໒. ປຐມອສ຺ສາທສຸຕ຺ຕໍ

໑໐໕. ‘‘ໂລກສ຺ສາຫໍ, ຠິກ຺ຂເວ, ອສ຺ສາທປຣິເຍສນໍ ອຈຣິໍ. ໂຍ ໂລເກ ອສ຺ສາໂທ ຕທຊ຺ຌຄມໍ. ຍາວຕໂກ ໂລເກ ອສ຺ສາໂທ, ປຎ຺ຎາຍ ເມ ໂສ ສຸທິຏ຺ໂຐ. ໂລກສ຺ສາຫໍ, ຠິກ຺ຂເວ, ອາທີນວປຣິເຍສນໍ ອຈຣິໍ. ໂຍ ໂລເກ ອາທີນໂວ ຕທຊ຺ຌຄມໍ. ຍາວຕໂກ ໂລເກ ອາທີນໂວ, ປຎ຺ຎາຍ ເມ ໂສ ສຸທິຏ຺ໂຐ. ໂລກສ຺ສາຫໍ, ຠິກ຺ຂເວ, ນິສ຺ສຣຓປຣິເຍສນໍ ອຈຣິໍ. ຍໍ ໂລເກ ນິສ຺ສຣຓໍ ຕທຊ຺ຌຄມໍ. ຍາວຕກໍ ໂລເກ ນິສ຺ສຣຓໍ, ປຎ຺ຎາຍ ເມ ຕໍ ສຸທິຏ຺ຐໍ. ຍາວກີວຎ຺ຈາຫໍ, ຠິກ຺ຂເວ, ໂລກສ຺ສ ອສ຺ສາທຎ຺ຈ ອສ຺ສາທໂຕ ອາທີນວຎ຺ຈ ອາທີນວໂຕ ນິສ຺ສຣຓຎ຺ຈ ນິສ຺ສຣຓໂຕ ຍຖາຠູຕໍ ນາພ຺ຠຎ຺ຎາສິໍ, ເນວ ຕາວາຫໍ, ຠິກ຺ຂເວ, ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ‘ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’ຕິ ປຈ຺ຈຎ຺ຎາສິໍ. ຍໂຕ ຈ ຂ຺ວາຫໍ, ຠິກ຺ຂເວ, ໂລກສ຺ສ ອສ຺ສາທຎ຺ຈ ອສ຺ສາທໂຕ ອາທີນວຎ຺ຈ ອາທີນວໂຕ ນິສ຺ສຣຓຎ຺ຈ ນິສ຺ສຣຓໂຕ ຍຖາຠູຕໍ ອພ຺ຠຎ຺ຎາສິໍ, ອຖາຫໍ, ຠິກ຺ຂເວ, ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ‘ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’ຕິ ປຈ຺ຈຎ຺ຎາສິໍ. ຎາຓຎ຺ຈ ປນ ເມ ທສ຺ສນໍ ອຸທປາທິ – ‘ອກຸປ຺ປາ ເມ ວິມຸຕ຺ຕິ, ອຍມນ຺ຕິມາ ຊາຕິ, ນຕ຺ຖິ ທານິ ປຸນພ຺ຠໂວ’’’ຕິ. ທຸຕິຍໍ.