೬. ಆರಾಮವಗ್ಗೋ

೨೩೬. ಜಾನಂ ಸಭಿಕ್ಖುಕಂ ಆರಾಮಂ ಅನಾಪುಚ್ಛಾ ಪವಿಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಪರಿಕ್ಖೇಪಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುಂ ಅಕ್ಕೋಸನ್ತೀ ಪರಿಭಾಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಅಕ್ಕೋಸತಿ, ಪಯೋಗೇ ದುಕ್ಕಟಂ; ಅಕ್ಕೋಸಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಚಣ್ಡೀಕತಾ ಗಣಂ ಪರಿಭಾಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪರಿಭಾಸತಿ, ಪಯೋಗೇ ದುಕ್ಕಟಂ; ಪರಿಭಾಸಿತೇ, ಆಪತ್ತಿ ಪಾಚಿತ್ತಿಯಸ್ಸ.

ನಿಮನ್ತಿತಾ ವಾ ಪವಾರಿತಾ ವಾ ಖಾದನೀಯಂ ವಾ ಭೋಜನೀಯಂ ವಾ ಭುಞ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಚಿತ್ತಿಯಸ್ಸ.

ಕುಲಂ ಮಚ್ಛರಾಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಮಚ್ಛರಾಯತಿ, ಪಯೋಗೇ ದುಕ್ಕಟಂ; ಮಚ್ಛರಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಅಭಿಕ್ಖುಕೇ ಆವಾಸೇ ವಸ್ಸಂ ವಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ‘‘ವಸ್ಸಂ ವಸಿಸ್ಸಾಮೀ’’ತಿ ಸೇನಾಸನಂ ಪಞ್ಞಪೇತಿ ಪಾನೀಯಂ ಪರಿಭೋಜನೀಯಂ ಉಪಟ್ಠಪೇತಿ ಪರಿವೇಣಂ ಸಮ್ಮಜ್ಜತಿ, ಆಪತ್ತಿ ದುಕ್ಕಟಸ್ಸ; ಸಹ ಅರುಣುಗ್ಗಮನಾ ಆಪತ್ತಿ ಪಾಚಿತ್ತಿಯಸ್ಸ.

ವಸ್ಸಂವುಟ್ಠಾ ಭಿಕ್ಖುನೀ ಉಭತೋಸಙ್ಘೇ ತೀಹಿ ಠಾನೇಹಿ ನ ಪವಾರೇನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಓವಾದಾಯ ವಾ ಸಂವಾಸಾಯ ವಾ ನ ಗಚ್ಛನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಉಪೋಸಥಮ್ಪಿ ನ ಪುಚ್ಛನ್ತೀ ಓವಾದಮ್ಪಿ ನ ಯಾಚನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಪಸಾಖೇ ಜಾತಂ ಗಣ್ಡಂ ವಾ ರುಧಿತಂ ವಾ ಅನಪಲೋಕೇತ್ವಾ ಸಙ್ಘಂ ವಾ ಗಣಂ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಭೇದಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಭೇದಾಪೇತಿ, ಪಯೋಗೇ ದುಕ್ಕಟಂ; ಭಿನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ಆರಾಮವಗ್ಗೋ ಛಟ್ಠೋ.