೮. ತಬ್ಭಾಗಿಯವಾರೋ

೨೯೮. ಕತಿ ಸಮಥಾ ವಿವಾದಾಧಿಕರಣಸ್ಸ ತಬ್ಭಾಗಿಯಾ? ಕತಿ ಸಮಥಾ ವಿವಾದಾಧಿಕರಣಸ್ಸ ಅಞ್ಞಭಾಗಿಯಾ? ಕತಿ ಸಮಥಾ ಅನುವಾದಾಧಿಕರಣಸ್ಸ ತಬ್ಭಾಗಿಯಾ? ಕತಿ ಸಮಥಾ ಅನುವಾದಾಧಿಕರಣಸ್ಸ ಅಞ್ಞಭಾಗಿಯಾ? ಕತಿ ಸಮಥಾ ಆಪತ್ತಾಧಿಕರಣಸ್ಸ ತಬ್ಭಾಗಿಯಾ? ಕತಿ ಸಮಥಾ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಾ? ಕತಿ ಸಮಥಾ ಕಿಚ್ಚಾಧಿಕರಣಸ್ಸ ತಬ್ಭಾಗಿಯಾ? ಕತಿ ಸಮಥಾ ಕಿಚ್ಚಾಧಿಕರಣಸ್ಸ ಅಞ್ಞಭಾಗಿಯಾ?

ದ್ವೇ ಸಮಥಾ ವಿವಾದಾಧಿಕರಣಸ್ಸ ತಬ್ಭಾಗಿಯಾ – ಸಮ್ಮುಖಾವಿನಯೋ, ಯೇಭುಯ್ಯಸಿಕಾ. ಪಞ್ಚ ಸಮಥಾ ವಿವಾದಾಧಿಕರಣಸ್ಸ ಅಞ್ಞಭಾಗಿಯಾ – ಸತಿವಿನಯೋ, ಅಮೂಳ್ಹವಿನಯೋ, ಪಟಿಞ್ಞಾತಕರಣಂ, ತಸ್ಸಪಾಪಿಯಸಿಕಾ, ತಿಣವತ್ಥಾರಕೋ.

ಚತ್ತಾರೋ ಸಮಥಾ ಅನುವಾದಾಧಿಕರಣಸ್ಸ ತಬ್ಭಾಗಿಯಾ – ಸಮ್ಮುಖಾವಿನಯೋ, ಸತಿವಿನಯೋ, ಅಮೂಳ್ಹವಿನಯೋ, ತಸ್ಸಪಾಪಿಯಸಿಕಾ. ತಯೋ ಸಮಥಾ ಅನುವಾದಾಧಿಕರಣಸ್ಸ ಅಞ್ಞಭಾಗಿಯಾ – ಯೇಭುಯ್ಯಸಿಕಾ, ಪಟಿಞ್ಞಾತಕರಣಂ, ತಿಣವತ್ಥಾರಕೋ.

ತಯೋ ಸಮಥಾ ಆಪತ್ತಾಧಿಕರಣಸ್ಸ ತಬ್ಭಾಗಿಯಾ – ಸಮ್ಮುಖಾವಿನಯೋ, ಪಟಿಞ್ಞಾತಕರಣಂ, ತಿಣವತ್ಥಾರಕೋ. ಚತ್ತಾರೋ ಸಮಥಾ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಾ – ಯೇಭುಯ್ಯಸಿಕಾ, ಸತಿವಿನಯೋ, ಅಮೂಳ್ಹವಿನಯೋ, ತಸ್ಸಪಾಪಿಯಸಿಕಾ.

ಏಕೋ ಸಮಥೋ ಕಿಚ್ಚಾಧಿಕರಣಸ್ಸ ತಬ್ಭಾಗಿಯೋ – ಸಮ್ಮುಖಾವಿನಯೋ. ಛ ಸಮಥಾ ಕಿಚ್ಚಾಧಿಕರಣಸ್ಸ ಅಞ್ಞಭಾಗಿಯಾ – ಯೇಭುಯ್ಯಸಿಕಾ, ಸತಿವಿನಯೋ, ಅಮೂಳ್ಹವಿನಯೋ, ಪಟಿಞ್ಞಾತಕರಣಂ, ತಸ್ಸಪಾಪಿಯಸಿಕಾ, ತಿಣವತ್ಥಾರಕೋ.

ತಬ್ಭಾಗಿಯವಾರೋ ನಿಟ್ಠಿತೋ ಅಟ್ಠಮೋ.