໕. ອຸຕ຺ຕິຍສຸຕ຺ຕໍ

໙໕. ອຖ ໂຂ ອຸຕ຺ຕິໂຍ ປຣິພ຺ພາຊໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອຸຕ຺ຕິໂຍ ປຣິພ຺ພາຊໂກ ຠຄວນ຺ຕໍ ເອຕທໂວຈ – ‘‘ກິໍ ນຸ ໂຂ, ໂຠ ໂຄຕມ, ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ? ‘‘ອພ຺ຍາກຕໍ ໂຂ ເອຕໍ, ອຸຕ຺ຕິຍ, ມຍາ – ‘ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’’ນ຺ຕິ.

‘‘ກິໍ ປນ, ໂຠ ໂຄຕມ, ອສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ? ‘‘ເອຕມ຺ປິ ໂຂ, ອຸຕ຺ຕິຍ, ອພ຺ຍາກຕໍ ມຍາ – ‘ອສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’’’ນ຺ຕິ.

‘‘ກິໍ ນຸ ໂຂ, ໂຠ ໂຄຕມ, ອນ຺ຕວາ ໂລໂກ…ເປ… ອນນ຺ຕວາ ໂລໂກ… ຕໍ ຊີວໍ ຕໍ ສຣີຣໍ… ອຎ຺ຎໍ ຊີວໍ ອຎ຺ຎໍ ສຣີຣໍ… ໂຫຕິ ຕຖາຄໂຕ ປຣໍ ມຣຓາ … ນ ໂຫຕິ ຕຖາຄໂຕ ປຣໍ ມຣຓາ… ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’ນ຺ຕິ? ‘‘ເອຕມ຺ປິ ໂຂ, ອຸຕ຺ຕິຍ, ອພ຺ຍາກຕໍ ມຍາ – ‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’’’ນ຺ຕິ.

‘‘‘ກິໍ ນຸ ໂຂ, ໂຠ ໂຄຕມ, ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’ນ຺ຕິ, ອິຕິ ປຸຏ຺ໂຐ ສມາໂນ ‘ອພ຺ຍາກຕໍ ໂຂ ເອຕໍ, ອຸຕ຺ຕິຍ, ມຍາ – ສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’ນ຺ຕິ ວເທສິ.

‘‘‘ກິໍ ປນ, ໂຠ ໂຄຕມ, ອສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’ນ຺ຕິ, ອິຕິ ປຸຏ຺ໂຐ ສມາໂນ – ‘ເອຕມ຺ປິ ໂຂ, ອຸຕ຺ຕິຍ, ອພ຺ຍາກຕໍ ມຍາ ອສສ຺ສໂຕ ໂລໂກ, ອິທເມວ ສຈ຺ຈໍ ໂມຆມຎ຺ຎ’ນ຺ຕິ ວເທສິ.

‘‘‘ກິໍ ນຸ ໂຂ, ໂຠ ໂຄຕມ, ອນ຺ຕວາ ໂລໂກ…ເປ… ອນນ຺ຕວາ ໂລໂກ… ຕໍ ຊີວໍ ຕໍ ສຣີຣໍ… ອຎ຺ຎໍ ຊີວໍ ອຎ຺ຎໍ ສຣີຣໍ… ໂຫຕິ ຕຖາຄໂຕ ປຣໍ ມຣຓາ… ນ ໂຫຕິ ຕຖາຄໂຕ ປຣໍ ມຣຓາ… ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎນ຺ຕິ, ອິຕິ ປຸຏ຺ໂຐ ສມາໂນ – ‘ເອຕມ຺ປິ ໂຂ, ອຸຕ຺ຕິຍ, ອພ຺ຍາກຕໍ ມຍາ – ‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ອິທເມວ ສຈ຺ຈໍ ໂມຆມຎ຺ຎ’ນ຺ຕິ ວເທສິ. ອຖ ກິຎ຺ຈຣຫິ ໂຠຕາ ໂຄຕເມນ ພ຺ຍາກຕ’’ນ຺ຕິ?

