೧. ಅವಿಪ್ಪವಾಸಪಞ್ಹಾ

೪೭೯. ಅಸಂವಾಸೋ ಭಿಕ್ಖೂಹಿ ಚ ಭಿಕ್ಖುನೀಹಿ ಚ;

ಸಮ್ಭೋಗೋ ಏಕಚ್ಚೋ ತಹಿಂ ನ ಲಬ್ಭತಿ;

ಅವಿಪ್ಪವಾಸೇನ ಅನಾಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಅವಿಸ್ಸಜ್ಜಿಯಂ ಅವೇಭಙ್ಗಿಯಂ;

ಪಞ್ಚ ವುತ್ತಾ ಮಹೇಸಿನಾ;

ವಿಸ್ಸಜ್ಜನ್ತಸ್ಸ ಪರಿಭುಞ್ಜನ್ತಸ್ಸ ಅನಾಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ದಸ ಪುಗ್ಗಲೇ ನ ವದಾಮಿ, ಏಕಾದಸ ವಿವಜ್ಜಿಯ;

ವುಡ್ಢಂ ವನ್ದನ್ತಸ್ಸ ಆಪತ್ತಿ, ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ಉಕ್ಖಿತ್ತಕೋ ನ ಚ ಪನ ಪಾರಿವಾಸಿಕೋ;

ನ ಸಙ್ಘಭಿನ್ನೋ ನ ಚ ಪನ ಪಕ್ಖಸಙ್ಕನ್ತೋ;

ಸಮಾನಸಂವಾಸಕಭೂಮಿಯಾ ಠಿತೋ;

ಕಥಂ ನು ಸಿಕ್ಖಾಯ ಅಸಾಧಾರಣೋ ಸಿಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಉಪೇತಿ ಧಮ್ಮಂ ಪರಿಪುಚ್ಛಮಾನೋ, ಕುಸಲಂ ಅತ್ಥೂಪಸಞ್ಹಿತಂ;

ನ ಜೀವತಿ ನ ಮತೋ ನ ನಿಬ್ಬುತೋ, ತಂ ಪುಗ್ಗಲಂ ಕತಮಂ ವದನ್ತಿ ಬುದ್ಧಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಉಬ್ಭಕ್ಖಕೇ ನ ವದಾಮಿ, ಅಧೋ ನಾಭಿಂ ವಿವಜ್ಜಿಯ;

ಮೇಥುನಧಮ್ಮಪಚ್ಚಯಾ, ಕಥಂ ಪಾರಾಜಿಕೋ ಸಿಯಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಭಿಕ್ಖು ಸಞ್ಞಾಚಿಕಾಯ ಕುಟಿಂ ಕರೋತಿ;

ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ;

ಸಾರಮ್ಭಂ ಅಪರಿಕ್ಕಮನಂ ಅನಾಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಭಿಕ್ಖು ಸಞ್ಞಾಚಿಕಾಯ ಕುಟಿಂ ಕರೋತಿ;

ದೇಸಿತವತ್ಥುಕಂ ಪಮಾಣಿಕಂ;

ಅನಾರಮ್ಭಂ ಸಪರಿಕ್ಕಮನಂ ಆಪತ್ತಿ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ಕಾಯಿಕಂ ಕಿಞ್ಚಿ ಪಯೋಗಮಾಚರೇ;

ನ ಚಾಪಿ ವಾಚಾಯ ಪರೇ ಭಣೇಯ್ಯ;

ಆಪಜ್ಜೇಯ್ಯ ಗರುಕಂ ಛೇಜ್ಜವತ್ಥುಂ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ನ ಕಾಯಿಕಂ ವಾಚಸಿಕಞ್ಚ ಕಿಞ್ಚಿ;

ಮನಸಾಪಿ ಸನ್ತೋ ನ ಕರೇಯ್ಯ ಪಾಪಂ;

ಸೋ ನಾಸಿತೋ ಕಿನ್ತಿ ಸುನಾಸಿತೋ ಭವೇ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಅನಾಲಪನ್ತೋ ಮನುಜೇನ ಕೇನಚಿ;

ವಾಚಾಗಿರಂ ನೋ ಚ ಪರೇ ಭಣೇಯ್ಯ;

ಆಪಜ್ಜೇಯ್ಯ ವಾಚಸಿಕಂ ನ ಕಾಯಿಕಂ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಸಿಕ್ಖಾಪದಾ ಬುದ್ಧವರೇನ ವಣ್ಣಿತಾ;

ಸಙ್ಘಾದಿಸೇಸಾ ಚತುರೋ ಭವೇಯ್ಯುಂ;

ಆಪಜ್ಜೇಯ್ಯ ಏಕಪಯೋಗೇನ ಸಬ್ಬೇ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಉಭೋ ಏಕತೋ ಉಪಸಮ್ಪನ್ನಾ;

ಉಭಿನ್ನಂ ಹತ್ಥತೋ ಚೀವರಂ ಪಟಿಗ್ಗಣ್ಹೇಯ್ಯ;

ಸಿಯಾ ಆಪತ್ತಿಯೋ ನಾನಾ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.

ಚತುರೋ ಜನಾ ಸಂವಿಧಾಯ;

ಗರುಭಣ್ಡಂ ಅವಾಹರುಂ;

ತಯೋ ಪಾರಾಜಿಕಾ ಏಕೋ ನ ಪಾರಾಜಿಕೋ;

ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ.