೧. ಅನುವಿಜ್ಜಕಸ್ಸಪಟಿಪತ್ತಿ

೩೬೫. [ಪರಿ. ೪೨೧] ಸಙ್ಗಾಮಾವಚರೇ ಭಿಕ್ಖುನಾ ಸಙ್ಘಂ ಉಪಸಙ್ಕಮನ್ತೇನ ನೀಚಚಿತ್ತೇನ ಸಙ್ಘೋ ಉಪಸಙ್ಕಮಿತಬ್ಬೋ ರಜೋಹರಣಸಮೇನ ಚಿತ್ತೇನ; ಆಸನಕುಸಲೇನ ಭವಿತಬ್ಬಂ ನಿಸಜ್ಜಕುಸಲೇನ; ಥೇರೇ ಭಿಕ್ಖೂ ಅನುಪಖಜ್ಜನ್ತೇನ, ನವೇ ಭಿಕ್ಖೂ ಆಸನೇನ ಅಪ್ಪಟಿಬಾಹನ್ತೇನ, ಯಥಾಪತಿರೂಪೇ ಆಸನೇ ನಿಸೀದಿತಬ್ಬಂ; ಅನಾನಾಕಥಿಕೇನ ಭವಿತಬ್ಬಂ ಅತಿರಚ್ಛಾನಕಥಿಕೇನ; ಸಾಮಂ ವಾ ಧಮ್ಮೋ ಭಾಸಿತಬ್ಬೋ ಪರೋ ವಾ ಅಜ್ಝೇಸಿತಬ್ಬೋ ಅರಿಯೋ ವಾ ತುಣ್ಹೀಭಾವೋ ನಾತಿಮಞ್ಞಿತಬ್ಬೋ.

ಸಙ್ಘೇನ ಅನುಮತೇನ ಪುಗ್ಗಲೇನ ಅನುವಿಜ್ಜಕೇನ ಅನುವಿಜ್ಜಿತುಕಾಮೇನ ನ ಉಪಜ್ಝಾಯೋ ಪುಚ್ಛಿತಬ್ಬೋ, ನ ಆಚರಿಯೋ ಪುಚ್ಛಿತಬ್ಬೋ, ನ ಸದ್ಧಿವಿಹಾರಿಕೋ ಪುಚ್ಛಿತಬ್ಬೋ, ನ ಅನ್ತೇವಾಸಿಕೋ ಪುಚ್ಛಿತಬ್ಬೋ, ನ ಸಮಾನುಪಜ್ಝಾಯಕೋ ಪುಚ್ಛಿತಬ್ಬೋ, ನ ಸಮಾನಾಚರಿಯಕೋ ಪುಚ್ಛಿತಬ್ಬೋ, ನ ಜಾತಿ ಪುಚ್ಛಿತಬ್ಬಾ, ನ ನಾಮಂ ಪುಚ್ಛಿತಬ್ಬಂ, ನ ಗೋತ್ತಂ ಪುಚ್ಛಿತಬ್ಬಂ, ನ ಆಗಮೋ ಪುಚ್ಛಿತಬ್ಬೋ, ನ ಕುಲಪದೇಸೋ ಪುಚ್ಛಿತಬ್ಬೋ, ನ ಜಾತಿಭೂಮಿ ಪುಚ್ಛಿತಬ್ಬಾ. ತಂ ಕಿಂ ಕಾರಣಾ? ಅತ್ರಸ್ಸ ಪೇಮಂ ವಾ ದೋಸೋ ವಾ. ಪೇಮೇ ವಾ ಸತಿ ದೋಸೇ ವಾ, ಛನ್ದಾಪಿ ಗಚ್ಛೇಯ್ಯ ದೋಸಾಪಿ ಗಚ್ಛೇಯ್ಯ ಮೋಹಾಪಿ ಗಚ್ಛೇಯ್ಯ ಭಯಾಪಿ ಗಚ್ಛೇಯ್ಯ.

