೨. ಊನಪಞ್ಚಬನ್ಧನಸಿಕ್ಖಾಪದಂ

೬೦೯. ತೇನ ಸಮಯೇನ ಬುದ್ಧೋ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೇನ ಕುಮ್ಭಕಾರೇನ ಭಿಕ್ಖೂ ಪವಾರಿತಾ ಹೋನ್ತಿ – ‘‘ಯೇಸಂ ಅಯ್ಯಾನಂ ಪತ್ತೇನ ಅತ್ಥೋ ಅಹಂ ಪತ್ತೇನಾ’’ತಿ. ತೇನ ಖೋ ಪನ ಸಮಯೇನ ಭಿಕ್ಖೂ ನ ಮತ್ತಂ ಜಾನಿತ್ವಾ ಬಹೂ ಪತ್ತೇ ವಿಞ್ಞಾಪೇನ್ತಿ. ಯೇಸಂ ಖುದ್ದಕಾ ಪತ್ತಾ ತೇ ಮಹನ್ತೇ ಪತ್ತೇ ವಿಞ್ಞಾಪೇನ್ತಿ. ಯೇಸಂ ಮಹನ್ತಾ ಪತ್ತಾ ತೇ ಖುದ್ದಕೇ ಪತ್ತೇ ವಿಞ್ಞಾಪೇನ್ತಿ. ಅಥ ಖೋ ಸೋ ಕುಮ್ಭಕಾರೋ ಭಿಕ್ಖೂನಂ ಬಹೂ ಪತ್ತೇ ಕರೋನ್ತೋ ನ ಸಕ್ಕೋತಿ ಅಞ್ಞಂ ವಿಕ್ಕಾಯಿಕಂ ಭಣ್ಡಂ ಕಾತುಂ, ಅತ್ತನಾಪಿ ನ ಯಾಪೇತಿ, ಪುತ್ತದಾರಾಪಿಸ್ಸ ಕಿಲಮನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನ ಮತ್ತಂ ಜಾನಿತ್ವಾ ಬಹೂ ಪತ್ತೇ ವಿಞ್ಞಾಪೇಸ್ಸನ್ತಿ! ಅಯಂ ಇಮೇಸಂ ಬಹೂ ಪತ್ತೇ ಕರೋನ್ತೋ ನ ಸಕ್ಕೋತಿ ಅಞ್ಞಂ ವಿಕ್ಕಾಯಿಕಂ ಭಣ್ಡಂ ಕಾತುಂ, ಅತ್ತನಾಪಿ ನ ಯಾಪೇತಿ, ಪುತ್ತದಾರಾಪಿಸ್ಸ ಕಿಲಮನ್ತೀ’’ತಿ.

ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖೂ ನ ಮತ್ತಂ ಜಾನಿತ್ವಾ ಬಹೂ ಪತ್ತೇ ವಿಞ್ಞಾಪೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ತೇ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖೂ ನ ಮತ್ತಂ ಜಾನಿತ್ವಾ ಬಹೂ ಪತ್ತೇ ವಿಞ್ಞಾಪೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ನ ಮತ್ತಂ ಜಾನಿತ್ವಾ ಬಹೂ ಪತ್ತೇ ವಿಞ್ಞಾಪೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಪತ್ತೋ ವಿಞ್ಞಾಪೇತಬ್ಬೋ. ಯೋ ವಿಞ್ಞಾಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೬೧೦. ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಭಿಕ್ಖುನೋ ಪತ್ತೋ ಭಿನ್ನೋ ಹೋತಿ. ಅಥ ಖೋ ಸೋ ಭಿಕ್ಖು – ‘‘ಭಗವತಾ ಪಟಿಕ್ಖಿತ್ತಂ ಪತ್ತಂ ವಿಞ್ಞಾಪೇತು’’ನ್ತಿ ಕುಕ್ಕುಚ್ಚಾಯನ್ತೋ ನ ವಿಞ್ಞಾಪೇತಿ. ಹತ್ಥೇಸು ಪಿಣ್ಡಾಯ ಚರತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ಹತ್ಥೇಸು ಪಿಣ್ಡಾಯ ಚರಿಸ್ಸನ್ತಿ, ಸೇಯ್ಯಥಾಪಿ ತಿತ್ಥಿಯಾ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ನಟ್ಠಪತ್ತಸ್ಸ ವಾ ಭಿನ್ನಪತ್ತಸ್ಸ ವಾ ಪತ್ತಂ ವಿಞ್ಞಾಪೇತು’’ನ್ತಿ.

