໒. ສາຣຓີຍສຸຕ຺ຕໍ

໑໒. ‘‘ຕີຓິມານິ, ຠິກ຺ຂເວ, ຣຎ຺ໂຎ ຂຕ຺ຕິຍສ຺ສ ມຸທ຺ຘາວສິຕ຺ຕສ຺ສ ຍາວຊີວໍ ສາຣຓີຍານິ [ສຣຓີຍານິ (ສີ. ສ຺ຍາ. ກໍ. ປີ.)] ຠວນ຺ຕິ. ກຕມານິ ຕີຓິ? ຍສ຺ມິໍ, ຠິກ຺ຂເວ, ປເທເສ ຣາຊາ ຂຕ຺ຕິໂຍ ມຸທ຺ຘາວສິຕ຺ໂຕ ຊາໂຕ ໂຫຕິ. ອິທໍ, ຠິກ຺ຂເວ, ປຐມໍ ຣຎ຺ໂຎ ຂຕ຺ຕິຍສ຺ສ ມຸທ຺ຘາວສິຕ຺ຕສ຺ສ ຍາວຊີວໍ ສາຣຓີຍໍ ໂຫຕິ.

‘‘ປຸນ ຈປຣໍ, ຠິກ຺ຂເວ, ຍສ຺ມິໍ ປເທເສ ຣາຊາ ຂຕ຺ຕິໂຍ ມຸທ຺ຘາວສິຕ຺ໂຕ ໂຫຕິ. ອິທໍ, ຠິກ຺ຂເວ, ທຸຕິຍໍ ຣຎ຺ໂຎ ຂຕ຺ຕິຍສ຺ສ ມຸທ຺ຘາວສິຕ຺ຕສ຺ສ ຍາວຊີວໍ ສາຣຓີຍໍ ໂຫຕິ.

‘‘ປຸນ ຈປຣໍ, ຠິກ຺ຂເວ, ຍສ຺ມິໍ ປເທເສ ຣາຊາ ຂຕ຺ຕິໂຍ ມຸທ຺ຘາວສິຕ຺ໂຕ ສງ຺ຄາມໍ ອຠິວິຊິນິຕ຺ວາ ວິຊິຕສງ຺ຄາໂມ ຕເມວ ສງ຺ຄາມສີສໍ ອຊ຺ຌາວສຕິ. ອິທໍ, ຠິກ຺ຂເວ, ຕຕິຍໍ ຣຎ຺ໂຎ ຂຕ຺ຕິຍສ຺ສ ມຸທ຺ຘາວສິຕ຺ຕສ຺ສ ຍາວຊີວໍ ສາຣຓີຍໍ ໂຫຕິ. ອິມານິ ໂຂ, ຠິກ຺ຂເວ, ຕີຓິ ຣຎ຺ໂຎ ຂຕ຺ຕິຍສ຺ສ ມຸທ຺ຘາວສິຕ຺ຕສ຺ສ ຍາວຊີວໍ ສາຣຓີຍານິ ຠວນ຺ຕິ.

‘‘ເອວເມວໍ ໂຂ, ຠິກ຺ຂເວ, ຕີຓິມານິ ຠິກ຺ຂຸສ຺ສ ຍາວຊີວໍ ສາຣຓີຍານິ ຠວນ຺ຕິ. ກຕມານິ ຕີຓິ? ຍສ຺ມິໍ, ຠິກ຺ຂເວ, ປເທເສ ຠິກ຺ຂຸ ເກສມສ຺ສຸໍ ໂອຫາເຣຕ຺ວາ ກາສາຍານິ ວຕ຺ຖານິ ອຈ຺ຉາເທຕ຺ວາ ອຄາຣສ຺ມາ ອນຄາຣິຍໍ ປພ຺ພຊິໂຕ ໂຫຕິ. ອິທໍ, ຠິກ຺ຂເວ, ປຐມໍ ຠິກ຺ຂຸສ຺ສ ຍາວຊີວໍ ສາຣຓີຍໍ ໂຫຕິ.

‘‘ປຸນ ຈປຣໍ, ຠິກ຺ຂເວ, ຍສ຺ມິໍ ປເທເສ ຠິກ຺ຂຸ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂສມຸທໂຍ’ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂນິໂຣໂຘ’ຕິ ຍຖາຠູຕໍ ປຊານາຕິ, ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ. ອິທໍ, ຠິກ຺ຂເວ, ທຸຕິຍໍ ຠິກ຺ຂຸສ຺ສ ຍາວຊີວໍ ສາຣຓີຍໍ ໂຫຕິ.

‘‘ປຸນ ຈປຣໍ, ຠິກ຺ຂເວ, ຍສ຺ມິໍ ປເທເສ ຠິກ຺ຂຸ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ອິທໍ, ຠິກ຺ຂເວ, ຕຕິຍໍ ຠິກ຺ຂຸສ຺ສ ຍາວຊີວໍ ສາຣຓີຍໍ ໂຫຕິ. ອິມານິ ໂຂ, ຠິກ຺ຂເວ, ຕີຓິ ຠິກ຺ຂຸສ຺ສ ຍາວຊີວໍ ສາຣຓີຍານິ ຠວນ຺ຕີ’’ຕິ. ທຸຕິຍໍ.