໔. ພຫຸກາຣສຸຕ຺ຕໍ

໒໔. ‘‘ຕໂຍເມ, ຠິກ຺ຂເວ, ປຸຄ຺ຄລາ ປຸຄ຺ຄລສ຺ສ ພຫຸກາຣາ. ກຕເມ ຕໂຍ? ຍໍ, ຠິກ຺ຂເວ, ປຸຄ຺ຄລໍ ອາຄມ຺ມ ປຸຄ຺ຄໂລ ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ; ອຍໍ, ຠິກ຺ຂເວ, ປຸຄ຺ຄໂລ ອິມສ຺ສ ປຸຄ຺ຄລສ຺ສ ພຫຸກາໂຣ.

‘‘ປຸນ ຈປຣໍ, ຠິກ຺ຂເວ, ຍໍ ປຸຄ຺ຄລໍ ອາຄມ຺ມ ປຸຄ຺ຄໂລ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂສມຸທໂຍ’ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂນິໂຣໂຘ’ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ; ອຍໍ, ຠິກ຺ຂເວ, ປຸຄ຺ຄໂລ ອິມສ຺ສ ປຸຄ຺ຄລສ຺ສ ພຫຸກາໂຣ.

‘‘ປຸນ ຈປຣໍ, ຠິກ຺ຂເວ, ຍໍ ປຸຄ຺ຄລໍ ອາຄມ຺ມ ປຸຄ຺ຄໂລ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ; ອຍໍ, ຠິກ຺ຂເວ, ປຸຄ຺ຄໂລ ອິມສ຺ສ ປຸຄ຺ຄລສ຺ສ ພຫຸກາໂຣ. ອິເມ ໂຂ, ຠິກ຺ຂເວ, ຕໂຍ ປຸຄ຺ຄລາ ປຸຄ຺ຄລສ຺ສ ພຫຸກາຣາ.

‘‘ອິເມຫິ ຈ ປນ, ຠິກ຺ຂເວ, ຕີຫິ ປຸຄ຺ຄເລຫິ ອິມສ຺ສ ປຸຄ຺ຄລສ຺ສ ນຕ຺ຖຎ຺ໂຎ ປຸຄ຺ຄໂລ ພຫຸກາໂຣຕິ ວທາມິ. ອິເມສໍ ປນ, ຠິກ຺ຂເວ, ຕິຓ຺ຓໍ ປຸຄ຺ຄລານໍ ອິມິນາ ປຸຄ຺ຄເລນ ນ ສຸປ຺ປຕິກາຣໍ ວທາມິ, ຍທິທໍ ອຠິວາທນປຈ຺ຈຸຏ຺ຐານອຎ຺ຊລິກມ຺ມສາມີຈິກມ຺ມຈີວຣປິຓ຺ຑປາຕເສນາສນ-ຄິລານປຈ຺ຈຍເຠສຊ຺ຊປຣິກ຺ຂາຣານຸປ຺ປທາເນນາ’’ຕິ. ຈຕຸຕ຺ຖໍ.