໑໐. ອານິສໍສວຄ຺ໂຄ

໑. ປາຕຸຠາວສຸຕ຺ຕໍ

໙໖. ‘‘ຉນ຺ນໍ, ຠິກ຺ຂເວ, ປາຕຸຠາໂວ ທຸລ຺ລໂຠ ໂລກສ຺ມິໍ. ກຕເມສໍ ຉນ຺ນໍ? ຕຖາຄຕສ຺ສ ອຣຫໂຕ ສມ຺ມາສມ຺ພຸທ຺ຘສ຺ສ ປາຕຸຠາໂວ ທຸລ຺ລໂຠ ໂລກສ຺ມິໍ, ຕຖາຄຕປ຺ປເວທິຕສ຺ສ ຘມ຺ມວິນຍສ຺ສ ເທເສຕາ ປຸຄ຺ຄໂລ ທຸລ຺ລໂຠ ໂລກສ຺ມິໍ, ອຣິຍາຍຕເນ ປຈ຺ຈາຊາຕິ ທຸລ຺ລຠາ [ປຈ຺ຈາຊາໂຕ ທຸລ຺ລໂຠ (ສ຺ຍາ.)] ໂລກສ຺ມິໍ, ອິນ຺ທ຺ຣິຍານໍ ອເວກລ຺ລຕາ ທຸລ຺ລຠາ ໂລກສ຺ມິໍ, ອຊຬຕາ ອເນຬມູຄຕາ ທຸລ຺ລຠາ ໂລກສ຺ມິໍ, ກຸສເລ ຘມ຺ເມ ຉນ຺ໂທ [ກຸສລຘມ຺ມຈ຺ຉນ຺ໂທ (ສີ. ສ຺ຍາ. ປີ.)] ທຸລ຺ລໂຠ ໂລກສ຺ມິໍ. ອິເມສໍ ໂຂ, ຠິກ຺ຂເວ, ຉນ຺ນໍ ປາຕຸຠາໂວ ທຸລ຺ລໂຠ ໂລກສ຺ມິ’’ນ຺ຕິ. ປຐມໍ.

໒. ອານິສໍສສຸຕ຺ຕໍ

໙໗. ‘‘ຉຍິເມ, ຠິກ຺ຂເວ, ອານິສໍສາ ໂສຕາປຕ຺ຕິຜລສຈ຺ຉິກິຣິຍາຍ. ກຕເມ ຉ? ສທ຺ຘມ຺ມນິຍໂຕ ໂຫຕິ, ອປຣິຫານຘມ຺ໂມ ໂຫຕິ, ປຣິຍນ຺ຕກຕສ຺ສ ທຸກ຺ຂໍ ໂຫຕິ [ທຸກ຺ຂໍ ນ ໂຫຕິ (ສ຺ຍາ. ປີ. ກ.)], ອສາຘາຣເຓນ ຎາເຓນ ສມນ຺ນາຄໂຕ ໂຫຕິ, ເຫຕຸ ຈສ຺ສ ສຸທິຏ຺ໂຐ, ເຫຕຸສມຸປ຺ປນ຺ນາ ຈ ຘມ຺ມາ. ອິເມ ໂຂ, ຠິກ຺ຂເວ, ຉ ອານິສໍສາ ໂສຕາປຕ຺ຕິຜລສຈ຺ຉິກິຣິຍາຍາ’’ຕິ. ທຸຕິຍໍ.

໓. ອນິຈ຺ຈສຸຕ຺ຕໍ

໙໘. ‘‘‘ໂສ ວຕ, ຠິກ຺ຂເວ, ຠິກ຺ຂຸ ກຎ຺ຈິ ສງ຺ຂາຣໍ ນິຈ຺ຈໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີ’ຕິ ເນຕໍ ຐານໍ ວິຊ຺ຊຕິ. ‘ອນຸໂລມິກາຍ ຂນ຺ຕິຍາ ອສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີ’ຕິ ເນຕໍ ຐານໍ ວິຊ຺ຊຕິ. ‘ສມ຺ມຕ຺ຕນິຍາມໍ ອໂນກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ [ອຣຫຕ຺ຕຜລໍ (ກ.) ປຏິ. ມ. ໓.໓໖] ວາ ສຈ຺ຉິກຣິສ຺ສຕີ’ຕິ ເນຕໍ ຐານໍ ວິຊ຺ຊຕິ.

