໘. ອຣຫຕ຺ຕວຄ຺ໂຄ

໑. ທຸກ຺ຂສຸຕ຺ຕໍ

໗໕. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ທິຏ຺ເຐວ ຘມ຺ເມ ທຸກ຺ຂໍ ວິຫຣຕິ ສວິຆາຕໍ ສອຸປາຍາສໍ ສປຣິຬາຫໍ, ກາຍສ຺ສ ເຠທາ ປຣໍ ມຣຓາ ທຸຄ຺ຄຕິ ປາຏິກງ຺ຂາ. ກຕເມຫິ ຉຫິ? ກາມວິຕກ຺ເກນ, ພ຺ຍາປາທວິຕກ຺ເກນ, ວິຫິໍສາວິຕກ຺ເກນ, ກາມສຎ຺ຎາຍ, ພ຺ຍາປາທສຎ຺ຎາຍ, ວິຫິໍສາສຎ຺ຎາຍ – ອິເມຫິ, ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ທິຏ຺ເຐວ ຘມ຺ເມ ທຸກ຺ຂໍ ວິຫຣຕິ ສວິຆາຕໍ ສອຸປາຍາສໍ ສປຣິຬາຫໍ, ກາຍສ຺ສ ເຠທາ ປຣໍ ມຣຓາ ທຸຄ຺ຄຕິ ປາຏິກງ຺ຂາ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ທິຏ຺ເຐວ ຘມ຺ເມ ສຸຂໍ ວິຫຣຕິ ອວິຆາຕໍ ອນຸປາຍາສໍ ອປຣິຬາຫໍ, ກາຍສ຺ສ ເຠທາ ປຣໍ ມຣຓາ ສຸຄຕິ ປາຏິກງ຺ຂາ. ກຕເມຫິ ຉຫິ? ເນກ຺ຂມ຺ມວິຕກ຺ເກນ, ອພ຺ຍາປາທວິຕກ຺ເກນ, ອວິຫິໍສາວິຕກ຺ເກນ, ເນກ຺ຂມ຺ມສຎ຺ຎາຍ, ອພ຺ຍາປາທສຎ຺ຎາຍ, ອວິຫິໍສາສຎ຺ຎາຍ – ອິເມຫິ, ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ທິຏ຺ເຐວ ຘມ຺ເມ ສຸຂໍ ວິຫຣຕິ ອວິຆາຕໍ ອນຸປາຍາສໍ ອປຣິຬາຫໍ, ກາຍສ຺ສ ເຠທາ ປຣໍ ມຣຓາ ສຸຄຕິ ປາຏິກງ຺ຂາ’’ຕິ. ປຐມໍ.

໒. ອຣຫຕ຺ຕສຸຕ຺ຕໍ

໗໖. ‘‘ຉ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອຣຫຕ຺ຕໍ ສຈ຺ຉິກາຕຸໍ. ກຕເມ ຉ? ມານໍ, ໂອມານໍ, ອຕິມານໍ, ອຘິມານໍ, ຖມ຺ຠໍ, ອຕິນິປາຕໍ. ອິເມ ໂຂ, ຠິກ຺ຂເວ, ຉ ຘມ຺ເມ ອປ຺ປຫາຍ ອຠພ຺ໂພ ອຣຫຕ຺ຕໍ ສຈ຺ຉິກາຕຸໍ.

‘‘ຉ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອຣຫຕ຺ຕໍ ສຈ຺ຉິກາຕຸໍ. ກຕເມ ຉ? ມານໍ, ໂອມານໍ, ອຕິມານໍ, ອຘິມານໍ, ຖມ຺ຠໍ, ອຕິນິປາຕໍ. ອິເມ ໂຂ, ຠິກ຺ຂເວ, ຉ ຘມ຺ເມ ປຫາຍ ຠພ຺ໂພ ອຣຫຕ຺ຕໍ ສຈ຺ຉິກາຕຸ’’ນ຺ຕິ. ທຸຕິຍໍ.

