໖. ອຸຠຍສຸຕ຺ຕໍ

໑໖໖. ‘‘ຈຕສ຺ໂສ ອິມາ, ຠິກ຺ຂເວ, ປຏິປທາ. ກຕມາ ຈຕສ຺ໂສ? ທຸກ຺ຂາ ປຏິປທາ ທນ຺ຘາຠິຎ຺ຎາ, ທຸກ຺ຂາ ປຏິປທາ ຂິປ຺ປາຠິຎ຺ຎາ, ສຸຂາ ປຏິປທາ ທນ຺ຘາຠິຎ຺ຎາ, ສຸຂາ ປຏິປທາ ຂິປ຺ປາຠິຎ຺ຎາ.

‘‘ຕຕ຺ຣ, ຠິກ຺ຂເວ, ຍາຍໍ ປຏິປທາ ທຸກ຺ຂາ ທນ຺ຘາຠິຎ຺ຎາ, ອຍໍ, ຠິກ຺ຂເວ, ປຏິປທາ ອຸຠເຍເນວ ຫີນາ ອກ຺ຂາຍຕິ. ຍມ຺ປາຍໍ ປຏິປທາ ທຸກ຺ຂາ, ອິມິນາປາຍໍ ຫີນາ ອກ຺ຂາຍຕິ; ຍມ຺ປາຍໍ ປຏິປທາ ທນ຺ຘາ, ອິມິນາປາຍໍ ຫີນາ ອກ຺ຂາຍຕິ. ອຍໍ, ຠິກ຺ຂເວ, ປຏິປທາ ອຸຠເຍເນວ ຫີນາ ອກ຺ຂາຍຕິ.

‘‘ຕຕ຺ຣ, ຠິກ຺ຂເວ, ຍາຍໍ ປຏິປທາ ທຸກ຺ຂາ ຂິປ຺ປາຠິຎ຺ຎາ, ອຍໍ, ຠິກ຺ຂເວ, ປຏິປທາ ທຸກ຺ຂຕ຺ຕາ ຫີນາ ອກ຺ຂາຍຕິ.

‘‘ຕຕ຺ຣ, ຠິກ຺ຂເວ, ຍາຍໍ ປຏິປທາ ສຸຂາ ທນ຺ຘາຠິຎ຺ຎາ, ອຍໍ, ຠິກ຺ຂເວ, ປຏິປທາ ທນ຺ຘຕ຺ຕາ ຫີນາ ອກ຺ຂາຍຕິ.

‘‘ຕຕ຺ຣ, ຠິກ຺ຂເວ, ຍາຍໍ ປຏິປທາ ສຸຂາ ຂິປ຺ປາຠິຎ຺ຎາ, ອຍໍ, ຠິກ຺ຂເວ, ປຏິປທາ ອຸຠເຍເນວ ປຓີຕາ ອກ຺ຂາຍຕິ. ຍມ຺ປາຍໍ ປຏິປທາ ສຸຂາ, ອິມິນາປາຍໍ ປຓີຕາ ອກ຺ຂາຍຕິ; ຍມ຺ປາຍໍ ປຏິປທາ ຂິປ຺ປາ, ອິມິນາປາຍໍ ປຓີຕາ ອກ຺ຂາຍຕິ. ອຍໍ, ຠິກ຺ຂເວ, ປຏິປທາ ອຸຠເຍເນວ ປຓີຕາ ອກ຺ຂາຍຕິ. ອິມາ ໂຂ, ຠິກ຺ຂເວ, ຈຕສ຺ໂສ ປຏິປທາ’’ຕິ. ຉຏ຺ຐໍ.