໒. ປປຕິຕສຸຕ຺ຕໍ

໒. ‘‘ຈຕູຫິ, ຠິກ຺ຂເວ, ຘມ຺ເມຫິ ອສມນ຺ນາຄໂຕ ‘ອິມສ຺ມາ ຘມ຺ມວິນຍາ ປປຕິໂຕ’ຕິ ວຸຈ຺ຈຕິ. ກຕເມຫິ ຈຕູຫິ? ອຣິເຍນ, ຠິກ຺ຂເວ, ສີເລນ ອສມນ຺ນາຄໂຕ ‘ອິມສ຺ມາ ຘມ຺ມວິນຍາ ປປຕິໂຕ’ຕິ ວຸຈ຺ຈຕິ. ອຣິເຍນ, ຠິກ຺ຂເວ, ສມາຘິນາ ອສມນ຺ນາຄໂຕ ‘ອິມສ຺ມາ ຘມ຺ມວິນຍາ ປປຕິໂຕ’ຕິ ວຸຈ຺ຈຕິ. ອຣິຍາຍ, ຠິກ຺ຂເວ, ປຎ຺ຎາຍ ອສມນ຺ນາຄໂຕ ‘ອິມສ຺ມາ ຘມ຺ມວິນຍາ ປປຕິໂຕ’ຕິ ວຸຈ຺ຈຕິ. ອຣິຍາຍ, ຠິກ຺ຂເວ, ວິມຸຕ຺ຕິຍາ ອສມນ຺ນາຄໂຕ ‘ອິມສ຺ມາ ຘມ຺ມວິນຍາ ປປຕິໂຕ’ຕິ ວຸຈ຺ຈຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ອສມນ຺ນາຄໂຕ ‘ອິມສ຺ມາ ຘມ຺ມວິນຍາ ປປຕິໂຕ’ຕິ ວຸຈ຺ຈຕິ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ‘ອິມສ຺ມາ ຘມ຺ມວິນຍາ ອປປຕິໂຕ’ຕິ [ອປ຺ປປຕິໂຕຕິ (ກ.)] ວຸຈ຺ຈຕິ. ກຕເມຫິ ຈຕູຫິ? ອຣິເຍນ, ຠິກ຺ຂເວ, ສີເລນ ສມນ຺ນາຄໂຕ ‘ອິມສ຺ມາ ຘມ຺ມວິນຍາ ອປປຕິໂຕ’ຕິ ວຸຈ຺ຈຕິ. ອຣິເຍນ, ຠິກ຺ຂເວ, ສມາຘິນາ ສມນ຺ນາຄໂຕ ‘ອິມສ຺ມາ ຘມ຺ມວິນຍາ ອປປຕິໂຕ’ຕິ ວຸຈ຺ຈຕິ. ອຣິຍາຍ, ຠິກ຺ຂເວ, ປຎ຺ຎາຍ ສມນ຺ນາຄໂຕ ‘ອິມສ຺ມາ ຘມ຺ມວິນຍາ ອປປຕິໂຕ’ຕິ ວຸຈ຺ຈຕິ. ອຣິຍາຍ, ຠິກ຺ຂເວ, ວິມຸຕ຺ຕິຍາ ສມນ຺ນາຄໂຕ ‘ອິມສ຺ມາ ຘມ຺ມວິນຍາ ອປປຕິໂຕ’ຕິ ວຸຈ຺ຈຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ‘ອິມສ຺ມາ ຘມ຺ມວິນຍາ ອປປຕິໂຕ’ຕິ ວຸຈ຺ຈຕີ’’ຕິ.

‘‘ຈຸຕາ ປຕນ຺ຕິ ປຕິຕາ, ຄິທ຺ຘາ ຈ ປຸນຣາຄຕາ;

ກຕໍ ກິຈ຺ຈໍ ຣຕໍ ຣມ຺ມໍ, ສຸເຂນານ຺ວາຄຕໍ ສຸຂ’’ນ຺ຕິ. ທຸຕິຍໍ;