೧. ಉಕ್ಕೋಟನಭೇದಾದಿ

೩೪೦. [ಚೂಳವ. ೨೧೫; ಪರಿ. ೨೭೫] ಚತ್ತಾರಿ ಅಧಿಕರಣಾನಿ. ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ – ಇಮಾನಿ ಚತ್ತಾರಿ ಅಧಿಕರಣಾನಿ.

ಇಮೇಸಂ ಚತುನ್ನಂ ಅಧಿಕರಣಾನಂ ಕತಿ ಉಕ್ಕೋಟಾ? ಇಮೇಸಂ ಚತುನ್ನಂ ಅಧಿಕರಣಾನಂ ದಸ ಉಕ್ಕೋಟಾ. ವಿವಾದಾಧಿಕರಣಸ್ಸ ದ್ವೇ ಉಕ್ಕೋಟಾ, ಅನುವಾದಾಧಿಕರಣಸ್ಸ ಚತ್ತಾರೋ ಉಕ್ಕೋಟಾ, ಆಪತ್ತಾಧಿಕರಣಸ್ಸ ತಯೋ ಉಕ್ಕೋಟಾ, ಕಿಚ್ಚಾಧಿಕರಣಸ್ಸ ಏಕೋ ಉಕ್ಕೋಟೋ – ಇಮೇಸಂ ಚತುನ್ನಂ ಅಧಿಕರಣಾನಂ ಇಮೇ ದಸ ಉಕ್ಕೋಟಾ.

ವಿವಾದಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ? ಅನುವಾದಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ? ಆಪತ್ತಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ? ಕಿಚ್ಚಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ?

ವಿವಾದಾಧಿಕರಣಂ ಉಕ್ಕೋಟೇನ್ತೋ ದ್ವೇ ಸಮಥೇ ಉಕ್ಕೋಟೇತಿ. ಅನುವಾದಾಧಿಕರಣಂ ಉಕ್ಕೋಟೇನ್ತೋ ಚತ್ತಾರೋ ಸಮಥೇ ಉಕ್ಕೋಟೇತಿ. ಆಪತ್ತಾಧಿಕರಣಂ ಉಕ್ಕೋಟೇನ್ತೋ ತಯೋ ಸಮಥೇ ಉಕ್ಕೋಟೇತಿ. ಕಿಚ್ಚಾಧಿಕರಣಂ ಉಕ್ಕೋಟೇನ್ತೋ ಏಕಂ ಸಮಥಂ ಉಕ್ಕೋಟೇತಿ.

೩೪೧. ಕತಿ ಉಕ್ಕೋಟಾ? ಕತಿಹಾಕಾರೇಹಿ ಉಕ್ಕೋಟನಂ ಪಸವತಿ? ಕತಿಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ? ಕತಿ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ?

ದ್ವಾದಸ ಉಕ್ಕೋಟಾ. ದಸಹಾಕಾರೇಹಿ ಉಕ್ಕೋಟನಂ ಪಸವತಿ. ಚತೂಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ. ಚತ್ತಾರೋ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ?

ಕತಮೇ ದ್ವಾದಸ ಉಕ್ಕೋಟಾ? ಅಕತಂ ಕಮ್ಮಂ, ದುಕ್ಕಟಂ ಕಮ್ಮಂ, ಪುನ ಕಾತಬ್ಬಂ ಕಮ್ಮಂ, ಅನಿಹತಂ, ದುನ್ನಿಹತಂ, ಪುನ ನಿಹನಿತಬ್ಬಂ, ಅವಿನಿಚ್ಛಿತಂ, ದುವಿನಿಚ್ಛಿತಂ, ಪುನ ವಿನಿಚ್ಛಿತಬ್ಬಂ, ಅವೂಪಸನ್ತಂ, ದುವೂಪಸನ್ತಂ, ಪುನ ವೂಪಸಮೇತಬ್ಬನ್ತಿ – ಇಮೇ ದ್ವಾದಸ ಉಕ್ಕೋಟಾ.

ಕತಮೇಹಿ ದಸಹಾಕಾರೇಹಿ ಉಕ್ಕೋಟನಂ ಪಸವತಿ? ತತ್ಥ ಜಾತಕಂ ಅಧಿಕರಣಂ ಉಕ್ಕೋಟೇತಿ, ತತ್ಥ ಜಾತಕಂ ವೂಪಸನ್ತಂ ಅಧಿಕರಣಂ ಉಕ್ಕೋಟೇತಿ, ಅನ್ತರಾಮಗ್ಗೇ ಅಧಿಕರಣಂ ಉಕ್ಕೋಟೇತಿ, ಅನ್ತರಾಮಗ್ಗೇ ವೂಪಸನ್ತಂ ಅಧಿಕರಣಂ ಉಕ್ಕೋಟೇತಿ, ತತ್ಥ ಗತಂ ಅಧಿಕರಣಂ ಉಕ್ಕೋಟೇತಿ, ತತ್ಥ ಗತಂ ವೂಪಸನ್ತಂ ಅಧಿಕರಣಂ ಉಕ್ಕೋಟೇತಿ, ಸತಿವಿನಯಂ ಉಕ್ಕೋಟೇತಿ, ಅಮೂಳ್ಹವಿನಯಂ ಉಕ್ಕೋಟೇತಿ, ತಸ್ಸಪಾಪಿಯಸಿಕಂ ಉಕ್ಕೋಟೇತಿ, ತಿಣವತ್ಥಾರಕಂ ಉಕ್ಕೋಟೇತಿ – ಇಮೇಹಿ ದಸಹಾಕಾರೇಹಿ ಉಕ್ಕೋಟನಂ ಪಸವತಿ.

ಕತಮೇಹಿ ಚತೂಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ? ಛನ್ದಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ, ದೋಸಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ, ಮೋಹಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ, ಭಯಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ – ಇಮೇಹಿ ಚತೂಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ.

ಕತಮೇ ಚತ್ತಾರೋ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ? ತದಹುಪಸಮ್ಪನ್ನೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ, ಆಗನ್ತುಕೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ, ಕಾರಕೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ, ಛನ್ದದಾಯಕೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ – ಇಮೇ ಚತ್ತಾರೋ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ.