໗. ສມາຘິສຸຕ຺ຕໍ

໒໗. ‘‘ສມາຘິໍ, ຠິກ຺ຂເວ, ຠາເວຖ ອປ຺ປມາຓໍ ນິປກາ ປຕິສ຺ສຕາ. ສມາຘິໍ, ຠິກ຺ຂເວ, ຠາວຍຕໍ ອປ຺ປມາຓໍ ນິປການໍ ປຕິສ຺ສຕານໍ ປຎ຺ຈ ຎາຓານິ ປຈ຺ຈຕ຺ຕຎ຺ເຎວ ອຸປ຺ປຊ຺ຊນ຺ຕິ. ກຕມານິ ປຎ຺ຈ? ‘ອຍໍ ສມາຘິ ປຈ຺ຈຸປ຺ປນ຺ນສຸໂຂ ເຈວ ອາຍຕິຎ຺ຈ ສຸຂວິປາໂກ’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ, ‘ອຍໍ ສມາຘິ ອຣິໂຍ ນິຣາມິໂສ’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ, ‘ອຍໍ ສມາຘິ ອກາປຸຣິສເສວິໂຕ’ຕິ [ມຫາປຸຣິສເສວິໂຕຕິ (ກ.)] ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ, ‘ອຍໍ ສມາຘິ ສນ຺ໂຕ ປຓີໂຕ ປຏິປ຺ປສ຺ສທ຺ຘລທ຺ໂຘ ເອໂກທິຠາວາຘິຄໂຕ, ນ ສງ຺ຂາຣນິຄ຺ຄຍ຺ຫວາຣິຕຄໂຕ’ຕິ [ນ ຈ ສສງ຺ຂາຣນິຄ຺ຄຍ຺ຫວາຣິຕປ຺ປຕິໂຕຕິ (ສີ.), ນ ຈ ສສງ຺ຂາຣນິຄ຺ຄຍ຺ຫວາຣິຕປຕ຺ໂຕຕິ (ສ຺ຍາ.), ນ ຈ ສສງ຺ຂາຣນິຄ຺ຄຍ຺ຫວາຣິວາວໂຏຕິ (ກ.), ນ ສສງ຺ຂາຣນິຄ຺ຄຍ຺ຫວາຣິຍາຘິຄໂຕຕິ (?) ທີ. ນິ. ໓.໓໕໕; ອ. ນິ. ໓.໑໐໒; ໙.໒໗] ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ, ‘ສໂຕ ໂຂ ປນາຫໍ ອິມໍ ສມາປຊ຺ຊາມິ ສໂຕ ວຸຏ຺ຐຫາມີ’ຕິ [ໂສ ໂຂ ປນາຫໍ ອິມໍ ສມາຘິໍ ສໂຕວ ສມາປຊ຺ຊາມິ, ສໂຕ ອຸຏ຺ຐຫາມີຕິ (ສີ. ສ຺ຍາ. ກໍ.)] ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ.

‘‘ສມາຘິໍ, ຠິກ຺ຂເວ, ຠາເວຖ ອປ຺ປມາຓໍ ນິປກາ ປຕິສ຺ສຕາ. ສມາຘິໍ, ຠິກ຺ຂເວ, ຠາວຍຕໍ ອປ຺ປມາຓໍ ນິປການໍ ປຕິສ຺ສຕານໍ ອິມານິ ປຎ຺ຈ ຎາຓານິ ປຈ຺ຈຕ຺ຕຎ຺ເຎວ ອຸປ຺ປຊ຺ຊນ຺ຕີ’’ຕິ. ສຕ຺ຕມໍ.