೧. ಪಾರಾಜಿಕಕಣ್ಡಂ

೨೪೯. ಕಾಯಸಂಸಗ್ಗಂ ಸಾದಿಯನಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ಕಾಯಸಂಸಗ್ಗಂ ಸಾದಿಯನಪಚ್ಚಯಾ ಪಞ್ಚ ಆಪತ್ತಿಯೋ ಆಪಜ್ಜತಿ. ಅವಸ್ಸುತಾ ಭಿಕ್ಖುನೀ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಗಹಣಂ ಸಾದಿಯತಿ, ಆಪತ್ತಿ ಪಾರಾಜಿಕಸ್ಸ; ಭಿಕ್ಖು ಕಾಯೇನ ಕಾಯಂ ಆಮಸತಿ, ಆಪತ್ತಿ ಸಙ್ಘಾದಿಸೇಸಸ್ಸ; ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ; ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ; ಅಙ್ಗುಲಿಪತೋದಕೇ ಪಾಚಿತ್ತಿಯಂ – ಕಾಯಸಂಸಗ್ಗಂ ಸಾದಿಯನಪಚ್ಚಯಾ ಇಮಾ ಪಞ್ಚ ಆಪತ್ತಿಯೋ ಆಪಜ್ಜತಿ.

ವಜ್ಜಪ್ಪಟಿಚ್ಛಾದನಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ವಜ್ಜಪ್ಪಟಿಚ್ಛಾದನಪಚ್ಚಯಾ ಚತಸ್ಸೋ ಆಪತ್ತಿಯೋ ಆಪಜ್ಜತಿ. ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ [ಧಮ್ಮಂ ಅಜ್ಝಾಪನ್ನಂ (ಸ್ಯಾ.)] ಪಟಿಚ್ಛಾದೇತಿ, ಆಪತ್ತಿ ಪಾರಾಜಿಕಸ್ಸ; ವೇಮತಿಕಾ ಪಟಿಚ್ಛಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ; ಭಿಕ್ಖು ಸಙ್ಘಾದಿಸೇಸಂ ಪಟಿಚ್ಛಾದೇತಿ, ಆಪತ್ತಿ ಪಾಚಿತ್ತಿಯಸ್ಸ; ಆಚಾರವಿಪತ್ತಿಂ ಪಟಿಚ್ಛಾದೇತಿ, ಆಪತ್ತಿ ದುಕ್ಕಟಸ್ಸ – ವಜ್ಜಪ್ಪಟಿಚ್ಛಾದನಪಚ್ಚಯಾ ಇಮಾ ಚತಸ್ಸೋ ಆಪತ್ತಿಯೋ ಆಪಜ್ಜತಿ.

ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನಪಚ್ಚಯಾ ಪಞ್ಚ ಆಪತ್ತಿಯೋ ಆಪಜ್ಜತಿ. ಉಕ್ಖಿತ್ತಾನುವತ್ತಿಕಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜತಿ, ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಪಾರಾಜಿಕಸ್ಸ; ಭೇದಕಾನುವತ್ತಿಕಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜತಿ, ಆಪತ್ತಿ ಸಙ್ಘಾದಿಸೇಸಸ್ಸ; ಪಾಪಿಕಾಯ ದಿಟ್ಠಿಯಾ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜತಿ, ಆಪತ್ತಿ ಪಾಚಿತ್ತಿಯಸ್ಸ – ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನಪಚ್ಚಯಾ ಇಮಾ ಪಞ್ಚ ಆಪತ್ತಿಯೋ ಆಪಜ್ಜತಿ.

ಅಟ್ಠಮಂ ವತ್ಥುಂ ಪರಿಪೂರಣಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ಅಟ್ಠಮಂ ವತ್ಥುಂ ಪರಿಪೂರಣಪಚ್ಚಯಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಪುರಿಸೇನ – ‘‘ಇತ್ಥನ್ನಾಮಂ ಓಕಾಸಂ ಆಗಚ್ಛಾ’’ತಿ ವುತ್ತಾ ಗಚ್ಛತಿ, ಆಪತ್ತಿ ದುಕ್ಕಟಸ್ಸ; ಪುರಿಸಸ್ಸ ಹತ್ಥಪಾಸಂ ಓಕ್ಕನ್ತಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸ; ಅಟ್ಠಮಂ ವತ್ಥುಂ ಪರಿಪೂರೇತಿ, ಆಪತ್ತಿ ಪಾರಾಜಿಕಸ್ಸ – ಅಟ್ಠಮಂ ವತ್ಥುಂ ಪರಿಪೂರಣಪಚ್ಚಯಾ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಪಾರಾಜಿಕಾ ನಿಟ್ಠಿತಾ.