೪. ಕಥಿನಾದಿಜಾನಿತಬ್ಬವಿಭಾಗೋ

೪೧೨. ಕಥಿನಂ ಜಾನಿತಬ್ಬಂ, ಕಥಿನತ್ಥಾರೋ ಜಾನಿತಬ್ಬೋ, ಕಥಿನಸ್ಸ ಅತ್ಥಾರಮಾಸೋ ಜಾನಿತಬ್ಬೋ, ಕಥಿನಸ್ಸ ಅತ್ಥಾರವಿಪತ್ತಿ ಜಾನಿತಬ್ಬಾ, ಕಥಿನಸ್ಸ ಅತ್ಥಾರಸಮ್ಪತ್ತಿ ಜಾನಿತಬ್ಬಾ, ನಿಮಿತ್ತಕಮ್ಮಂ ಜಾನಿತಬ್ಬಂ, ಪರಿಕಥಾ ಜಾನಿತಬ್ಬಾ, ಕುಕ್ಕುಕತಂ ಜಾನಿತಬ್ಬಂ, ಸನ್ನಿಧಿ ಜಾನಿತಬ್ಬಾ, ನಿಸ್ಸಗ್ಗಿಯಂ ಜಾನಿತಬ್ಬಂ.

ಕಥಿನಂ ಜಾನಿತಬ್ಬನ್ತಿ ತೇಸಞ್ಞೇವ ಧಮ್ಮಾನಂ ಸಙ್ಗಹೋ ಸಮವಾಯೋ ನಾಮಂ ನಾಮಕಮ್ಮಂ ನಾಮಧೇಯ್ಯಂ ನಿರುತ್ತಿ ಬ್ಯಞ್ಜನಂ ಅಭಿಲಾಪೋ ಯದಿದಂ ಕಥಿನನ್ತಿ.

ಕಥಿನಸ್ಸ ಅತ್ಥಾರಮಾಸೋ ಜಾನಿತಬ್ಬೋತಿ ವಸ್ಸಾನಸ್ಸ ಪಚ್ಛಿಮೋ ಮಾಸೋ ಜಾನಿತಬ್ಬೋ.

ಕಥಿನಸ್ಸ ಅತ್ಥಾರವಿಪತ್ತಿ ಜಾನಿತಬ್ಬಾತಿ ಚತುವೀಸತಿಯಾ ಆಕಾರೇಹಿ ಕಥಿನಸ್ಸ ಅತ್ಥಾರವಿಪತ್ತಿ ಜಾನಿತಬ್ಬಾ.

ಕಥಿನಸ್ಸ ಅತ್ಥಾರಸಮ್ಪತ್ತಿ ಜಾನಿತಬ್ಬಾತಿ ಸತ್ತರಸಹಿ ಆಕಾರೇಹಿ ಕಥಿನಸ್ಸ ಅತ್ಥಾರಸಮ್ಪತ್ತಿ ಜಾನಿತಬ್ಬಾ.

ನಿಮಿತ್ತಕಮ್ಮಂ ಜಾನಿತಬ್ಬನ್ತಿ ನಿಮಿತ್ತಂ ಕರೋತಿ ಇಮಿನಾ ದುಸ್ಸೇನ ಕಥಿನಂ ಅತ್ಥರಿಸ್ಸಾಮೀತಿ.

ಪರಿಕಥಾ ಜಾನಿತಬ್ಬಾತಿ ಪರಿಕಥಂ ಕರೋತಿ ಇಮಾಯ ಪರಿಕಥಾಯ ಕಥಿನದುಸ್ಸಂ ನಿಬ್ಬತ್ತೇಸ್ಸಾಮೀತಿ.

ಕುಕ್ಕುಕತಂ ಜಾನಿತಬ್ಬನ್ತಿ ಅನಾದಿಯದಾನಂ ಜಾನಿತಬ್ಬಂ.

ಸನ್ನಿಧಿ ಜಾನಿತಬ್ಬಾತಿ ದ್ವೇ ಸನ್ನಿಧಿಯೋ ಜಾನಿತಬ್ಬಾ – ಕರಣಸನ್ನಿಧಿ ವಾ ನಿಚಯಸನ್ನಿಧಿ ವಾ.

ನಿಸ್ಸಗ್ಗಿಯಂ ಜಾನಿತಬ್ಬನ್ತಿ ಕರಿಯಮಾನೇ ಅರುಣಂ ಉಟ್ಠಹತಿ.

ಕಥಿನತ್ಥಾರೋ ಜಾನಿತಬ್ಬೋತಿ ಸಚೇ ಸಙ್ಘಸ್ಸ ಕಥಿನದುಸ್ಸಂ ಉಪ್ಪನ್ನಂ ಹೋತಿ, ಸಙ್ಘೇನ ಕಥಂ ಪಟಿಪಜ್ಜಿತಬ್ಬಂ, ಅತ್ಥಾರಕೇನ ಕಥಂ ಪಟಿಪಜ್ಜಿತಬ್ಬಂ, ಅನುಮೋದಕೇನ ಕಥಂ ಪಟಿಪಜ್ಜಿತಬ್ಬಂ.