೬೧೧. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ – ‘‘ಭಗವತಾ ಅನುಞ್ಞಾತಂ ನಟ್ಠಪತ್ತಸ್ಸ ವಾ ಭಿನ್ನಪತ್ತಸ್ಸ ವಾ ಪತ್ತಂ ವಿಞ್ಞಾಪೇತು’’ನ್ತಿ ಅಪ್ಪಮತ್ತಕೇನಪಿ ಭಿನ್ನೇನ ಅಪ್ಪಮತ್ತಕೇನಪಿ ಖಣ್ಡೇನ ವಿಲಿಖಿತಮತ್ತೇನಪಿ ಬಹೂ ಪತ್ತೇ ವಿಞ್ಞಾಪೇನ್ತಿ. ಅಥ ಖೋ ಸೋ ಕುಮ್ಭಕಾರೋ ಭಿಕ್ಖೂನಂ ತಥೇವ ಬಹೂ ಪತ್ತೇ ಕರೋನ್ತೋ ನ ಸಕ್ಕೋತಿ ಅಞ್ಞಂ ವಿಕ್ಕಾಯಿಕಂ ಭಣ್ಡಂ ಕಾತುಂ, ಅತ್ತನಾಪಿ ನ ಯಾಪೇತಿ, ಪುತ್ತದಾರಾಪಿಸ್ಸ ಕಿಲಮನ್ತಿ. ಮನುಸ್ಸಾ ತಥೇವ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನ ಮತ್ತಂ ಜಾನಿತ್ವಾ ಬಹೂ ಪತ್ತೇ ವಿಞ್ಞಾಪೇಸ್ಸನ್ತಿ! ಅಯಂ ಇಮೇಸಂ ಬಹೂ ಪತ್ತೇ ಕರೋನ್ತೋ ನ ಸಕ್ಕೋತಿ ಅಞ್ಞಂ ವಿಕ್ಕಾಯಿಕಂ ಭಣ್ಡಂ ಕಾತುಂ, ಅತ್ತನಾಪಿ ನ ಯಾಪೇತಿ, ಪುತ್ತದಾರಾಪಿಸ್ಸ ಕಿಲಮನ್ತೀ’’ತಿ.

ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಮತ್ತಕೇನಪಿ ಭಿನ್ನೇನ ಅಪ್ಪಮತ್ತಕೇನಪಿ ಖಣ್ಡೇನ ವಿಲಿಖಿತಮತ್ತೇನಪಿ ಬಹೂ ಪತ್ತೇ ವಿಞ್ಞಾಪೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಛಬ್ಬಗ್ಗಿಯೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ಅಪ್ಪಮತ್ತಕೇನಪಿ ಭಿನ್ನೇನ ಅಪ್ಪಮತ್ತಕೇನಪಿ ಖಣ್ಡೇನ ವಿಲಿಖಿತಮತ್ತೇನಪಿ ಬಹೂ ಪತ್ತೇ ವಿಞ್ಞಾಪೇಥಾ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಅಪ್ಪಮತ್ತಕೇನಪಿ ಭಿನ್ನೇನ ಅಪ್ಪಮತ್ತಕೇನಪಿ ಖಣ್ಡೇನ ವಿಲಿಖಿತಮತ್ತೇನಪಿ ಬಹೂ ಪತ್ತೇ ವಿಞ್ಞಾಪೇಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೬೧೨. ‘‘ಯೋ ಪನ ಭಿಕ್ಖು ಊನಪಞ್ಚಬನ್ಧನೇನ ಪತ್ತೇನ ಅಞ್ಞಂ ನವಂ ಪತ್ತಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ತೇನ ಭಿಕ್ಖುನಾ ಸೋ ಪತ್ತೋ ಭಿಕ್ಖುಪರಿಸಾಯ ನಿಸ್ಸಜ್ಜಿತಬ್ಬೋ. ಯೋ ಚ ತಸ್ಸಾ ಭಿಕ್ಖುಪರಿಸಾಯ ಪತ್ತಪರಿಯನ್ತೋ ಸೋ ತಸ್ಸ ಭಿಕ್ಖುನೋ ಪದಾತಬ್ಬೋ – ‘ಅಯಂ ತೇ, ಭಿಕ್ಖು, ಪತ್ತೋ ಯಾವ ಭೇದನಾಯ ಧಾರೇತಬ್ಬೋ’ತಿ. ಅಯಂ ತತ್ಥ ಸಾಮೀಚೀ’’ತಿ.

