೩. ಪಾಚಿತ್ತಿಯಾದಿಪಞ್ಹಾ

೪೮೧. ಅಧಿಟ್ಠಿತಂ ರಜನಾಯ ರತ್ತಂ;

ಕಪ್ಪಕತಮ್ಪಿ ಸನ್ತಂ;

ಪರಿಭುಞ್ಜನ್ತಸ್ಸ ಆಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಅತ್ಥಙ್ಗತೇ ಸೂರಿಯೇ ಭಿಕ್ಖು ಮಂಸಾನಿ ಖಾದತಿ;

ನ ಉಮ್ಮತ್ತಕೋ ನ ಚ ಪನ ಖಿತ್ತಚಿತ್ತೋ;

ನ ಚಾಪಿ ಸೋ ವೇದನಾಟ್ಟೋ ಭವೇಯ್ಯ;

ನ ಚಸ್ಸ ಹೋತಿ ಆಪತ್ತಿ;

ಸೋ ಚ ಧಮ್ಮೋ ಸುಗತೇನ ದೇಸಿತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ರತ್ತಚಿತ್ತೋ ನ ಚ ಪನ ಥೇಯ್ಯಚಿತ್ತೋ;

ನ ಚಾಪಿ ಸೋ ಪರಂ ಮರಣಾಯ ಚೇತಯಿ;

ಸಲಾಕಂ ದೇನ್ತಸ್ಸ ಹೋತಿ ಛೇಜ್ಜಂ;

ಪಟಿಗ್ಗಣ್ಹನ್ತಸ್ಸ ಥುಲ್ಲಚ್ಚಯಂ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ಚಾಪಿ ಆರಞ್ಞಕಂ ಸಾಸಙ್ಕಸಮ್ಮತಂ;

ನ ಚಾಪಿ ಸಙ್ಘೇನ ಸಮ್ಮುತಿ ದಿನ್ನಾ;

ನ ಚಸ್ಸ ಕಥಿನಂ ಅತ್ಥತಂ ತತ್ಥೇವ;

ಚೀವರಂ ನಿಕ್ಖಿಪಿತ್ವಾ ಗಚ್ಛೇಯ್ಯ ಅಡ್ಢಯೋಜನಂ;

ತತ್ಥೇವ ಅರುಣಂ ಉಗ್ಗಚ್ಛನ್ತಸ್ಸ ಅನಾಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಕಾಯಿಕಾನಿ ನ ವಾಚಸಿಕಾನಿ;

ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ ಆಪಜ್ಜೇಯ್ಯ ಏಕತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ವಾಚಸಿಕಾನಿ ನ ಕಾಯಿಕಾನಿ;

ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ ಆಪಜ್ಜೇಯ್ಯ ಏಕತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ತಿಸ್ಸಿತ್ಥಿಯೋ ಮೇಥುನಂ ತಂ ನ ಸೇವೇ;

ತಯೋ ಪುರಿಸೇ ತಯೋ ಅನರಿಯಪಣ್ಡಕೇ;

ನ ಚಾಚರೇ ಮೇಥುನಂ ಬ್ಯಞ್ಜನಸ್ಮಿಂ;

ಛೇಜ್ಜಂ ಸಿಯಾ ಮೇಥುನಧಮ್ಮಪಚ್ಚಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಮಾತರಂ ಚೀವರಂ ಯಾಚೇ, ನೋ ಚ ಸಙ್ಘೇ [ನೋ ಸಂಘಸ್ಸ (ಕ.), ನೋ ಚ ಸಂಘಸ್ಸ (ಸ್ಯಾ.), ನೋ ಚೇ ಸಂಘಸ್ಸ (ಸೀ.)] ಪರಿಣತಂ;

ಕೇನಸ್ಸ ಹೋತಿ ಆಪತ್ತಿ, ಅನಾಪತ್ತಿ ಚ ಞಾತಕೇ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಕುದ್ಧೋ ಆರಾಧಕೋ ಹೋತಿ, ಕುದ್ಧೋ ಹೋತಿ ಗರಹಿಯೋ;

ಅಥ ಕೋ ನಾಮ ಸೋ ಧಮ್ಮೋ, ಯೇನ ಕುದ್ಧೋ ಪಸಂಸಿಯೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ತುಟ್ಠೋ ಆರಾಧಕೋ ಹೋತಿ, ತುಟ್ಠೋ ಹೋತಿ ಗರಹಿಯೋ;

ಅಥ ಕೋ ನಾಮ ಸೋ ಧಮ್ಮೋ, ಯೇನ ತುಟ್ಠೋ ಗರಹಿಯೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಸಙ್ಘಾದಿಸೇಸಂ ಥುಲ್ಲಚ್ಚಯಂ;

ಪಾಚಿತ್ತಿಯಂ ಪಾಟಿದೇಸನೀಯಂ;

ದುಕ್ಕಟಂ ಆಪಜ್ಜೇಯ್ಯ ಏಕತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಉಭೋ ಪರಿಪುಣ್ಣವೀಸತಿವಸ್ಸಾ;

ಉಭಿನ್ನಂ ಏಕುಪಜ್ಝಾಯೋ;

ಏಕಾಚರಿಯೋ ಏಕಾ ಕಮ್ಮವಾಚಾ;

ಏಕೋ ಉಪಸಮ್ಪನ್ನೋ ಏಕೋ ಅನುಪಸಮ್ಪನ್ನೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಅಕಪ್ಪಕತಂ ನಾಪಿ ರಜನಾಯ ರತ್ತಂ;

ತೇನ ನಿವತ್ಥೋ ಯೇನ ಕಾಮಂ ವಜೇಯ್ಯ;

ನ ಚಸ್ಸ ಹೋತಿ ಆಪತ್ತಿ;

ಸೋ ಚ ಧಮ್ಮೋ ಸುಗತೇನ ದೇಸಿತೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ದೇತಿ ನ ಪಟಿಗ್ಗಣ್ಹಾತಿ, ಪಟಿಗ್ಗಹೋ ತೇನ ನ ವಿಜ್ಜತಿ;

ಆಪಜ್ಜತಿ ಗರುಕಂ ನ ಲಹುಕಂ, ತಞ್ಚ ಪರಿಭೋಗಪಚ್ಚಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ದೇತಿ ನ ಪಟಿಗ್ಗಣ್ಹಾತಿ, ಪಟಿಗ್ಗಹೋ ತೇನ ನ ವಿಜ್ಜತಿ;

ಆಪಜ್ಜತಿ ಲಹುಕಂ ನ ಗರುಕಂ, ತಞ್ಚ ಪರಿಭೋಗಪಚ್ಚಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಆಪಜ್ಜತಿ ಗರುಕಂ ಸಾವಸೇಸಂ;

ಛಾದೇತಿ ಅನಾದರಿಯಂ ಪಟಿಚ್ಚ;

ನ ಭಿಕ್ಖುನೀ ನೋ ಚ ಫುಸೇಯ್ಯ ವಜ್ಜಂ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಸೇದಮೋಚನಗಾಥಾ ನಿಟ್ಠಿತಾ.