೬. ಪಲಿಬೋಧಪಞ್ಹಾಬ್ಯಾಕರಣಂ

೪೧೫. ಪಕ್ಕಮನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ಪಕ್ಕಮನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ಚೀವರಪಲಿಬೋಧೋ ಪಠಮಂ ಛಿಜ್ಜತಿ;

ತಸ್ಸ ಸಹ ಬಹಿಸೀಮಗಮನಾ, ಆವಾಸಪಲಿಬೋಧೋ ಛಿಜ್ಜತಿ.

ನಿಟ್ಠಾನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ನಿಟ್ಠಾನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ಆವಾಸಪಲಿಬೋಧೋ ಪಠಮಂ ಛಿಜ್ಜತಿ;

ಚೀವರೇ ನಿಟ್ಠಿತೇ ಚೀವರಪಲಿಬೋಧೋ ಛಿಜ್ಜತಿ.

ಸನ್ನಿಟ್ಠಾನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ಸನ್ನಿಟ್ಠಾನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ದ್ವೇ ಪಲಿಬೋಧಾ ಅಪುಬ್ಬಂ ಅಚರಿಮಂ ಛಿಜ್ಜನ್ತಿ.

ನಾಸನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ನಾಸನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ಆವಾಸಪಲಿಬೋಧೋ ಪಠಮಂ ಛಿಜ್ಜತಿ;

ಚೀವರೇ ನಟ್ಠೇ ಚೀವರಪಲಿಬೋಧೋ ಛಿಜ್ಜತಿ.

ಸವನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ಸವನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ಚೀವರಪಲಿಬೋಧೋ ಪಠಮಂ ಛಿಜ್ಜತಿ;

ತಸ್ಸ ಸಹ ಸವನೇನ, ಆವಾಸಪಲಿಬೋಧೋ ಛಿಜ್ಜತಿ.

ಆಸಾವಚ್ಛೇದಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ಆಸಾವಚ್ಛೇದಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ಆವಾಸಪಲಿಬೋಧೋ ಪಠಮಂ ಛಿಜ್ಜತಿ;

ಚೀವರಾಸಾಯ ಉಪಚ್ಛಿನ್ನಾಯ ಚೀವರಪಲಿಬೋಧೋ ಛಿಜ್ಜತಿ.

ಸೀಮಾತಿಕ್ಕಮನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ಸೀಮಾತಿಕ್ಕಮನನ್ತಿಕೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ಚೀವರಪಲಿಬೋಧೋ ಪಠಮಂ ಛಿಜ್ಜತಿ;

ತಸ್ಸ ಬಹಿಸೀಮೇ [ಬಹಿಸೀಮಗತಸ್ಸ (ಸೀ. ಸ್ಯಾ.)] ಆವಾಸಪಲಿಬೋಧೋ ಛಿಜ್ಜತಿ.

ಸಹುಬ್ಭಾರೋ ಕಥಿನುದ್ಧಾರೋ [ಸಉಬ್ಭಾರೋ (ಕ.)], ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ಪುಚ್ಛಾಮಿ, ಕತಮೋ ಪಲಿಬೋಧೋ ಪಠಮಂ ಛಿಜ್ಜತಿ.

ಸಹುಬ್ಭಾರೋ ಕಥಿನುದ್ಧಾರೋ, ವುತ್ತೋ ಆದಿಚ್ಚಬನ್ಧುನಾ;

ಏತಞ್ಚ ತಾಹಂ ವಿಸ್ಸಜ್ಜಿಸ್ಸಂ, ದ್ವೇ ಪಲಿಬೋಧಾ ಅಪುಬ್ಬಂ ಅಚರಿಮಂ ಛಿಜ್ಜನ್ತೀತಿ.