‘‘‘ໂສ ວຕ, ຠິກ຺ຂເວ, ຠິກ຺ຂຸ ສພ຺ພສງ຺ຂາເຣ [ສພ຺ພສງ຺ຂາຣໍ (ສີ. ປີ.)] ອນິຈ຺ຈໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີ’ຕິ ຐານເມຕໍ ວິຊ຺ຊຕິ. ‘ອນຸໂລມິກາຍ ຂນ຺ຕິຍາ ສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີ’ຕິ ຐານເມຕໍ ວິຊ຺ຊຕິ. ‘ສມ຺ມຕ຺ຕນິຍາມໍ ໂອກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີ’ຕິ ຐານເມຕໍ ວິຊ຺ຊຕີ’’ຕິ. ຕຕິຍໍ.

໔. ທຸກ຺ຂສຸຕ຺ຕໍ

໙໙. ‘‘ໂສ ວຕ, ຠິກ຺ຂເວ, ຠິກ຺ຂຸ ກຎ຺ຈິ ສງ຺ຂາຣໍ ສຸຂໂຕ ສມນຸປສ຺ສນ຺ໂຕ…ເປ… ສພ຺ພສງ຺ຂາເຣ ທຸກ຺ຂໂຕ ສມນຸປສ຺ສນ຺ໂຕ…ເປ… ຐານເມຕໍ ວິຊ຺ຊຕິ’’. ຈຕຸຕ຺ຖໍ.

໕. ອນຕ຺ຕສຸຕ຺ຕໍ

໑໐໐. ‘‘ໂສ ວຕ, ຠິກ຺ຂເວ, ຠິກ຺ຂຸ ກຎ຺ຈິ ຘມ຺ມໍ ອຕ຺ຕໂຕ ສມນຸປສ຺ສນ຺ໂຕ…ເປ… ສພ຺ພຘມ຺ເມ [ສພ຺ພຘມ຺ມໍ (ສີ. ປີ.), ກິຎ຺ຈິຘມ຺ມໍ (ກ.) ປຏິ. ມ. ໓.໓໖] ອນຕ຺ຕໂຕ ສມນຸປສ຺ສນ຺ໂຕ…ເປ… ຐານເມຕໍ ວິຊ຺ຊຕິ’’. ປຎ຺ຈມໍ.

໖. ນິພ຺ພານສຸຕ຺ຕໍ

໑໐໑. ‘‘‘ໂສ ວຕ, ຠິກ຺ຂເວ, ຠິກ຺ຂຸ ນິພ຺ພານໍ ທຸກ຺ຂໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີ’ຕິ ເນຕໍ ຐານໍ ວິຊ຺ຊຕິ. ‘ອນຸໂລມິກາຍ ຂນ຺ຕິຍາ ອສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີ’ຕິ ເນຕໍ ຐານໍ ວິຊ຺ຊຕິ. ‘ສມ຺ມຕ຺ຕນິຍາມໍ ອໂນກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີ’ຕິ ເນຕໍ ຐານໍ ວິຊ຺ຊຕິ.

‘‘‘ໂສ ວຕ, ຠິກ຺ຂເວ, ຠິກ຺ຂຸ ນິພ຺ພານໍ ສຸຂໂຕ ສມນຸປສ຺ສນ຺ໂຕ ອນຸໂລມິກາຍ ຂນ຺ຕິຍາ ສມນ຺ນາຄໂຕ ຠວິສ຺ສຕີ’ຕິ ຐານເມຕໍ ວິຊ຺ຊຕິ. ‘ອນຸໂລມິກາຍ ຂນ຺ຕິຍາ ສມນ຺ນາຄໂຕ ສມ຺ມຕ຺ຕນິຍາມໍ ໂອກ຺ກມິສ຺ສຕີ’ຕິ ຐານເມຕໍ ວິຊ຺ຊຕິ. ‘ສມ຺ມຕ຺ຕນິຍາມໍ ໂອກ຺ກມມາໂນ ໂສຕາປຕ຺ຕິຜລໍ ວາ ສກທາຄາມິຜລໍ ວາ ອນາຄາມິຜລໍ ວາ ອຣຫຕ຺ຕໍ ວາ ສຈ຺ຉິກຣິສ຺ສຕີ’ຕິ ຐານເມຕໍ ວິຊ຺ຊຕີ’’ຕິ. ຉຏ຺ຐໍ.

