೨. ಪಾರಾಜಿಕಾದಿಪಞ್ಹಾ

೪೮೦. ಇತ್ಥೀ ಚ ಅಬ್ಭನ್ತರೇ ಸಿಯಾ,

ಭಿಕ್ಖು ಚ ಬಹಿದ್ಧಾ ಸಿಯಾ;

ಛಿದ್ದಂ ತಸ್ಮಿಂ ಘರೇ ನತ್ಥಿ;

ಮೇಥುನಧಮ್ಮಪಚ್ಚಯಾ;

ಕಥಂ ಪಾರಾಜಿಕೋ ಸಿಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ತೇಲಂ ಮಧುಂ ಫಾಣಿತಞ್ಚಾಪಿ ಸಪ್ಪಿಂ;

ಸಾಮಂ ಗಹೇತ್ವಾನ ನಿಕ್ಖಿಪೇಯ್ಯ;

ಅವೀತಿವತ್ತೇ ಸತ್ತಾಹೇ;

ಸತಿ ಪಚ್ಚಯೇ ಪರಿಭುಞ್ಜನ್ತಸ್ಸ ಆಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನಿಸ್ಸಗ್ಗಿಯೇನ ಆಪತ್ತಿ;

ಸುದ್ಧಕೇನ ಪಾಚಿತ್ತಿಯಂ;

ಆಪಜ್ಜನ್ತಸ್ಸ ಏಕತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಭಿಕ್ಖೂ ಸಿಯಾ ವೀಸತಿಯಾ ಸಮಾಗತಾ;

ಕಮ್ಮಂ ಕರೇಯ್ಯುಂ ಸಮಗ್ಗಸಞ್ಞಿನೋ;

ಭಿಕ್ಖು ಸಿಯಾ ದ್ವಾದಸಯೋಜನೇ ಠಿತೋ;

ಕಮ್ಮಞ್ಚ ತಂ ಕುಪ್ಪೇಯ್ಯ ವಗ್ಗಪಚ್ಚಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಪದವೀತಿಹಾರಮತ್ತೇನ ವಾಚಾಯ ಭಣಿತೇನ ಚ;

ಸಬ್ಬಾನಿ ಗರುಕಾನಿ ಸಪ್ಪಟಿಕಮ್ಮಾನಿ;

ಚತುಸಟ್ಠಿ ಆಪತ್ತಿಯೋ ಆಪಜ್ಜೇಯ್ಯ ಏಕತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನಿವತ್ಥೋ ಅನ್ತರವಾಸಕೇನ;

ದಿಗುಣಂ ಸಙ್ಘಾಟಿಂ ಪಾರುತೋ;

ಸಬ್ಬಾನಿ ತಾನಿ ನಿಸ್ಸಗ್ಗಿಯಾನಿ ಹೋನ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ಚಾಪಿ ಞತ್ತಿ ನ ಚ ಪನ ಕಮ್ಮವಾಚಾ;

ನ ಚೇಹಿ ಭಿಕ್ಖೂತಿ ಜಿನೋ ಅವೋಚ;

ಸರಣಗಮನಮ್ಪಿ ನ ತಸ್ಸ ಅತ್ಥಿ;

ಉಪಸಮ್ಪದಾ ಚಸ್ಸ ಅಕುಪ್ಪಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಇತ್ಥಿಂ ಹನೇ ನ ಮಾತರಂ, ಪುರಿಸಞ್ಚ ನ ಪಿತರಂ ಹನೇ;

ಹನೇಯ್ಯ ಅನರಿಯಂ ಮನ್ದೋ, ತೇನ ಚಾನನ್ತರಂ ಫುಸೇ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಇತ್ಥಿಂ ಹನೇ ಚ ಮಾತರಂ, ಪುರಿಸಞ್ಚ ಪಿತರಂ ಹನೇ;

ಮಾತರಂ ಪಿತರಂ ಹನ್ತ್ವಾ, ನ ತೇನಾನನ್ತರಂ ಫುಸೇ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಅಚೋದಯಿತ್ವಾ ಅಸ್ಸಾರಯಿತ್ವಾ;

ಅಸಮ್ಮುಖೀಭೂತಸ್ಸ ಕರೇಯ್ಯ ಕಮ್ಮಂ;

ಕತಞ್ಚ ಕಮ್ಮಂ ಸುಕತಂ ಭವೇಯ್ಯ;

ಕಾರಕೋ ಚ ಸಙ್ಘೋ ಅನಾಪತ್ತಿಕೋ ಸಿಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಚೋದಯಿತ್ವಾ ಸಾರಯಿತ್ವಾ;

ಸಮ್ಮುಖೀಭೂತಸ್ಸ ಕರೇಯ್ಯ ಕಮ್ಮಂ;

ಕತಞ್ಚ ಕಮ್ಮಂ ಅಕತಂ ಭವೇಯ್ಯ;

ಕಾರಕೋ ಚ ಸಙ್ಘೋ ಸಾಪತ್ತಿಕೋ ಸಿಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಛಿನ್ದನ್ತಸ್ಸ ಆಪತ್ತಿ, ಛಿನ್ದನ್ತಸ್ಸ ಅನಾಪತ್ತಿ;

ಛಾದೇನ್ತಸ್ಸ ಆಪತ್ತಿ, ಛಾದೇನ್ತಸ್ಸ ಅನಾಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಸಚ್ಚಂ ಭಣನ್ತೋ ಗರುಕಂ, ಮುಸಾ ಚ ಲಹು ಭಾಸತೋ;

ಮುಸಾ ಭಣನ್ತೋ ಗರುಕಂ, ಸಚ್ಚಞ್ಚ ಲಹು ಭಾಸತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.