໒. ອຘິວຸຕ຺ຕິປທສຸຕ຺ຕໍ

໒໒. ອຖ ໂຂ ອາຍສ຺ມາ ອານນ຺ໂທ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ອານນ຺ທໍ ຠຄວາ ເອຕທໂວຈ –

‘‘ເຍ ເຕ, ອານນ຺ທ, ຘມ຺ມາ ເຕສໍ ເຕສໍ ອຘິວຸຕ຺ຕິປທານໍ [ອຘິມຸຕ຺ຕິປທານໍ (ກ.)] ອຠິຎ຺ຎາ ສຈ຺ຉິກິຣິຍາຍ ສໍວຕ຺ຕນ຺ຕິ, ວິສາຣໂທ ອຫໍ, ອານນ຺ທ, ຕຕ຺ຖ ປຏິຊານາມິ. ‘ເຕສໍ ເຕສໍ ຕຖາ ຕຖາ ຘມ຺ມໍ ເທເສຕຸໍ ຍຖາ ຍຖາ ປຏິປນ຺ໂນ ສນ຺ຕໍ ວາ ອຕ຺ຖີຕິ ຎສ຺ສຕິ, ອສນ຺ຕໍ ວາ ນຕ຺ຖີຕິ ຎສ຺ສຕິ, ຫີນໍ ວາ ຫີນນ຺ຕິ ຎສ຺ສຕິ, ປຓີຕໍ ວາ ປຓີຕນ຺ຕິ ຎສ຺ສຕິ, ສອຸຕ຺ຕຣໍ ວາ ສອຸຕ຺ຕຣນ຺ຕິ ຎສ຺ສຕິ, ອນຸຕ຺ຕຣໍ ວາ ອນຸຕ຺ຕຣນ຺ຕິ ຎສ຺ສຕິ; ຍຖາ ຍຖາ ວາ ປນ ຕໍ ຎາເຕຍ຺ຍໍ ວາ ທຏ຺ເຐຍ຺ຍໍ ວາ ສຈ຺ຉິກເຣຍ຺ຍໍ ວາ, ຕຖາ ຕຖາ ຎສ຺ສຕິ ວາ ທກ຺ຂຕິ ວາ ສຈ຺ຉິກຣິສ຺ສຕິ ວາ’ຕິ ຐານເມຕໍ ວິຊ຺ຊຕິ. ເອຕທານຸຕ຺ຕຣິຍໍ, ອານນ຺ທ, ຎາຓານໍ ຍທິທໍ ຕຕ຺ຖ ຕຕ຺ຖ ຍຖາຠູຕຎາຓໍ. ເອຕສ຺ມາ ຈາຫໍ, ອານນ຺ທ, ຎາຓາ ອຎ຺ຎໍ ຎາຓໍ ອຸຕ຺ຕຣິຕຣໍ ວາ ປຓີຕຕຣໍ ວາ ນຕ຺ຖີຕິ ວທາມິ.

‘‘ທສຍິມານິ, ອານນ຺ທ, ຕຖາຄຕສ຺ສ ຕຖາຄຕພລານິ, ເຍຫິ ພເລຫິ ສມນ຺ນາຄໂຕ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ. ກຕມານິ ທສ? ອິຘານນ຺ທ, ຕຖາຄໂຕ ຐານຎ຺ຈ ຐານໂຕ ອຏ຺ຐານຎ຺ຈ ອຏ຺ຐານໂຕ ຍຖາຠູຕໍ ປຊານາຕິ. ຍມ຺ປານນ຺ທ, ຕຖາຄໂຕ ຐານຎ຺ຈ ຐານໂຕ ອຏ຺ຐານຎ຺ຈ ອຏ຺ຐານໂຕ ຍຖາຠູຕໍ ປຊານາຕິ, ອິທມ຺ປານນ຺ທ, ຕຖາຄຕສ຺ສ ຕຖາຄຕພລໍ ໂຫຕິ, ຍໍ ພລໍ ອາຄມ຺ມ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

‘‘ປຸນ ຈປຣໍ, ອານນ຺ທ, ຕຖາຄໂຕ ອຕີຕານາຄຕປຈ຺ຈຸປ຺ປນ຺ນານໍ ກມ຺ມສມາທານານໍ ຐານໂສ ເຫຕຸໂສ ວິປາກໍ ຍຖາຠູຕໍ ປຊານາຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ສພ຺ພຕ຺ຖຄາມິນິໍ ປຏິປທໍ ຍຖາຠູຕໍ ປຊານາຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ອເນກຘາຕຸໍ ນານາຘາຕຸໍ ໂລກໍ ຍຖາຠູຕໍ ປຊານາຕິ. ຍມ຺ປານນ຺ທ …ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ສຕ຺ຕານໍ ນານາຘິມຸຕ຺ຕິກຕໍ ຍຖາຠູຕໍ ປຊານາຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ປຣສຕ຺ຕານໍ ປຣປຸຄ຺ຄລານໍ ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ປຊານາຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ຌານວິໂມກ຺ຂສມາຘິສມາປຕ຺ຕີນໍ ສໍກິເລສໍ ໂວທານໍ ວຸຏ຺ຐານໍ ຍຖາຠູຕໍ ປຊານາຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ, ເສຍ຺ຍຖິທໍ – ເອກມ຺ປິ ຊາຕິໍ ທ຺ເວປິ ຊາຕິໂຍ…ເປ… ອິຕິ ສາກາຣໍ ສອຸທ຺ເທສໍ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ທິພ຺ເພນ ຈກ຺ຂຸນາ ວິສຸທ຺ເຘນ ອຕິກ຺ກນ຺ຕມານຸສເກນ…ເປ… ຍຖາກມ຺ມູປເຄ ສຕ຺ເຕ ປຊານາຕິ. ຍມ຺ປານນ຺ທ…ເປ… ອິທມ຺ປານນ຺ທ…ເປ….

‘‘ປຸນ ຈປຣໍ, ອານນ຺ທ, ຕຖາຄໂຕ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ຍມ຺ປານນ຺ທ, ຕຖາຄໂຕ ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ…ເປ… ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕິ. ອິທມ຺ປານນ຺ທ, ຕຖາຄຕສ຺ສ ຕຖາຄຕພລໍ ໂຫຕິ, ຍໍ ພລໍ ອາຄມ຺ມ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕິ.

‘‘ອິມານິ ໂຂ, ອານນ຺ທ, ທສ ຕຖາຄຕສ຺ສ ຕຖາຄຕພລານິ, ເຍຫິ ພເລຫິ ສມນ຺ນາຄໂຕ ຕຖາຄໂຕ ອາສຠໍ ຐານໍ ປຏິຊານາຕິ, ປຣິສາສຸ ສີຫນາທໍ ນທຕິ, ພ຺ຣຫ຺ມຈກ຺ກໍ ປວຕ຺ເຕຕີ’’ຕິ. ທຸຕິຍໍ.