໓. ສາກຈ຺ຉສຸຕ຺ຕໍ

໑໖໓. ຕຕ຺ຣ ໂຂ ອາຍສ຺ມາ ສາຣິປຸຕ຺ໂຕ ຠິກ຺ຂູ ອາມນ຺ເຕສິ – ‘‘ອາວຸໂສ ຠິກ຺ຂເວ’’ຕິ. ‘‘ອາວຸໂສ’’ຕິ ໂຂ ເຕ ຠິກ຺ຂູ ອາຍສ຺ມໂຕ ສາຣິປຸຕ຺ຕສ຺ສ ປຈ຺ຈສ຺ໂສສຸໍ. ອາຍສ຺ມາ ສາຣິປຸຕ຺ໂຕ ເອຕທໂວຈ –

[ອ. ນິ. ໕.໖໕-໖໖] ‘‘ປຎ຺ຈຫາວຸໂສ, ຘມ຺ເມຫິ ສມນ຺ນາຄໂຕ ຠິກ຺ຂຸ ອລໍ ສາກຈ຺ໂຉ ສພ຺ຣຫ຺ມຈາຣີນໍ. ກຕເມຫິ ປຎ຺ຈຫິ? ອິຘາວຸໂສ, ຠິກ຺ຂຸ ອຕ຺ຕນາ ຈ ສີລສມ຺ປນ຺ໂນ ໂຫຕິ, ສີລສມ຺ປທາກຖາຍ ຈ ອາຄຕໍ ປຎ຺ຫໍ ພ຺ຍາກຕ຺ຕາ ໂຫຕິ; ອຕ຺ຕນາ ຈ ສມາຘິສມ຺ປນ຺ໂນ ໂຫຕິ, ສມາຘິສມ຺ປທາກຖາຍ ຈ ອາຄຕໍ ປຎ຺ຫໍ ພ຺ຍາກຕ຺ຕາ ໂຫຕິ; ອຕ຺ຕນາ ຈ ປຎ຺ຎາສມ຺ປນ຺ໂນ ໂຫຕິ, ປຎ຺ຎາສມ຺ປທາກຖາຍ ຈ ອາຄຕໍ ປຎ຺ຫໍ ພ຺ຍາກຕ຺ຕາ ໂຫຕິ; ອຕ຺ຕນາ ຈ ວິມຸຕ຺ຕິສມ຺ປນ຺ໂນ ໂຫຕິ, ວິມຸຕ຺ຕິສມ຺ປທາກຖາຍ ຈ ອາຄຕໍ ປຎ຺ຫໍ ພ຺ຍາກຕ຺ຕາ ໂຫຕິ; ອຕ຺ຕນາ ຈ ວິມຸຕ຺ຕິຎາຓທສ຺ສນສມ຺ປນ຺ໂນ ໂຫຕິ, ວິມຸຕ຺ຕິຎາຓທສ຺ສນສມ຺ປທາກຖາຍ ຈ ອາຄຕໍ ປຎ຺ຫໍ ພ຺ຍາກຕ຺ຕາ ໂຫຕິ. ອິເມຫິ ໂຂ, ອາວຸໂສ, ປຎ຺ຈຫິ ຘມ຺ເມຫິ ສມນ຺ນາຄໂຕ ຠິກ຺ຂຸ ອລໍ ສາກຈ຺ໂຉ ສພ຺ຣຫ຺ມຈາຣີນ’’ນ຺ຕິ. ຕຕິຍໍ.