೩. ಪುಬ್ಬಕರಣನಿದಾನಾದಿವಿಭಾಗೋ

೪೦೫. ಪುಬ್ಬಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಪಚ್ಚುದ್ಧಾರೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಅಧಿಟ್ಠಾನಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಅತ್ಥಾರೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಮಾತಿಕಾ ಚ ಪಲಿಬೋಧಾ ಚ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾ, ಕಿಂಸಮ್ಭಾರಾ ಕಿಂಸಮುಟ್ಠಾನಾ? ಆಸಾ ಚ ಅನಾಸಾ ಚ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾ, ಕಿಂಸಮ್ಭಾರಾ, ಕಿಂಸಮುಟ್ಠಾನಾ?

ಪುಬ್ಬಕರಣಂ ಪಯೋಗನಿದಾನಂ, ಪಯೋಗಸಮುದಯಂ, ಪಯೋಗಜಾತಿಕಂ, ಪಯೋಗಪಭವಂ, ಪಯೋಗಸಮ್ಭಾರಂ, ಪಯೋಗಸಮುಟ್ಠಾನಂ. ಪಚ್ಚುದ್ಧಾರೋ ಪುಬ್ಬಕರಣನಿದಾನೋ, ಪುಬ್ಬಕರಣಸಮುದಯೋ, ಪುಬ್ಬಕರಣಜಾತಿಕೋ, ಪುಬ್ಬಕರಣಪಭವೋ, ಪುಬ್ಬಕರಣಸಮ್ಭಾರೋ, ಪುಬ್ಬಕರಣಸಮುಟ್ಠಾನೋ. ಅಧಿಟ್ಠಾನಂ ಪಚ್ಚುದ್ಧಾರನಿದಾನಂ, ಪಚ್ಚುದ್ಧಾರಸಮುದಯಂ, ಪಚ್ಚುದ್ಧಾರಜಾತಿಕಂ, ಪಚ್ಚುದ್ಧಾರಪಭವಂ, ಪಚ್ಚುದ್ಧಾರಸಮ್ಭಾರಂ, ಪಚ್ಚುದ್ಧಾರಸಮುಟ್ಠಾನಂ. ಅತ್ಥಾರೋ ಅಧಿಟ್ಠಾನನಿದಾನೋ, ಅಧಿಟ್ಠಾನಸಮುದಯೋ, ಅಧಿಟ್ಠಾನಜಾತಿಕೋ, ಅಧಿಟ್ಠಾನಪಭವೋ, ಅಧಿಟ್ಠಾನಸಮ್ಭಾರೋ, ಅಧಿಟ್ಠಾನಸಮುಟ್ಠಾನೋ. ಮಾತಿಕಾ ಚ ಪಲಿಬೋಧಾ ಚ ಅತ್ಥಾರನಿದಾನಾ, ಅತ್ಥಾರಸಮುದಯಾ, ಅತ್ಥಾರಜಾತಿಕಾ, ಅತ್ಥಾರಪಭವಾ, ಅತ್ಥಾರಸಮ್ಭಾರಾ, ಅತ್ಥಾರಸಮುಟ್ಠಾನಾ. ಆಸಾ ಚ ಅನಾಸಾ ಚ ವತ್ಥುನಿದಾನಾ, ವತ್ಥುಸಮುದಯಾ, ವತ್ಥುಜಾತಿಕಾ, ವತ್ಥುಪಭವಾ, ವತ್ಥುಸಮ್ಭಾರಾ, ವತ್ಥುಸಮುಟ್ಠಾನಾ.

೪೦೬. ಪಯೋಗೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ, ಪುಬ್ಬಕರಣಂ…ಪೇ… ಪಚ್ಚುದ್ಧಾರೋ… ಅಧಿಟ್ಠಾನಂ… ಅತ್ಥಾರೋ… ಮಾತಿಕಾ ಚ ಪಲಿಬೋಧಾ ಚ… ವತ್ಥು… ಆಸಾ ಚ ಅನಾಸಾ ಚ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾ, ಕಿಂಸಮ್ಭಾರಾ, ಕಿಂಸಮುಟ್ಠಾನಾ?

