໖. ຕໂຍຘມ຺ມສຸຕ຺ຕໍ

໗໖. ‘‘ຕໂຍເມ, ຠິກ຺ຂເວ, ຘມ຺ມາ ໂລເກ ນ ສໍວິຊ຺ເຊຍ຺ຍຸໍ, ນ ຕຖາຄໂຕ ໂລເກ ອຸປ຺ປຊ຺ເຊຍ຺ຍ ອຣຫໍ ສມ຺ມາສມ຺ພຸທ຺ໂຘ, ນ ຕຖາຄຕປ຺ປເວທິໂຕ ຘມ຺ມວິນໂຍ ໂລເກ ທິພ຺ເພຍ຺ຍ. ກຕເມ ຕໂຍ? ຊາຕິ ຈ, ຊຣາ ຈ, ມຣຓຎ຺ຈ – ອິເມ ໂຂ, ຠິກ຺ຂເວ, ຕໂຍ ຘມ຺ມາ ໂລເກ ນ ສໍວິຊ຺ເຊຍ຺ຍຸໍ, ນ ຕຖາຄໂຕ ໂລເກ ອຸປ຺ປຊ຺ເຊຍ຺ຍ ອຣຫໍ ສມ຺ມາສມ຺ພຸທ຺ໂຘ, ນ ຕຖາຄຕປ຺ປເວທິໂຕ ຘມ຺ມວິນໂຍ ໂລເກ ທິພ຺ເພຍ຺ຍ. ຍສ຺ມາ ຈ ໂຂ, ຠິກ຺ຂເວ, ອິເມ ຕໂຍ ຘມ຺ມາ ໂລເກ ສໍວິຊ຺ຊນ຺ຕິ ຕສ຺ມາ ຕຖາຄໂຕ ໂລເກ ອຸປ຺ປຊ຺ຊຕິ ອຣຫໍ ສມ຺ມາສມ຺ພຸທ຺ໂຘ, ຕສ຺ມາ ຕຖາຄຕປ຺ປເວທິໂຕ ຘມ຺ມວິນໂຍ ໂລເກ ທິພ຺ພຕິ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ຊາຕິໍ ປຫາຕຸໍ ຊຣໍ ປຫາຕຸໍ ມຣຓໍ ປຫາຕຸໍ. ກຕເມ ຕໂຍ? ຣາຄໍ ອປ຺ປຫາຍ, ໂທສໍ ອປ຺ປຫາຍ, ໂມຫໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ຊາຕິໍ ປຫາຕຸໍ ຊຣໍ ປຫາຕຸໍ ມຣຓໍ ປຫາຕຸໍ.

‘‘ຕໂຍເມ ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ຣາຄໍ ປຫາຕຸໍ ໂທສໍ ປຫາຕຸໍ ໂມຫໍ ປຫາຕຸໍ. ກຕເມ ຕໂຍ? ສກ຺ກາຍທິຏ຺ຐິໍ ອປ຺ປຫາຍ, ວິຈິກິຈ຺ຉໍ ອປ຺ປຫາຍ, ສີລພ຺ພຕປຣາມາສໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ຣາຄໍ ປຫາຕຸໍ ໂທສໍ ປຫາຕຸໍ ໂມຫໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ສກ຺ກາຍທິຏ຺ຐິໍ ປຫາຕຸໍ ວິຈິກິຈ຺ຉໍ ປຫາຕຸໍ ສີລພ຺ພຕປຣາມາສໍ ປຫາຕຸໍ. ກຕເມ ຕໂຍ? ອໂຍນິໂສມນສິກາຣໍ ອປ຺ປຫາຍ, ກຸມ຺ມຄ຺ຄເສວນໍ ອປ຺ປຫາຍ, ເຈຕໂສ ລີນຕ຺ຕໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ສກ຺ກາຍທິຏ຺ຐິໍ ປຫາຕຸໍ ວິຈິກິຈ຺ຉໍ ປຫາຕຸໍ ສີລພ຺ພຕປຣາມາສໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອໂຍນິໂສ ມນສິກາຣໍ ປຫາຕຸໍ ກຸມ຺ມຄ຺ຄເສວນໍ ປຫາຕຸໍ ເຈຕໂສ ລີນຕ຺ຕໍ ປຫາຕຸໍ. ກຕເມ ຕໂຍ? ມຸຏ຺ຐສຈ຺ຈໍ ອປ຺ປຫາຍ, ອສມ຺ປຊຎ຺ຎໍ ອປ຺ປຫາຍ, ເຈຕໂສ ວິກ຺ເຂປໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ອໂຍນິໂສມນສິກາຣໍ ປຫາຕຸໍ ກຸມ຺ມຄ຺ຄເສວນໍ ປຫາຕຸໍ ເຈຕໂສ ລີນຕ຺ຕໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ມຸຏ຺ຐສຈ຺ຈໍ ປຫາຕຸໍ ອສມ຺ປຊຎ຺ຎໍ ປຫາຕຸໍ ເຈຕໂສ ວິກ຺ເຂປໍ ປຫາຕຸໍ. ກຕເມ ຕໂຍ? ອຣິຍານໍ ອທສ຺ສນກມ຺ຍຕໍ ອປ຺ປຫາຍ, ອຣິຍຘມ຺ມສ຺ສ [ອຣິຍຘມ຺ມໍ (ສ຺ຍາ.)] ອໂສຕຸກມ຺ຍຕໍ ອປ຺ປຫາຍ, ອຸປາຣມ຺ຠຈິຕ຺ຕຕໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ມຸຏ຺ຐສຈ຺ຈໍ ປຫາຕຸໍ ອສມ຺ປຊຎ຺ຎໍ ປຫາຕຸໍ ເຈຕໂສ ວິກ຺ເຂປໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອຣິຍານໍ ອທສ຺ສນກມ຺ຍຕໍ ປຫາຕຸໍ ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຕຸໍ ອຸປາຣມ຺ຠຈິຕ຺ຕຕໍ ປຫາຕຸໍ. ກຕເມ ຕໂຍ? ອຸທ຺ຘຈ຺ຈໍ ອປ຺ປຫາຍ, ອສໍວຣໍ ອປ຺ປຫາຍ, ທຸສ຺ສີລ຺ຍໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ອຣິຍານໍ ອທສ຺ສນກມ຺ຍຕໍ ປຫາຕຸໍ ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຕຸໍ ອຸປາຣມ຺ຠຈິຕ຺ຕຕໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອຸທ຺ຘຈ຺ຈໍ ປຫາຕຸໍ ອສໍວຣໍ ປຫາຕຸໍ ທຸສ຺ສີລ຺ຍໍ ປຫາຕຸໍ. ກຕເມ ຕໂຍ? ອສ຺ສທ຺ຘິຍໍ ອປ຺ປຫາຍ, ອວທຎ຺ຎຸຕໍ ອປ຺ປຫາຍ, ໂກສຊ຺ຊໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ອຸທ຺ຘຈ຺ຈໍ ປຫາຕຸໍ ອສໍວຣໍ ປຫາຕຸໍ ທຸສ຺ສີລ຺ຍໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອສ຺ສທ຺ຘິຍໍ ປຫາຕຸໍ ອວທຎ຺ຎຸຕໍ ປຫາຕຸໍ ໂກສຊ຺ຊໍ ປຫາຕຸໍ. ກຕເມ ຕໂຍ? ອນາທຣິຍໍ ອປ຺ປຫາຍ, ໂທວຈສ຺ສຕໍ ອປ຺ປຫາຍ, ປາປມິຕ຺ຕຕໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ອສ຺ສທ຺ຘິຍໍ ປຫາຕຸໍ ອວທຎ຺ຎຸຕໍ ປຫາຕຸໍ ໂກສຊ຺ຊໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ອປ຺ປຫາຍ ອຠພ຺ໂພ ອນາທຣິຍໍ ປຫາຕຸໍ ໂທວຈສ຺ສຕໍ ປຫາຕຸໍ ປາປມິຕ຺ຕຕໍ ປຫາຕຸໍ. ກຕເມ ຕໂຍ? ອຫິຣິກໍ ອປ຺ປຫາຍ, ອໂນຕ຺ຕປ຺ປໍ ອປ຺ປຫາຍ, ປມາທໍ ອປ຺ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ອປ຺ປຫາຍ ອຠພ຺ໂພ ອນາທຣິຍໍ ປຫາຕຸໍ ໂທວຈສ຺ສຕໍ ປຫາຕຸໍ ປາປມິຕ຺ຕຕໍ ປຫາຕຸໍ.

