೧. ಪಠಮಅನಿಯತಸಿಕ್ಖಾಪದಂ

ಇಮೇ ಖೋ ಪನಾಯಸ್ಮನ್ತೋ ದ್ವೇ ಅನಿಯತಾ ಧಮ್ಮಾ

ಉದ್ದೇಸಂ ಆಗಚ್ಛನ್ತಿ.

೪೪೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಸಾವತ್ಥಿಯಂ ಕುಲೂಪಕೋ ಹೋತಿ, ಬಹುಕಾನಿ ಕುಲಾನಿ ಉಪಸಙ್ಕಮತಿ. ತೇನ ಖೋ ಪನ ಸಮಯೇನ ಆಯಸ್ಮತೋ ಉದಾಯಿಸ್ಸ ಉಪಟ್ಠಾಕಕುಲಸ್ಸ ಕುಮಾರಿಕಾ ಅಞ್ಞತರಸ್ಸ ಕುಲಸ್ಸ ಕುಮಾರಕಸ್ಸ ದಿನ್ನಾ ಹೋತಿ. ಅಥ ಖೋ ಆಯಸ್ಮಾ ಉದಾಯೀ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ತಂ ಕುಲಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಮನುಸ್ಸೇ ಪುಚ್ಛಿ – ‘‘ಕಹಂ ಇತ್ಥನ್ನಾಮಾ’’ತಿ? ತೇ ಏವಮಾಹಂಸು – ‘‘ದಿನ್ನಾ, ಭನ್ತೇ, ಅಮುಕಸ್ಸ ಕುಲಸ್ಸ ಕುಮಾರಕಸ್ಸಾ’’ತಿ. ತಮ್ಪಿ ಖೋ ಕುಲಂ ಆಯಸ್ಮತೋ ಉದಾಯಿಸ್ಸ ಉಪಟ್ಠಾಕಂ ಹೋತಿ. ಅಥ ಖೋ ಆಯಸ್ಮಾ ಉದಾಯೀ ಯೇನ ತಂ ಕುಲಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಮನುಸ್ಸೇ ಪುಚ್ಛಿ – ‘‘ಕಹಂ ಇತ್ಥನ್ನಾಮಾ’’ತಿ? ತೇ ಏವಮಾಹಂಸು – ‘‘ಏಸಾಯ್ಯ, ಓವರಕೇ ನಿಸಿನ್ನಾ’’ತಿ. ಅಥ ಖೋ ಆಯಸ್ಮಾ ಉದಾಯೀ ಯೇನ ಸಾ ಕುಮಾರಿಕಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಸ್ಸಾ ಕುಮಾರಿಕಾಯ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಸಿ ಕಾಲಯುತ್ತಂ ಸಮುಲ್ಲಪನ್ತೋ ಕಾಲಯುತ್ತಂ ಧಮ್ಮಂ ಭಣನ್ತೋ.