ಪಯೋಗೋ ಹೇತುನಿದಾನೋ, ಹೇತುಸಮುದಯೋ, ಹೇತುಜಾತಿಕೋ, ಹೇತುಪಭವೋ, ಹೇತುಸಮ್ಭಾರೋ, ಹೇತುಸಮುಟ್ಠಾನೋ. ಪುಬ್ಬಕರಣಂ…ಪೇ… ಪಚ್ಚುದ್ಧಾರೋ… ಅಧಿಟ್ಠಾನಂ… ಅತ್ಥಾರೋ … ಮಾತಿಕಾ ಚ ಪಲಿಬೋಧಾ ಚ… ವತ್ಥು… ಆಸಾ ಚ ಅನಾಸಾ ಚ ಹೇತುನಿದಾನಾ, ಹೇತುಸಮುದಯಾ, ಹೇತುಜಾತಿಕಾ, ಹೇತುಪಭವಾ, ಹೇತುಸಮ್ಭಾರಾ, ಹೇತುಸಮುಟ್ಠಾನಾ.

೪೦೭. ಪಯೋಗೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಪುಬ್ಬಕರಣಂ…ಪೇ… ಪಚ್ಚುದ್ಧಾರೋ… ಅಧಿಟ್ಠಾನಂ… ಅತ್ಥಾರೋ… ಮಾತಿಕಾ ಚ ಪಲಿಬೋಧಾ ಚ… ವತ್ಥು… ಆಸಾ ಚ ಅನಾಸಾ ಚ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾ, ಕಿಂಸಮ್ಭಾರಾ, ಕಿಂಸಮುಟ್ಠಾನಾ?

ಪಯೋಗೋ ಪಚ್ಚಯನಿದಾನೋ, ಪಚ್ಚಯಸಮುದಯೋ, ಪಚ್ಚಯಜಾತಿಕೋ, ಪಚ್ಚಯಪಭವೋ, ಪಚ್ಚಯಸಮ್ಭಾರೋ, ಪಚ್ಚಯಸಮುಟ್ಠಾನೋ. ಪುಬ್ಬಕರಣಂ…ಪೇ… ಪಚ್ಚುದ್ಧಾರೋ… ಅಧಿಟ್ಠಾನಂ… ಅತ್ಥಾರೋ… ಮಾತಿಕಾ ಚ ಪಲಿಬೋಧಾ ಚ… ವತ್ಥು… ಆಸಾ ಚ ಅನಾಸಾ ಚ ಪಚ್ಚಯನಿದಾನಾ, ಪಚ್ಚಯಸಮುದಯಾ, ಪಚ್ಚಯಜಾತಿಕಾ, ಪಚ್ಚಯಪಭವಾ, ಪಚ್ಚಯಸಮ್ಭಾರಾ, ಪಚ್ಚಯಸಮುಟ್ಠಾನಾ.

೪೦೮. ಪುಬ್ಬಕರಣಂ ಕತಿಹಿ ಧಮ್ಮೇಹಿ ಸಙ್ಗಹಿತಂ? ಪುಬ್ಬಕರಣಂ ಸತ್ತಹಿ ಧಮ್ಮೇಹಿ ಸಙ್ಗಹಿತಂ. ಧೋವನೇನ, ವಿಚಾರಣೇನ, ಛೇದನೇನ, ಬನ್ಧನೇನ, ಸಿಬ್ಬನೇನ, ರಜನೇನ, ಕಪ್ಪಕರಣೇನ – ಪುಬ್ಬಕರಣಂ ಇಮೇಹಿ ಸತ್ತಹಿ ಧಮ್ಮೇಹಿ ಸಙ್ಗಹಿತಂ.

ಪಚ್ಚುದ್ಧಾರೋ ಕತಿಹಿ ಧಮ್ಮೇಹಿ ಸಙ್ಗಹಿತೋ? ಪಚ್ಚುದ್ಧಾರೋ ತೀಹಿ ಧಮ್ಮೇಹಿ ಸಙ್ಗಹಿತೋ – ಸಙ್ಘಾಟಿಯಾ, ಉತ್ತರಾಸಙ್ಗೇನ, ಅನ್ತರವಾಸಕೇನ.