‘‘ອຫິຣິໂກຍໍ, ຠິກ຺ຂເວ, ອໂນຕ຺ຕາປີ ປມຕ຺ໂຕ ໂຫຕິ. ໂສ ປມຕ຺ໂຕ ສມາໂນ ອຠພ຺ໂພ ອນາທຣິຍໍ ປຫາຕຸໍ ໂທວຈສ຺ສຕໍ ປຫາຕຸໍ ປາປມິຕ຺ຕຕໍ ປຫາຕຸໍ. ໂສ ປາປມິຕ຺ໂຕ ສມາໂນ ອຠພ຺ໂພ ອສ຺ສທ຺ຘິຍໍ ປຫາຕຸໍ ອວທຎ຺ຎຸຕໍ ປຫາຕຸໍ ໂກສຊ຺ຊໍ ປຫາຕຸໍ. ໂສ ກຸສີໂຕ ສມາໂນ ອຠພ຺ໂພ ອຸທ຺ຘຈ຺ຈໍ ປຫາຕຸໍ ອສໍວຣໍ ປຫາຕຸໍ ທຸສ຺ສີລ຺ຍໍ ປຫາຕຸໍ. ໂສ ທຸສ຺ສີໂລ ສມາໂນ ອຠພ຺ໂພ ອຣິຍານໍ ອທສ຺ສນກມ຺ຍຕໍ ປຫາຕຸໍ ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຕຸໍ ອຸປາຣມ຺ຠຈິຕ຺ຕຕໍ ປຫາຕຸໍ. ໂສ ອຸປາຣມ຺ຠຈິຕ຺ໂຕ ສມາໂນ ອຠພ຺ໂພ ມຸຏ຺ຐສຈ຺ຈໍ ປຫາຕຸໍ ອສມ຺ປຊຎ຺ຎໍ ປຫາຕຸໍ ເຈຕໂສ ວິກ຺ເຂປໍ ປຫາຕຸໍ. ໂສ ວິກ຺ຂິຕ຺ຕຈິຕ຺ໂຕ ສມາໂນ ອຠພ຺ໂພ ອໂຍນິໂສມນສິກາຣໍ ປຫາຕຸໍ ກຸມ຺ມຄ຺ຄເສວນໍ ປຫາຕຸໍ ເຈຕໂສ ລີນຕ຺ຕໍ ປຫາຕຸໍ. ໂສ ລີນຈິຕ຺ໂຕ ສມາໂນ ອຠພ຺ໂພ ສກ຺ກາຍທິຏ຺ຐິໍ ປຫາຕຸໍ ວິຈິກິຈ຺ຉໍ ປຫາຕຸໍ ສີລພ຺ພຕປຣາມາສໍ ປຫາຕຸໍ. ໂສ ວິຈິກິຈ຺ໂຉ ສມາໂນ ອຠພ຺ໂພ ຣາຄໍ ປຫາຕຸໍ ໂທສໍ ປຫາຕຸໍ ໂມຫໍ ປຫາຕຸໍ. ໂສ ຣາຄໍ ອປ຺ປຫາຍ ໂທສໍ ອປ຺ປຫາຍ ໂມຫໍ ອປ຺ປຫາຍ ອຠພ຺ໂພ ຊາຕິໍ ປຫາຕຸໍ ຊຣໍ ປຫາຕຸໍ ມຣຓໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ຊາຕິໍ ປຫາຕຸໍ ຊຣໍ ປຫາຕຸໍ ມຣຓໍ ປຫາຕຸໍ. ກຕເມ ຕໂຍ? ຣາຄໍ ປຫາຍ, ໂທສໍ ປຫາຍ, ໂມຫໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ຊາຕິໍ ປຫາຕຸໍ ຊຣໍ ປຫາຕຸໍ ມຣຓໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ຣາຄໍ ປຫາຕຸໍ ໂທສໍ ປຫາຕຸໍ ໂມຫໍ ປຫາຕຸໍ. ກຕເມ ຕໂຍ? ສກ຺ກາຍທິຏ຺ຐິໍ ປຫາຍ, ວິຈິກິຈ຺ຉໍ ປຫາຍ, ສີລພ຺ພຕປຣາມາສໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ຣາຄໍ ປຫາຕຸໍ ໂທສໍ ປຫາຕຸໍ ໂມຫໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ສກ຺ກາຍທິຏ຺ຐິໍ ປຫາຕຸໍ ວິຈິກິຈ຺ຉໍ ປຫາຕຸໍ ສີລພ຺ພຕປຣາມາສໍ ປຫາຕຸໍ. ກຕເມ ຕໂຍ? ອໂຍນິໂສມນສິກາຣໍ ປຫາຍ, ກຸມ຺ມຄ຺ຄເສວນໍ ປຫາຍ, ເຈຕໂສ ລີນຕ຺ຕໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ສກ຺ກາຍທິຏ຺ຐິໍ ປຫາຕຸໍ ວິຈິກິຈ຺ຉໍ ປຫາຕຸໍ ສີລພ຺ພຕປຣາມາສໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອໂຍນິໂສມນສິກາຣໍ ປຫາຕຸໍ ກຸມ຺ມຄ຺ຄເສວນໍ ປຫາຕຸໍ ເຈຕໂສ ລີນຕ຺ຕໍ ປຫາຕຸໍ. ກຕເມ ຕໂຍ? ມຸຏ຺ຐສຈ຺ຈໍ ປຫາຍ, ອສມ຺ປຊຎ຺ຎໍ ປຫາຍ, ເຈຕໂສ ວິກ຺ເຂປໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ອໂຍນິໂສມນສິກາຣໍ ປຫາຕຸໍ ກຸມ຺ມຄ຺ຄເສວນໍ ປຫາຕຸໍ ເຈຕໂສ ລີນຕ຺ຕໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ມຸຏ຺ຐສຈ຺ຈໍ ປຫາຕຸໍ ອສມ຺ປຊຎ຺ຎໍ ປຫາຕຸໍ ເຈຕໂສ ວິກ຺ເຂປໍ ປຫາຕຸໍ. ກຕເມ ຕໂຍ? ອຣິຍານໍ ອທສ຺ສນກມ຺ຍຕໍ ປຫາຍ, ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຍ, ອຸປາຣມ຺ຠຈິຕ຺ຕຕໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ມຸຏ຺ຐສ຺ສຈ຺ຈໍ ປຫາຕຸໍ ອສມ຺ປຊຎ຺ຎໍ ປຫາຕຸໍ ເຈຕໂສ ວິກ຺ເຂປໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອຣິຍານໍ ອທສ຺ສນກມ຺ຍຕໍ ປຫາຕຸໍ ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຕຸໍ ອຸປາຣມ຺ຠຈິຕ຺ຕຕໍ ປຫາຕຸໍ. ກຕເມ ຕໂຍ? ອຸທ຺ຘຈ຺ຈໍ ປຫາຍ, ອສໍວຣໍ ປຫາຍ, ທຸສ຺ສີລ຺ຍໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ອຣິຍານໍ ອທສ຺ສນກມ຺ຍຕໍ ປຫາຕຸໍ ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຕຸໍ ອຸປາຣມ຺ຠຈິຕ຺ຕຕໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອຸທ຺ຘຈ຺ຈໍ ປຫາຕຸໍ ອສໍວຣໍ ປຫາຕຸໍ ທຸສ຺ສີລ຺ຍໍ ປຫາຕຸໍ. ກຕເມ ຕໂຍ? ອສ຺ສທ຺ຘິຍໍ ປຫາຍ, ອວທຎ຺ຎຸຕໍ ປຫາຍ, ໂກສຊ຺ຊໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ອຸທ຺ຘຈ຺ຈໍ ປຫາຕຸໍ ອສໍວຣໍ ປຫາຕຸໍ ທຸສ຺ສີລ຺ຍໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອສ຺ສທ຺ຘິຍໍ ປຫາຕຸໍ ອວທຎ຺ຎຸຕໍ ປຫາຕຸໍ ໂກສຊ຺ຊໍ ປຫາຕຸໍ. ກຕເມ ຕໂຍ? ອນາທຣິຍໍ ປຫາຍ, ໂທວຈສ຺ສຕໍ ປຫາຍ, ປາປມິຕ຺ຕຕໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ອສ຺ສທ຺ຘິຍໍ ປຫາຕຸໍ ອວທຎ຺ຎຸຕໍ ປຫາຕຸໍ ໂກສຊ຺ຊໍ ປຫາຕຸໍ.