೪೧೩. ಸಙ್ಘೇನ ಞತ್ತಿದುತಿಯೇನ ಕಮ್ಮೇನ ಕಥಿನತ್ಥಾರಕಸ್ಸ ಭಿಕ್ಖುನೋ ದಾತಬ್ಬಂ, ತೇನ ಕಥಿನತ್ಥಾರಕೇನ ಭಿಕ್ಖುನಾ ತದಹೇವ ಧೋವಿತ್ವಾ ವಿಮಜ್ಜಿತ್ವಾ ವಿಚಾರೇತ್ವಾ ಛಿನ್ದಿತ್ವಾ ಸಿಬ್ಬೇತ್ವಾ ರಜಿತ್ವಾ ಕಪ್ಪಂ ಕತ್ವಾ ಕಥಿನಂ ಅತ್ಥರಿತಬ್ಬಂ. ಸಚೇ ಸಙ್ಘಾಟಿಯಾ ಕಥಿನಂ ಅತ್ಥರಿತುಕಾಮೋ ಹೋತಿ, ಪೋರಾಣಿಕಾ ಸಙ್ಘಾಟಿ ಪಚ್ಚುದ್ಧರಿತಬ್ಬಾ, ನವಾ ಸಙ್ಘಾಟಿ ಅಧಿಟ್ಠಾತಬ್ಬಾ. ಇಮಾಯ ಸಙ್ಘಾಟಿಯಾ ಕಥಿನಂ ಅತ್ಥರಾಮೀತಿ ವಾಚಾ ಭಿನ್ದಿತಬ್ಬಾ. ಸಚೇ ಉತ್ತರಾಸಙ್ಗೇನ ಕಥಿನಂ ಅತ್ಥರಿತುಕಾಮೋ ಹೋತಿ, ಪೋರಾಣಕೋ ಉತ್ತರಾಸಙ್ಗೋ ಪಚ್ಚುದ್ಧರಿತಬ್ಬೋ, ನವೋ ಉತ್ತರಾಸಙ್ಗೋ ಅಧಿಟ್ಠಾತಬ್ಬೋ. ಇಮಿನಾ ಉತ್ತರಾಸಙ್ಗೇನ ಕಥಿನಂ ಅತ್ಥರಾಮೀತಿ ವಾಚಾ ಭಿನ್ದಿತಬ್ಬಾ. ಸಚೇ ಅನ್ತರವಾಸಕೇನ ಕಥಿನಂ ಅತ್ಥರಿತುಕಾಮೋ ಹೋತಿ, ಪೋರಾಣಕೋ ಅನ್ತರವಾಸಕೋ ಪಚ್ಚುದ್ಧರಿತಬ್ಬೋ, ನವೋ ಅನ್ತರವಾಸಕೋ ಅಧಿಟ್ಠಾತಬ್ಬೋ. ಇಮಿನಾ ಅನ್ತರವಾಸಕೇನ ಕಥಿನಂ ಅತ್ಥರಾಮೀತಿ ವಾಚಾ ಭಿನ್ದಿತಬ್ಬಾ. ತೇನ ಕಥಿನತ್ಥಾರಕೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅತ್ಥತಂ, ಭನ್ತೇ, ಸಙ್ಘಸ್ಸ ಕಥಿನಂ, ಧಮ್ಮಿಕೋ ಕಥಿನತ್ಥಾರೋ, ಅನುಮೋದಥಾ’’ತಿ. ತೇಹಿ ಅನುಮೋದಕೇಹಿ ಭಿಕ್ಖೂಹಿ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅತ್ಥತಂ, ಆವುಸೋ, ಸಙ್ಘಸ್ಸ ಕಥಿನಂ, ಧಮ್ಮಿಕೋ ಕಥಿನತ್ಥಾರೋ, ಅನುಮೋದಾಮಾ’’ತಿ. ತೇನ ಕಥಿನತ್ಥಾರಕೇನ ಭಿಕ್ಖುನಾ ಸಮ್ಬಹುಲೇ ಭಿಕ್ಖೂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸು ವಚನೀಯಾ – ‘‘ಅತ್ಥತಂ, ಭನ್ತೇ, ಸಙ್ಘಸ್ಸ ಕಥಿನಂ, ಧಮ್ಮಿಕೋ ಕಥಿನತ್ಥಾರೋ, ಅನುಮೋದಥಾ’’ತಿ. ತೇಹಿ ಅನುಮೋದಕೇಹಿ ಭಿಕ್ಖೂಹಿ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅತ್ಥತಂ, ಆವುಸೋ, ಸಙ್ಘಸ್ಸ ಕಥಿನಂ, ಧಮ್ಮಿಕೋ ಕಥಿನತ್ಥಾರೋ ಅನುಮೋದಾಮಾ’’ತಿ. ತೇನ ಕಥಿನತ್ಥಾರಕೇನ ಭಿಕ್ಖುನಾ ಏಕಂ ಭಿಕ್ಖುಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅತ್ಥತಂ, ಆವುಸೋ, ಸಙ್ಘಸ್ಸ ಕಥಿನಂ, ಧಮ್ಮಿಕೋ ಕಥಿನತ್ಥಾರೋ, ಅನುಮೋದಾಹೀ’’ತಿ. ತೇನ ಅನುಮೋದಕೇನ ಭಿಕ್ಖುನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅತ್ಥತಂ, ಆವುಸೋ, ಸಙ್ಘಸ್ಸ ಕಥಿನಂ, ಧಮ್ಮಿಕೋ ಕಥಿನತ್ಥಾರೋ, ಅನುಮೋದಾಮೀ’’ತಿ.