೬. ಏಳಕಲೋಮಸಿಕ್ಖಾಪದಂ

೫೭೧. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಭಿಕ್ಖುನೋ ಕೋಸಲೇಸು ಜನಪದೇ ಸಾವತ್ಥಿಂ ಗಚ್ಛನ್ತಸ್ಸ ಅನ್ತರಾಮಗ್ಗೇ ಏಳಕಲೋಮಾನಿ ಉಪ್ಪಜ್ಜಿಂಸು. ಅಥ ಖೋ ಸೋ ಭಿಕ್ಖು ತಾನಿ ಏಳಕಲೋಮಾನಿ ಉತ್ತರಾಸಙ್ಗೇನ ಭಣ್ಡಿಕಂ ಬನ್ಧಿತ್ವಾ ಅಗಮಾಸಿ. ಮನುಸ್ಸಾ ತಂ ಭಿಕ್ಖುಂ ಪಸ್ಸಿತ್ವಾ ಉಪ್ಪಣ್ಡೇಸುಂ – ‘‘ಕಿತ್ತಕೇನ ತೇ, ಭನ್ತೇ, ಕೀತಾನಿ? ಕಿತ್ತಕೋ ಉದಯೋ ಭವಿಸ್ಸತೀ’’ತಿ? ಸೋ ಭಿಕ್ಖು ತೇಹಿ ಮನುಸ್ಸೇಹಿ ಉಪ್ಪಣ್ಡಿಯಮಾನೋ ಮಙ್ಕು ಅಹೋಸಿ. ಅಥ ಖೋ ಸೋ ಭಿಕ್ಖು ಸಾವತ್ಥಿಂ ಗನ್ತ್ವಾ ತಾನಿ ಏಳಕಲೋಮಾನಿ ಠಿತಕೋವ ಆಸುಮ್ಭಿ. ಭಿಕ್ಖೂ ತಂ ಭಿಕ್ಖುಂ ಏತದವೋಚುಂ – ‘‘ಕಿಸ್ಸ ತ್ವಂ, ಆವುಸೋ, ಇಮಾನಿ ಏಳಕಲೋಮಾನಿ ಠಿತಕೋವ ಆಸುಮ್ಭಸೀ’’ತಿ? ‘‘ತಥಾ ಹಿ ಪನಾಹಂ, ಆವುಸೋ, ಇಮೇಸಂ ಏಳಕಲೋಮಾನಂ ಕಾರಣಾ ಮನುಸ್ಸೇಹಿ ಉಪ್ಪಣ್ಡಿತೋ’’ತಿ. ‘‘ಕೀವ ದೂರತೋ ಪನ ತ್ವಂ, ಆವುಸೋ, ಇಮಾನಿ ಏಳಕಲೋಮಾನಿ ಆಹರೀ’’ತಿ? ‘‘ಅತಿರೇಕತಿಯೋಜನಂ, ಆವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖು ಅತಿರೇಕತಿಯೋಜನಂ ಏಳಕಲೋಮಾನಿ ಆಹರಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ತಂ ಭಿಕ್ಖುಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ ತ್ವಂ, ಭಿಕ್ಖು, ಅತಿರೇಕತಿಯೋಜನಂ ಏಳಕಲೋಮಾನಿ ಆಹರೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಅತಿರೇಕತಿಯೋಜನಂ ಏಳಕಲೋಮಾನಿ ಆಹರಿಸ್ಸಸಿ! ನೇತಂ ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೫೭೨. ‘‘ಭಿಕ್ಖುನೋ ಪನೇವ ಅದ್ಧಾನಮಗ್ಗಪ್ಪಟಿಪನ್ನಸ್ಸ ಏಳಕಲೋಮಾನಿ ಉಪ್ಪಜ್ಜಯ್ಯುಂ. ಆಕಙ್ಖಮಾನೇನ ಭಿಕ್ಖುನಾ ಪಟಿಗ್ಗಹೇತಬ್ಬಾನಿ. ಪಟಿಗ್ಗಹೇತ್ವಾ ತಿಯೋಜನಪರಮಂ ಸಹತ್ಥಾ ಹರಿತಬ್ಬಾನಿ [ಹಾರೇತಬ್ಬಾನಿ (ಸೀ. ಸ್ಯಾ. ಕ.)], ಅಸನ್ತೇ ಹಾರಕೇ. ತತೋ ಚೇ ಉತ್ತರಿ ಹರೇಯ್ಯ, ಅಸನ್ತೇಪಿ ಹಾರಕೇ, ನಿಸ್ಸಗ್ಗಿಯಂ ಪಾಚಿತ್ತಿಯ’’ನ್ತಿ.

೫೭೩. ಭಿಕ್ಖುನೋ ಪನೇವ ಅದ್ಧಾನಮಗ್ಗಪ್ಪಟಿಪನ್ನಸ್ಸಾತಿ ಪನ್ಥಂ ಗಚ್ಛನ್ತಸ್ಸ.

ಏಳಕಲೋಮಾನಿ ಉಪ್ಪಜ್ಜೇಯ್ಯುನ್ತಿ ಉಪ್ಪಜ್ಜೇಯ್ಯುಂ ಸಙ್ಘತೋ ವಾ ಗಣತೋ ವಾ ಞಾತಿತೋ ವಾ ಮಿತ್ತತೋ ವಾ ಪಂಸುಕೂಲಂ ವಾ ಅತ್ತನೋ ವಾ ಧನೇನ.

