໓. ອິຏ຺ຐຘມ຺ມສຸຕ຺ຕໍ

໗໓. ‘‘ທສຍິເມ, ຠິກ຺ຂເວ, ຘມ຺ມາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ. ກຕເມ ທສ? ໂຠຄາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ; ວຓ຺ໂຓ ອິຏ຺ໂຐ ກນ຺ໂຕ ມນາໂປ ທຸລ຺ລໂຠ ໂລກສ຺ມິໍ; ອາໂຣຄ຺ຍໍ ອິຏ຺ຐໍ ກນ຺ຕໍ ມນາປໍ ທຸລ຺ລຠໍ ໂລກສ຺ມິໍ; ສີລໍ ອິຏ຺ຐໍ ກນ຺ຕໍ ມນາປໍ ທຸລ຺ລຠໍ ໂລກສ຺ມິໍ; ພ຺ຣຫ຺ມຈຣິຍໍ ອິຏ຺ຐໍ ກນ຺ຕໍ ມນາປໍ ທຸລ຺ລຠໍ ໂລກສ຺ມິໍ; ມິຕ຺ຕາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ; ພາຫຸສຈ຺ຈໍ ອິຏ຺ຐໍ ກນ຺ຕໍ ມນາປໍ ທຸລ຺ລຠໍ ໂລກສ຺ມິໍ; ປຎ຺ຎາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ; ຘມ຺ມາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ; ສຄ຺ຄາ ອິຏ຺ຐາ ກນ຺ຕາ ມນາປາ ທຸລ຺ລຠາ ໂລກສ຺ມິໍ.

‘‘ອິເມສໍ ໂຂ, ຠິກ຺ຂເວ, ທສນ຺ນໍ ຘມ຺ມານໍ ອິຏ຺ຐານໍ ກນ຺ຕານໍ ມນາປານໍ ທຸລ຺ລຠານໍ ໂລກສ຺ມິໍ ທສ ຘມ຺ມາ ປຣິປນ຺ຖາ [ປຣິພນ຺ຘາ (ກ.)] – ອາລສ຺ຍໍ ອນຸຏ຺ຐານໍ ໂຠຄານໍ ປຣິປນ຺ໂຖ, ອມຓ຺ຑນາ ອວິຠູສນາ ວຓ຺ຓສ຺ສ ປຣິປນ຺ໂຖ, ອສປ຺ປາຍກິຣິຍາ ອາໂຣຄ຺ຍສ຺ສ ປຣິປນ຺ໂຖ, ປາປມິຕ຺ຕຕາ ສີລານໍ ປຣິປນ຺ໂຖ, ອິນ຺ທ຺ຣິຍອສໍວໂຣ ພ຺ຣຫ຺ມຈຣິຍສ຺ສ ປຣິປນ຺ໂຖ, ວິສໍວາທນາ ມິຕ຺ຕານໍ ປຣິປນ຺ໂຖ, ອສຊ຺ຌາຍກິຣິຍາ ພາຫຸສຈ຺ຈສ຺ສ ປຣິປນ຺ໂຖ, ອສຸສ຺ສູສາ ອປຣິປຸຈ຺ຉາ ປຎ຺ຎາຍ ປຣິປນ຺ໂຖ, ອນນຸໂຍໂຄ ອປຈ຺ຈເວກ຺ຂຓາ ຘມ຺ມານໍ ປຣິປນ຺ໂຖ, ມິຈ຺ຉາປຏິປຕ຺ຕິ ສຄ຺ຄານໍ ປຣິປນ຺ໂຖ. ອິເມສໍ ໂຂ, ຠິກ຺ຂເວ, ທສນ຺ນໍ ອິຏ຺ຐານໍ ກນ຺ຕານໍ ມນາປານໍ ທຸລ຺ລຠານໍ ໂລກສ຺ມິໍ ອິເມ ທສ ຘມ຺ມາ ປຣິປນ຺ຖາ.

‘‘ອິເມສໍ ໂຂ, ຠິກ຺ຂເວ, ທສນ຺ນໍ ຘມ຺ມານໍ ອິຏ຺ຐານໍ ກນ຺ຕານໍ ມນາປານໍ ທຸລ຺ລຠານໍ ໂລກສ຺ມິໍ ທສ ຘມ຺ມາ ອາຫາຣາ – ອຸຏ຺ຐານໍ ອນາລສ຺ຍໍ ໂຠຄານໍ ອາຫາໂຣ, ມຓ຺ຑນາ ວິຠູສນາ ວຓ຺ຓສ຺ສ ອາຫາໂຣ, ສປ຺ປາຍກິຣິຍາ ອາໂຣຄ຺ຍສ຺ສ ອາຫາໂຣ, ກລ຺ຍາຓມິຕ຺ຕຕາ ສີລານໍ ອາຫາໂຣ, ອິນ຺ທ຺ຣິຍສໍວໂຣ ພ຺ຣຫ຺ມຈຣິຍສ຺ສ ອາຫາໂຣ, ອວິສໍວາທນາ ມິຕ຺ຕານໍ ອາຫາໂຣ, ສຊ຺ຌາຍກິຣິຍາ ພາຫຸສຈ຺ຈສ຺ສ ອາຫາໂຣ, ສຸສ຺ສູສາ ປຣິປຸຈ຺ຉາ ປຎ຺ຎາຍ ອາຫາໂຣ, ອນຸໂຍໂຄ ປຈ຺ຈເວກ຺ຂຓາ ຘມ຺ມານໍ ອາຫາໂຣ, ສມ຺ມາປຏິປຕ຺ຕິ ສຄ຺ຄານໍ ອາຫາໂຣ. ອິເມສໍ ໂຂ, ຠິກ຺ຂເວ, ທສນ຺ນໍ ຘມ຺ມານໍ ອິຏ຺ຐານໍ ກນ຺ຕານໍ ມນາປານໍ ທຸລ຺ລຠານໍ ໂລກສ຺ມິໍ ອິເມ ທສ ຘມ຺ມາ ອາຫາຣາ’’ຕິ. ຕຕິຍໍ.