໑໐. ປຸຄ຺ຄລປ຺ປສາທສຸຕ຺ຕໍ

໒໕໐. ‘‘ປຎ຺ຈິເມ, ຠິກ຺ຂເວ, ອາທີນວາ ປຸຄ຺ຄລປ຺ປສາເທ. ກຕເມ ປຎ຺ຈ? ຍສ຺ມິໍ, ຠິກ຺ຂເວ, ປຸຄ຺ຄເລ ປຸຄ຺ຄໂລ ອຠິປ຺ປສນ຺ໂນ ໂຫຕິ, ໂສ ຕຖາຣູປໍ ອາປຕ຺ຕິໍ ອາປນ຺ໂນ ໂຫຕິ ຍຖາຣູປາຍ ອາປຕ຺ຕິຍາ ສງ຺ໂຆ ອຸກ຺ຂິປຕິ. ຕສ຺ສ ເອວໍ ໂຫຕິ – ‘ໂຍ ໂຂ ມ຺ຍາຍໍ ປຸຄ຺ຄໂລ ປິໂຍ ມນາໂປ ໂສ ສງ຺ເຆນ ອຸກ຺ຂິຕ຺ໂຕ’ຕິ. ຠິກ຺ຂູສຸ ອປ຺ປສາທພຫຸໂລ ໂຫຕິ. ຠິກ຺ຂູສຸ ອປ຺ປສາທພຫຸໂລ ສມາໂນ ອຎ຺ເຎ ຠິກ຺ຂູ ນ ຠຊຕິ. ອຎ຺ເຎ ຠິກ຺ຂູ ອຠຊນ຺ໂຕ ສທ຺ຘມ຺ມໍ ນ ສຸຓາຕິ. ສທ຺ຘມ຺ມໍ ອສຸຓນ຺ໂຕ ສທ຺ຘມ຺ມາ ປຣິຫາຍຕິ. ອຍໍ, ຠິກ຺ຂເວ, ປຐໂມ ອາທີນໂວ ປຸຄ຺ຄລປ຺ປສາເທ.

‘‘ປຸນ ຈປຣໍ, ຠິກ຺ຂເວ, ຍສ຺ມິໍ ປຸຄ຺ຄເລ ປຸຄ຺ຄໂລ ອຠິປ຺ປສນ຺ໂນ ໂຫຕິ, ໂສ ຕຖາຣູປໍ ອາປຕ຺ຕິໍ ອາປນ຺ໂນ ໂຫຕິ ຍຖາຣູປາຍ ອາປຕ຺ຕິຍາ ສງ຺ໂຆ ອນ຺ເຕ ນິສີທາເປຕິ. ຕສ຺ສ ເອວໍ ໂຫຕິ – ‘ໂຍ ໂຂ ມ຺ຍາຍໍ ປຸຄ຺ຄໂລ ປິໂຍ ມນາໂປ ໂສ ສງ຺ເຆນ ອນ຺ເຕ ນິສີທາປິໂຕ’ຕິ. ຠິກ຺ຂູສຸ ອປ຺ປສາທພຫຸໂລ ໂຫຕິ. ຠິກ຺ຂູສຸ ອປ຺ປສາທພຫຸໂລ ສມາໂນ ອຎ຺ເຎ ຠິກ຺ຂູ ນ ຠຊຕິ. ອຎ຺ເຎ ຠິກ຺ຂູ ອຠຊນ຺ໂຕ ສທ຺ຘມ຺ມໍ ນ ສຸຓາຕິ. ສທ຺ຘມ຺ມໍ ອສຸຓນ຺ໂຕ ສທ຺ຘມ຺ມາ ປຣິຫາຍຕິ. ອຍໍ, ຠິກ຺ຂເວ, ທຸຕິໂຍ ອາທີນໂວ ປຸຄ຺ຄລປ຺ປສາເທ.

‘‘ປຸນ ຈປຣໍ, ຠິກ຺ຂເວ, ຍສ຺ມິໍ ປຸຄ຺ຄເລ ປຸຄ຺ຄໂລ ອຠິປ຺ປສນ຺ໂນ ໂຫຕິ, ໂສ ທິສາປກ຺ກນ຺ໂຕ ໂຫຕິ…ເປ… ໂສ ວິພ຺ຠນ຺ໂຕ ໂຫຕິ…ເປ… ໂສ ກາລງ຺ກໂຕ ໂຫຕິ. ຕສ຺ສ ເອວໍ ໂຫຕິ – ‘ໂຍ ໂຂ ມ຺ຍາຍໍ ປຸຄ຺ຄໂລ ປິໂຍ ມນາໂປ ໂສ ກາລງ຺ກໂຕ’ຕິ. ອຎ຺ເຎ ຠິກ຺ຂູ ນ ຠຊຕິ. ອຎ຺ເຎ ຠິກ຺ຂູ ອຠຊນ຺ໂຕ ສທ຺ຘມ຺ມໍ ນ ສຸຓາຕິ. ສທ຺ຘມ຺ມໍ ອສຸຓນ຺ໂຕ ສທ຺ຘມ຺ມາ ປຣິຫາຍຕິ. ອຍໍ, ຠິກ຺ຂເວ, ປຎ຺ຈໂມ ອາທີນໂວ ປຸຄ຺ຄລປ຺ປສາເທ. ອິເມ ໂຂ, ຠິກ຺ຂເວ, ປຎ຺ຈ ອາທີນວາ ປຸຄ຺ຄລປ຺ປສາເທ’’ຕິ. ທສມໍ.

ທຸຈ຺ຈຣິຕວຄ຺ໂຄ ປຎ຺ຈໂມ.