໙. ນິພ຺ພານສຸຕ຺ຕໍ

໑໙. [ກຖາ. ໕໔໗-໕໔໘] ‘‘ນິພ຺ພາເນ ສຸຂານຸປສ຺ສີ ວິຫຣຕິ ສຸຂສຎ຺ຎີ ສຸຂປຏິສໍເວທີ ສຕຕໍ ສມິຕໍ ອພ຺ໂພກິຓ຺ຓໍ ເຈຕສາ ອຘິມຸຈ຺ຈມາໂນ ປຎ຺ຎາຍ ປຣິໂຍຄາຫມາໂນ. ໂສ ອາສວານໍ ຂຍາ…ເປ… ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ອຍໍ ຠິກ຺ຂເວ, ປຐໂມ ປຸຄ຺ຄໂລ ອາຫຸເນຍ຺ໂຍ…ເປ… ປຸຎ຺ຎກ຺ເຂຕ຺ຕໍ ໂລກສ຺ສ.

‘‘ປຸນ ຈປຣໍ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ນິພ຺ພາເນ ສຸຂານຸປສ຺ສີ ວິຫຣຕິ ສຸຂສຎ຺ຎີ ສຸຂປຏິສໍເວທີ ສຕຕໍ ສມິຕໍ ອພ຺ໂພກິຓ຺ຓໍ ເຈຕສາ ອຘິມຸຈ຺ຈມາໂນ ປຎ຺ຎາຍ ປຣິໂຍຄາຫມາໂນ. ຕສ຺ສ ອປຸພ຺ພໍ ອຈຣິມໍ ອາສວປຣິຍາທານຎ຺ຈ ໂຫຕິ ຊີວິຕປຣິຍາທານຎ຺ຈ. ອຍໍ, ຠິກ຺ຂເວ, ທຸຕິໂຍ ປຸຄ຺ຄໂລ ອາຫຸເນຍ຺ໂຍ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສ.

‘‘ປຸນ ຈປຣໍ, ຠິກ຺ຂເວ, ອິເຘກຈ຺ໂຈ ປຸຄ຺ຄໂລ ນິພ຺ພາເນ ສຸຂານຸປສ຺ສີ ວິຫຣຕິ ສຸຂສຎ຺ຎີ ສຸຂປຏິສໍເວທີ ສຕຕໍ ສມິຕໍ ອພ຺ໂພກິຓ຺ຓໍ ເຈຕສາ ອຘິມຸຈ຺ຈມາໂນ ປຎ຺ຎາຍ ປຣິໂຍຄາຫມາໂນ. ໂສ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ອນ຺ຕຣາປຣິນິພ຺ພາຍີ ໂຫຕິ…ເປ… ອຸປຫຈ຺ຈປຣິນິພ຺ພາຍີ ໂຫຕິ…ເປ… ອສງ຺ຂາຣປຣິນິພ຺ພາຍີ ໂຫຕິ…ເປ… ສສງ຺ຂາຣປຣິນິພ຺ພາຍີ ໂຫຕິ…ເປ… ອຸທ຺ຘໍໂສໂຕ ໂຫຕິ ອກນິຏ຺ຐຄາມີ. ອຍໍ, ຠິກ຺ຂເວ, ສຕ຺ຕໂມ ປຸຄ຺ຄໂລ ອາຫຸເນຍ຺ໂຍ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສ. ອິເມ ໂຂ, ຠິກ຺ຂເວ, ສຕ຺ຕ ປຸຄ຺ຄລາ ອາຫຸເນຍ຺ຍາ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາ’’ຕິ. ນວມໍ.