ಸಙ್ಘೇನ ಅನುಮತೇನ ಪುಗ್ಗಲೇನ ಅನುವಿಜ್ಜಕೇನ ಅನುವಿಜ್ಜಿತುಕಾಮೇನ ಸಙ್ಘಗರುಕೇನ ಭವಿತಬ್ಬಂ ನೋ ಪುಗ್ಗಲಗರುಕೇನ, ಸದ್ಧಮ್ಮಗರುಕೇನ ಭವಿತಬ್ಬಂ ನೋ ಆಮಿಸಗರುಕೇನ, ಅತ್ಥವಸಿಕೇನ ಭವಿತಬ್ಬಂ ನೋ ಪರಿಸಕಪ್ಪಿಕೇನ, ಕಾಲೇನ ಅನುವಿಜ್ಜಿತಬ್ಬಂ ನೋ ಅಕಾಲೇನ, ಭೂತೇನ ಅನುವಿಜ್ಜಿತಬ್ಬಂ ನೋ ಅಭೂತೇನ, ಸಣ್ಹೇನ ಅನುವಿಜ್ಜಿತಬ್ಬಂ ನೋ ಫರುಸೇನ, ಅತ್ಥಸಂಹಿತೇನ ಅನುವಿಜ್ಜಿತಬ್ಬಂ ನೋ ಅನತ್ಥಸಂಹಿತೇನ, ಮೇತ್ತಾಚಿತ್ತೇನ ಅನುವಿಜ್ಜಿತಬ್ಬಂ ನೋ ದೋಸನ್ತರೇನ, ನ ಉಪಕಣ್ಣಕಜಪ್ಪಿನಾ ಭವಿತಬ್ಬಂ, ನ ಜಿಮ್ಹಂ ಪೇಕ್ಖಿತಬ್ಬಂ, ನ ಅಕ್ಖಿ ನಿಖಣಿತಬ್ಬಂ, ನ ಭಮುಕಂ ಉಕ್ಖಿಪಿತಬ್ಬಂ, ನ ಸೀಸಂ ಉಕ್ಖಿಪಿತಬ್ಬಂ, ನ ಹತ್ಥವಿಕಾರೋ ಕಾತಬ್ಬೋ, ನ ಹತ್ಥಮುದ್ದಾ ದಸ್ಸೇತಬ್ಬಾ.

ಆಸನಕುಸಲೇನ ಭವಿತಬ್ಬಂ ನಿಸಜ್ಜಕುಸಲೇನ, ಯುಗಮತ್ತಂ ಪೇಕ್ಖನ್ತೇನ ಅತ್ಥಂ ಅನುವಿಧಿಯನ್ತೇನ ಸಕೇ ಆಸನೇ ನಿಸೀದಿತಬ್ಬಂ, ನ ಚ ಆಸನಾ ವುಟ್ಠಾತಬ್ಬಂ, ನ ವೀತಿಹಾತಬ್ಬಂ, ನ ಕುಮ್ಮಗ್ಗೋ ಸೇವಿತಬ್ಬೋ, ನ ಬಾಹಾವಿಕ್ಖೇಪಕಂ [ನ ವಾಚಾ ವಿಕ್ಖೇಪಕಂ (ಸ್ಯಾ.)] ಭಣಿತಬ್ಬಂ, ಅತುರಿತೇನ ಭವಿತಬ್ಬಂ ಅಸಾಹಸಿಕೇನ, ಅಚಣ್ಡಿಕತೇನ ಭವಿತಬ್ಬಂ ವಚನಕ್ಖಮೇ, ಮೇತ್ತಾಚಿತ್ತೇನ ಭವಿತಬ್ಬಂ ಹಿತಾನುಕಮ್ಪಿನಾ, ಕಾರುಣಿಕೇನ ಭವಿತಬ್ಬಂ ಹಿತಪರಿಸಕ್ಕಿನಾ, ಅಸಮ್ಫಪ್ಪಲಾಪಿನಾ ಭವಿತಬ್ಬಂ ಪರಿಯನ್ತಭಾಣಿನಾ, ಅವೇರವಸಿಕೇನ ಭವಿತಬ್ಬಂ ಅನಸುರುತ್ತೇನ, ಅತ್ತಾ ಪರಿಗ್ಗಹೇತಬ್ಬೋ, ಪರೋ ಪರಿಗ್ಗಹೇತಬ್ಬೋ, ಚೋದಕೋ ಪರಿಗ್ಗಹೇತಬ್ಬೋ, ಚುದಿತಕೋ ಪರಿಗ್ಗಹೇತಬ್ಬೋ, ಅಧಮ್ಮಚೋದಕೋ ಪರಿಗ್ಗಹೇತಬ್ಬೋ, ಅಧಮ್ಮಚುದಿತಕೋ ಪರಿಗ್ಗಹೇತಬ್ಬೋ, ಧಮ್ಮಚೋದಕೋ ಪರಿಗ್ಗಹೇತಬ್ಬೋ, ಧಮ್ಮಚುದಿತಕೋ ಪರಿಗ್ಗಹೇತಬ್ಬೋ, ವುತ್ತಂ ಅಹಾಪೇನ್ತೇನ ಅವುತ್ತಂ ಅಪಕಾಸೇನ್ತೇನ ಓತಿಣ್ಣಾನಿ ಪದಬ್ಯಞ್ಜನಾನಿ ಸಾಧುಕಂ ಪರಿಗ್ಗಹೇತ್ವಾ ಪರೋ ಪಟಿಪುಚ್ಛಿತ್ವಾ ಯಥಾ ಪಟಿಞ್ಞಾಯ ಕಾರೇತಬ್ಬೋ, ಮನ್ದೋ ಹಾಸೇತಬ್ಬೋ [ವೇಪೋ ಪಹಾಸೇತಬ್ಬೋ (ಸ್ಯಾ.)], ಭೀರೂ ಅಸ್ಸಾಸೇತಬ್ಬೋ, ಚಣ್ಡೋ ನಿಸೇಧೇತಬ್ಬೋ, ಅಸುಚಿ ವಿಭಾವೇತಬ್ಬೋ, ಉಜುಮದ್ದವೇನ ನ ಛನ್ದಾಗತಿಂ ಗನ್ತಬ್ಬಂ, ನ ದೋಸಾಗತಿಂ ಗನ್ತಬ್ಬಂ, ನ ಮೋಹಾಗತಿಂ ಗನ್ತಬ್ಬಂ, ನ ಭಯಾಗತಿಂ ಗನ್ತಬ್ಬಂ, ಮಜ್ಝತ್ತೇನ ಭವಿತಬ್ಬಂ ಧಮ್ಮೇಸು ಚ ಪುಗ್ಗಲೇಸು ಚ. ಏವಞ್ಚ ಪನ ಅನುವಿಜ್ಜಕೋ ಅನುವಿಜ್ಜಮಾನೋ ಸತ್ಥು ಚೇವ ಸಾಸನಕರೋ ಹೋತಿ, ವಿಞ್ಞೂನಞ್ಚ ಸಬ್ರಹ್ಮಚಾರೀನಂ ಪಿಯೋ ಚ ಹೋತಿ ಮನಾಪೋ ಚ ಗರು ಚ ಭಾವನೀಯೋ ಚ.

