໙. ຂິປ຺ປນິສນ຺ຕິສຸຕ຺ຕໍ

໑໖໙. ອຖ ໂຂ ອາຍສ຺ມາ ອານນ຺ໂທ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ສາຣິປຸຕ຺ເຕນ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ [ສາຣາຓີຍໍ (ສີ. ສ຺ຍາ. ກໍ. ປີ.)] ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອານນ຺ໂທ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ –

‘‘ກິຕ຺ຕາວຕາ ນຸ ໂຂ, ອາວຸໂສ ສາຣິປຸຕ຺ຕ, ຠິກ຺ຂຸ ຂິປ຺ປນິສນ຺ຕິ ຈ ໂຫຕິ, ກຸສເລສຸ ຘມ຺ເມສຸ ສຸຄ຺ຄຫິຕຄ຺ຄາຫີ ຈ, ພຫຸຎ຺ຈ ຄຓ຺ຫາຕິ, ຄຫິຕຎ຺ຈສ຺ສ ນປ຺ປມຸສ຺ສຕີ’’ຕິ? ‘‘ອາຍສ຺ມາ ໂຂ ອານນ຺ໂທ ພຫຸສ຺ສຸໂຕ. ປຏິຠາຕຸ ອາຍສ຺ມນ຺ຕໍເຍວ ອານນ຺ທ’’ນ຺ຕິ. ‘‘ເຕນຫາວຸໂສ ສາຣິປຸຕ຺ຕ, ສຸຓາຫິ, ສາຘຸກໍ ມນສິ ກໂຣຫິ; ຠາສິສ຺ສາມີ’’ຕິ. ‘‘ເອວມາວຸໂສ’’ຕິ ໂຂ ອາຍສ຺ມາ ສາຣິປຸຕ຺ໂຕ ອາຍສ຺ມໂຕ ອານນ຺ທສ຺ສ ປຈ຺ຈສ຺ໂສສິ. ອາຍສ຺ມາ ອານນ຺ໂທ ເອຕທໂວຈ –

‘‘ອິຘາວຸໂສ ສາຣິປຸຕ຺ຕ, ຠິກ຺ຂຸ ອຕ຺ຖກຸສໂລ ຈ ໂຫຕິ, ຘມ຺ມກຸສໂລ ຈ, ພ຺ຍຎ຺ຊນກຸສໂລ ຈ, ນິຣຸຕ຺ຕິກຸສໂລ ຈ, ປຸພ຺ພາປຣກຸສໂລ ຈ. ເອຕ຺ຕາວຕາ ໂຂ, ອາວຸໂສ ສາຣິປຸຕ຺ຕ, ຠິກ຺ຂຸ ຂິປ຺ປນິສນ຺ຕິ ຈ ໂຫຕິ ກຸສເລສຸ ຘມ຺ເມສຸ, ສຸຄ຺ຄຫິຕຄ຺ຄາຫີ ຈ, ພຫຸຎ຺ຈ ຄຓ຺ຫາຕິ, ຄຫິຕຎ຺ຈສ຺ສ ນປ຺ປມຸສ຺ສຕີ’’ຕິ. ‘‘ອຈ຺ຉຣິຍໍ, ອາວຸໂສ! ອພ຺ຠຸຕໍ, ອາວຸໂສ!! ຍາວ ສຸຠາສິຕໍ ຈິທໍ ອາຍສ຺ມຕາ ອານນ຺ເທນ. ອິເມຫິ ຈ ມຍໍ ປຎ຺ຈຫິ ຘມ຺ເມຫິ ສມນ຺ນາຄຕໍ ອາຍສ຺ມນ຺ຕໍ ອານນ຺ທໍ ຘາເຣມ – ‘ອາຍສ຺ມາ ອານນ຺ໂທ ອຕ຺ຖກຸສໂລ ຘມ຺ມກຸສໂລ ພ຺ຍຎ຺ຊນກຸສໂລ ນິຣຸຕ຺ຕິກຸສໂລ ປຸພ຺ພາປຣກຸສໂລ’’’ຕິ. ນວມໍ.