‘‘ອຠິຎ຺ຎາຍ ໂຂ ອຫໍ, ອຸຕ຺ຕິຍ, ສາວການໍ ຘມ຺ມໍ ເທເສມິ ສຕ຺ຕານໍ ວິສຸທ຺ຘິຍາ ໂສກປຣິເທວານໍ ສມຕິກ຺ກມາຍ ທຸກ຺ຂໂທມນສ຺ສານໍ ອຕ຺ຖງ຺ຄມາຍ ຎາຍສ຺ສ ອຘິຄມາຍ ນິພ຺ພານສ຺ສ ສຈ຺ຉິກິຣິຍາຍາ’’ຕິ.

‘‘ຍໍ ປເນຕໍ ຠວໍ ໂຄຕໂມ ອຠິຎ຺ຎາຍ ສາວການໍ ຘມ຺ມໍ ເທເສສິ ສຕ຺ຕານໍ ວິສຸທ຺ຘິຍາ ໂສກປຣິເທວານໍ ສມຕິກ຺ກມາຍ ທຸກ຺ຂໂທມນສ຺ສານໍ ອຕ຺ຖງ຺ຄມາຍ ຎາຍສ຺ສ ອຘິຄມາຍ ນິພ຺ພານສ຺ສ ສຈ຺ຉິກິຣິຍາຍ, ສພ຺ໂພ ວາ [ສພ຺ໂພ ຈ (ກ.)] ເຕນ ໂລໂກ ນີຍຕິ [ນີຍິສ຺ສຕິ (ສີ.), ນິຍ຺ຍາສ຺ສຕິ (ສ຺ຍາ.), ນິຍ຺ຍໍສ຺ສຕິ (ປີ.)] ອຸປຑ຺ໂຒ ວາ ຕິຠາໂຄ ວາ’’ຕິ [ຕິຠາໂຄ ວາຕິ ປເທຫິ (ກ.)]? ເອວໍ ວຸຕ຺ເຕ ຠຄວາ ຕຸຓ຺ຫີ ອໂຫສິ.

ອຖ ໂຂ ອາຍສ຺ມໂຕ ອານນ຺ທສ຺ສ ເອຕທໂຫສິ – ‘‘ມາ ເຫວໍ ໂຂ ອຸຕ຺ຕິໂຍ ປຣິພ຺ພາຊໂກ ປາປກໍ ທິຏ຺ຐິຄຕໍ ປຏິລຠິ – ‘ສພ຺ພສາມຸກ຺ກໍສິກໍ ວຕ ເມ ສມໂຓ ໂຄຕໂມ ປຎ຺ຫໍ ປຸຏ຺ໂຐ ສໍສາເທຕິ, ໂນ ວິສ຺ສຊ຺ເຊຕິ, ນ ນູນ ວິສຫຕີ’ຕິ. ຕທສ຺ສ ອຸຕ຺ຕິຍສ຺ສ ປຣິພ຺ພາຊກສ຺ສ ທີຆຣຕ຺ຕໍ ອຫິຕາຍ ທຸກ຺ຂາຍາ’’ຕິ.

