೧. ಏಕಕವಾರೋ

೩೨೧. ಆಪತ್ತಿಕರಾ ಧಮ್ಮಾ ಜಾನಿತಬ್ಬಾ. ಅನಾಪತ್ತಿಕರಾ ಧಮ್ಮಾ ಜಾನಿತಬ್ಬಾ. ಆಪತ್ತಿ ಜಾನಿತಬ್ಬಾ. ಅನಾಪತ್ತಿ ಜಾನಿತಬ್ಬಾ. ಲಹುಕಾ ಆಪತ್ತಿ ಜಾನಿತಬ್ಬಾ. ಗರುಕಾ ಆಪತ್ತಿ ಜಾನಿತಬ್ಬಾ. ಸಾವಸೇಸಾ ಆಪತ್ತಿ ಜಾನಿತಬ್ಬಾ. ಅನವಸೇಸಾ ಆಪತ್ತಿ ಜಾನಿತಬ್ಬಾ. ದುಟ್ಠುಲ್ಲಾ ಆಪತ್ತಿ ಜಾನಿತಬ್ಬಾ. ಅದುಟ್ಠುಲ್ಲಾ ಆಪತ್ತಿ ಜಾನಿತಬ್ಬಾ. ಸಪ್ಪಟಿಕಮ್ಮಾ ಆಪತ್ತಿ ಜಾನಿತಬ್ಬಾ. ಅಪ್ಪಟಿಕಮ್ಮಾ ಆಪತ್ತಿ ಜಾನಿತಬ್ಬಾ. ದೇಸನಾಗಾಮಿನೀ ಆಪತ್ತಿ ಜಾನಿತಬ್ಬಾ. ಅದೇಸನಾಗಾಮಿನೀ ಆಪತ್ತಿ ಜಾನಿತಬ್ಬಾ. ಅನ್ತರಾಯಿಕಾ ಆಪತ್ತಿ ಜಾನಿತಬ್ಬಾ. ಅನನ್ತರಾಯಿಕಾ ಆಪತ್ತಿ ಜಾನಿತಬ್ಬಾ. ಸಾವಜ್ಜಪಞ್ಞತ್ತಿ ಆಪತ್ತಿ ಜಾನಿತಬ್ಬಾ. ಅನವಜ್ಜಪಞ್ಞತ್ತಿ ಆಪತ್ತಿ ಜಾನಿತಬ್ಬಾ. ಕಿರಿಯತೋ ಸಮುಟ್ಠಿತಾ ಆಪತ್ತಿ ಜಾನಿತಬ್ಬಾ. ಅಕಿರಿಯತೋ ಸಮುಟ್ಠಿತಾ ಆಪತ್ತಿ ಜಾನಿತಬ್ಬಾ. ಕಿರಿಯಾಕಿರಿಯತೋ ಸಮುಟ್ಠಿತಾ ಆಪತ್ತಿ ಜಾನಿತಬ್ಬಾ. ಪುಬ್ಬಾಪತ್ತಿ ಜಾನಿತಬ್ಬಾ. ಅಪರಾಪತ್ತಿ ಜಾನಿತಬ್ಬಾ. ಪುಬ್ಬಾಪತ್ತೀನಂ ಅನ್ತರಾಪತ್ತಿ ಜಾನಿತಬ್ಬಾ. ಅಪರಾಪತ್ತೀನಂ ಅನ್ತರಾಪತ್ತಿ ಜಾನಿತಬ್ಬಾ. ದೇಸಿತಾ ಗಣನೂಪಗಾ ಆಪತ್ತಿ ಜಾನಿತಬ್ಬಾ. ದೇಸಿತಾ ನ ಗಣನೂಪಗಾ ಆಪತ್ತಿ ಜಾನಿತಬ್ಬಾ. ಪಞ್ಞತ್ತಿ ಜಾನಿತಬ್ಬಾ. ಅನುಪಞ್ಞತ್ತಿ ಜಾನಿತಬ್ಬಾ. ಅನುಪ್ಪನ್ನಪಞ್ಞತ್ತಿ ಜಾನಿತಬ್ಬಾ. ಸಬ್ಬತ್ಥಪಞ್ಞತ್ತಿ ಜಾನಿತಬ್ಬಾ. ಪದೇಸಪಞ್ಞತ್ತಿ ಜಾನಿತಬ್ಬಾ. ಸಾಧಾರಣಪಞ್ಞತ್ತಿ ಜಾನಿತಬ್ಬಾ. ಅಸಾಧಾರಣಪಞ್ಞತ್ತಿ ಜಾನಿತಬ್ಬಾ. ಏಕತೋಪಞ್ಞತ್ತಿ ಜಾನಿತಬ್ಬಾ. ಉಭತೋಪಞ್ಞತ್ತಿ ಜಾನಿತಬ್ಬಾ. ಥುಲ್ಲವಜ್ಜಾ ಆಪತ್ತಿ ಜಾನಿತಬ್ಬಾ. ಅಥುಲ್ಲವಜ್ಜಾ ಆಪತ್ತಿ ಜಾನಿತಬ್ಬಾ. ಗಿಹಿಪಟಿಸಂಯುತ್ತಾ ಆಪತ್ತಿ ಜಾನಿತಬ್ಬಾ. ನ ಗಿಹಿಪಟಿಸಂಯುತ್ತಾ ಆಪತ್ತಿ ಜಾನಿತಬ್ಬಾ. ನಿಯತಾ ಆಪತ್ತಿ ಜಾನಿತಬ್ಬಾ. ಅನಿಯತಾ ಆಪತ್ತಿ ಜಾನಿತಬ್ಬಾ. ಆದಿಕರೋ ಪುಗ್ಗಲೋ ಜಾನಿತಬ್ಬೋ. ಅನಾದಿಕರೋ ಪುಗ್ಗಲೋ ಜಾನಿತಬ್ಬೋ. ಅಧಿಚ್ಚಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಅಭಿಣ್ಹಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಚೋದಕೋ ಪುಗ್ಗಲೋ ಜಾನಿತಬ್ಬೋ. ಚುದಿತಕೋ ಪುಗ್ಗಲೋ ಜಾನಿತಬ್ಬೋ. ಅಧಮ್ಮಚೋದಕೋ ಪುಗ್ಗಲೋ ಜಾನಿತಬ್ಬೋ. ಅಧಮ್ಮಚುದಿತಕೋ ಪುಗ್ಗಲೋ ಜಾನಿತಬ್ಬೋ. ಧಮ್ಮಚೋದಕೋ ಪುಗ್ಗಲೋ ಜಾನಿತಬ್ಬೋ. ಧಮ್ಮಚುದಿತಕೋ ಪುಗ್ಗಲೋ ಜಾನಿತಬ್ಬೋ. ನಿಯತೋ ಪುಗ್ಗಲೋ ಜಾನಿತಬ್ಬೋ. ಅನಿಯತೋ ಪುಗ್ಗಲೋ ಜಾನಿತಬ್ಬೋ. ಅಭಬ್ಬಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಭಬ್ಬಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಉಕ್ಖಿತ್ತಕೋ ಪುಗ್ಗಲೋ ಜಾನಿತಬ್ಬೋ. ಅನುಕ್ಖಿತ್ತಕೋ ಪುಗ್ಗಲೋ ಜಾನಿತಬ್ಬೋ. ನಾಸಿತಕೋ ಪುಗ್ಗಲೋ ಜಾನಿತಬ್ಬೋ. ಅನಾಸಿತಕೋ ಪುಗ್ಗಲೋ ಜಾನಿತಬ್ಬೋ. ಸಮಾನಸಂವಾಸಕೋ ಪುಗ್ಗಲೋ ಜಾನಿತಬ್ಬೋ. ಅಸಮಾನಸಂವಾಸಕೋ ಪುಗ್ಗಲೋ ಜಾನಿತಬ್ಬೋ. ಠಪನಂ ಜಾನಿತಬ್ಬನ್ತಿ.

