೫. ಪುಗ್ಗಲಸ್ಸೇವಕಥಿನತ್ಥಾರೋ

೪೧೪. ಸಙ್ಘೋ ಕಥಿನಂ ಅತ್ಥರತಿ, ಗಣೋ ಕಥಿನಂ ಅತ್ಥರತಿ, ಪುಗ್ಗಲೋ ಕಥಿನಂ ಅತ್ಥರತೀತಿ. ನ ಸಙ್ಘೋ ಕಥಿನಂ ಅತ್ಥರತಿ, ನ ಗಣೋ ಕಥಿನಂ ಅತ್ಥರತಿ, ಪುಗ್ಗಲೋ ಕಥಿನಂ ಅತ್ಥರತೀತಿ. ಹಞ್ಚಿ ನ ಸಙ್ಘೋ ಕಥಿನಂ ಅತ್ಥರತಿ, ನ ಗಣೋ ಕಥಿನಂ ಅತ್ಥರತಿ, ಪುಗ್ಗಲೋ ಕಥಿನಂ ಅತ್ಥರತಿ. ಸಙ್ಘಸ್ಸ ಅನತ್ಥತಂ ಹೋತಿ ಕಥಿನಂ, ಗಣಸ್ಸ ಅನತ್ಥತಂ ಹೋತಿ ಕಥಿನಂ, ಪುಗ್ಗಲಸ್ಸ ಅತ್ಥತಂ ಹೋತಿ ಕಥಿನಂ. ಸಙ್ಘೋ ಪಾತಿಮೋಕ್ಖಂ ಉದ್ದಿಸತಿ ಗಣೋ ಪಾತಿಮೋಕ್ಖಂ ಉದ್ದಿಸತಿ ಪುಗ್ಗಲೋ ಪಾತಿಮೋಕ್ಖಂ ಉದ್ದಿಸತೀತಿ ನ ಸಙ್ಘೋ ಪಾತಿಮೋಕ್ಖಂ ಉದ್ದಿಸತಿ, ನ ಗಣೋ ಪಾತಿಮೋಕ್ಖಂ ಉದ್ದಿಸತಿ, ಪುಗ್ಗಲೋ ಪಾತಿಮೋಕ್ಖಂ ಉದ್ದಿಸತೀತಿ. ಹಞ್ಚಿ ನ ಸಙ್ಘೋ ಪಾತಿಮೋಕ್ಖಂ ಉದ್ದಿಸತಿ, ನ ಗಣೋ ಪಾತಿಮೋಕ್ಖಂ ಉದ್ದಿಸತಿ, ಪುಗ್ಗಲೋ ಪಾತಿಮೋಕ್ಖಂ ಉದ್ದಿಸತಿ. ಸಙ್ಘಸ್ಸ ಅನುದ್ದಿಟ್ಠಂ ಹೋತಿ ಪಾತಿಮೋಕ್ಖಂ, ಗಣಸ್ಸ ಅನುದ್ದಿಟ್ಠಂ ಹೋತಿ ಪಾತಿಮೋಕ್ಖಂ, ಪುಗ್ಗಲಸ್ಸ ಉದ್ದಿಟ್ಠಂ ಹೋತಿ ಪಾತಿಮೋಕ್ಖಂ. ಸಙ್ಘಸ್ಸ ಸಾಮಗ್ಗಿಯಾ ಗಣಸ್ಸ ಸಾಮಗ್ಗಿಯಾ ಪುಗ್ಗಲಸ್ಸ ಉದ್ದೇಸಾ ಸಙ್ಘಸ್ಸ ಉದ್ದಿಟ್ಠಂ ಹೋತಿ ಪಾತಿಮೋಕ್ಖಂ, ಗಣಸ್ಸ ಉದ್ದಿಟ್ಠಂ ಹೋತಿ ಪಾತಿಮೋಕ್ಖಂ, ಪುಗ್ಗಲಸ್ಸ ಉದ್ದಿಟ್ಠಂ ಹೋತಿ ಪಾತಿಮೋಕ್ಖಂ. ಏವಮೇವ ನ ಸಙ್ಘೋ ಕಥಿನಂ ಅತ್ಥರತಿ, ನ ಗಣೋ ಕಥಿನಂ ಅತ್ಥರತಿ, ಪುಗ್ಗಲೋ ಕಥಿನಂ ಅತ್ಥರತಿ. ಸಙ್ಘಸ್ಸ ಅನುಮೋದನಾಯ ಗಣಸ್ಸ ಅನುಮೋದನಾಯ ಪುಗ್ಗಲಸ್ಸ ಅತ್ಥಾರಾ ಸಙ್ಘಸ್ಸ ಅತ್ಥತಂ ಹೋತಿ ಕಥಿನಂ, ಗಣಸ್ಸ ಅತ್ಥತಂ ಹೋತಿ ಕಥಿನಂ, ಪುಗ್ಗಲಸ್ಸ ಅತ್ಥತಂ ಹೋತಿ ಕಥಿನನ್ತಿ.