ຺ຕປ຺ປີ ໂຫຕິ, ພຫຸສ຺ສຸໂຕ ໂຫຕິ, ອາຣທ຺ຘວີຣິໂຍ ໂຫຕິ, ສຕິມາ ໂຫຕິ, ປຎ຺ຎວາ ໂຫຕິ. ອິເມ ໂຂ, ຠິກ຺ຂເວ, ສຕ຺ຕ ສທ຺ຘມ຺ມາ’’ຕິ. ທສມໍ.

ສມຓວຄ຺ໂຄ ນວໂມ.