໖. ປໂລກສຸຕ຺ຕໍ

໕໗. ອຖ ໂຂ ອຎ຺ຎຕໂຣ ພ຺ຣາຫ຺ມຓມຫາສາໂລ ເຍນ ຠຄວາ ເຕນຸປສງ຺ກມິ…ເປ… ເອກມນ຺ຕໍ ນິສິນ຺ໂນ ໂຂ ໂສ ພ຺ຣາຫ຺ມຓມຫາສາໂລ ຠຄວນ຺ຕໍ ເອຕທໂວຈ – ‘‘ສຸຕໍ ເມຕໍ, ໂຠ ໂຄຕມ, ປຸພ຺ພການໍ ພ຺ຣາຫ຺ມຓານໍ ວຸທ຺ຘານໍ ມຫລ຺ລການໍ ອາຈຣິຍປາຈຣິຍານໍ ຠາສມານານໍ – ‘ປຸພ຺ເພ ສຸທໍ [ປຸພ຺ພສ຺ສຸທໍ (ສີ. ສ຺ຍາ. ກໍ. ປີ.)] ອຍໍ ໂລໂກ ອວີຈິ ມຎ຺ເຎ ຜຸໂຏ ອໂຫສິ ມນຸສ຺ເສຫິ, ກຸກ຺ກຸຏສໍປາຕິກາ ຄາມນິຄມຣາຊຘານິໂຍ’ຕິ. ໂກ ນຸ ໂຂ, ໂຠ ໂຄຕມ, ເຫຕຸ ໂກ ປຈ຺ຈໂຍ ເຍເນຕຣຫິ ມນຸສ຺ສານໍ ຂໂຍ ໂຫຕິ, ຕນຸຕ຺ຕໍ ປຎ຺ຎາຍຕິ, ຄາມາປິ ອຄາມາ ໂຫນ຺ຕິ, ນິຄມາປິ ອນິຄມາ ໂຫນ຺ຕິ, ນຄຣາປິ ອນຄຣາ ໂຫນ຺ຕິ, ຊນປທາປິ ອຊນປທາ ໂຫນ຺ຕີ’’ຕິ?

‘‘ເອຕຣຫິ, ພ຺ຣາຫ຺ມຓ, ມນຸສ຺ສາ ອຘມ຺ມຣາຄຣຕ຺ຕາ ວິສມໂລຠາຠິຠູຕາ ມິຈ຺ຉາຘມ຺ມປເຣຕາ. ເຕ ອຘມ຺ມຣາຄຣຕ຺ຕາ ວິສມໂລຠາຠິຠູຕາ ມິຈ຺ຉາຘມ຺ມປເຣຕາ ຕິຓ຺ຫານິ ສຕ຺ຖານິ ຄເຫຕ຺ວາ ອຎ຺ຎມຎ຺ຎໍ [ອຎ຺ຎມຎ຺ຎສ຺ສ (ສພ຺ພຕ຺ຖ)] ຊີວິຕາ ໂວໂຣເປນ຺ຕິ, ເຕນ ພຫູ ມນຸສ຺ສາ ກາລໍ ກໂຣນ຺ຕິ. ອຍມ຺ປິ ໂຂ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ ເຍເນຕຣຫິ ມນຸສ຺ສານໍ ຂໂຍ ໂຫຕິ, ຕນຸຕ຺ຕໍ ປຎ຺ຎາຍຕິ, ຄາມາປິ ອຄາມາ ໂຫນ຺ຕິ, ນິຄມາປິ ອນິຄມາ ໂຫນ຺ຕິ, ນຄຣາປິ ອນຄຣາ ໂຫນ຺ຕິ, ຊນປທາປິ ອຊນປທາ ໂຫນ຺ຕິ.

‘‘ປຸນ ຈປຣໍ, ພ຺ຣາຫ຺ມຓ, ເອຕຣຫິ ມນຸສ຺ສາ ອຘມ຺ມຣາຄຣຕ຺ຕາ ວິສມໂລຠາຠິຠູຕາ ມິຈ຺ຉາຘມ຺ມປເຣຕາ. ເຕສໍ ອຘມ຺ມຣາຄຣຕ຺ຕານໍ ວິສມໂລຠາຠິຠູຕານໍ ມິຈ຺ຉາຘມ຺ມປເຣຕານໍ ເທໂວ ນ ສມ຺ມາຘາຣໍ ອນຸປ຺ປເວຈ຺ຉຕິ. ເຕນ ທຸພ຺ຠິກ຺ຂໍ ໂຫຕິ ທຸສ຺ສສ຺ສໍ ເສຕຏ຺ຐິກໍ ສລາກາວຸຕ຺ຕໍ. ເຕນ ພຫູ ມນຸສ຺ສາ ກາລໍ ກໂຣນ຺ຕິ. ອຍມ຺ປິ ໂຂ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ ເຍເນຕຣຫິ ມນຸສ຺ສານໍ ຂໂຍ ໂຫຕິ, ຕນຸຕ຺ຕໍ ປຎ຺ຎາຍຕິ, ຄາມາປິ ອຄາມາ ໂຫນ຺ຕິ, ນິຄມາປິ ອນິຄມາ ໂຫນ຺ຕິ, ນຄຣາປິ ອນຄຣາ ໂຫນ຺ຕິ, ຊນປທາປິ ອຊນປທາ ໂຫນ຺ຕິ.

‘‘ປຸນ ຈປຣໍ, ພ຺ຣາຫ຺ມຓ, ເອຕຣຫິ ມນຸສ຺ສາ ອຘມ຺ມຣາຄຣຕ຺ຕາ ວິສມໂລຠາຠິຠູຕາ ມິຈ຺ຉາຘມ຺ມປເຣຕາ. ເຕສໍ ອຘມ຺ມຣາຄຣຕ຺ຕານໍ ວິສມໂລຠາຠິຠູຕານໍ ມິຈ຺ຉາຘມ຺ມປເຣຕານໍ ຍກ຺ຂາ ວາເຬ ອມນຸສ຺ເສ ໂອສ຺ສຊ຺ຊນ຺ຕິ [ໂອສ຺ສຊນ຺ຕິ (ສີ.)], ເຕນ ພຫູ ມນຸສ຺ສາ ກາລໍ ກໂຣນ຺ຕິ. ອຍມ຺ປິ ໂຂ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ ເຍເນຕຣຫິ ມນຸສ຺ສານໍ ຂໂຍ ໂຫຕິ, ຕນຸຕ຺ຕໍ ປຎ຺ຎາຍຕິ, ຄາມາປິ ອຄາມາ ໂຫນ຺ຕິ, ນິຄມາປິ ອນິຄມາ ໂຫນ຺ຕິ, ນຄຣາປິ ອນຄຣາ ໂຫນ຺ຕິ, ຊນປທາປິ ອຊນປທາ ໂຫນ຺ຕີ’’ຕິ.

‘‘ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ຉຏ຺ຐໍ.