ತೇನ ಖೋ ಪನ ಸಮಯೇನ ವಿಸಾಖಾ ಮಿಗಾರಮಾತಾ ಬಹುಪುತ್ತಾ ಹೋತಿ ಬಹುನತ್ತಾ ಅರೋಗಪುತ್ತಾ ಅರೋಗನತ್ತಾ ಅಭಿಮಙ್ಗಲಸಮ್ಮತಾ. ಮನುಸ್ಸಾ ಯಞ್ಞೇಸು ಛಣೇಸು ಉಸ್ಸವೇಸು ವಿಸಾಖಂ ಮಿಗಾರಮಾತರಂ ಪಠಮಂ ಭೋಜೇನ್ತಿ. ಅಥ ಖೋ ವಿಸಾಖಾ ಮಿಗಾರಮಾತಾ ನಿಮನ್ತಿತಾ ತಂ ಕುಲಂ ಅಗಮಾಸಿ. ಅದ್ದಸಾ ಖೋ ವಿಸಾಖಾ ಮಿಗಾರಮಾತಾ ಆಯಸ್ಮನ್ತಂ ಉದಾಯಿಂ ತಸ್ಸಾ ಕುಮಾರಿಕಾಯ ಸದ್ಧಿಂ ಏಕಂ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಿನ್ನಂ. ದಿಸ್ವಾನ ಆಯಸ್ಮನ್ತಂ ಉದಾಯಿಂ ಏತದವೋಚ – ‘‘ಇದಂ, ಭನ್ತೇ, ನಚ್ಛನ್ನಂ ನಪ್ಪತಿರೂಪಂ ಯಂ ಅಯ್ಯೋ ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇತಿ. ಕಿಞ್ಚಾಪಿ, ಭನ್ತೇ, ಅಯ್ಯೋ ಅನತ್ಥಿಕೋ ತೇನ ಧಮ್ಮೇನ, ಅಪಿಚ ದುಸ್ಸದ್ಧಾಪಯಾ ಅಪ್ಪಸನ್ನಾ ಮನುಸ್ಸಾ’’ತಿ. ಏವಮ್ಪಿ ಖೋ ಆಯಸ್ಮಾ ಉದಾಯೀ ವಿಸಾಖಾಯ ಮಿಗಾರಮಾತುಯಾ ವುಚ್ಚಮಾನೋ ನಾದಿಯಿ. ಅಥ ಖೋ ವಿಸಾಖಾ ಮಿಗಾರಮಾತಾ ನಿಕ್ಖಮಿತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತ್ವಂ, ಉದಾಯಿ, ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಸ್ಸಸಿ! ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೪೪೪. ‘‘ಯೋ ಪನ ಭಿಕ್ಖು ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಯ್ಯ, ತಮೇನಂ ಸದ್ಧೇಯ್ಯವಚಸಾ ಉಪಾಸಿಕಾ ದಿಸ್ವಾ ತಿಣ್ಣಂ ಧಮ್ಮಾನಂ ಅಞ್ಞತರೇನ ವದೇಯ್ಯ – ಪಾರಾಜಿಕೇನ ವಾ ಸಙ್ಘಾದಿಸೇಸೇನ ವಾ ಪಾಚಿತ್ತಿಯೇನ ವಾ, ನಿಸಜ್ಜಂ ಭಿಕ್ಖು ಪಟಿಜಾನಮಾನೋ ತಿಣ್ಣಂ ಧಮ್ಮಾನಂ ಅಞ್ಞತರೇನ ಕಾರೇತಬ್ಬೋ – ಪಾರಾಜಿಕೇನ ವಾ ಸಙ್ಘಾದಿಸೇಸೇನ ವಾ ಪಾಚಿತ್ತಿಯೇನ ವಾ ಯೇನ ವಾ ಸಾ ಸದ್ಧೇಯ್ಯವಚಸಾ ಉಪಾಸಿಕಾ ವದೇಯ್ಯ, ತೇನ ಸೋ ಭಿಕ್ಖು ಕಾರೇತಬ್ಬೋ. ಅಯಂ ಧಮ್ಮೋ ಅನಿಯತೋ’’ತಿ.

೪೪೫. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಮಾತುಗಾಮೋ ನಾಮ ಮನುಸ್ಸಿತ್ಥೀ, ನ ಯಕ್ಖೀ ನ ಪೇತೀ ನ ತಿರಚ್ಛಾನಗತಾ. ಅನ್ತಮಸೋ ತದಹುಜಾತಾಪಿ ದಾರಿಕಾ, ಪಗೇವ ಮಹತ್ತರೀ.

ಸದ್ಧಿನ್ತಿ ಏಕತೋ.

ಏಕೋ ಏಕಾಯಾತಿ ಭಿಕ್ಖು ಚೇವ ಹೋತಿ ಮಾತುಗಾಮೋ ಚ.