೬೧೩. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಊನಪಞ್ಚಬನ್ಧನೋ ನಾಮ ಪತ್ತೋ ಅಬನ್ಧನೋ ವಾ ಏಕಬನ್ಧನೋ ವಾ ದ್ವಿಬನ್ಧನೋ ವಾ ತಿಬನ್ಧನೋ ವಾ ಚತುಬನ್ಧನೋ ವಾ. ಅಬನ್ಧನೋಕಾಸೋ ನಾಮ ಪತ್ತೋ ಯಸ್ಸ ದ್ವಙ್ಗುಲಾ ರಾಜಿ ನ ಹೋತಿ. ಬನ್ಧನೋಕಾಸೋ ನಾಮ ಪತ್ತೋ ಯಸ್ಸ ದ್ವಙ್ಗುಲಾ ರಾಜಿ ಹೋತಿ. ನವೋ ನಾಮ ಪತ್ತೋ ವಿಞ್ಞತ್ತಿಂ ಉಪಾದಾಯ ವುಚ್ಚತಿ.

ಚೇತಾಪೇಯ್ಯಾತಿ ವಿಞ್ಞಾಪೇತಿ, ಪಯೋಗೇ ದುಕ್ಕಟಂ. ಪಟಿಲಾಭೇನ ನಿಸ್ಸಗ್ಗಿಯೋ ಹೋತಿ. ಸಙ್ಘಮಜ್ಝೇ ನಿಸ್ಸಜ್ಜಿತಬ್ಬೋ. ಸಬ್ಬೇಹೇವ ಅಧಿಟ್ಠಿತಪತ್ತಂ ಗಹೇತ್ವಾ ಸನ್ನಿಪತಿತಬ್ಬಂ. ನ ಲಾಮಕೋ ಪತ್ತೋ ಅಧಿಟ್ಠಾತಬ್ಬೋ – ‘‘ಮಹಗ್ಘಂ ಪತ್ತಂ ಗಹೇಸ್ಸಾಮೀ’’ತಿ. ಸಚೇ ಲಾಮಕಂ ಪತ್ತಂ ಅಧಿಟ್ಠೇತಿ – ‘‘ಮಹಗ್ಘಂ ಪತ್ತಂ ಗಹೇಸ್ಸಾಮೀ’’ತಿ, ಆಪತ್ತಿ ದುಕ್ಕಟಸ್ಸ. ಏವಞ್ಚ ಪನ, ಭಿಕ್ಖವೇ, ನಿಸ್ಸಜ್ಜಿತಬ್ಬೋ. ತೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅಯಂ ಮೇ, ಭನ್ತೇ, ಪತ್ತೋ ಊನಪಞ್ಚಬನ್ಧನೇನ ಪತ್ತೇನ ಚೇತಾಪಿತೋ ನಿಸ್ಸಗ್ಗಿಯೋ. ಇಮಾಹಂ ಸಙ್ಘಸ್ಸ ನಿಸ್ಸಜ್ಜಾಮೀ’’ತಿ. ನಿಸ್ಸಜ್ಜಿತ್ವಾ ಆಪತ್ತಿ ದೇಸೇತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಆಪತ್ತಿ ಪಟಿಗ್ಗಹೇತಬ್ಬಾ. ಪಞ್ಚಹಙ್ಗೇಹಿ ಸಮನ್ನಾಗತೋ ಭಿಕ್ಖು ಪತ್ತಗ್ಗಾಹಾಪಕೋ ಸಮ್ಮನ್ನಿತಬ್ಬೋ – ಯೋ ನ ಛನ್ದಾಗತಿಂ ಗಚ್ಛೇಯ್ಯ, ನ ದೋಸಾಗತಿಂ ಗಚ್ಛೇಯ್ಯ, ನ ಮೋಹಾಗತಿಂ ಗಚ್ಛೇಯ್ಯ, ನ ಭಯಾಗತಿಂ ಗಚ್ಛೇಯ್ಯ, ಗಾಹಿತಾಗಾಹಿತಞ್ಚ ಜಾನೇಯ್ಯ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ಭಿಕ್ಖು ಯಾಚಿತಬ್ಬೋ. ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೬೧೪. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಪತ್ತಗ್ಗಾಹಾಪಕಂ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಪತ್ತಗ್ಗಾಹಾಪಕಂ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಪತ್ತಗ್ಗಾಹಾಪಕಸ್ಸ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಇತ್ಥನ್ನಾಮೋ ಭಿಕ್ಖು ಪತ್ತಗ್ಗಾಹಾಪಕೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೬೧೫. ತೇನ ಸಮ್ಮತೇನ ಭಿಕ್ಖುನಾ ಪತ್ತೋ ಗಾಹೇತಬ್ಬೋ. ಥೇರೋ ವತ್ತಬ್ಬೋ – ‘‘ಗಣ್ಹಾತು, ಭನ್ತೇ, ಥೇರೋ ಪತ್ತ’’ನ್ತಿ. ಸಚೇ ಥೇರೋ ಗಣ್ಹಾತಿ, ಥೇರಸ್ಸ ಪತ್ತೋ ದುತಿಯಸ್ಸ ಗಾಹೇತಬ್ಬೋ. ನ ಚ ತಸ್ಸ ಅನುದ್ದಯತಾಯ ನ ಗಹೇತಬ್ಬೋ. ಯೋ ನ ಗಣ್ಹೇಯ್ಯ, ಆಪತ್ತಿ ದುಕ್ಕಟಸ್ಸ. ಅಪತ್ತಕಸ್ಸ ನ ಗಾಹೇತಬ್ಬೋ. ಏತೇನೇವ ಉಪಾಯೇನ ಯಾವ ಸಙ್ಘನವಕಾ ಗಾಹೇತಬ್ಬಾ. ಯೋ ಚ ತಸ್ಸಾ ಭಿಕ್ಖುಪರಿಸಾಯ ಪತ್ತಪರಿಯನ್ತೋ, ಸೋ ತಸ್ಸ ಭಿಕ್ಖುನೋ ಪದಾತಬ್ಬೋ – ‘‘ಅಯಂ ತೇ, ಭಿಕ್ಖು, ಪತ್ತೋ ಯಾವ ಭೇದನಾಯ ಧಾರೇತಬ್ಬೋ’’ತಿ.