೩೬೬. ಸುತ್ತಂ ಸಂಸನ್ದನತ್ಥಾಯ, ಓಪಮ್ಮಂ ನಿದಸ್ಸನತ್ಥಾಯ, ಅತ್ಥೋ ವಿಞ್ಞಾಪನತ್ಥಾಯ, ಪಟಿಪುಚ್ಛಾ ಠಪನತ್ಥಾಯ, ಓಕಾಸಕಮ್ಮಂ ಚೋದನತ್ಥಾಯ, ಚೋದನಾ ಸಾರಣತ್ಥಾಯ, ಸಾರಣಾ ಸವಚನೀಯತ್ಥಾಯ, ಸವಚನೀಯಂ ಪಲಿಬೋಧತ್ಥಾಯ, ಪಲಿಬೋಧೋ ವಿನಿಚ್ಛಯತ್ಥಾಯ, ವಿನಿಚ್ಛಯೋ ಸನ್ತೀರಣತ್ಥಾಯ, ಸನ್ತೀರಣಂ ಠಾನಾಠಾನಗಮನತ್ಥಾಯ, ಠಾನಾಠಾನಗಮನಂ ದುಮ್ಮಙ್ಕೂನಂ ಪುಗ್ಗಲಾನಂ ನಿಗ್ಗಹತ್ಥಾಯ, ಪೇಸಲಾನಂ ಭಿಕ್ಖೂನಂ ಸಮ್ಪಗ್ಗಹತ್ಥಾಯ, ಸಙ್ಘೋ ಸಮ್ಪರಿಗ್ಗಹಸಮ್ಪಟಿಚ್ಛನತ್ಥಾಯ, ಸಙ್ಘೇನ ಅನುಮತಾ ಪುಗ್ಗಲಾ ಪಚ್ಚೇಕಟ್ಠಾಯಿನೋ ಅವಿಸಂವಾದಕಟ್ಠಾಯಿನೋ.