ರಹೋ ನಾಮ ಚಕ್ಖುಸ್ಸ ರಹೋ, ಸೋತಸ್ಸ ರಹೋ. ಚಕ್ಖುಸ್ಸ ರಹೋನಾಮ ನ ಸಕ್ಕಾ ಹೋತಿ ಅಕ್ಖಿಂ ವಾ ನಿಖಣೀಯಮಾನೇ ಭಮುಕಂ ವಾ ಉಕ್ಖಿಪೀಯಮಾನೇ ಸೀಸಂ ವಾ ಉಕ್ಖಿಪೀಯಮಾನೇ ಪಸ್ಸಿತುಂ. ಸೋತಸ್ಸ ರಹೋನಾಮ ನ ಸಕ್ಕಾ ಹೋತಿ ಪಕತಿಕಥಾ ಸೋತುಂ.

ಪಟಿಚ್ಛನ್ನಂ ನಾಮ ಆಸನಂ ಕುಟ್ಟೇನ ವಾ [ಕುಡ್ಡೇನ ವಾ (ಸೀ. ಸ್ಯಾ.)] ಕವಾಟೇನ ವಾ ಕಿಲಞ್ಜೇನ ವಾ ಸಾಣಿಪಾಕಾರೇನ ವಾ ರುಕ್ಖೇನ ವಾ ಥಮ್ಭೇನ ವಾ ಕೋತ್ಥಳಿಯಾ ವಾ ಯೇನ ಕೇನಚಿ ಪಟಿಚ್ಛನ್ನಂ ಹೋತಿ.

ಅಲಂಕಮ್ಮನಿಯೇತಿ ಸಕ್ಕಾ ಹೋತಿ ಮೇಥುನಂ ಧಮ್ಮಂ ಪಟಿಸೇವಿತುಂ.

ನಿಸಜ್ಜಂ ಕಪ್ಪೇಯ್ಯಾತಿ ಮಾತುಗಾಮೇ ನಿಸಿನ್ನೇ ಭಿಕ್ಖು ಉಪನಿಸಿನ್ನೋ ವಾ ಹೋತಿ ಉಪನಿಪನ್ನೋ ವಾ. ಭಿಕ್ಖು ನಿಸಿನ್ನೇ ಮಾತುಗಾಮೋ ಉಪನಿಸಿನ್ನೋ ವಾ ಹೋತಿ ಉಪನಿಪನ್ನೋ ವಾ. ಉಭೋ ವಾ ನಿಸಿನ್ನಾ ಹೋನ್ತಿ ಉಭೋ ವಾ ನಿಪನ್ನಾ.

ಸದ್ಧೇಯ್ಯವಚಸಾ ನಾಮ ಆಗತಫಲಾ ಅಭಿಸಮೇತಾವಿನೀ ವಿಞ್ಞಾತಸಾಸನಾ.

ಉಪಾಸಿಕಾ ನಾಮ ಬುದ್ಧಂ ಸರಣಂ ಗತಾ, ಧಮ್ಮಂ ಸರಣಂ ಗತಾ, ಸಙ್ಘಂ ಸರಣಂ ಗತಾ.

ದಿಸ್ವಾತಿ ಪಸ್ಸಿತ್ವಾ.

ತಿಣ್ಣಂ ಧಮ್ಮಾನಂ ಅಞ್ಞತರೇನ ವದೇಯ್ಯ – ಪಾರಾಜಿಕೇನ ವಾ ಸಙ್ಘಾದಿಸೇಸೇನ ವಾ ಪಾಚಿತ್ತಿಯೇನ ವಾ. ನಿಸಜ್ಜಂ ಭಿಕ್ಖು ಪಟಿಜಾನಮಾನೋ ತಿಣ್ಣಂ ಧಮ್ಮಾನಂ ಅಞ್ಞತರೇನ ಕಾರೇತಬ್ಬೋ – ಪಾರಾಜಿಕೇನ ವಾ ಸಙ್ಘಾದಿಸೇಸೇನ ವಾ ಪಾಚಿತ್ತಿಯೇನ ವಾ. ಯೇನ ವಾ ಸಾ ಸದ್ಧೇಯ್ಯವಚಸಾ ಉಪಾಸಿಕಾ ವದೇಯ್ಯ ತೇನ ಸೋ ಭಿಕ್ಖು ಕಾರೇತಬ್ಬೋ.