೪೧೬. ಕತಿ ಕಥಿನುದ್ಧಾರಾ ಸಙ್ಘಾಧೀನಾ? ಕತಿ ಕಥಿನುದ್ಧಾರಾ ಪುಗ್ಗಲಾಧೀನಾ? ಕತಿ ಕಥಿನುದ್ಧಾರಾ ನೇವ ಸಙ್ಘಾಧೀನಾ ನ ಪುಗ್ಗಲಾಧೀನಾ? ಏಕೋ ಕಥಿನುದ್ಧಾರೋ ಸಙ್ಘಾಧೀನೋ – ಅನ್ತರುಬ್ಭಾರೋ. ಚತ್ತಾರೋ ಕಥಿನುದ್ಧಾರಾ ಪುಗ್ಗಲಾಧೀನಾ – ಪಕ್ಕಮನನ್ತಿಕೋ, ನಿಟ್ಠಾನನ್ತಿಕೋ, ಸನ್ನಿಟ್ಠಾನನ್ತಿಕೋ, ಸೀಮಾತಿಕ್ಕಮನನ್ತಿಕೋ. ಚತ್ತಾರೋ ಕಥಿನುದ್ಧಾರಾ ನೇವ ಸಙ್ಘಾಧೀನಾ ನ ಪುಗ್ಗಲಾಧೀನಾ – ನಾಸನನ್ತಿಕೋ, ಸವನನ್ತಿಕೋ, ಆಸಾವಚ್ಛೇದಿಕೋ, ಸಹುಬ್ಭಾರೋ. ಕತಿ ಕಥಿನುದ್ಧಾರಾ ಅನ್ತೋಸೀಮಾಯ ಉದ್ಧರಿಯ್ಯನ್ತಿ? ಕತಿ ಕಥಿನುದ್ಧಾರಾ ಬಹಿಸೀಮಾಯ ಉದ್ಧರಿಯ್ಯನ್ತಿ? ಕತಿ ಕಥಿನುದ್ಧಾರಾ ಸಿಯಾ ಅನ್ತೋಸೀಮಾಯ ಉದ್ಧರಿಯ್ಯನ್ತಿ ಸಿಯಾ ಬಹಿಸೀಮಾಯ ಉದ್ಧರಿಯ್ಯನ್ತಿ? ದ್ವೇ ಕಥಿನುದ್ಧಾರಾ ಅನ್ತೋಸೀಮಾಯ ಉದ್ಧರಿಯ್ಯನ್ತಿ – ಅನ್ತರುಬ್ಭಾರೋ, ಸಹುಬ್ಭಾರೋ. ತಯೋ ಕಥಿನುದ್ಧಾರಾ ಬಹಿಸೀಮಾಯ ಉದ್ಧರಿಯ್ಯನ್ತಿ – ಪಕ್ಕಮನನ್ತಿಕೋ, ಸವನನ್ತಿಕೋ, ಸೀಮಾತಿಕ್ಕಮನನ್ತಿಕೋ. ಚತ್ತಾರೋ ಕಥಿನುದ್ಧಾರಾ ಸಿಯಾ ಅನ್ತೋಸೀಮಾಯ ಉದ್ಧರಿಯ್ಯನ್ತಿ ಸಿಯಾ ಬಹಿಸೀಮಾಯ ಉದ್ಧರಿಯ್ಯನ್ತಿ – ನಿಟ್ಠಾನನ್ತಿಕೋ, ಸನ್ನಿಟ್ಠಾನನ್ತಿಕೋ, ನಾಸನನ್ತಿಕೋ, ಆಸಾವಚ್ಛೇದಿಕೋ.

ಕತಿ ಕಥಿನುದ್ಧಾರಾ ಏಕುಪ್ಪಾದಾ ಏಕನಿರೋಧಾ? ಕತಿ ಕಥಿನುದ್ಧಾರಾ ಏಕುಪ್ಪಾದಾ ನಾನಾನಿರೋಧಾ? ದ್ವೇ ಕಥಿನುದ್ಧಾರಾ ಏಕುಪ್ಪಾದಾ ಏಕನಿರೋಧಾ – ಅನ್ತರುಬ್ಭಾರೋ, ಸಹುಬ್ಭಾರೋ. ಅವಸೇಸಾ ಕಥಿನುದ್ಧಾರಾ ಏಕುಪ್ಪಾದಾ ನಾನಾನಿರೋಧಾತಿ.

ಕಥಿನಭೇದೋ ನಿಟ್ಠಿತೋ.