໕. ທຸຕິຍສິກ຺ຂາປທສຸຕ຺ຕໍ

໒໓໖. ‘‘ຈຕ຺ຕາຣິມານິ, ຠິກ຺ຂເວ, ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານິ. ກຕມານິ ຈຕ຺ຕາຣິ? ອຕ຺ຖິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ; ອຕ຺ຖິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ; ອຕ຺ຖິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ.

‘‘ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ? ອິຘ, ຠິກ຺ຂເວ, ເອກຈ຺ເຈນ ມາຕາ [ເອກຈ຺ໂຈ ມາຕຣໍ (ກ.)] ຊີວິຕາ ໂວໂຣປິຕາ ໂຫຕິ, ປິຕາ [ປິຕຣໍ (ກ.)] ຊີວິຕາ ໂວໂຣປິໂຕ [ໂວໂຣປິຕາ (ກ.)] ໂຫຕິ, ອຣຫໍ [ອຣຫນ຺ຕໍ (ກ.)] ຊີວິຕາ ໂວໂຣປິໂຕ [ໂວໂຣປິຕາ (ກ.)] ໂຫຕິ, ຕຖາຄຕສ຺ສ ທຸຏ຺ເຐນ ຈິຕ຺ເຕນ ໂລຫິຕໍ ອຸປ຺ປາທິຕໍ [ອຸປ຺ປາທິຕາ (ກ.)] ໂຫຕິ, ສງ຺ໂຆ ຠິນ຺ໂນ ໂຫຕິ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫໍ ກຓ຺ຫວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ? ອິຘ, ຠິກ຺ຂເວ, ເອກຈ຺ໂຈ ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ປິສຸຓາຍ ວາຈາຍ ປຏິວິຣໂຕ ໂຫຕິ, ຜຣຸສາຍ ວາຈາຍ ປຏິວິຣໂຕ ໂຫຕິ, ສມ຺ຜປ຺ປລາປາ ປຏິວິຣໂຕ ໂຫຕິ, ອນຠິຊ຺ຌາລຸ ໂຫຕິ, ອພ຺ຍາປນ຺ນຈິຕ຺ໂຕ ໂຫຕິ, ສມ຺ມາທິຏ຺ຐິ [ສມ຺ມາທິຏ຺ຐິໂກ (ສີ. ສ຺ຍາ. ກໍ.)] ໂຫຕິ. ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ສຸກ຺ກໍ ສຸກ຺ກວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ? ອິຘ, ຠິກ຺ຂເວ, ເອກຈ຺ໂຈ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂໂຣຕິ…ເປ… ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ກຓ຺ຫສຸກ຺ກໍ ກຓ຺ຫສຸກ຺ກວິປາກໍ.

‘‘ກຕມຎ຺ຈ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ? ຕຕ຺ຣ, ຠິກ຺ຂເວ, ຍມິທໍ ກມ຺ມໍ ກຓ຺ຫໍ ກຓ຺ຫວິປາກໍ…ເປ… ອິທໍ ວຸຈ຺ຈຕິ, ຠິກ຺ຂເວ, ກມ຺ມໍ ອກຓ຺ຫອສຸກ຺ກໍ ອກຓ຺ຫອສຸກ຺ກວິປາກໍ ກມ຺ມກ຺ຂຍາຍ ສໍວຕ຺ຕຕິ. ອິມານິ ໂຂ, ຠິກ຺ຂເວ, ຈຕ຺ຕາຣິ ກມ຺ມານິ ມຍາ ສຍໍ ອຠິຎ຺ຎາ ສຈ຺ຉິກຕ຺ວາ ປເວທິຕານີ’’ຕິ. ປຎ຺ຈມໍ.