໓. ອຸຕ຺ຕຣິມນຸສ຺ສຘມ຺ມສຸຕ຺ຕໍ

໗໗. ‘‘ຉ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອຸຕ຺ຕຣິມນຸສ຺ສຘມ຺ມໍ ອລມຣິຍຎາຓທສ຺ສນວິເສສໍ ສຈ຺ຉິກາຕຸໍ. ກຕເມ ຉ? ມຸຏ຺ຐສ຺ສຈ຺ຈໍ, ອສມ຺ປຊຎ຺ຎໍ, ອິນ຺ທ຺ຣິເຍສຸ ອຄຸຕ຺ຕທ຺ວາຣຕໍ, ໂຠຊເນ ອມຕ຺ຕຎ຺ຎຸຕໍ, ກຸຫນໍ, ລປນໍ. ອິເມ ໂຂ, ຠິກ຺ຂເວ, ຉ ຘມ຺ເມ ອປ຺ປຫາຍ ອຠພ຺ໂພ ອຸຕ຺ຕຣິມນຸສ຺ສຘມ຺ມໍ ອລມຣິຍຎາຓທສ຺ສນວິເສສໍ ສຈ຺ຉິກາຕຸໍ.

‘‘ຉ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອຸຕ຺ຕຣິມນຸສ຺ສຘມ຺ມໍ ອລມຣິຍຎາຓທສ຺ສນວິເສສໍ ສຈ຺ຉິກາຕຸໍ. ກຕເມ ຉ? ມຸຏ຺ຐສ຺ສຈ຺ຈໍ, ອສມ຺ປຊຎ຺ຎໍ, ອິນ຺ທ຺ຣິເຍສຸ ອຄຸຕ຺ຕທ຺ວາຣຕໍ, ໂຠຊເນ ອມຕ຺ຕຎ຺ຎຸຕໍ, ກຸຫນໍ, ລປນໍ. ອິເມ ໂຂ, ຠິກ຺ຂເວ, ຉ ຘມ຺ເມ ປຫາຍ ຠພ຺ໂພ ອຸຕ຺ຕຣິມນຸສ຺ສຘມ຺ມໍ ອລມຣິຍຎາຓທສ຺ສນວິເສສໍ ສຈ຺ຉິກາຕຸ’’ນ຺ຕິ. ຕຕິຍໍ.

໔. ສຸຂໂສມນສ຺ສສຸຕ຺ຕໍ

໗໘. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ທິຏ຺ເຐວ ຘມ຺ເມ ສຸຂໂສມນສ຺ສພຫຸໂລ ວິຫຣຕິ, ໂຍນິ ຈສ຺ສ ອາຣທ຺ຘາ ໂຫຕິ ອາສວານໍ ຂຍາຍ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ຘມ຺ມາຣາໂມ ໂຫຕິ, ຠາວນາຣາໂມ ໂຫຕິ, ປຫານາຣາໂມ ໂຫຕິ, ປວິເວກາຣາໂມ ໂຫຕິ, ອພ຺ຍາປຊ຺ຌາຣາໂມ ໂຫຕິ, ນິປ຺ປປຎ຺ຈາຣາໂມ ໂຫຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ທິຏ຺ເຐວ ຘມ຺ເມ ສຸຂໂສມນສ຺ສພຫຸໂລ ວິຫຣຕິ, ໂຍນິ ຈສ຺ສ ອາຣທ຺ຘາ ໂຫຕິ ອາສວານໍ ຂຍາຍາ’’ຕິ. ຈຕຸຕ຺ຖໍ.