໗. ອນວຕ຺ຖິຕສຸຕ຺ຕໍ

໑໐໒. ‘‘ຉ, ຠິກ຺ຂເວ, ອານິສໍເສ ສມ຺ປສ຺ສມາເນນ ອລເມວ ຠິກ຺ຂຸນາ ສພ຺ພສງ຺ຂາເຣສຸ ອໂນຘິໍ ກຣິຕ຺ວາ ອນິຈ຺ຈສຎ຺ຎໍ ອຸປຏ຺ຐາເປຕຸໍ. ກຕເມ ຉ? ‘ສພ຺ພສງ຺ຂາຣາ ຈ ເມ ອນວຕ຺ຖິຕາ [ອນວຏ຺ຐິຕໂຕ (ສີ. ສ຺ຍາ. ປີ.)] ຂາຍິສ຺ສນ຺ຕິ, ສພ຺ພໂລເກ ຈ ເມ ມໂນ ນາຠິຣມິສ຺ສຕິ [ນ ຣມິສ຺ສຕິ (ກ.)], ສພ຺ພໂລກາ ຈ ເມ ມໂນ ວຸຏ຺ຐຫິສ຺ສຕິ, ນິພ຺ພານໂປຓຎ຺ຈ ເມ ມານສໍ ຠວິສ຺ສຕິ, ສໍໂຍຊນາ ຈ ເມ ປຫານໍ ຄຈ຺ຉິສ຺ສນ຺ຕິ [ຄຈ຺ຉນ຺ຕິ (ສ຺ຍາ. ປີ. ກ.)], ປຣເມນ ຈ ສາມຎ຺ເຎນ ສມນ຺ນາຄໂຕ ຠວິສ຺ສາມີ’ຕິ. ອິເມ ໂຂ, ຠິກ຺ຂເວ, ຉ ອານິສໍເສ ສມ຺ປສ຺ສມາເນນ ອລເມວ ຠິກ຺ຂຸນາ ສພ຺ພສງ຺ຂາເຣສຸ ອໂນຘິໍ ກຣິຕ຺ວາ ອນິຈ຺ຈສຎ຺ຎໍ ອຸປຏ຺ຐາເປຕຸ’’ນ຺ຕິ. ສຕ຺ຕມໍ.

໘. ອຸກ຺ຂິຕ຺ຕາສິກສຸຕ຺ຕໍ

໑໐໓. ‘‘ຉ, ຠິກ຺ຂເວ, ອານິສໍເສ ສມ຺ປສ຺ສມາເນນ ອລເມວ ຠິກ຺ຂຸນາ ສພ຺ພສງ຺ຂາເຣສຸ ອໂນຘິໍ ກຣິຕ຺ວາ ທຸກ຺ຂສຎ຺ຎໍ ອຸປຏ຺ຐາເປຕຸໍ. ກຕເມ ຉ? ‘ສພ຺ພສງ຺ຂາເຣສຸ ຈ ເມ ນິພ຺ພິທສຎ຺ຎາ ປຈ຺ຈຸປຏ຺ຐິຕາ ຠວິສ຺ສຕິ, ເສຍ຺ຍຖາປິ ອຸກ຺ຂິຕ຺ຕາສິເກ ວຘເກ. ສພ຺ພໂລກາ ຈ ເມ ມໂນ ວຸຏ຺ຐຫິສ຺ສຕິ, ນິພ຺ພາເນ ຈ ສນ຺ຕທສ຺ສາວີ ຠວິສ຺ສາມິ, ອນຸສຍາ ຈ ເມ ສມຸຄ຺ຆາຕໍ ຄຈ຺ຉິສ຺ສນ຺ຕິ [ຄຈ຺ຉນ຺ຕິ (ປີ. ກ.)], ກິຈ຺ຈກາຣີ ຈ ຠວິສ຺ສາມິ, ສຕ຺ຖາ ຈ ເມ ປຣິຈິຓ຺ໂຓ ຠວິສ຺ສຕິ ເມຕ຺ຕາວຕາຍາ’ຕິ. ອິເມ ໂຂ, ຠິກ຺ຂເວ, ຉ ອານິສໍເສ ສມ຺ປສ຺ສມາເນນ ອລເມວ ຠິກ຺ຂຸນາ ສພ຺ພສງ຺ຂາເຣສຸ ອໂນຘິໍ ກຣິຕ຺ວາ ທຸກ຺ຂສຎ຺ຎໍ ອຸປຏ຺ຐາເປຕຸ’’ນ຺ຕິ. ອຏ຺ຐມໍ.

