໑. ອຈ຺ຈາຍິກສຸຕ຺ຕໍ

໙໓. ‘‘ຕີຓິມານິ, ຠິກ຺ຂເວ, ກສ຺ສກສ຺ສ ຄຫປຕິສ຺ສ ອຈ຺ຈາຍິການິ ກຣຓີຍານິ. ກຕມານິ ຕີຓິ? ອິຘ, ຠິກ຺ຂເວ, ກສ຺ສໂກ ຄຫປຕິ ສີຆໍ ສີຆໍ ເຂຕ຺ຕໍ ສຸກຏ຺ຐໍ ກໂຣຕິ ສຸມຕິກຕໍ. ສີຆໍ ສີຆໍ ເຂຕ຺ຕໍ ສຸກຏ຺ຐໍ ກຣິຕ຺ວາ ສຸມຕິກຕໍ ສີຆໍ ສີຆໍ ພີຊານິ ປຕິຏ຺ຐາເປຕິ. ສີຆໍ ສີຆໍ ພີຊານິ ປຕິຏ຺ຐາເປຕ຺ວາ ສີຆໍ ສີຆໍ ອຸທກໍ ອຠິເນຕິປິ ອປເນຕິປິ. ອິມານິ ໂຂ, ຠິກ຺ຂເວ, ຕີຓິ ກສ຺ສກສ຺ສ ຄຫປຕິສ຺ສ ອຈ຺ຈາຍິການິ ກຣຓີຍານິ. ຕສ຺ສ ໂຂ ຕໍ, ຠິກ຺ຂເວ, ກສ຺ສກສ຺ສ ຄຫປຕິສ຺ສ ນຕ຺ຖິ ສາ ອິທ຺ຘິ ວາ ອານຸຠາໂວ ວາ – ‘ອຊ຺ເຊວ ເມ ຘຎ຺ຎານິ ຊາຍນ຺ຕຸ, ສ຺ເວວ ຄພ຺ຠີນິ ໂຫນ຺ຕຸ, ອຸຕ຺ຕຣສ຺ເວວ ປຈ຺ຈນ຺ຕູ’ຕິ. ອຖ ໂຂ, ຠິກ຺ຂເວ, ໂຫຕິ ໂສ ສມໂຍ ຍໍ ຕສ຺ສ ກສ຺ສກສ຺ສ ຄຫປຕິສ຺ສ ຕານິ ຘຎ຺ຎານິ ອຸຕຸປຣິຓາມີນິ ຊາຍນ຺ຕິປິ ຄພ຺ຠີນິປິ ໂຫນ຺ຕິ ປຈ຺ຈນ຺ຕິປິ.

‘‘ເອວເມວໍ ໂຂ, ຠິກ຺ຂເວ, ຕີຓິມານິ ຠິກ຺ຂຸສ຺ສ ອຈ຺ຈາຍິການິ ກຣຓີຍານິ. ກຕມານິ ຕີຓິ? ອຘິສີລສິກ຺ຂາສມາທານໍ, ອຘິຈິຕ຺ຕສິກ຺ຂາສມາທານໍ, ອຘິປຎ຺ຎາສິກ຺ຂາສມາທານໍ – ອິມານິ ໂຂ, ຠິກ຺ຂເວ, ຕີຓິ ຠິກ຺ຂຸສ຺ສ ອຈ຺ຈາຍິການິ ກຣຓີຍານິ. ຕສ຺ສ ໂຂ ຕໍ, ຠິກ຺ຂເວ, ຠິກ຺ຂຸໂນ ນຕ຺ຖິ ສາ ອິທ຺ຘິ ວາ ອນຸຠາໂວ ວາ – ‘ອຊ຺ເຊວ ເມ ອນຸປາທາຍ ອາສເວຫິ ຈິຕ຺ຕໍ ວິມຸຈ຺ຈຕຸ ສ຺ເວ ວາ ອຸຕ຺ຕຣສ຺ເວ ວາ’ຕິ. ອຖ ໂຂ, ຠິກ຺ຂເວ, ໂຫຕິ ໂສ ສມໂຍ ຍໍ ຕສ຺ສ ຠິກ຺ຂຸໂນ ອຘິສີລມ຺ປິ ສິກ຺ຂໂຕ ອຘິຈິຕ຺ຕມ຺ປິ ສິກ຺ຂໂຕ ອຘິປຎ຺ຎມ຺ປິ ສິກ຺ຂໂຕ ອນຸປາທາຍ ອາສເວຫິ ຈິຕ຺ຕໍ ວິມຸຈ຺ຈຕິ.

‘‘ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ຕິພ຺ໂພ ໂນ ຉນ຺ໂທ ຠວິສ຺ສຕິ ອຘິສີລສິກ຺ຂາສມາທາເນ, ຕິພ຺ໂພ ຉນ຺ໂທ ຠວິສ຺ສຕິ ອຘິຈິຕ຺ຕສິກ຺ຂາສມາທາເນ, ຕິພ຺ໂພ ຉນ຺ໂທ ຠວິສ຺ສຕິ ອຘິປຎ຺ຎາສິກ຺ຂາສມາທາເນ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ປຐມໍ.