೩. ಅಧಿಕರಣಮೂಲಾದಿ

೩೪೩. ಚತುನ್ನಂ ಅಧಿಕರಣಾನಂ ಕತಿ ಮೂಲಾನಿ, ಕತಿ ಸಮುಟ್ಠಾನಾ? ಚತುನ್ನಂ ಅಧಿಕರಣಾನಂ ತೇತ್ತಿಂಸ ಮೂಲಾನಿ, ತೇತ್ತಿಂಸ ಸಮುಟ್ಠಾನಾ.

ಚತುನ್ನಂ ಅಧಿಕರಣಾನಂ ಕತಮಾನಿ ತೇತ್ತಿಂಸ ಮೂಲಾನಿ? ವಿವಾದಾಧಿಕರಣಸ್ಸ ದ್ವಾದಸ ಮೂಲಾನಿ, ಅನುವಾದಾಧಿಕರಣಸ್ಸ ಚುದ್ದಸ ಮೂಲಾನಿ, ಆಪತ್ತಾಧಿಕರಣಸ್ಸ ಛ ಮೂಲಾನಿ, ಕಿಚ್ಚಾಧಿಕರಣಸ್ಸ ಏಕಂ ಮೂಲಂ, ಸಙ್ಘೋ – ಚತುನ್ನಂ ಅಧಿಕರಣಾನಂ ಇಮಾನಿ ತೇತ್ತಿಂಸ ಮೂಲಾನಿ.

ಚತುನ್ನಂ ಅಧಿಕರಣಾನಂ ಕತಮೇ ತೇತ್ತಿಂಸ ಸಮುಟ್ಠಾನಾ? ವಿವಾದಾಧಿಕರಣಸ್ಸ ಅಟ್ಠಾರಸಭೇದಕರವತ್ಥೂನಿ ಸಮುಟ್ಠಾನಾ, ಅನುವಾದಾಧಿಕರಣಸ್ಸ ಚತಸ್ಸೋ ವಿಪತ್ತಿಯೋ ಸಮುಟ್ಠಾನಾ, ಆಪತ್ತಾಧಿಕರಣಸ್ಸ ಸತ್ತಾಪತ್ತಿಕ್ಖನ್ಧಾ ಸಮುಟ್ಠಾನಾ, ಕಿಚ್ಚಾಧಿಕರಣಸ್ಸ ಚತ್ತಾರಿ ಕಮ್ಮಾನಿ ಸಮುಟ್ಠಾನಾ – ಚತುನ್ನಂ ಅಧಿಕರಣಾನಂ ಇಮೇ ತೇತ್ತಿಂಸ ಸಮುಟ್ಠಾನಾ.