ອຖ ໂຂ ອາຍສ຺ມາ ອານນ຺ໂທ ອຸຕ຺ຕິຍໍ ປຣິພ຺ພາຊກໍ ເອຕທໂວຈ – ‘‘ເຕນຫາວຸໂສ ອຸຕ຺ຕິຍ, ອຸປມໍ ເຕ ກຣິສ຺ສາມິ. ອຸປມາຍ ມິເຘກຈ຺ເຈ ວິຎ຺ຎູ ປຸຣິສາ ຠາສິຕສ຺ສ ອຕ຺ຖໍ ອາຊານນ຺ຕິ. ເສຍ຺ຍຖາປິ, ອາວຸໂສ ອຸຕ຺ຕິຍ, ຣຎ຺ໂຎ ປຈ຺ຈນ຺ຕິມໍ ນຄຣໍ ທຬ຺ຫຸທ຺ຘາປໍ [ທຬ຺ຫຸທ຺ທາປໍ (ສີ. ປີ.)] ທຬ຺ຫປາກາຣໂຕຣຓໍ ເອກທ຺ວາຣໍ. ຕຕ຺ຣສ຺ສ ໂທວາຣິໂກ ປຓ຺ຑິໂຕ ພ຺ຍຕ຺ໂຕ ເມຘາວີ ອຎ຺ຎາຕານໍ ນິວາເຣຕາ ຎາຕານໍ ປເວເສຕາ. ໂສ ຕສ຺ສ ນຄຣສ຺ສ ສມນ຺ຕາ ອນຸປຣິຍາຍປຖໍ ອນຸກ຺ກມຕິ. ອນຸປຣິຍາຍປຖໍ ອນຸກ຺ກມມາໂນ ນ ປສ຺ເສຍ຺ຍ ປາກາຣສນ຺ຘິໍ ວາ ປາກາຣວິວຣໍ ວາ, ອນ຺ຕມໂສ ພິຬາຣນິກ຺ຂມນມຕ຺ຕມ຺ປິ. ໂນ ຈ ຂ຺ວສ຺ສ ເອວໍ ຎາຓໍ ໂຫຕິ – ‘ເອຕ຺ຕກາ ປາຓາ ອິມໍ ນຄຣໍ ປວິສນ຺ຕິ ວາ ນິກ຺ຂມນ຺ຕິ ວາ’ຕິ. ອຖ ຂ຺ວສ຺ສ ເອວເມຕ຺ຖ ໂຫຕິ – ‘ເຍ ໂຂ ເກຈິ ໂອຬາຣິກາ ປາຓາ ອິມໍ ນຄຣໍ ປວິສນ຺ຕິ ວາ ນິກ຺ຂມນ຺ຕິ ວາ, ສພ຺ເພ ເຕ ອິມິນາ ທ຺ວາເຣນ ປວິສນ຺ຕິ ວາ ນິກ຺ຂມນ຺ຕິ ວາ’ຕິ.

‘‘ເອວເມວໍ ໂຂ, ອາວຸໂສ ອຸຕ຺ຕິຍ, ນ ຕຖາຄຕສ຺ສ ເອວໍ ອຸສ຺ສຸກ຺ກໍ ໂຫຕິ – ‘ສພ຺ໂພ ວາ ເຕນ ໂລໂກ ນີຍຕິ, ອຸປຑ຺ໂຒ ວາ, ຕິຠາໂຄ ວາ’ຕິ. ອຖ ໂຂ ເອວເມຕ຺ຖ ຕຖາຄຕສ຺ສ ໂຫຕິ – ‘ເຍ ໂຂ ເກຈິ ໂລກມ຺ຫາ ນີຍິໍສຸ ວາ ນີຍນ຺ຕິ ວາ ນີຍິສ຺ສນ຺ຕິ ວາ, ສພ຺ເພ ເຕ ປຎ຺ຈ ນີວຣເຓ ປຫາຍ ເຈຕໂສ ອຸປກ຺ກິເລເສ ປຎ຺ຎາຍ ທຸພ຺ພລີກຣເຓ, ຈຕູສຸ ສຕິປຏ຺ຐາເນສຸ ສຸປ຺ປຕິຏ຺ຐິຕຈິຕ຺ຕາ, ສຕ຺ຕ ໂພຊ຺ຌງ຺ເຄ ຍຖາຠູຕໍ ຠາເວຕ຺ວາ. ເອວເມເຕ [ເອວເມເຕນ (ກ.)] ໂລກມ຺ຫາ ນີຍິໍສຸ ວາ ນີຍນ຺ຕິ ວາ ນີຍິສ຺ສນ຺ຕິ ວາ’ຕິ. ຍເທວ ໂຂ ຕ຺ວໍ [ຍເທວ ຂ຺ເວຕ຺ຖ (ກ.)], ອາວຸໂສ ອຸຕ຺ຕິຍ, ຠຄວນ຺ຕໍ ປຎ຺ຫໍ [ອິມໍ ປຎ຺ຫໍ (ສ຺ຍາ. ກ.)] ອປຸຈ຺ຉິ ຕເທເວຕໍ ປຎ຺ຫໍ ຠຄວນ຺ຕໍ ອຎ຺ເຎນ ປຣິຍາເຍນ ອປຸຈ຺ຉິ. ຕສ຺ມາ ເຕ ຕໍ ຠຄວາ ນ ພ຺ຍາກາສີ’’ຕິ. ປຎ຺ຈມໍ.