໗. ວສ຺ສສຸຕ຺ຕໍ

໑໙໗. ‘‘ປຎ຺ຈິເມ, ຠິກ຺ຂເວ, ວສ຺ສສ຺ສ ອນ຺ຕຣາຍາ, ຍໍ ເນມິຕ຺ຕາ [ເນມິຕ຺ຕກາ (ກຕ຺ຖຈິ)] ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕິ. ກຕເມ ປຎ຺ຈ? ອຸປຣິ, ຠິກ຺ຂເວ, ອາກາເສ ເຕໂຊຘາຕຸ ປກຸປ຺ປຕິ. ເຕນ ອຸປ຺ປນ຺ນາ ເມຆາ ປຏິວິຄຈ຺ຉນ຺ຕິ. ອຍໍ, ຠິກ຺ຂເວ, ປຐໂມ ວສ຺ສສ຺ສ ອນ຺ຕຣາໂຍ, ຍໍ ເນມິຕ຺ຕາ ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕິ.

‘‘ປຸນ ຈປຣໍ, ຠິກ຺ຂເວ, ອຸປຣິ ອາກາເສ ວາໂຍຘາຕຸ ປກຸປ຺ປຕິ. ເຕນ ອຸປ຺ປນ຺ນາ ເມຆາ ປຏິວິຄຈ຺ຉນ຺ຕິ. ອຍໍ, ຠິກ຺ຂເວ, ທຸຕິໂຍ ວສ຺ສສ຺ສ ອນ຺ຕຣາໂຍ, ຍໍ ເນມິຕ຺ຕາ ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕິ.

‘‘ປຸນ ຈປຣໍ, ຠິກ຺ຂເວ, ຣາຫຸ ອສຸຣິນ຺ໂທ ປາຓິນາ ອຸທກໍ ສມ຺ປຏິຈ຺ຉິຕ຺ວາ ມຫາສມຸທ຺ເທ ຉຑ຺ເຑຕິ. ອຍໍ, ຠິກ຺ຂເວ, ຕຕິໂຍ ວສ຺ສສ຺ສ ອນ຺ຕຣາໂຍ, ຍໍ ເນມິຕ຺ຕາ ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕິ.

‘‘ປຸນ ຈປຣໍ, ຠິກ຺ຂເວ, ວສ຺ສວລາຫກາ ເທວາ ປມຕ຺ຕາ ໂຫນ຺ຕິ. ອຍໍ, ຠິກ຺ຂເວ, ຈຕຸຕ຺ໂຖ ວສ຺ສສ຺ສ ອນ຺ຕຣາໂຍ, ຍໍ ເນມິຕ຺ຕາ ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕິ.

‘‘ປຸນ ຈປຣໍ, ຠິກ຺ຂເວ, ມນຸສ຺ສາ ອຘມ຺ມິກາ ໂຫນ຺ຕິ. ອຍໍ, ຠິກ຺ຂເວ, ປຎ຺ຈໂມ ວສ຺ສສ຺ສ ອນ຺ຕຣາໂຍ, ຍໍ ເນມິຕ຺ຕາ ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕິ. ອິເມ ໂຂ, ຠິກ຺ຂເວ, ປຎ຺ຈ ວສ຺ສສ຺ສ ອນ຺ຕຣາຍາ, ຍໍ ເນມິຕ຺ຕາ ນ ຊານນ຺ຕິ, ຍຕ຺ຖ ເນມິຕ຺ຕານໍ ຈກ຺ຂຸ ນ ກມຕີ’’ຕິ. ສຕ຺ຕມໍ.