೧೨. ವಿನಯವಾರೋ

೩೦೨. ವಿನಯೋ ಸಮ್ಮುಖಾವಿನಯೋ, ಸಮ್ಮುಖಾವಿನಯೋ ವಿನಯೋ? ವಿನಯೋ ಯೇಭುಯ್ಯಸಿಕಾ, ಯೇಭುಯ್ಯಸಿಕಾ ವಿನಯೋ? ವಿನಯೋ ಸತಿವಿನಯೋ, ಸತಿವಿನಯೋ ವಿನಯೋ? ವಿನಯೋ ಅಮೂಳ್ಹವಿನಯೋ, ಅಮೂಳ್ಹವಿನಯೋ ವಿನಯೋ? ವಿನಯೋ ಪಟಿಞ್ಞಾತಕರಣಂ, ಪಟಿಞ್ಞಾತಕರಣಂ ವಿನಯೋ? ವಿನಯೋ ತಸ್ಸಪಾಪಿಯಸಿಕಾ, ತಸ್ಸಪಾಪಿಯಸಿಕಾ ವಿನಯೋ? ವಿನಯೋ ತಿಣವತ್ಥಾರಕೋ, ತಿಣವತ್ಥಾರಕೋ ವಿನಯೋ?

ವಿನಯೋ ಸಿಯಾ ಸಮ್ಮುಖಾವಿನಯೋ ಸಿಯಾ ನ ಸಮ್ಮುಖಾವಿನಯೋ. ಸಮ್ಮುಖಾವಿನಯೋ ವಿನಯೋ ಚೇವ ಸಮ್ಮುಖಾವಿನಯೋ ಚ.

ವಿನಯೋ ಸಿಯಾ ಯೇಭುಯ್ಯಸಿಕಾ, ಸಿಯಾ ನ ಯೇಭುಯ್ಯಸಿಕಾ. ಯೇಭುಯ್ಯಸಿಕಾ ವಿನಯೋ ಚೇವ ಯೇಭುಯ್ಯಸಿಕಾ ಚ.

ವಿನಯೋ ಸಿಯಾ ಸತಿವಿನಯೋ, ಸಿಯಾ ನ ಸತಿವಿನಯೋ. ಸತಿವಿನಯೋ ವಿನಯೋ ಚೇವ ಸತಿವಿನಯೋ ಚ.

ವಿನಯೋ ಸಿಯಾ ಅಮೂಳ್ಹವಿನಯೋ, ಸಿಯಾ ನ ಅಮೂಳ್ಹವಿನಯೋ. ಅಮೂಳ್ಹವಿನಯೋ ವಿನಯೋ ಚೇವ ಅಮೂಳ್ಹವಿನಯೋ ಚ.

ವಿನಯೋ ಸಿಯಾ ಪಟಿಞ್ಞಾತಕರಣಂ, ಸಿಯಾ ನ ಪಟಿಞ್ಞಾತಕರಣಂ. ಪಟಿಞ್ಞಾತಕರಣಂ ವಿನಯೋ ಚೇವ ಪಟಿಞ್ಞಾತಕರಣಞ್ಚ.

ವಿನಯೋ ಸಿಯಾ ತಸ್ಸಪಾಪಿಯಸಿಕಾ, ಸಿಯಾ ನ ತಸ್ಸಪಾಪಿಯಸಿಕಾ. ತಸ್ಸಪಾಪಿಯಸಿಕಾ ವಿನಯೋ ಚೇವ ತಸ್ಸಪಾಪಿಯಸಿಕಾ ಚ.

ವಿನಯೋ ಸಿಯಾ ತಿಣವತ್ಥಾರಕೋ, ಸಿಯಾ ನ ತಿಣವತ್ಥಾರಕೋ. ತಿಣವತ್ಥಾರಕೋ ವಿನಯೋ ಚೇವ ತಿಣವತ್ಥಾರಕೋ ಚ.

ವಿನಯವಾರೋ ನಿಟ್ಠಿತೋ ದ್ವಾದಸಮೋ.