໙. ອຕມ຺ມຍສຸຕ຺ຕໍ

໑໐໔. ‘‘ຉ, ຠິກ຺ຂເວ, ອານິສໍເສ ສມ຺ປສ຺ສມາເນນ ອລເມວ ຠິກ຺ຂຸນາ ສພ຺ພຘມ຺ເມສຸ ອໂນຘິໍ ກຣິຕ຺ວາ ອນຕ຺ຕສຎ຺ຎໍ ອຸປຏ຺ຐາເປຕຸໍ. ກຕເມ ຉ? ສພ຺ພໂລເກ ຈ ອຕມ຺ມໂຍ ຠວິສ຺ສາມິ, ອຫງ຺ກາຣາ ຈ ເມ ອຸປຣຸຊ຺ຌິສ຺ສນ຺ຕິ, ມມງ຺ກາຣາ ຈ ເມ ອຸປຣຸຊ຺ຌິສ຺ສນ຺ຕິ, ອສາຘາຣເຓນ ຈ ຎາເຓນ ສມນ຺ນາຄໂຕ ຠວິສ຺ສາມິ, ເຫຕຸ ຈ ເມ ສຸທິຏ຺ໂຐ ຠວິສ຺ສຕິ, ເຫຕຸສມຸປ຺ປນ຺ນາ ຈ ຘມ຺ມາ. ອິເມ ໂຂ, ຠິກ຺ຂເວ, ຉ ອານິສໍເສ ສມ຺ປສ຺ສມາເນນ ອລເມວ ຠິກ຺ຂຸນາ ສພ຺ພຘມ຺ເມສຸ ອໂນຘິໍ ກຣິຕ຺ວາ ອນຕ຺ຕສຎ຺ຎໍ ອຸປຏ຺ຐາເປຕຸ’’ນ຺ຕິ. ນວມໍ.

໑໐. ຠວສຸຕ຺ຕໍ

໑໐໕. ‘‘ຕໂຍເມ, ຠິກ຺ຂເວ, ຠວາ ປຫາຕພ຺ພາ, ຕີສຸ ສິກ຺ຂາສຸ ສິກ຺ຂິຕພ຺ພໍ. ກຕເມ ຕໂຍ ຠວາ ປຫາຕພ຺ພາ? ກາມຠໂວ, ຣູປຠໂວ, ອຣູປຠໂວ – ອິເມ ຕໂຍ ຠວາ ປຫາຕພ຺ພາ. ກຕມາສຸ ຕີສຸ ສິກ຺ຂາສຸ ສິກ຺ຂິຕພ຺ພໍ? ອຘິສີລສິກ຺ຂາຍ, ອຘິຈິຕ຺ຕສິກ຺ຂາຍ, ອຘິປຎ຺ຎາສິກ຺ຂາຍ – ອິມາສຸ ຕີສຸ ສິກ຺ຂາສຸ ສິກ຺ຂິຕພ຺ພໍ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິເມ ຕໂຍ ຠວາ ປຫີນາ ໂຫນ຺ຕິ, ອິມາສຸ ຈ ຕີສຸ ສິກ຺ຂາສຸ ສິກ຺ຂິຕສິກ຺ໂຂ ໂຫຕິ – ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ອຈ຺ເຉຈ຺ຉິ ຕຓ຺ຫໍ, ວິວຕ຺ຕຍິ ສໍໂຍຊນໍ, ສມ຺ມາ ມານາຠິສມຍາ ອນ຺ຕມກາສິ ທຸກ຺ຂສ຺ສາ’’ຕິ. ທສມໍ.

໑໑. ຕຓ຺ຫາສຸຕ຺ຕໍ

໑໐໖. ‘‘ຕິສ຺ໂສ ອິມາ, ຠິກ຺ຂເວ, ຕຓ຺ຫາ ປຫາຕພ຺ພາ, ຕໂຍ ຈ ມານາ. ກຕມາ ຕິສ຺ໂສ ຕຓ຺ຫາ ປຫາຕພ຺ພາ? ກາມຕຓ຺ຫາ, ຠວຕຓ຺ຫາ, ວິຠວຕຓ຺ຫາ – ອິມາ ຕິສ຺ໂສ ຕຓ຺ຫາ ປຫາຕພ຺ພາ. ກຕເມ ຕໂຍ ມານາ ປຫາຕພ຺ພາ? ມາໂນ, ໂອມາໂນ, ອຕິມາໂນ – ອິເມ ຕໂຍ ມານາ ປຫາຕພ຺ພາ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິມາ ຕິສ຺ໂສ ຕຓ຺ຫາ ປຫີນາ ໂຫນ຺ຕິ, ອິເມ ຈ ຕໂຍ ມານາ; ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ອຈ຺ເຉຈ຺ຉິ ຕຓ຺ຫໍ, ວິວຕ຺ຕຍິ ສໍໂຍຊນໍ, ສມ຺ມາ ມານາຠິສມຍາ ອນ຺ຕມກາສິ ທຸກ຺ຂສ຺ສາ’’ຕິ. ເອກາທສມໍ.

ອານິສໍສວຄ຺ໂຄ ທສໂມ. [ປຎ຺ຈໂມ (ສ຺ຍາ. ກ.)]