(໒໐) ໕. ອປຣປຸຄ຺ຄລວຄ຺ໂຄ

ນເສວິຕພ຺ພາທິສຸຕ຺ຕານິ

໑໙໙. ‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ນ ເສວິຕພ຺ໂພ. ກຕເມຫິ ທສຫິ? ປາຓາຕິປາຕີ ໂຫຕິ, ອທິນ຺ນາທາຍີ ໂຫຕິ, ກາເມສຸມິຈ຺ຉາຈາຣີ ໂຫຕິ, ມຸສາວາທີ ໂຫຕິ, ປິສຸຓວາໂຈ ໂຫຕິ, ຜຣຸສວາໂຈ ໂຫຕິ, ສມ຺ຜປ຺ປລາປີ ໂຫຕິ, ອຠິຊ຺ຌາລຸ ໂຫຕິ, ພ຺ຍາປນ຺ນຈິຕ຺ໂຕ ໂຫຕິ, ມິຈ຺ຉາທິຏ຺ຐິໂກ ໂຫຕິ – ອິເມຫິ ໂຂ, ຠິກ຺ຂເວ, ທສຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ນ ເສວິຕພ຺ໂພ.

‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ເສວິຕພ຺ໂພ. ກຕເມຫິ ທສຫິ? ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ປິສຸຓາຍ ວາຈາຍ ປຏິວິຣໂຕ ໂຫຕິ, ຜຣຸສາຍ ວາຈາຍ ປຏິວິຣໂຕ ໂຫຕິ, ສມ຺ຜປ຺ປລາປາ ປຏິວິຣໂຕ ໂຫຕິ, ອນຠິຊ຺ຌາລຸ ໂຫຕິ, ອພ຺ຍາປນ຺ນຈິຕ຺ໂຕ ໂຫຕິ, ສມ຺ມາທິຏ຺ຐິໂກ ໂຫຕິ – ອິເມຫິ ໂຂ, ຠິກ຺ຂເວ, ທສຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ເສວິຕພ຺ໂພ’’.

໒໐໐-໒໐໙. ‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ນ ຠຊິຕພ຺ໂພ…ເປ… ຠຊິຕພ຺ໂພ… ນ ປຍິຣຸປາສິຕພ຺ໂພ… ປຍິຣຸປາສິຕພ຺ໂພ… ນ ປຸຊ຺ໂຊ ໂຫຕິ… ປຸຊ຺ໂຊ ໂຫຕິ… ນ ປາສໍໂສ ໂຫຕິ… ປາສໍໂສ ໂຫຕິ… ອຄາຣໂວ ໂຫຕິ… ຄາຣໂວ ໂຫຕິ… ອປ຺ປຕິສ຺ໂສ ໂຫຕິ… ສປ຺ປຕິສ຺ໂສ ໂຫຕິ… ນ ອາຣາຘໂກ ໂຫຕິ… ອາຣາຘໂກ ໂຫຕິ… ນ ວິສຸຊ຺ຌຕິ… ວິສຸຊ຺ຌຕິ… ມານໍ ນາຘິໂຠຕິ [ນາຠິໂຠຕິ (ສີ.) ອ. ນິ. ໑໐.໑໕໖-໑໖໖] … ມານໍ ອຘິໂຠຕິ… ປຎ຺ຎາຍ ນ ວຑ຺ຒຕິ… ປຎ຺ຎາຍ ວຑ຺ຒຕິ…ເປ….

໒໑໐. ‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ພຫຸໍ ອປຸຎ຺ຎໍ ປສວຕິ… ພຫຸໍ ປຸຎ຺ຎໍ ປສວຕິ. ກຕເມຫິ ທສຫິ? ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ປິສຸຓາຍ ວາຈາຍ ປຏິວິຣໂຕ ໂຫຕິ, ຜຣຸສາຍ ວາຈາຍ ປຏິວິຣໂຕ ໂຫຕິ, ສມ຺ຜປ຺ປລາປາ ປຏິວິຣໂຕ ໂຫຕິ, ອນຠິຊ຺ຌາລຸ ໂຫຕິ, ອພ຺ຍາປນ຺ນຈິຕ຺ໂຕ ໂຫຕິ, ສມ຺ມາທິຏ຺ຐິໂກ ໂຫຕິ – ອິເມຫິ ໂຂ, ຠິກ຺ຂເວ, ທສຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ພຫຸໍ ປຸຎ຺ຎໍ ປສວຕີ’’ຕິ.

ອປຣປຸຄ຺ຄລວຄ຺ໂຄ ປຎ຺ຈໂມ.