(໑໖) ໑. ປຸຄ຺ຄລວຄ຺ໂຄ

໑. ເສວິຕພ຺ພສຸຕ຺ຕໍ

໑໕໕. ‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ນ ເສວິຕພ຺ໂພ. ກຕເມຫິ ທສຫິ? ມິຈ຺ຉາທິຏ຺ຐິໂກ ໂຫຕິ, ມິຈ຺ຉາສງ຺ກປ຺ໂປ ໂຫຕິ, ມິຈ຺ຉາວາໂຈ ໂຫຕິ, ມິຈ຺ຉາກມ຺ມນ຺ໂຕ ໂຫຕິ, ມິຈ຺ຉາອາຊີໂວ ໂຫຕິ, ມິຈ຺ຉາວາຍາໂມ ໂຫຕິ, ມິຈ຺ຉາສຕິ ໂຫຕິ, ມິຈ຺ຉາສມາຘິ ໂຫຕິ, ມິຈ຺ຉາຎາຓີ ໂຫຕິ, ມິຈ຺ຉາວິມຸຕ຺ຕິ ໂຫຕິ – ອິເມຫິ ໂຂ, ຠິກ຺ຂເວ, ທສຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ນ ເສວິຕພ຺ໂພ.

‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ເສວິຕພ຺ໂພ. ກຕເມຫິ ທສຫິ? ສມ຺ມາທິຏ຺ຐິໂກ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາໂຈ ໂຫຕິ, ສມ຺ມາກມ຺ມນ຺ໂຕ ໂຫຕິ, ສມ຺ມາອາຊີໂວ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສມ຺ມາຎາຓີ ໂຫຕິ, ສມ຺ມາວິມຸຕ຺ຕິ ໂຫຕິ – ອິເມຫິ ໂຂ, ຠິກ຺ຂເວ, ທສຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ເສວິຕພ຺ໂພ’’ຕິ.

໒-໑໒. ຠຊິຕພ຺ພາທິສຸຕ຺ຕານິ

໑໕໖-໑໖໖. ‘‘ທສຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ປຸຄ຺ຄໂລ ນ ຠຊິຕພ຺ໂພ…ເປ… ຠຊິຕພ຺ໂພ…ເປ… ນ ປຍິຣຸປາສິຕພ຺ໂພ… ປຍິຣຸປາສິຕພ຺ໂພ…ເປ… ນ ປຸຊ຺ໂຊ ໂຫຕິ… ປຸຊ຺ໂຊ ໂຫຕິ…ເປ… ນ ປາສໍໂສ ໂຫຕິ… ປາສໍໂສ ໂຫຕິ…ເປ… ອຄາຣໂວ ໂຫຕິ… ສຄາຣໂວ ໂຫຕິ…ເປ… ອປ຺ປຕິສ຺ໂສ ໂຫຕິ… ສປ຺ປຕິສ຺ໂສ ໂຫຕິ…ເປ… ນ ອາຣາຘໂກ ໂຫຕິ … ອາຣາຘໂກ ໂຫຕິ…ເປ… ນ ວິສຸຊ຺ຌຕິ… ວິສຸຊ຺ຌຕິ…ເປ… ມານໍ ນາຘິໂຠຕິ… ມານໍ ອຘິໂຠຕິ…ເປ. … ປຎ຺ຎາຍ ນ ວຑ຺ຒຕິ… ປຎ຺ຎາຍ ວຑ຺ຒຕິ…ເປ….

‘‘ພຫຸໍ ອປຸຎ຺ຎໍ ປສວຕິ… ພຫຸໍ ປຸຎ຺ຎໍ ປສວຕິ. ກຕເມຫິ ທສຫິ? ສມ຺ມາທິຏ຺ຐິໂກ ໂຫຕິ, ສມ຺ມາສງ຺ກປ຺ໂປ ໂຫຕິ, ສມ຺ມາວາໂຈ ໂຫຕິ, ສມ຺ມາກມ຺ມນ຺ໂຕ ໂຫຕິ, ສມ຺ມາອາຊີໂວ ໂຫຕິ, ສມ຺ມາວາຍາໂມ ໂຫຕິ, ສມ຺ມາສຕິ ໂຫຕິ, ສມ຺ມາສມາຘິ ໂຫຕິ, ສມ຺ມາຎາຓີ ໂຫຕິ, ສມ຺ມາວິມຸຕ຺ຕິ ໂຫຕິ – ອິເມຫິ ໂຂ, ຠິກ຺ຂເວ, ທສຫິ ຘມ຺ເມຫິ ສມນ຺ນາຄໂຕ ປຸຄ຺ຄໂລ ພຫຸໍ ປຸຎ຺ຎໍ ປສວຕີ’’ຕິ.

ປຸຄ຺ຄລວຄ຺ໂຄ ປຐໂມ.