ಏಕಕಂ ನಿಟ್ಠಿತಂ.

ತಸ್ಸುದ್ದಾನಂ –

ಕರಾ ಆಪತ್ತಿ ಲಹುಕಾ, ಸಾವಸೇಸಾ ಚ ದುಟ್ಠುಲ್ಲಾ;

ಪಟಿಕಮ್ಮದೇಸನಾ ಚ, ಅನ್ತರಾ ವಜ್ಜಕಿರಿಯಂ.

ಕಿರಿಯಾಕಿರಿಯಂ ಪುಬ್ಬಾ, ಅನ್ತರಾ ಗಣನೂಪಗಾ;

ಪಞ್ಞತ್ತಿ ಅನಾನುಪ್ಪನ್ನ, ಸಬ್ಬಸಾಧಾರಣಾ ಚ ಏಕತೋ [ಪಞ್ಞತ್ತಾನುಪ್ಪನ್ನಾ ಸಬ್ಬಾ, ಸಾಧಾರಣಾ ಚ ಏಕತೋ (ಸ್ಯಾ.)].

ಥುಲ್ಲಗಿಹಿನಿಯತಾ ಚ, ಆದಿ ಅಧಿಚ್ಚಚೋದಕೋ;

ಅಧಮ್ಮಧಮ್ಮನಿಯತೋ, ಅಭಬ್ಬೋಕ್ಖಿತ್ತನಾಸಿತಾ;

ಸಮಾನಂ ಠಪನಞ್ಚೇವ, ಉದ್ದಾನಂ ಏಕಕೇ ಇದನ್ತಿ.