ಅಧಿಟ್ಠಾನಂ ಕತಿಹಿ ಧಮ್ಮೇಹಿ ಸಙ್ಗಹಿತಂ? ಅಧಿಟ್ಠಾನಂ ತೀಹಿ ಧಮ್ಮೇಹಿ ಸಙ್ಗಹಿತಂ – ಸಙ್ಘಾಟಿಯಾ, ಉತ್ತರಾಸಙ್ಗೇನ, ಅನ್ತರವಾಸಕೇನ.

ಅತ್ಥಾರೋ ಕತಿಹಿ ಧಮ್ಮೇಹಿ ಸಙ್ಗಹಿತೋ? ಅತ್ಥಾರೋ ಏಕೇನ ಧಮ್ಮೇನ ಸಙ್ಗಹಿತೋ – ವಚೀಭೇದೇನ.

ಕಥಿನಸ್ಸ ಕತಿ ಮೂಲಾನಿ, ಕತಿ ವತ್ಥೂನಿ, ಕತಿ ಭೂಮಿಯೋ? ಕಥಿನಸ್ಸ ಏಕಂ ಮೂಲಂ – ಸಙ್ಘೋ; ತೀಣಿ ವತ್ಥೂನಿ – ಸಙ್ಘಾಟಿ, ಉತ್ತರಾಸಙ್ಗೋ, ಅನ್ತರವಾಸಕೋ, ಛ ಭೂಮಿಯೋ – ಖೋಮಂ, ಕಪ್ಪಾಸಿಕಂ, ಕೋಸೇಯ್ಯಂ, ಕಮ್ಬಲಂ, ಸಾಣಂ, ಭಙ್ಗಂ.

ಕಥಿನಸ್ಸ ಕೋ ಆದಿ, ಕಿಂ ಮಜ್ಝೇ, ಕಿಂ ಪರಿಯೋಸಾನಂ? ಕಥಿನಸ್ಸ ಪುಬ್ಬಕರಣಂ ಆದಿ, ಕ್ರಿಯಾ ಮಜ್ಝೇ, ಅತ್ಥಾರೋ ಪರಿಯೋಸಾನಂ.

೪೦೯. ಕತಿಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಭಬ್ಬೋ ಕಥಿನಂ ಅತ್ಥರಿತುಂ? ಕತಿಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಭಬ್ಬೋ ಕಥಿನಂ ಅತ್ಥರಿತುಂ? ಅಟ್ಠಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಭಬ್ಬೋ ಕಥಿನಂ ಅತ್ಥರಿತುಂ. ಅಟ್ಠಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಭಬ್ಬೋ ಕಥಿನಂ ಅತ್ಥರಿತುಂ. ಕತಮೇಹಿ ಅಟ್ಠಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಭಬ್ಬೋ ಕಥಿನಂ ಅತ್ಥರಿತುಂ? ಪುಬ್ಬಕರಣಂ ನ ಜಾನಾತಿ, ಪಚ್ಚುದ್ಧಾರಂ ನ ಜಾನಾತಿ, ಅಧಿಟ್ಠಾನಂ ನ ಜಾನಾತಿ, ಅತ್ಥಾರಂ ನ ಜಾನಾತಿ, ಮಾತಿಕಂ ನ ಜಾನಾತಿ, ಪಲಿಬೋಧಂ ನ ಜಾನಾತಿ, ಉದ್ಧಾರಂ ನ ಜಾನಾತಿ, ಆನಿಸಂಸಂ ನ ಜಾನಾತಿ – ಇಮೇಹಿ ಅಟ್ಠಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಭಬ್ಬೋ ಕಥಿನಂ ಅತ್ಥರಿತುಂ. ಕತಮೇಹಿ ಅಟ್ಠಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಭಬ್ಬೋ ಕಥಿನಂ ಅತ್ಥರಿತುಂ? ಪುಬ್ಬಕರಣಂ ಜಾನಾತಿ, ಪಚ್ಚುದ್ಧಾರಂ ಜಾನಾತಿ, ಅಧಿಟ್ಠಾನಂ ಜಾನಾತಿ, ಅತ್ಥಾರಂ ಜಾನಾತಿ, ಮಾತಿಕಂ ಜಾನಾತಿ, ಪಲಿಬೋಧಂ ಜಾನಾತಿ, ಉದ್ಧಾರಂ ಜಾನಾತಿ, ಆನಿಸಂಸಂ ಜಾನಾತಿ – ಇಮೇಹಿ ಅಟ್ಠಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಭಬ್ಬೋ ಕಥಿನಂ ಅತ್ಥರಿತುಂ.