೪೪೬. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಸಿನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚ ತಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಸಿನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚೇ ಏವಂ ವದೇಯ್ಯ – ‘‘ಸಚ್ಚಾಹಂ ನಿಸಿನ್ನೋ, ನೋ ಚ ಖೋ ಮೇಥುನಂ ಧಮ್ಮಂ ಪಟಿಸೇವಿ’’ನ್ತಿ, ನಿಸಜ್ಜಾಯ ಕಾರೇತಬ್ಬೋ. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಸಿನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚೇ ಏವಂ ವದೇಯ್ಯ – ‘‘ನಾಹಂ ನಿಸಿನ್ನೋ, ಅಪಿಚ ಖೋ ನಿಪನ್ನೋ’’ತಿ, ನಿಪಜ್ಜಾಯ ಕಾರೇತಬ್ಬೋ. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಸಿನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚೇ ಏವಂ ವದೇಯ್ಯ – ‘‘ನಾಹಂ ನಿಸಿನ್ನೋ ಅಪಿಚ ಖೋ ಠಿತೋ’’ತಿ, ನ ಕಾರೇತಬ್ಬೋ.

೪೪೭. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಪನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚ ತಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಪನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚೇ ಏವಂ ವದೇಯ್ಯ – ‘‘ಸಚ್ಚಾಹಂ ನಿಪನ್ನೋ, ನೋ ಚ ಖೋ ಮೇಥುನಂ ಧಮ್ಮಂ ಪಟಿಸೇವಿ’’ನ್ತಿ, ನಿಪಜ್ಜಾಯ ಕಾರೇತಬ್ಬೋ. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಪನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚೇ ಏವಂ ವದೇಯ್ಯ – ‘‘ನಾಹಂ ನಿಪನ್ನೋ, ಅಪಿಚ ಖೋ ನಿಸಿನ್ನೋ’’ತಿ, ನಿಸಜ್ಜಾಯ ಕಾರೇತಬ್ಬೋ. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಪನ್ನೋ ಮಾತುಗಾಮಸ್ಸ ಮೇಥುನಂ ಧಮ್ಮಂ ಪಟಿಸೇವನ್ತೋ’’ತಿ, ಸೋ ಚೇ ಏವಂ ವದೇಯ್ಯ – ‘‘ನಾಹಂ ನಿಪನ್ನೋ ಅಪಿಚ ಖೋ ಠಿತೋ’’ತಿ, ನ ಕಾರೇತಬ್ಬೋ.

೪೪೮. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಸಿನ್ನೋ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜನ್ತೋ’’ತಿ, ಸೋ ಚ ತಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ…ಪೇ… ಸಚ್ಚಾಹಂ ನಿಸಿನ್ನೋ ನೋ ಚ ಖೋ ಕಾಯಸಂಸಗ್ಗಂ ಸಮಾಪಜ್ಜಿನ್ತಿ, ನಿಸಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಸಿನ್ನೋ ಅಪಿಚ ಖೋ ನಿಪನ್ನೋತಿ, ನಿಪಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಸಿನ್ನೋ ಅಪಿಚ ಖೋ ಠಿತೋತಿ, ನ ಕಾರೇತಬ್ಬೋ.

ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ನಿಪನ್ನೋ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜನ್ತೋ’’ತಿ, ಸೋ ಚ ತಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ…ಪೇ… ಸಚ್ಚಾಹಂ ನಿಪನ್ನೋ, ನೋ ಚ ಖೋ ಕಾಯಸಂಸಗ್ಗಂ ಸಮಾಪಜ್ಜಿನ್ತಿ, ನಿಪಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಪನ್ನೋ, ಅಪಿಚ ಖೋ ನಿಸಿನ್ನೋತಿ, ನಿಸಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಪನ್ನೋ, ಅಪಿಚ ಖೋ ಠಿತೋತಿ, ನ ಕಾರೇತಬ್ಬೋ.