ವಿನಯೋ ಸಂವರತ್ಥಾಯ, ಸಂವರೋ ಅವಿಪ್ಪಟಿಸಾರತ್ಥಾಯ, ಅವಿಪ್ಪಟಿಸಾರೋ ಪಾಮುಜ್ಜತ್ಥಾಯ, ಪಾಮುಜ್ಜಂ ಪೀತತ್ಥಾಯ, ಪೀತಿ ಪಸ್ಸದ್ಧತ್ಥಾಯ, ಪಸ್ಸದ್ಧಿ ಸುಖತ್ಥಾಯ, ಸುಖಂ ಸಮಾಧತ್ಥಾಯ, ಸಮಾಧಿ ಯಥಾಭೂತಞಾಣದಸ್ಸನತ್ಥಾಯ, ಯಥಾಭೂತಞಾಣದಸ್ಸನಂ ನಿಬ್ಬಿದತ್ಥಾಯ, ನಿಬ್ಬಿದಾ ವಿರಾಗತ್ಥಾಯ, ವಿರಾಗೋ ವಿಮುತ್ತತ್ಥಾಯ, ವಿಮುತ್ತಿ ವಿಮುತ್ತಿಞಾಣದಸ್ಸನತ್ಥಾಯ, ವಿಮುತ್ತಿಞಾಣದಸ್ಸನಂ ಅನುಪಾದಾಪರಿನಿಬ್ಬಾನತ್ಥಾಯ. ಏತದತ್ಥಾ ಕಥಾ, ಏತದತ್ಥಾ ಮನ್ತನಾ, ಏತದತ್ಥಾ ಉಪನಿಸಾ, ಏತದತ್ಥಂ ಸೋತಾವಧಾನಂ – ಯದಿದಂ ಅನುಪಾದಾಚಿತ್ತಸ್ಸ ವಿಮೋಕ್ಖೋತಿ.

೩೬೭. ಅನುಯೋಗವತ್ತಂ ನಿಸಾಮಯ, ಕುಸಲೇನ ಬುದ್ಧಿಮತಾ ಕತಂ;

ಸುವುತ್ತಂ ಸಿಕ್ಖಾಪದಾನುಲೋಮಿಕಂ, ಗತಿಂ ನ ನಾಸೇನ್ತೋ ಸಮ್ಪರಾಯಿಕಂ.

ವತ್ಥುಂ ವಿಪತ್ತಿಂ ಆಪತ್ತಿಂ, ನಿದಾನಂ ಆಕಾರಅಕೋವಿದೋ;

ಪುಬ್ಬಾಪರಂ ನ ಜಾನಾತಿ, ಕತಾಕತಂ ಸಮೇನ ಚ.

ಕಮ್ಮಞ್ಚ ಅಧಿಕರಣಞ್ಚ, ಸಮಥೇ ಚಾಪಿ ಅಕೋವಿದೋ;

ರತ್ತೋ ದುಟ್ಠೋ ಚ ಮೂಳ್ಹೋ ಚ, ಭಯಾ ಮೋಹಾ ಚ ಗಚ್ಛತಿ.

ನ ಚ ಸಞ್ಞತ್ತಿಕುಸಲೋ, ನಿಜ್ಝತ್ತಿಯಾ ಚ ಅಕೋವಿದೋ;

ಲದ್ಧಪಕ್ಖೋ ಅಹಿರಿಕೋ, ಕಣ್ಹಕಮ್ಮೋ ಅನಾದರೋ;

ಸ ವೇ [ಸಚೇ (ಕ.)] ತಾದಿಸಕೋ ಭಿಕ್ಖು, ಅಪ್ಪಟಿಕ್ಖೋತಿ ವುಚ್ಚತಿ.

ವತ್ಥುಂ ವಿಪತ್ತಿಂ ಆಪತ್ತಿಂ, ನಿದಾನಂ ಆಕಾರಕೋವಿದೋ;

ಪುಬ್ಬಾಪರಞ್ಚ ಜಾನಾತಿ, ಕತಾಕತಂ ಸಮೇನ ಚ.

ಕಮ್ಮಞ್ಚ ಅಧಿಕರಣಞ್ಚ, ಸಮಥೇ ಚಾಪಿ ಕೋವಿದೋ;

ಅರತ್ತೋ ಅದುಟ್ಠೋ ಅಮೂಳ್ಹೋ, ಭಯಾ ಮೋಹಾ ನ ಗಚ್ಛತಿ.

ಸಞ್ಞತ್ತಿಯಾ ಚ ಕುಸಲೋ, ನಿಜ್ಝತ್ತಿಯಾ ಚ ಕೋವಿದೋ;

ಲದ್ಧಪಕ್ಖೋ ಹಿರಿಮನೋ, ಸುಕ್ಕಕಮ್ಮೋ ಸಗಾರವೋ;

ಸ ವೇ ತಾದಿಸಕೋ ಭಿಕ್ಖು, ಸಪ್ಪಟಿಕ್ಖೋತಿ ವುಚ್ಚತೀತಿ.

ಚೂಳಸಙ್ಗಾಮೋ ನಿಟ್ಠಿತೋ.