ಆಕಙ್ಖಮಾನೇನಾತಿ ಇಚ್ಛಮಾನೇನ ಪಟಿಗ್ಗಹೇತಬ್ಬಾನಿ.

ಪಟಿಗ್ಗಹೇತ್ವಾ ತಿಯೋಜನಪರಮಂ ಸಹತ್ಥಾ ಹರಿತಬ್ಬಾನೀತಿ ತಿಯೋಜನಪರಮತಾ ಸಹತ್ಥಾ ಹರಿತಬ್ಬಾನಿ.

ಅಸನ್ತೇ ಹಾರಕೇತಿ ನಾಞ್ಞೋ ಕೋಚಿ ಹಾರಕೋ ಹೋತಿ ಇತ್ಥೀ ವಾ ಪುರಿಸೋ ವಾ ಗಹಟ್ಠೋ ವಾ ಪಬ್ಬಜಿತೋ ವಾ.

ತತೋ ಚೇ ಉತ್ತರಿ ಹರೇಯ್ಯ, ಅಸನ್ತೇಪಿ ಹಾರಕೇತಿ ಪಠಮಂ ಪಾದಂ ತಿಯೋಜನಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ. ದುತಿಯಂ ಪಾದಂ ಅತಿಕ್ಕಾಮೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ [ನಿಸ್ಸಗ್ಗಿಯಾನಿ ಹೋನ್ತಿ (ಸ್ಯಾ.)]. ಅನ್ತೋತಿಯೋಜನೇ ಠಿತೋ ಬಹಿತಿಯೋಜನಂ ಪಾತೇತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ [ನಿಸ್ಸಗ್ಗಿಯಾನಿ ಹೋನ್ತಿ (ಸ್ಯಾ.)]. ಅಞ್ಞಸ್ಸ ಯಾನೇ ವಾ ಭಣ್ಡೇ ವಾ ಅಜಾನನ್ತಸ್ಸ ಪಕ್ಖಿಪಿತ್ವಾ ತಿಯೋಜನಂ ಅತಿಕ್ಕಾಮೇತಿ, ನಿಸ್ಸಗ್ಗಿಯಾನಿ ಹೋನ್ತಿ. ನಿಸ್ಸಜ್ಜಿತಬ್ಬಾನಿ ಸಙ್ಘಸ್ಸ ವಾ ಗಣಸ್ಸ ವಾ ಪುಗ್ಗಲಸ್ಸ ವಾ. ಏವಞ್ಚ ಪನ, ಭಿಕ್ಖವೇ, ನಿಸ್ಸಜ್ಜಿತಬ್ಬಾನಿ…ಪೇ… ಇಮಾನಿ ಮೇ, ಭನ್ತೇ, ಏಳಕಲೋಮಾನಿ ತಿಯೋಜನಂ ಅತಿಕ್ಕಾಮಿತಾನಿ ನಿಸ್ಸಗ್ಗಿಯಾನಿ. ಇಮಾನಾಹಂ ಸಙ್ಘಸ್ಸ ನಿಸ್ಸಜ್ಜಾಮೀತಿ…ಪೇ… ದದೇಯ್ಯಾತಿ…ಪೇ… ದದೇಯ್ಯುನ್ತಿ…ಪೇ… ಆಯಸ್ಮತೋ ದಮ್ಮೀತಿ.

೫೭೪. ಅತಿರೇಕತಿಯೋಜನೇ ಅತಿರೇಕಸಞ್ಞೀ ಅತಿಕ್ಕಾಮೇತಿ [ತಿಯೋಜನಂ ಅತಿಕ್ಕಾಮೇತಿ (ಸ್ಯಾ.)], ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅತಿರೇಕತಿಯೋಜನೇ ವೇಮತಿಕೋ ಅತಿಕ್ಕಾಮೇತಿ [ತಿಯೋಜನಂ ಅತಿಕ್ಕಾಮೇತಿ (ಸ್ಯಾ.)], ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅತಿರೇಕತಿಯೋಜನೇ ಊನಕಸಞ್ಞೀ ಅತಿಕ್ಕಾಮೇತಿ [ತಿಯೋಜನಂ ಅತಿಕ್ಕಾಮೇತಿ (ಸ್ಯಾ.)], ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಊನಕತಿಯೋಜನೇ ಅತಿರೇಕಸಞ್ಞೀ, ಆಪತ್ತಿ ದುಕ್ಕಟಸ್ಸ. ಊನಕತಿಯೋಜನೇ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಊನಕತಿಯೋಜನೇ ಊನಕಸಞ್ಞೀ, ಅನಾಪತ್ತಿ.

೫೭೫. ಅನಾಪತ್ತಿ ತಿಯೋಜನಂ ಹರತಿ, ಊನಕತಿಯೋಜನಂ ಹರತಿ, ತಿಯೋಜನಂ ಹರತಿಪಿ, ಪಚ್ಚಾಹರತಿಪಿ, ತಿಯೋಜನಂ ವಾಸಾಧಿಪ್ಪಾಯೋ ಗನ್ತ್ವಾ ತತೋ ಪರಂ ಹರತಿ, ಅಚ್ಛಿನ್ನಂ ಪಟಿಲಭಿತ್ವಾ ಹರತಿ, ನಿಸ್ಸಟ್ಠಂ ಪಟಿಲಭಿತ್ವಾ ಹರತಿ, ಅಞ್ಞಂ ಹರಾಪೇತಿ ಕತಭಣ್ಡಂ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಏಳಕಲೋಮಸಿಕ್ಖಾಪದಂ ನಿಟ್ಠಿತಂ ಛಟ್ಠಂ.