໓. ໂວໂຣປິຕສຸຕ຺ຕໍ

໘໗. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ສຸຓນ຺ໂຕປິ ສທ຺ຘມ຺ມໍ ອຠພ຺ໂພ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ. ກຕເມຫິ ຉຫິ? ມາຕາ ຊີວິຕາ ໂວໂຣປິຕາ ໂຫຕິ, ປິຕາ ຊີວິຕາ ໂວໂຣປິໂຕ ໂຫຕິ, ອຣຫໍ [ອຣຫາ (ສ຺ຍາ. ກໍ.), ອຣຫນ຺ໂຕ (ກ.)] ຊີວິຕາ ໂວໂຣປິໂຕ ໂຫຕິ, ຕຖາຄຕສ຺ສ ທຸຏ຺ເຐນ ຈິຕ຺ເຕນ ໂລຫິຕໍ ອຸປ຺ປາທິຕໍ ໂຫຕິ, ສງ຺ໂຆ ຠິນ຺ໂນ ໂຫຕິ, ທຸປ຺ປຎ຺ໂຎ ໂຫຕິ ຊໂຬ ເອຬມູໂຄ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ສຸຓນ຺ໂຕປິ ສທ຺ຘມ຺ມໍ ອຠພ຺ໂພ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ສຸຓນ຺ໂຕ ສທ຺ຘມ຺ມໍ ຠພ຺ໂພ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕໍ. ກຕເມຫິ ຉຫິ? ນ ມາຕາ ຊີວິຕາ ໂວໂຣປິຕາ ໂຫຕິ, ນ ປິຕາ ຊີວິຕາ ໂວໂຣປິໂຕ ໂຫຕິ, ນ ອຣຫໍ ຊີວິຕາ ໂວໂຣປິໂຕ ໂຫຕິ, ນ ຕຖາຄຕສ຺ສ ທຸຏ຺ເຐນ ຈິຕ຺ເຕນ ໂລຫິຕໍ ອຸປ຺ປາທິຕໍ ໂຫຕິ, ນ ສງ຺ໂຆ ຠິນ຺ໂນ ໂຫຕິ, ປຎ຺ຎວາ ໂຫຕິ ອຊໂຬ ອເນຬມູໂຄ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ສຸຓນ຺ໂຕ ສທ຺ຘມ຺ມໍ ຠພ຺ໂພ ນິຍາມໍ ໂອກ຺ກມິຕຸໍ ກຸສເລສຸ ຘມ຺ເມສຸ ສມ຺ມຕ຺ຕ’’ນ຺ຕິ. ຕຕິຍໍ.