໕. ອຘິຄມສຸຕ຺ຕໍ

໗໙. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ອຠພ຺ໂພ ອນຘິຄຕໍ ວາ ກຸສລໍ ຘມ຺ມໍ ອຘິຄນ຺ຕຸໍ, ອຘິຄຕໍ ວາ ກຸສລໍ ຘມ຺ມໍ ຜາຕິໍ ກາຕຸໍ [ຜາຕິກຕ຺ຕຸໍ (ສີ.), ຜາຕິກາຕຸໍ (ສ຺ຍາ. ກໍ. ປີ.)]. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ນ ອາຍກຸສໂລ ຈ ໂຫຕິ, ນ ອປາຍກຸສໂລ ຈ ໂຫຕິ, ນ ອຸປາຍກຸສໂລ ຈ ໂຫຕິ, ອນຘິຄຕານໍ ກຸສລານໍ ຘມ຺ມານໍ ອຘິຄມາຍ ນ ຉນ຺ທໍ ຊເນຕິ, ອຘິຄເຕ ກຸສເລ ຘມ຺ເມ ນ ອາຣກ຺ຂຕິ [ສາຣກ຺ຂຕິ (ສີ. ສ຺ຍາ. ກໍ. ປີ)], ສາຕຈ຺ຈກິຣິຍາຍ ນ ສມ຺ປາເທຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ອຠພ຺ໂພ ອນຘິຄຕໍ ວາ ກຸສລໍ ຘມ຺ມໍ ອຘິຄນ຺ຕຸໍ, ອຘິຄຕໍ ວາ ກຸສລໍ ຘມ຺ມໍ ຜາຕິໍ ກາຕຸໍ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ຠພ຺ໂພ ອນຘິຄຕໍ ວາ ກຸສລໍ ຘມ຺ມໍ ອຘິຄນ຺ຕຸໍ, ອຘິຄຕໍ ວາ ກຸສລໍ ຘມ຺ມໍ ຜາຕິໍ ກາຕຸໍ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ອາຍກຸສໂລ ຈ ໂຫຕິ, ອປາຍກຸສໂລ ຈ ໂຫຕິ, ອຸປາຍກຸສໂລ ຈ ໂຫຕິ, ອນຘິຄຕານໍ ກຸສລານໍ ຘມ຺ມານໍ ອຘິຄມາຍ ຉນ຺ທໍ ຊເນຕິ, ອຘິຄເຕ ກຸສເລ ຘມ຺ເມ ອາຣກ຺ຂຕິ, ສາຕຈ຺ຈກິຣິຍາຍ ສມ຺ປາເທຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ຠພ຺ໂພ ອນຘິຄຕໍ ວາ ກຸສລໍ ຘມ຺ມໍ ອຘິຄນ຺ຕຸໍ, ອຘິຄຕໍ ວາ ກຸສລໍ ຘມ຺ມໍ ຜາຕິໍ ກາຕຸ’’ນ຺ຕິ. ປຎ຺ຈມໍ.

໖. ມຫນ຺ຕຕ຺ຕສຸຕ຺ຕໍ

໘໐. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ນຈິຣສ຺ເສວ ມຫນ຺ຕຕ຺ຕໍ [ມຫຕ຺ຕໍ (ສ຺ຍາ. ກໍ.)] ເວປຸລ຺ລຕ຺ຕໍ ປາປຸຓາຕິ ຘມ຺ເມສຸ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ອາໂລກພຫຸໂລ ຈ ໂຫຕິ ໂຍຄພຫຸໂລ ຈ ເວທພຫຸໂລ ຈ ອສນ຺ຕຸຏ຺ຐິພຫຸໂລ ຈ ອນິກ຺ຂິຕ຺ຕຘຸໂຣ ຈ ກຸສເລສຸ ຘມ຺ເມສຸ ອຸຕ຺ຕຣິ ຈ ປຕາເຣຕິ [ປກໂຣຕິ (ກ.)]. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ນຈິຣສ຺ເສວ ມຫນ຺ຕຕ຺ຕໍ ເວປຸລ຺ລຕ຺ຕໍ ປາປຸຓາຕິ ຘມ຺ເມສູ’’ຕິ. ຉຏ຺ຐໍ.

໗. ປຐມນິຣຍສຸຕ຺ຕໍ

໘໑. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຉຫິ? ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ, ປາປິຈ຺ໂຉ ຈ, ມິຈ຺ຉາທິຏ຺ຐິ ຈ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ຉຫິ? ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ອປ຺ປິຈ຺ໂຉ ຈ, ສມ຺ມາທິຏ຺ຐິ ຈ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ. ສຕ຺ຕມໍ.

໘. ທຸຕິຍນິຣຍສຸຕ຺ຕໍ

໘໒. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຉຫິ [ມຸສາວາທີ ໂຫຕິ, ປິສຸຓວາຈາ ໂຫຕິ, ຜຣຸສວາໂຈ ໂຫຕິ, ສມ຺ຜປ຺ປລາປີ ໂຫຕິ, (ສີ. ສ຺ຍາ. ປີ.) ເອວໍ ສຸກ຺ກປກ຺ເຂປິ]? ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ [ມຸສາວາທີ ໂຫຕິ, ປິສຸຓວາຈາ ໂຫຕິ, ຜຣຸສວາໂຈ ໂຫຕິ, ສມ຺ຜປ຺ປລາປີ ໂຫຕິ, (ສີ. ສ຺ຍາ. ປີ.) ເອວໍ ສຸກ຺ກປກ຺ເຂປິ], ລຸທ຺ໂຘ ຈ, ປຄພ຺ໂຠ ຈ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ຉຫິ? ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ອລຸທ຺ໂຘ ຈ, ອປ຺ປຄພ຺ໂຠ ຈ. ອິເມຫິ ໂຂ ຠິກ຺ຂເວ ຉຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ. ອຏ຺ຐມໍ.