‘‘ຕໂຍເມ, ຠິກ຺ຂເວ, ຘມ຺ເມ ປຫາຍ ຠພ຺ໂພ ອນາທຣິຍໍ ປຫາຕຸໍ ໂທວຈສ຺ສຕໍ ປຫາຕຸໍ ປາປມິຕ຺ຕຕໍ ປຫາຕຸໍ. ກຕເມ ຕໂຍ? ອຫິຣິກໍ ປຫາຍ, ອໂນຕ຺ຕປ຺ປໍ ປຫາຍ, ປມາທໍ ປຫາຍ – ອິເມ ໂຂ, ຠິກ຺ຂເວ, ຕໂຍ ຘມ຺ເມ ປຫາຍ ຠພ຺ໂພ ອນາທຣິຍໍ ປຫາຕຸໍ ໂທວຈສ຺ສຕໍ ປຫາຕຸໍ ປາປມິຕ຺ຕຕໍ ປຫາຕຸໍ.

‘‘ຫິຣີມາຍໍ, ຠິກ຺ຂເວ, ໂອຕ຺ຕາປີ ອປ຺ປມຕ຺ໂຕ ໂຫຕິ. ໂສ ອປ຺ປມຕ຺ໂຕ ສມາໂນ ຠພ຺ໂພ ອນາທຣິຍໍ ປຫາຕຸໍ ໂທວຈສ຺ສຕໍ ປຫາຕຸໍ ປາປມິຕ຺ຕຕໍ ປຫາຕຸໍ. ໂສ ກລ຺ຍາຓມິຕ຺ໂຕ ສມາໂນ ຠພ຺ໂພ ອສ຺ສທ຺ຘິຍໍ ປຫາຕຸໍ ອວທຎ຺ຎຸຕໍ ປຫາຕຸໍ ໂກສຊ຺ຊໍ ປຫາຕຸໍ. ໂສ ອາຣທ຺ຘວີຣິໂຍ ສມາໂນ ຠພ຺ໂພ ອຸທ຺ຘຈ຺ຈໍ ປຫາຕຸໍ ອສໍວຣໍ ປຫາຕຸໍ ທຸສ຺ສີລ຺ຍໍ ປຫາຕຸໍ. ໂສ ສີລວາ ສມາໂນ ຠພ຺ໂພ ອຣິຍານໍ ອທສ຺ສນກມ຺ຍຕໍ ປຫາຕຸໍ ອຣິຍຘມ຺ມສ຺ສ ອໂສຕຸກມ຺ຍຕໍ ປຫາຕຸໍ ອຸປາຣມ຺ຠຈິຕ຺ຕຕໍ ປຫາຕຸໍ. ໂສ ອນຸປາຣມ຺ຠຈິຕ຺ໂຕ ສມາໂນ ຠພ຺ໂພ ມຸຏ຺ຐສ຺ສຈ຺ຈໍ ປຫາຕຸໍ ອສມ຺ປຊຎ຺ຎໍ ປຫາຕຸໍ ເຈຕໂສ ວິກ຺ເຂປໍ ປຫາຕຸໍ. ໂສ ອວິກ຺ຂິຕ຺ຕຈິຕ຺ໂຕ ສມາໂນ ຠພ຺ໂພ ອໂຍນິໂສມນສິກາຣໍ ປຫາຕຸໍ ກຸມ຺ມຄ຺ຄເສວນໍ ປຫາຕຸໍ ເຈຕໂສ ລີນຕ຺ຕໍ ປຫາຕຸໍ. ໂສ ອລີນຈິຕ຺ໂຕ ສມາໂນ ຠພ຺ໂພ ສກ຺ກາຍທິຏ຺ຐິໍ ປຫາຕຸໍ ວິຈິກິຈ຺ຉໍ ປຫາຕຸໍ ສີລພ຺ພຕປຣາມາສໍ ປຫາຕຸໍ. ໂສ ອວິຈິກິຈ຺ໂຉ ສມາໂນ ຠພ຺ໂພ ຣາຄໍ ປຫາຕຸໍ ໂທສໍ ປຫາຕຸໍ ໂມຫໍ ປຫາຕຸໍ. ໂສ ຣາຄໍ ປຫາຍ ໂທສໍ ປຫາຍ ໂມຫໍ ປຫາຍ ຠພ຺ໂພ ຊາຕິໍ ປຫາຕຸໍ ຊຣໍ ປຫາຕຸໍ ມຣຓໍ ປຫາຕຸ’’ນ຺ຕິ. ຉຏ຺ຐໍ.