೪೪೯. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಿನ್ನೋ’’ತಿ, ಸೋ ಚ ತಂ ಪಟಿಜಾನಾತಿ, ನಿಸಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಸಿನ್ನೋ ಅಪಿಚ ಖೋ ನಿಪನ್ನೋತಿ, ನಿಪಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಸಿನ್ನೋ, ಅಪಿಚ ಖೋ ಠಿತೋತಿ, ನ ಕಾರೇತಬ್ಬೋ.

೪೫೦. ಸಾ ಚೇ ಏವಂ ವದೇಯ್ಯ – ‘‘ಅಯ್ಯೋ ಮಯಾ ದಿಟ್ಠೋ ಮಾತುಗಾಮೇನ ಸದ್ಧಿಂ ಏಕೋ ಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಪನ್ನೋ’’ತಿ, ಸೋ ಚ ತಂ ಪಟಿಜಾನಾತಿ, ನಿಪಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಪನ್ನೋ, ಅಪಿಚ ಖೋ ನಿಸಿನ್ನೋತಿ, ನಿಸಜ್ಜಾಯ ಕಾರೇತಬ್ಬೋ…ಪೇ… ನಾಹಂ ನಿಪನ್ನೋ, ಅಪಿಚ ಖೋ ಠಿತೋತಿ, ನ ಕಾರೇತಬ್ಬೋ.

ಅನಿಯತೋತಿ ನ ನಿಯತೋ, ಪಾರಾಜಿಕಂ ವಾ ಸಙ್ಘಾದಿಸೇಸೋ ವಾ ಪಾಚಿತ್ತಿಯಂ ವಾ.

೪೫೧. ಗಮನಂ ಪಟಿಜಾನಾತಿ, ನಿಸಜ್ಜಂ ಪಟಿಜಾನಾತಿ, ಆಪತ್ತಿಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ. ಗಮನಂ ಪಟಿಜಾನಾತಿ, ನಿಸಜ್ಜಂ ನ ಪಟಿಜಾನಾತಿ, ಆಪತ್ತಿಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ. ಗಮನಂ ಪಟಿಜಾನಾತಿ, ನಿಸಜ್ಜಂ ಪಟಿಜಾನಾತಿ, ಆಪತ್ತಿಂ ನ ಪಟಿಜಾನಾತಿ, ನಿಸಜ್ಜಾಯ ಕಾರೇತಬ್ಬೋ. ಗಮನಂ ಪಟಿಜಾನಾತಿ, ನಿಸಜ್ಜಂ ನ ಪಟಿಜಾನಾತಿ, ಆಪತ್ತಿಂ ನ ಪಟಿಜಾನಾತಿ, ನ ಕಾರೇತಬ್ಬೋ.

ಗಮನಂ ನ ಪಟಿಜಾನಾತಿ, ನಿಸಜ್ಜಂ ಪಟಿಜಾನಾತಿ, ಆಪತ್ತಿಂ ಪಟಿಜಾನಾತಿ, ಆಪತ್ತಿಯಾ

ಕಾರೇತಬ್ಬೋ. ಗಮನಂ ನ ಪಟಿಜಾನಾತಿ, ನಿಸಜ್ಜಂ ನ ಪಟಿಜಾನಾತಿ, ಆಪತ್ತಿಂ ಪಟಿಜಾನಾತಿ, ಆಪತ್ತಿಯಾ ಕಾರೇತಬ್ಬೋ. ಗಮನಂ ನ ಪಟಿಜಾನಾತಿ, ನಿಸಜ್ಜಂ ಪಟಿಜಾನಾತಿ, ಆಪತ್ತಿಂ ನ ಪಟಿಜಾನಾತಿ, ನಿಸಜ್ಜಾಯ ಕಾರೇತಬ್ಬೋ. ಗಮನಂ ನ ಪಟಿಜಾನಾತಿ, ನಿಸಜ್ಜಂ ನ ಪಟಿಜಾನಾತಿ, ಆಪತ್ತಿಂ ನ ಪಟಿಜಾನಾತಿ, ನ ಕಾರೇತಬ್ಬೋತಿ.

ಪಠಮೋ ಅನಿಯತೋ ನಿಟ್ಠಿತೋ.