໙. ອຄ຺ຄຘມ຺ມສຸຕ຺ຕໍ

໘໓. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ອຠພ຺ໂພ ອຄ຺ຄໍ ຘມ຺ມໍ ອຣຫຕ຺ຕໍ ສຈ຺ຉິກາຕຸໍ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ອສ຺ສທ຺ໂຘ ໂຫຕິ, ອຫິຣິໂກ ໂຫຕິ, ອໂນຕ຺ຕປ຺ປີ ໂຫຕິ, ກຸສີໂຕ ໂຫຕິ, ທຸປ຺ປຎ຺ໂຎ ໂຫຕິ, ກາເຍ ຈ ຊີວິເຕ ຈ ສາເປກ຺ໂຂ ໂຫຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ອຠພ຺ໂພ ອຄ຺ຄໍ ຘມ຺ມໍ ອຣຫຕ຺ຕໍ ສຈ຺ຉິກາຕຸໍ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຠິກ຺ຂຸ ຠພ຺ໂພ ອຄ຺ຄໍ ຘມ຺ມໍ ອຣຫຕ຺ຕໍ ສຈ຺ຉິກາຕຸໍ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ສທ຺ໂຘ ໂຫຕິ, ຫິຣິມາ ໂຫຕິ, ໂອຕ຺ຕປ຺ປີ ໂຫຕິ, ອາຣທ຺ຘວີຣິໂຍ ໂຫຕິ, ປຎ຺ຎວາ ໂຫຕິ, ກາເຍ ຈ ຊີວິເຕ ຈ ອນເປກ຺ໂຂ ໂຫຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ຠພ຺ໂພ ອຄ຺ຄໍ ຘມ຺ມໍ ອຣຫຕ຺ຕໍ ສຈ຺ຉິກາຕຸ’’ນ຺ຕິ. ນວມໍ.

໑໐. ຣຕ຺ຕິທິວສສຸຕ຺ຕໍ

໘໔. ‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄຕສ຺ສ ຠິກ຺ຂຸໂນ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ວຸທ຺ຘິ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ມຫິຈ຺ໂຉ ໂຫຕິ, ວິຆາຕວາ, ອສນ຺ຕຸຏ຺ໂຐ, ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣນ, ອສ຺ສທ຺ໂຘ ໂຫຕິ, ທຸສ຺ສີໂລ ໂຫຕິ, ກຸສີໂຕ ໂຫຕິ, ມຸຏ຺ຐສ຺ສຕິ ໂຫຕິ, ທຸປ຺ປຎ຺ໂຎ ໂຫຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄຕສ຺ສ ຠິກ຺ຂຸໂນ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ວຸທ຺ຘິ.

‘‘ຉຫິ, ຠິກ຺ຂເວ, ຘມ຺ເມຫິ ສມນ຺ນາຄຕສ຺ສ ຠິກ຺ຂຸໂນ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ, ໂນ ປຣິຫານິ. ກຕເມຫິ ຉຫິ? ອິຘ, ຠິກ຺ຂເວ, ຠິກ຺ຂຸ ນ ມຫິຈ຺ໂຉ ໂຫຕິ, ອວິຆາຕວາ, ສນ຺ຕຸຏ຺ໂຐ, ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣນ, ສທ຺ໂຘ ໂຫຕິ, ສີລວາ ໂຫຕິ, ອາຣທ຺ຘວີຣິໂຍ ໂຫຕິ, ສຕິມາ ໂຫຕິ, ປຎ຺ຎວາ ໂຫຕິ. ອິເມຫິ ໂຂ, ຠິກ຺ຂເວ, ຉຫິ ຘມ຺ເມຫິ ສມນ຺ນາຄຕສ຺ສ ຠິກ຺ຂຸໂນ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ ວຸທ຺ຘິເຍວ ປາຏິກງ຺ຂາ, ກຸສເລສຸ ຘມ຺ເມສຸ ໂນ ປຣິຫານີ’’ຕິ. ທສມໍ.

ອຣຫຕ຺ຕວຄ຺ໂຄ ອຏ຺ຐໂມ. [ຕຕິໂຍ (ສ຺ຍາ. ກ.)]