೧೭. ಸಮ್ಮತಿವಾರೋ

೩೦೭. ವಿವಾದಾಧಿಕರಣಂ ಕತಿಹಿ ಸಮಥೇಹಿ ಸಮ್ಮತಿ? ಅನುವಾದಾಧಿಕರಣಂ ಕತಿಹಿ ಸಮಥೇಹಿ ಸಮ್ಮತಿ? ಆಪತ್ತಾಧಿಕರಣಂ ಕತಿಹಿ ಸಮಥೇಹಿ ಸಮ್ಮತಿ? ಕಿಚ್ಚಾಧಿಕರಣಂ ಕತಿಹಿ ಸಮಥೇಹಿ ಸಮ್ಮತಿ?

[ಚೂಳವ. ೨೨೮, ೨೩೬ ಆದಯೋ] ವಿವಾದಾಧಿಕರಣಂ ದ್ವೀಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ.

[ಚೂಳವ. ೨೨೮, ೨೩೬ ಆದಯೋ] ಅನುವಾದಾಧಿಕರಣಂ ಚತೂಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ.

[ಚೂಳವ. ೨೩೯, ೨೪೨ ಆದಯೋ] ಆಪತ್ತಾಧಿಕರಣಂ ತೀಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ.

[ಚೂಳವ. ೨೩೯, ೨೪೨ ಆದಯೋ] ಕಿಚ್ಚಾಧಿಕರಣಂ ಏಕೇನ ಸಮಥೇನ ಸಮ್ಮತಿ – ಸಮ್ಮುಖಾವಿನಯೇನ.

ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಪಞ್ಚಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ.

ವಿವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ವಿವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಚತೂಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ.

ವಿವಾದಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ವಿವಾದಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ದ್ವೀಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ.

ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಛಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ಚ ತಿಣವತ್ಥಾರಕೇನ ಚ.

ಅನುವಾದಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ಅನುವಾದಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಚತೂಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ.

ಆಪತ್ತಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ಆಪತ್ತಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ತೀಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ.

ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಸತ್ತಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ಚ ತಿಣವತ್ಥಾರಕೇನ ಚ.

ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಪಞ್ಚಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ.

ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಛಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ಚ ತಿಣವತ್ಥಾರಕೇನ ಚ.

ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಕತಿಹಿ ಸಮಥೇಹಿ ಸಮ್ಮನ್ತಿ? ವಿವಾದಾಧಿಕರಣಞ್ಚ ಅನುವಾದಾಧಿಕರಣಞ್ಚ ಆಪತ್ತಾಧಿಕರಣಞ್ಚ ಕಿಚ್ಚಾಧಿಕರಣಞ್ಚ ಸತ್ತಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ಚ ತಿಣವತ್ಥಾರಕೇನ ಚ.

ಸಮ್ಮತಿವಾರೋ ನಿಟ್ಠಿತೋ ಸತ್ತರಸಮೋ.