೪೧೦. ಕತಿನಂ ಪುಗ್ಗಲಾನಂ ಕಥಿನತ್ಥಾರಾ ನ ರುಹನ್ತಿ? ಕತಿನಂ ಪುಗ್ಗಲಾನಂ ಕಥಿನತ್ಥಾರಾ ರುಹನ್ತಿ? ತಿಣ್ಣಂ ಪುಗ್ಗಲಾನಂ ಕಥಿನತ್ಥಾರಾ ನ ರುಹನ್ತಿ. ತಿಣ್ಣಂ ಪುಗ್ಗಲಾನಂ ಕಥಿನತ್ಥಾರಾ ರುಹನ್ತಿ. ಕತಮೇಸಂ ತಿಣ್ಣಂ ಪುಗ್ಗಲಾನಂ ಕಥಿನತ್ಥಾರಾ ನ ರುಹನ್ತಿ? ನಿಸ್ಸೀಮಟ್ಠೋ ಅನುಮೋದತಿ, ಅನುಮೋದೇನ್ತೋ ನ ವಾಚಂ ಭಿನ್ದತಿ, ವಾಚಂ ಭಿನ್ದನ್ತೋ ನ ಪರಂ ವಿಞ್ಞಾಪೇತಿ – ಇಮೇಸಂ ತಿಣ್ಣಂ ಪುಗ್ಗಲಾನಂ ಕಥಿನತ್ಥಾರಾ ನ ರುಹನ್ತಿ. ಕತಮೇಸಂ ತಿಣ್ಣಂ ಪುಗ್ಗಲಾನಂ ಕಥಿನತ್ಥಾರಾ ರುಹನ್ತಿ? ಸೀಮಟ್ಠೋ ಅನುಮೋದತಿ, ಅನುಮೋದೇನ್ತೋ ವಾಚಂ ಭಿನ್ದತಿ, ವಾಚಂ ಭಿನ್ದನ್ತೋ ಪರಂ ವಿಞ್ಞಾಪೇತಿ – ಇಮೇಸಂ ತಿಣ್ಣಂ ಪುಗ್ಗಲಾನಂ ಕಥಿನತ್ಥಾರಾ ರುಹನ್ತಿ.

೪೧೧. ಕತಿ ಕಥಿನತ್ಥಾರಾ ನ ರುಹನ್ತಿ? ಕತಿ ಕಥಿನತ್ಥಾರಾ ರುಹನ್ತಿ? ತಯೋ ಕಥಿನತ್ಥಾರಾ ನ ರುಹನ್ತಿ. ತಯೋ ಕಥಿನತ್ಥಾರಾ ರುಹನ್ತಿ. ಕತಮೇ ತಯೋ ಕಥಿನತ್ಥಾರಾ ನ ರುಹನ್ತಿ? ವತ್ಥುವಿಪನ್ನಞ್ಚೇವ ಹೋತಿ, ಕಾಲವಿಪನ್ನಞ್ಚ, ಕರಣವಿಪನ್ನಞ್ಚ – ಇಮೇ ತಯೋ ಕಥಿನತ್ಥಾರಾ ನ ರುಹನ್ತಿ. ಕತಮೇ ತಯೋ ಕಥಿನತ್ಥಾರಾ ರುಹನ್ತಿ? ವತ್ಥುಸಮ್ಪನ್ನಞ್ಚೇವ ಹೋತಿ, ಕಾಲಸಮ್ಪನ್ನಞ್ಚ, ಕರಣಸಮ್ಪನ್ನಞ್ಚ – ಇಮೇ ತಯೋ ಕಥಿನತ್ಥಾರಾ ರುಹನ್ತಿ.