ತೇನ ಭಿಕ್ಖುನಾ ಸೋ ಪತ್ತೋ ನ ಅದೇಸೇ ನಿಕ್ಖಿಪಿತಬ್ಬೋ, ನ ಅಭೋಗೇನ ಭುಞ್ಜಿತಬ್ಬೋ, ನ ವಿಸ್ಸಜ್ಜೇತಬ್ಬೋ – ‘‘ಕಥಾಯಂ ಪತ್ತೋ ನಸ್ಸೇಯ್ಯ ವಾ ವಿನಸ್ಸೇಯ್ಯ ವಾ ಭಿಜ್ಜೇಯ್ಯ ವಾ’’ತಿ? ಸಚೇ ಅದೇಸೇ ವಾ ನಿಕ್ಖಿಪತಿ ಅಭೋಗೇನ ವಾ ಭುಞ್ಜತಿ ವಿಸ್ಸಜ್ಜೇತಿ ವಾ, ಆಪತ್ತಿ ದುಕ್ಕಟಸ್ಸ.

ಅಯಂ ತತ್ಥ ಸಾಮೀಚೀತಿ ಅಯಂ ತತ್ಥ ಅನುಧಮ್ಮತಾ.

೬೧೬. ಅಬನ್ಧನೇನ ಪತ್ತೇನ ಅಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಬನ್ಧನೇನ ಪತ್ತೇನ ಏಕಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಬನ್ಧನೇನ ಪತ್ತೇನ ದ್ವಿಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಬನ್ಧನೇನ ಪತ್ತೇನ ತಿಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಬನ್ಧನೇನ ಪತ್ತೇನ ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಏಕಬನ್ಧನೇನ ಪತ್ತೇನ ಅಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಏಕಬನ್ಧನೇನ ಪತ್ತೇನ ಏಕಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಏಕಬನ್ಧನೇನ ಪತ್ತೇನ ದ್ವಿಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಏಕಬನ್ಧನೇನ ಪತ್ತೇನ ತಿಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಏಕಬನ್ಧನೇನ ಪತ್ತೇನ ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ದ್ವಿಬನ್ಧನೇನ ಪತ್ತೇನ ಅಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ದ್ವಿಬನ್ಧನೇನ ಪತ್ತೇನ ಏಕಬನ್ಧನಂ ಪತ್ತಂ…ಪೇ… ದ್ವಿಬನ್ಧನಂ ಪತ್ತಂ… ತಿಬನ್ಧನಂ ಪತ್ತಂ… ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ತಿಬನ್ಧನೇನ ಪತ್ತೇನ ಅಬನ್ಧನಂ ಪತ್ತಂ…ಪೇ… ಏಕಬನ್ಧನಂ ಪತ್ತಂ…ಪೇ… ದ್ವಿಬನ್ಧನಂ ಪತ್ತಂ… ತಿಬನ್ಧನಂ ಪತ್ತಂ… ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಚತುಬನ್ಧನೇನ ಪತ್ತೇನ ಅಬನ್ಧನಂ ಪತ್ತಂ…ಪೇ… ಏಕಬನ್ಧನಂ ಪತ್ತಂ… ದ್ವಿಬನ್ಧನಂ ಪತ್ತಂ… ತಿಬನ್ಧನಂ ಪತ್ತಂ… ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಬನ್ಧನೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಬನ್ಧನೇನ ಪತ್ತೇನ ಏಕಬನ್ಧನೋಕಾಸಂ ಪತ್ತಂ…ಪೇ… ದ್ವಿಬನ್ಧನೋಕಾಸಂ ಪತ್ತಂ … ತಿಬನ್ಧನೋಕಾಸಂ ಪತ್ತಂ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಏಕಬನ್ಧನೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ…ಪೇ… ಏಕಬನ್ಧನೋಕಾಸಂ ಪತ್ತಂ… ದ್ವಿಬನ್ಧನೋಕಾಸಂ ಪತ್ತಂ… ತಿಬನ್ಧನೋಕಾಸಂ ಪತ್ತಂ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ದ್ವಿಬನ್ಧನೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ…ಪೇ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ತಿಬನ್ಧನೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ…ಪೇ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಚತುಬನ್ಧನೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ…ಪೇ… ಏಕಬನ್ಧನೋಕಾಸಂ ಪತ್ತಂ… ದ್ವಿಬನ್ಧನೋಕಾಸಂ ಪತ್ತಂ… ತಿಬನ್ಧನೋಕಾಸಂ ಪತ್ತಂ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಬನ್ಧನೋಕಾಸೇನ ಪತ್ತೇನ ಅಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಬನ್ಧನೋಕಾಸೇನ ಪತ್ತೇನ ಏಕಬನ್ಧನಂ ಪತ್ತಂ…ಪೇ… ದ್ವಿಬನ್ಧನಂ ಪತ್ತಂ… ತಿಬನ್ಧನಂ ಪತ್ತಂ… ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಚತುಬನ್ಧನೋಕಾಸೇನ ಪತ್ತೇನ ಅಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಚತುಬನ್ಧನೋಕಾಸೇನ ಪತ್ತೇನ ಏಕಬನ್ಧನಂ ಪತ್ತಂ…ಪೇ… ದ್ವಿಬನ್ಧನಂ ಪತ್ತಂ… ತಿಬನ್ಧನಂ ಪತ್ತಂ… ಚತುಬನ್ಧನಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಬನ್ಧನೋಕಾಸೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ…ಪೇ… ಏಕಬನ್ಧನೋಕಾಸಂ ಪತ್ತಂ… ದ್ವಿಬನ್ಧನೋಕಾಸಂ ಪತ್ತಂ… ತಿಬನ್ಧನೋಕಾಸಂ ಪತ್ತಂ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಚತುಬನ್ಧನೋಕಾಸೇನ ಪತ್ತೇನ ಅಬನ್ಧನೋಕಾಸಂ ಪತ್ತಂ…ಪೇ… ಏಕಬನ್ಧನೋಕಾಸಂ ಪತ್ತಂ… ದ್ವಿಬನ್ಧನೋಕಾಸಂ ಪತ್ತಂ… ತಿಬನ್ಧನೋಕಾಸಂ ಪತ್ತಂ… ಚತುಬನ್ಧನೋಕಾಸಂ ಪತ್ತಂ ಚೇತಾಪೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

೬೧೭. ಅನಾಪತ್ತಿ ನಟ್ಠಪತ್ತಸ್ಸ, ಭಿನ್ನಪತ್ತಸ್ಸ, ಞಾತಕಾನಂ ಪವಾರಿತಾನಂ, ಅಞ್ಞಸ್ಸತ್ಥಾಯ, ಅತ್ತನೋ ಧನೇನ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಊನಪಞ್ಚಬನ್ಧನಸಿಕ್ಖಾಪದಂ ನಿಟ್ಠಿತಂ ದುತಿಯಂ.